KƆLƆ́SE 2 - Kɛ́lɛ Niinaí

¹ Ndóngɔɔ lé wú ɣɛ́ kɔ́lɔ ngáá kíya ngíwaa yénge ngwala wú yɛ ɛ́ɣɛ Ngalángi vóngaa vekaítii tí taí sí h̃u taá náá lolí ngáá Leyodésiya ɛ́ɣɛ sítii kéle tɔ taá kɔ́lɔ téɣele.

² Nyá lɔ́ɔ́ yénge h̃íí na kɛinɔɔ́ wú kpɛ́lɛɛ ndiiwúúlɛngɔ í ɣɛ́ la ngwala ɛ́ɣɛ wú bɔ́su wú ló ngáa ỹɔw̃ɔ́ ỹɔ́w̃ɔ, ɛ́ɣɛ mɔ́ɔ́ wú nɛ́ɛ́mai sí w̃aahɔ́lɔ áá gúla faa yatɔ́mbandaa walái h̃u wú yɛ́. Ná ná áá ɣɛ́, wáá ɣɛ́ náá kɔlɔ́ sí kái kái í ngáá Ngalángi lɔ́ɔ́wu h̃u hái, ná wáá ngáá, Kílisitii laá búte.

³ Kílisitii lɔ áá kɛ nuu áá ɣɛ́ faa wɔ́lɔ kɔwɔ́ato Ngalángi géle ɣelengí ɛ́ɣɛ ngi háá wɔlɔngɔ́i wa tiyɛ́i ti gúlangɔ ngáá kíya nɔ́ɔ ngandɔ́ɔ́lɔ ngáá ɣɛ́ ná ndɔɔwu h̃ú.

⁴ Faalɔ, nyá lɔɔ nde wú w̃a ngáá wálaa kɛ nuu fíli ɔ́ɔ́ wú yákpolowa ngáá ndɛɛ lááhasa wondáa, bele pá taá láa woí nátii maabátɛ batɛ ngáá pangɔ.

⁵ Kíya bɛ́lɛ a maá ỹándaa yílaa a maa wúyeni, ngáá gísiya ngáá wú ye táingi fíli má. Kóóh̃unɛɛngɔɔ lé wú hááw̃a ngáá wú báhaa kílii su kpáŋ ngáá nuu fíli ɛ́i hómbo ɔ́ɔ́ wú lííka vóma ndangí h̃u wú sú ngáá Kílisitii.

Ndɛɛh̃u gítei Jísu Kílisitii í váánga la

⁶ Ná wú lókoheinga Jísu Kílisitii wú ngáá wú Lémɔi, náá hááw̃a, a ɣɛ́ kíya Jísu Kílisitii í na wú báha kílii su mba.

⁷ A ndi ngu ma wú lo kpáŋ kpáŋ kpahaí wa wú su Jísu Kílisitii wa, wú lókolangɔ í ɣɛ́ la ma wú lɛ́ɛ́h̃ui h̃uuhíya kílii h̃u. Ná vólu, ndangí wú su la nga ngí ɣɛ́ nɔ́ɔ áá ɣɛ́ wɔ́ɔ́lɔ kélei kíya tí wu gálangɔ la. Wú ɣɛ́ múl̃ɔ ngáá sɛ́ɣɛɛ gulama yélaa ngwala.

⁸ A waá kɛ nuu fíli ɔ́ɔ́ wú yákpolowa ngáá ngoo bɔ́ɔ́w̃aa lendáá wú w̃a áá gúla nuu búsa ndá géle ɣele su, bɔw̃álale nátii kpɛ́lɛɛ tɔ nɔ́ɔ́ ngáá nuu búsa gálambo ɛ́ɣɛ ngakpa ŋáni ỹɔu ỹɔungáitii tí ngélewu. Kele ɣéle táálii nátii tɛ́i gúla Kílisitii yáa.

⁹ Kíya bɛ́lɛ nuu búsa lúwu í Kílisitii w̃a, kɛ́ aá lɔ́ ngáá Ngalá pele kpɛ́lɛɛ su.

¹⁰ Aáva mu ndɛ́ɛ́h̃u gítei w̃aahɔ́lɔngɔ kpahaí wa mu su Kílisitii wa. Aá va tɔ ngakpa ngí ngeyá ngakpa ŋániaitii kpɛ́lɛɛ mááh̃u ti ngákpa su.

¹¹ Wú lɔ́vengɔɔ lé pɛ́lɛ vólu kpahaí wa wú su Kílisitii wa. Kɛ́ tɔve pɛ́lɛ vólui sí aa ngáá sí nungáá táá mbo ngáá loko, kɛ́ aá lɔ́ ngáá tɔve pɛlɛ́ vólui sí Kílisitii gite í kɛ́ngɔ ngáá háwu í wóngɔ ngáá wú yé. Ná wáá ngáá, i wú wúmaawonga faa ỹɔ́i yaa wú líí áá wú lóma.

¹² Ná tí ngúyai wóni ngáá wú ye, i ɣɛi nɔ́ɔ kíya taa ɣɛ́ wú bɔ́luni kíya nɔ́ɔ jɔ́ tí Kílisitii bɔ́luni aáva ná tí wú gúlani nguya wo njɛ́i wú, í ɣɛi nɔ́ɔ́ jɔ́ kíya Ngala ngáá ɣɛ́ wú wúyoɣenga saí h̃u kíya í Kílisitii wúyoɣeni sái h̃u. Ná vá tɔ h̃íí ná sífaa wú lángɔɔ lé ngáá ngakpángi í Ngala ngéya í Kílisitii wúyoɣeni lá sái h̃u.

¹³ Wú ɣɛ́ngɔ ɣɛi kíya nɔ́ɔ nuu háángɔ í ná Ngala kákala, bɔw̃álale wú ɣɛ́ngɔ ngáá faa ỹɔ́u yélaa aáva wú wúmaawongɔ aa ɣɛi la nɛ́nɛ faa ỹɔ́i yaa. Kɛ́ Ngalá ngí kɛ́ni ngáá háwu Kílisitii í ndɛ́ɛ́h̃u gíte gúla kɛlɛ́ma wú yɛ́ í mú háá ỹɔítii kpɛ́lɛɛ súúhaalo.

¹⁴ Sí kpɛ́lɛɛ í ɣɛ́ngɔ mu wa ngáá mu waa háá savaí wú kɔwɔ́ato kolo lálai wa mu ɣɛ́i su la, Ngala ngi ngí háá bɛí nga. I ngi háá hiɣeí mú wa í kpɛ́lɛɛ ngéɣe í ti bakpá kulɔ́sii w̃a. Ná wáá ngáá, saí Kílisitii í mbóni.

¹⁵ Ngalá ngí ngakpángi gúlani ngakpa ŋáni ỹɔu ỹɔungáitii kpɛ́lɛɛ ngeyá sái w̃áá véle w̃a Kílisitii í mbóni kulɔ́sii w̃a. I kɛni nungáitii kpɛ́lɛɛ tí ngélewu tí ɣɛ́ faa wɔ́lɔ mba ná í ɣɛ́i áá góóh̃unɛɛ ti w̃a ngáá ngi ndái í ndongá ma.

¹⁶ Faalɔ, waá kɛ́ nuu fíli ɔ́ɔ káɣa lá wú w̃a kɔwɔ́ato mɛɛni háá wa ɔɔ kpɔle bɔlé ŋáni haa wa, ɔɔ kɔwɔ́ato kuu haa w̃a, ɔɔ ngalú níína w̃aa gúú wúyandaa wa, ɔɔ Ndɛɛlɛmbó Ngála Fɛli Fóloi wa.

¹⁷ Nátii tiyá lɔ́ nɔ́ɔ ngáá faa w̃áábale kɔwɔ́ato sí wa i ɣɛi naa wutúwɔ, kɛ́ Kílisitii lɔ í ngáá kiteí.

¹⁸ A waá kɛ́ nuu fíli ɔ́ɔ́ lɛ́ɣɛ wú h̃u ngáá bɔwɔ́ yéɣendaa wú yáa ngáá kɛ aá lɔ́ ngáá ngakpa mɔ́ɔ́ wala áá wú su lɔ. Álaa kpa kɛŋɛ́ ngáá wú lɛ́ɣɛ bɔwɔ́ h̃u ɔ́ɔ́ mɔ́ɔ́ kɛ wɔ́ɔ́ malékani fɛ́li. Nátii kpɛ́lɛɛ tɔ nɔ́ɔ ngáá suuwɔɔlɔ́ háá gbááma. Nuu láálii na áá bɔwɔ́ gílisu léve faa ɣɛ́ fááw̃a, kɛ́ ngi gísiyai lɔ nɔ́ɔ ngáá nuu búsa gisíya ɣɛ kíli.

¹⁹ Aáva tókolangɔ láá le múl̃ɔ Kílisitii w̃a, lɛ́i í ngáá Ngalá fɛ́li mbélai ti wungí. Ngalá fɛ́li mbélaitii pa ti bɔngɔ́ɔ́ lé su, ti báhangɔ Kílisitii wa lɛ́i áá jíji vu ti h̃u kíya nɔ́ɔ nuu lúwui waa wɔ́lingaitii taa ɣɛ na ti báha kpahangɔ áá ɣɛ la wa táá lóóla kíya Ngalá ngáá ɣɛ loi ti lóóla.

A muỹa lɔ su yíla maá Kílisitii saa h̃u ɛ́ɣɛ ndɛɛh̃u h̃u

²⁰ Ná Kílisitii í hááni, wa bɛ́lɛ nɔ wu háángɔ votó ngí ɣɛ́i lá aáva wú wúmaawongɔɔ lé náa ngakpa ŋáni ỹɔu ỹɔungáitii ngeyá tí ngélewu. Faalɔ, kule áá wú w̃a wú lúva veléi ɔ́ɔ́ ɣɛ́ ngáá ngeleí sí wúu yélaitii kái kái ti ndái ɣɛ kíli. Kule áá mɔ́ɔ́ wú w̃a wɔ́ɔ́ gólo sava lááli sítii mbu.

²¹ Maa hávaitii mbaa ngáá, maaỹɛ́i taa pɛ́lɛ fáitii mba taa ɣɛ ta, “Nuu ɛ́i sí yéɣe,” “Nuu ɛ́i sí béle,” “Nuu ɛ́i lúba sí wa.”

²² Nátii kpɛ́lɛɛ tɔ nɔ́ɔ ngáá mɛɛní ɛ́ɣɛ kpɔle wɔlíngaa nga ngɛ́i mɔ́ɔ ɣɛ ti wa nuu áá lí ndɔ́bɔ wa ngáá ti ye. Nátii kpɛ́lɛɛ tɔ́ nɔ́ɔ ngáá nuu búsa ndá háva langɔ́ ɛ́ɣɛ maa gálambongaitii taa tí wo.

²³ Nungái sítii taá sáva laalíi nátii kpátɛ, aa ɣɛ́ nungáá gi ma ngáá kɛ ti géle ɣelengɔɔ lé, kɛ́ taá géle ɣeléni kulo bɛ́lɛ. Ná nuu áá ɣɛ́a gólo sava laalíi nátii mbu, aa kula ngáá kɛ í lóngɔɔ lé ngáá Ngalá ngwála, í mɔ́ɔ kula ngáá aa ngáá suuwɔɔlɔ́ w̃ɔ́ɔ, í mɔ́ɔ kula ngáá kɛ maa w̃ɔ́i lehé lɔ́ bɔ́wɔ w̃a. Kɛ́ savaí nátii tɛ́i hómbo tɔɔ́ núú h̃úúhou w̃a faa ỹɔ́u ɣɛ́ fááw̃a.