LÓÓMI 1 - Kɛ́lɛ Niinaí

Kééla wóo vándai Pɔ́ɔ í pɔ́nɛni kɔwɔ́ato Jísu wa

¹ Nyɛ́i ngí ngáá Pɔ́ɔ, ngí ngáá Jísu Kílisitii yénge mɔɔ, nyá lɔ ngíwaa kɔ́lɔi sí vɔ́nɛ. Ngala ngí tólingɔ, í lókolo mbá ngáá ngi géélai ngáá ngí ngi gééla woó vandaí lé.

² Ngalá ngí maa gééla woo vandaí sí w̃aagúúlo mboní wɔ́lɔ kpɔ́lɔɔ kíya nɔ́ɔ Ngala ndaa háá lé mbélaitii tí pɔ́nɛngɔ Ngala Kɔ́lɔi h̃u.

³ Aá lɔ́ ngáá keela woo kɔwɔ́ato Ngalangí H̃íỹɛndou Loí Jísu Kílisitii wa, lɛ́i í mɔ́ɔ ngáá a mu Lemɔí, lɛ́i í ɣɛ́i ngáá Masangí Deevé lé kpámbii h̃uu w̃ɔ́ɔ nuu búsa gákai w̃áá véle w̃a.

⁴ Kɛ́ Ngalángi ndá gákai w̃áá vélei w̃a, Jísu i gulangɔ́ Ngála ngéle sífaa, ngakɛngɔ́ɔ́ lé kpál̃au ngáá kɛ Jísu lɔ í ngáá Ngalángi H̃íỹɛndou Loí ngakpángɔ ngwála bɔw̃álale, i wuyoɣéni sái h̃u.

⁵ Jísu w̃áa véle w̃a, Ngalá ngí naa gúlaa kɛ́lɛma mbɛ́ ngáá ngí ɣɛ́ ngáá ngi gééla Jísu Kílisitii hááw̃a ngáá kɛinɔɔ́ nungáá ti gúla híítii sú bɛ́kpɛ ti lá ngáá Ngalá, ti gólo mbɛ́.

⁶ Nungái sítii ti tá waa wú ye Ngalá ngí wú lɔ́ngɔ lolíngɔ wú ɣɛ́ Jísu Kílisitii hááw̃a.

⁷ Aáva nyá lɔ́ ngíwaa kɔ́lɔi sí vɔ́nɛ wú kpɛ́lɛɛ ngéle wú táa walái sí h̃u taá náá lolí ngáá Lóómi, wɛ́i wá bɛ́lɛ Ngalá ndóngɔ ngáá wú ye aáva i wú lólinga ngáá wú ɣɛ́ ngáá ngi vóngaa. Bɛlɛ́ a mu Kɛ́ɛ́ɣɛ Ngalá ɛ́ɣɛ a mu Lemɔ́i Jísu Kílisitii tí háá bɔwɔí ɛ́ɣɛ ti lííhei ti ɣɛ́ wú yɛ.

Pɔ́ɔ i sɛ́ɣɛɛ gulaí Ngála ma

⁸ Maifɔ́lɔ mbáá ngáá, ngáá sɛ́ɣɛɛ gula Ngalá ma wú hááw̃a Jísu Kílisitii w̃áá véle w̃a bɔw̃álale, wú w̃áá woo híyangɔɔ lé hááli hááli ỹandá kpɛ́lɛɛ ndɔwɔlɔ́i sí h̃u kɔwɔ́ato wú lángi wa wú sú ngáá Jísu Kílisitii.

^9-10 Ngalá lɛ́i ngíwaa yénge mbɛ ngáá lií kpɛ́lɛɛ ngáá keela woó vándai ngíwaa nde kɔwɔ́ato ngi H̃íỹɛndou Loí Jísu wa, laá lɔ í ngáá maa hééle ngáá kíya fíli ngáá ɣɛ́a fɛ́li, ngáá fɛ́li wá bɛ́lɛ wú hááw̃a. Aáva nyá lɔ́ɔ́ fɛ́li ngáá sí h̃úi laá náa í ɣɛ́ náá ngáá Ngalángi lúw̃ama h̃u háá ngáá í ɣɛ ngáá solowo fáá ngí vá wú yéle.

¹¹ Naa w̃ɔní lɔ́ma ngwála ngáá ngí vá ngí wú héi heí kɛinɔɔ́ ná ngáá vá wú Ngalangí nɛ́ɛ́mai w̃ááhɔlɔ tiyɛ́i taá kɛ ngáá háwu wú h̃úú í bá Ngala fái h̃u.

¹² Ná wáá ngáá, wú lííwuu í lɛ́ ní lángi w̃áa véle w̃a, nyá bɛ́lɛ ndííwuu í lɛ́ wú lángi w̃áá véle w̃a.

¹³ Mu mbála Yala fɛ́li mbélai, ndóngɔɔ lé gíte wú ɣɛ́ kɔlɔ́ ngáá kuu bih̃íw̃aa w̃aah̃u ngí kpátɛa ngáá ngí vá ngí wú héi heí, kɛ́ faa í lónga víli pílima kɔ́wɔ h̃u í fólo sí h̃úi ɣéle tɔ ma. Ndóngɔɔ lé ngí vá ngí nungáá w̃ááhɔlɔ wú lííwaa tiyá bɛ́lɛ ti ɣɛ́ ngáá Jísu Kílisitii vólu yélaa, kíya nɔ́ɔ ngí kɛ́ngɔ nungáá vékaitii ndiiwáá tiyɛ́i tiyá bɛ́lɛ taa ngáá Júsua.

¹⁴ Aá lɔ má ngáá kule ngáá ngí Ngala ngói le nuu kpɛ́lɛɛ má, ná wáá ngáá sítii ti ngáá wííngaa ɛ́ɣɛ sítii taa ngáá wííngaa, ná vólu, sítii tí kɔ́lɔ wɔlɔ́ ɛ́ɣɛ sítii taá kɔ́lɔ wɔlɔ́.

¹⁵ Ná lɔ́ í kɛ́nga naa w̃ɔní í má ngwala ngáá ngí Ngalángi gééla woo vandaí lé wú w̃a wá bɛ́lɛ, wɛ́i wú Lóómi taa walái h̃u.

Ngalangí gééla woo vandaí yákpangi

¹⁶ Ngáá wúfema ngáá Ngalángi gééla woo vandaí bɔw̃álale, aá lɔ í ngáá Ngalángi yákpangi ngumaawóngi hááw̃a nuu fíli fááw̃a áá lá la. Maifɔ́lɔ mbélaitii í ɣɛ́ngɔ ná ti haáw̃a tiyá wáá ngáá Júsuaitii, náa vólu yélaitii mbaa ngáá sítii taa ngáá Júsua.

¹⁷ Ngakɛ́ngɔɔ lé maa gééla woo vandaí h̃u ngáá kíya Ngalá ngáá nuu yéɣe ngáá telembo mɔ́ɔ́. Ná wáá ngáá, nuí fíli nda ngáá ɣɛ nɔ́ɔ su léi, Ngalá ngáá ngeɣé ngáá telembo mɔ́ɔ́. Maa hái waa nɔ́ɔ́ ngáá kíya pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáa ngáá sí, “Sítii Ngalá ngáá ti yeɣé ngáá telembo mbélaa taá ɣɛ́ ndɛɛh̃u gítei h̃u ndangí w̃áá véle w̃a taa ɣɛ́ sú ngáá Ngalá.”

Nuu búsa velé lálandai

¹⁸ Ngakɛ́ngɔɔ lé ngáá kíya Ngalá ndiiyáw̃al̃angɔ áá ɣɛ́ la i mɔ́ɔ faa báma lá faa ỹɔ́u ɣɛ́ mbélai ɛ́ɣɛ nyaama yélai kpɛ́lɛɛ má tiyɛ́i ti lúva velé ỹɔ́i nátii tí kɛ́a ngáá háwu tɔɔỹái kɔwɔ́ato Ngalá mba máá íwaa lɔ́ɔ́wu.

¹⁹ Ngala ngáá faa báma lá ti w̃a sífaa, sí kule í ɣɛ́ngɔ ɣɛi ma ti ɣɛ́ kɔlɔ́ kɔwɔ́ato Ngalá mba, ngakɛ́ngɔ lé kpál̃au ti yaá bɔw̃álale, Ngalá ngí ngakɛ́ngɔ kpál̃au ti yaá.

²⁰ Ná wɔ́lɔ pá Ngala ngí ngéteyangi sí bátɛni, ngi bátɛ wɔlingáitii tɔ taá kɛ ngáá háwu nuú í ɣɛ́ kɔ́lɔ ngáá Ngalá tɔ́ na aáva ngakpangɔ́ɔ́ lé kíya bɛ́lɛ nuu ɛ́i tɔ́ ngáá yááh̃u kɛlaa nuu ɔ́ɔ́ ngí yákpangi bátɛ gíli lɔ́. Faalɔ, ngooh̃ugulá w̃áá aa nuu búsa yáa.

²¹ Kíya bɛ́lɛ ti Ngalá kɔ́lɔ, taá ɣɛ́i taa wúfe ma ngáá Ngalá kɛlaa tɔɔ ɣɛ́ táa sɛ́ɣɛɛ gulá ma, kɛ́ laá ɣéle, tí gísiyaitii ti ɣɛ́a ngáá ngámbalamba háá, ná vólu, ti gútɔ kimaítii ngangí bíndi.

²² I ɣɛi ti gí má ngáá kɛ ti géle ɣelengɔ́ɔ́ lé kɛ́ ti ɣɛ́a ngáá kutɔ́ mbélaa.

²³ Sí áá kɛ tí Ngálangi sí hɛ́li lɛ́i í ná kúnafɔ, tiyá ɣéle tí líínga ti kɔ́ɔ kɔɔ́ ŋani batɛ́ gúlangɔ ngáá nuu búsa ɔɔ w̃ɔ́nia ɔɔ súwaa ɔɔ bokpo koow̃á húwuaitii tiyɛ́i ɣele na taa há, taa ti yeɣé ngáá ngalángaa taa ti hɛ́li.

²⁴ Faalɔ, Ngalángi lokogúlai nungái sítii su tí pɛ́lɛ lɛɛh̃úi h̃uuhíyama ỹɔ́u ngáá ti bɔwɔ́ gísiya w̃aa véle w̃a, aáva sí ɔ́ɔ́ nɛ́ɛ́ ti yɛ laá lɔ́ tɔ́ɔ́ kɛ. Aáva tamál̃a kísiyaitii taa mbó ná aa kɛ ngáá háwu táá ngufe tála hááni kɛ́ ngáá ỹɔw̃ɔ́ ỹɔ́w̃ɔ.

²⁵ Sí í ngáá tɔɔỹái kɔwɔ́ato Ngalá mba tí lókogulai ná h̃u, tí lókovili ndɛɛ hááni su. Aá ɣéle p̃ɛ́ɛ́ háwui ɔ́ɔ́ kɛ tí Ngála fɛ́li lɛí i ngáá ŋani kpɛ́lɛɛ kpátɛ mɔ́i, tí béi ná wá, tí pɛ́lɛ ngi bátɛ wɔlingáitii fɛ́lima, táá golo ti yɛ. Kɛ́ Ngala tɔ ndaaw̃áá áá lɛ́ kúnafɔ. Amíína.

²⁶ Sífaa táá nátii kɛ, Ngalá ngí lokogúlai nɔ́ɔ tí h̃u tí pɛ́lɛ hiyamá ngáá ti bɔwɔ́ bɔ́wɔ wufe tala liivo kɛítii. Nyah̃áitii kéle tɔ taá mɔ́ɔ́ ɣɛ́i lói ngáá siỹɛ fáá ɣɛndáá kíya kule í má í ɣɛ́ na. Aáva tí lókovili náá faaní kɛ́ndaa h̃u ngáá ỹɔw̃ɔ́ ỹɔ́w̃ɔ ngáá kule áá ma ɔ́ɔ́ ɣɛ.

²⁷ Siỹɛngáitii bɛ́lɛ tí pɛ́lɛ nɔ́ɔ ná w̃aa lúvaitii mbóma ngáá ỹɔw̃ɔ́ ỹɔ́w̃ɔ. Nyah̃á háá ɣɛndáá ngáá nyáh̃aitii ná w̃ɔ́ni í gúlani náá tí w̃a aá ɣéle ti hítɛndai ỹɔw̃ɔ́ vólu ná lɔ́ náá í víli ti lii vólu ngwala, tí pɛ́lɛ ngufe tála haa ɣɛmá ngáá ỹɔw̃ɔ́ ỹɔ́w̃ɔ. Náá hááw̃a, Ngala ngáá faa báma lá tí w̃a sí kúle í tí w̃a ti maahɔ́lɔ ti háá ỹɔítii fááw̃a.

²⁸ Ná núngai sítiini ti lélenga ngáá tí kisíyai sí ɣéle tɔ mbo ngáá Ngalá, ná lɔ́ í kɛ́a Ngalá ngí lókogulaa tí h̃u ngáá tí ɣɛ́ ti lámal̃a kisiyái nátiini su. Ná lɔ́ í kɛ́a taa ɣɛ́ táá njɔlɔ haá lááli taalingái kpɛ́lɛɛ kɛ.

²⁹ Tiyá lɔ́ ngáá fáá ỹɔ́u yélaa ti ỹáámangɔ, ná vólu, tiyá lɔ́ ngáá mɔní mɔ́ni mbélaa. Ti hilimangɔ́ɔ́ lé ngwala, ti ngáá tolóma yélaa, ná vólu, tiyá lɔ́ ngáá nuu váá mbélaa, ti ngáá ndaahasá yélaa ɛ́ɣɛ káha yélaa. Aáva nuu bɔ́ndai faaw̃á wáá tiyéni naa bangɔ́ɔ́ lé ngwála, ná vólu, tiyá lɔ́ ngáá njɛpɛ mba yélaa.

³⁰ Tiyá lɔ ngáá ndɛɛ vɛlɛ mbá yélaa, ná vólu, ti hilíngɔ ngáá Ngalá. Ti laah̃úúngɔɔ lé, ti ngáá suuwɔɔlɔ́ yélaa, ná vólu, ti ngáá yonga téve mbélaa. Nápa tiyá lɔ́ nɔ́ɔ taá gísiya ngáá pele niináni ngáá ti ɣɛ́ táá faa ỹɔ́u ɣɛ́. Tɛ́i gólo kpósouŋ ti lé mbélaitii mbɛ.

³¹ Tiyá lɔ́ ngáá tamál̃a mbélaa ɛ́ɣɛ tokolá ma lala yélaa. Ndo ngáá tí h̃u nuu fíli fááw̃a kɛ́laa ngaah̃u w̃aaw̃aanú.

³² Tí súúwɔlɔ ngáá Ngalá ngí ndengɔ́ ngáá nuí fíli kɛ́ kíli áá ɣɛ́ h̃íí, kulé lɔ maa w̃ɔ́i w̃a í saá w̃aahɔ́lɔ. Kɛ́ ná fíli sú, taá ɣɛ́ nɔ́ɔ taá ndí ngu ma ngáá maa haa ỹɔí sítii kɛ́ndaa, aá ɣéle p̃ɛ́ɛ́ taá ɣɛ́ taá nungáá vékaa liiwúúlɛ ngáá nátii bɛ́lɛ ti ɣɛ́ táá faa ỹɔ́itii kɛ.