KƆLƆ́SE 3 - Kɛ́lɛ Niinaí

¹ Ná Ngála ngí Kílisitii wúyoɣeni sái h̃u, wa bɛ́lɛ nɔ́ wú wuyóɣengɔ votó ngí ɣɛi lá sái h̃u. Faalɔ, a wááyaa gisíya ngáá faítii tí ngelegóóh̃u mbéi Kílisitii í héini ngufema ỹándai Ngala kpéla masandáá h̃u.

² A waayaa gisíya ngáá ngelegóóh̃u háitii, kɛ́ wálaa ɣɛ́ wáá gísiya ngáá faítii tí ngélewu.

³ Kulangɔ́ɔ́ lé nɔ́ɔ ngáá kɛ wú háángɔɔ lé, kɛ́ Kílisitii i wú lɛ́ɛ́h̃ui yandɔ́ɔ́lɔngɔ Ngala ngéle.

⁴ Ná wáá ɣɛ́ lói wú ló ndɛɛh̃ú gítei h̃u, kɛ wáá ɣɛ́ wáá yénge Kílisitii yɛ́. Aáva ná Kílisitii áá vá volú múl̃ɔ ngeleí sí wu, wá bɛ́lɛ nɔ́ wáá ɣɛ́ náá mba ngi yákpa maanɛɛnɛɛngí h̃u.

Ndɛɛh̃u níínai í léélaa ndɛɛh̃u vɔ́lɔi wa

⁵ Sítii kínɛi tí wú h̃u ngáá faa ỹɔ́itii ngeleí sí wu, a vólu yafé ti kpɛ́lɛɛ mbá. Ná wáá ngáá, kɔlɔsiyá fáitii ɔɔ njeé sína w̃áa lúva wóndaitii ɔɔ nyah̃á w̃ɔ́nini ngaa siỹɛ mɔ́ni táá víli nuu líí vólu ɔɔ nyaama gúla mɔní ɔɔ mɔ́ni mɔ́ningi. Kɛ ngimɔ́ɔ́ nɔ́ɔ nuí fíli áá nungáá yáá wɔ́li kɛ ngáá liivó ngwála kɛ náá w̃ɔ́i ndá yála mil̃a.

⁶ Sítii kínɛi ngí yɛ́pɛnga kɔwɔ́ato ti wa, ti haáw̃a lɔɔ áá kɛ Ngala ngáá liiyáw̃al̃a sítii ma tɛi gólo mbɛ.

⁷ Hése wɔ́lɔ ngimɔ́ɔ́ wú lúva veléitii ti ɣɛ́ngɔ na, ná wú h̃úúlaahengɔ í ɣɛ́ngɔ la ngáá faa ỹɔ́u ɣɛ́ndaitii.

⁸ Kɛ́ a lokogúla náá faa ỹɔ́i sítii kpɛ́lɛɛ su. Na wáá ngáá, tuu wondái, ndiibándii ɛ́ɣɛ sílimai. Wálaa ɣɛ́ wáá ngɛɛli píli ɔ́ɔ́ ngoo ỹɔ́u fíli álaa gúla wú lá.

⁹ A waa ɣɛ́ wáá ndɛɛ gɔ́ɔ́la ỹɔw̃ɔ́ ỹɔ́w̃ɔ yáá múl̃ɔ bɔw̃álale wú vólu yafénga faa ỹɔ́i sítii kpɛ́lɛɛ mbá ti ɣɛ́ngɔ wú h̃ú.

¹⁰ Wálaa nátii kɛ sífaa, wá lɔ́ náá ngáá nuu níína. Wú bátɛ mɔ́i Ngalá tɔɔ kɛ ngáá háwu wú ɣɛ́ kílii í ɣɛ́ nɔ́ɔ kélei ngáá kíya laá Ngalá kpútei í na. Aá lɔɔ ná ɣɛ́ h̃íí ná kɛinɔɔ́ í kɛ́ ngáá háwu wú ɣɛ́ kɔ́lɔ ngáá ele gíte waa ngáá laá.

¹¹ Náá hááw̃a, ndowah̃u kɔ́lɛ fíli áa mɔɔ sítii ndowah̃u taa ngáá Júsua ɛ́ɣɛ sítii ti ngáá Júsua, sítii ndówah̃u tí lɔ́vengɔ pɛ́lɛ vólu ɛ́ɣɛ sítii taa ti lɔ́vengɔ pɛ́lɛ vólu. Ná vólu mɔ́ɔ́, ndowah̃u kɔ́lɛ aa mɔ́ɔ sítii ndówah̃u ti ngáá ndɔwɔlɔ vékaa h̃uu yélaa ɛ́ɣɛ sítii taa wíí fáá fíli ngákɔlɔ. Ndowah̃u kɔ́lɛ aa sítii ndówah̃u ti ngáá nduwɔ lopóa taa sítii taa ngáá nduwɔ lopóa. Kɛ́ maa hái kpɛ́lɛɛ su, Kílisitii lɔ́ í ngáá faa bíkpingi, aáva aa ɣɛ Ngalá fɛ́li mbélaitii kpɛ́lɛɛ ndííh̃u.

¹² Ngalá ndongɔ́ɔ́ lé ngáá wú ye, aáva í lókolonga wú wá ngáá ngi vóngaa. Faalɔ, a waayaa nungáá yaah̃ú w̃ááw̃aanu hóu, wú ɣɛ́ wáá faa bɔ́wɔ ɣɛ, wálaa ɣɛ́ ngáá suuwɔɔlɔ́ yélaa, ná vólu, wú ɣɛ́ lúúỹaa, wú líílɔlɔngɔ í ɣɛ́ la ỹɔw̃ɔ́ ỹɔ́w̃ɔ háitii nga.

¹³ A ỹɔw̃ɔ́ ỹɔ́w̃ɔ háitii kúmbo h̃u, wááyaa ỹɔw̃ɔ́ ỹɔ́w̃ɔ h̃úúhaalo ná nuu háá baalɛ áá ɣɛ í gi ma kíya nɔ́ɔ Ndemɔí Jísu í mu haa ỹɔítii suuhaalóni.

¹⁴ A sítii kpɛ́lɛɛ kɛ́ ngí yépɛnga ti wa, kɛ́ ngi bíkpingi waa ngáá a ló ngáá ỹɔw̃ɔ́ ỹɔ́w̃ɔ. Ndongí wáá ɣɛ́ su ngáá ỹɔw̃ɔ́ ỹɔ́w̃ɔ, aa kɛ ngáá háwu wú kpɛ́lɛɛ wú ɣɛ́ ngáá nuu yílaa kpé.

¹⁵ A bɛ́lɛ ndiiheí sí Kílisitii áá fé í wú wúto faa fíli su wáá ɣɛ́ wú kɛ, sífaa, Ngalá tɔ í wú lólingɔ ỹanda yílaa ngáá wú báha su wú ɣɛ ndííhei h̃ú. A waayaa sɛ́ɣɛɛ gula ma hɔ́wɔ fíli.

¹⁶ A bɛ́lɛ kalambongí sí kɔwɔ́ato Kílisitii wa í wú líi h̃uu laahé. Wááyaa ỹɔw̃ɔ́ ỹɔ́w̃ɔ galambo, wáá pele ɣɛ ngáá ỹɔw̃ɔ́ ỹɔ́w̃ɔ ngáá kele ɣelé péle kpɛ́lɛɛ. Waayaa Ngala ngúle gɛvɛlɛ kɛvɛlɛ sɔɔlɛ́, wáa sɛ́ɣɛɛ gula Ngalá ma liítii su.

¹⁷ Sí fíli wáá ndé ɛ́ɣɛ sí fíli wáá kɛ, kpɛ́lɛɛ í ɣɛ Ndemɔí Jísu laahéingi h̃u. Waayaa sɛ́ɣɛɛ gula Kɛɛɣɛí Ngála má sí hááw̃a Ndemɔí Jísu í kɛ́nga mu yɛ.

Savaítii tɛingáá Ngala fɛ́li mbélaitii fááw̃a

¹⁸ Wɛ́i wú ngáá nyah̃áitii, a waayaa bɔwɔ́ gúla kɛ́lɛma wú h̃íỹɛngaitii mbɛ bɔw̃álale ná lɔ́ kule í wú w̃a wááyaa kɛ na wú ngáá Ngala fɛ́li mbélaa.

¹⁹ Wɛ́i wú ngáá siỹɛngáitii, a ló ngáá wú ỹáh̃aitii. Waa ɣɛ́ wáá bandí bándi héi ti w̃a.

²⁰ Wɛ́i wú ngáá ndengáitii, kule lɔ wú w̃a wú gólo wú lé mbélaitii mbɛ hɔ́wɔ fíli sífaa ná lɔ́ áá Ndemɔí Ngála ndiilɛ́i.

²¹ Wɛ́i wú ngáá nde mbeláitii, a waa ɣɛ́ wáá wú léngaitii kpaalɛ gula ngwala sífaa ná wáá ná ɣɛ, tí lii áá ỹááni.

²² Wɛ́i wú ngáá nduwɔ lopoáitii, a waayaa goló wú w̃ááliɣiaitii mbɛ faa kpɛ́lɛɛ su. A yakpá wááyaa tí lii lá, aáva álaa ɣɛ́ nɔ́ɔ ngáá ti yaah̃u haa kɛinɔɔ́ ti lokohéi wú wú. A waayaa yenge ti yɛ ngáá ndiiwolé ngáá sífaa, Ndemɔí Jísu wufema í wú yáá.

²³ A waayaa maa yéngengitii mbo ngáá hɛmbɛ́ kpɛ́lɛɛ. A waayaa ti wo kíya nɔ́ɔ kpéi wááyaa yénge Ndemɔí Jísu bútei yɛ́ kɛ́ álaa ɣɛ́ ngáá wá lɔ́ mbo nuu búsaa yɛ́.

²⁴ A giséi ma ngáá kɛ Ndemɔí Jísu lɔɔ va wú w̃ááỹa féma ngáá sí í ngándɔɔlɔngɔ sítii mbɛ ti ngáá ngi vóngaa, sífaa Kílisitii lɔ í ngáá wú W̃ááliɣii kái káingi wáá yénge mbɛ.

²⁵ Nuí fíli aa nyaama haa ɣɛ, aa maa w̃ááỹa sɔlɔ bɔw̃álale, Ngalá ngɛ́i suuwɔlɛ́ mbó ngi gɔ́sɔngi h̃u.