KƆ́L̃E HESENDAA GƆLƆÍ 6 - Kɛ́lɛ Niinaí

Kíya kule í Ngala fɛ́li mbélaitii ma tí tí haa báálɛitii kɔ́sɔ ỹɔw̃ɔ́ ỹɔ́w̃ɔ lówah̃u

¹ Ná wɔ́lii faa baalɛ́ áá ɣɛ́ nuu lówah̃u taá ngí mbála Yalá fɛ́li mɔɔ́, ndeénii le wɛ́i wú ngáá Ngalángi vóngai wɔ́i ndé lowah̃u? Ndéé le kɛ wáá líi lá sítii taá ngáá Ngalángi vóngaa ti gɔ́sɔ mbelái ngelé?

² Wáá kɔ́lɔ ngáá kɛ Ngalángi vóngaitii tiyá lɔ́ɔ vá ngeleí sí wúú yélai kɔsɔ́ma? Ná ngimɔ́ɔ́ í na, kɛ wáá hómbo wú faa gúlo gúloai sítii suu haa lé.

³ Waá kɔlɔ́ ngáá kɛ a muỹá lɔ́ɔ vá malékaitii gɔsɔmá? Ná ɣéle ná máá vá kɛma kɛlaa maa faítii tí ngetéyangi sí h̃u ti h̃úú haa léndaa!

⁴ Ndeé le ná faa láálii nátii taa hítɛ, wáá ngéɣe wú líí sítii ngelé toow̃aá ɛ́i ɣɛ́ tí wa Ngala fɛ́li fái h̃u?

⁵ Wú yángufe tɔ ngáá sí. Tɔɔỹaá hááw̃a, nuu lɔ wú lííwaa kele geléngɔ aáva aa hómbo í Ngalángi vóngaitii ti lówah̃u haa lé.

⁶ Kɛ́ laá ɣéle, Ngala fɛ́li mɔ́i aa li ngáá ngi mbála Yalá fɛ́li mɔ́i kóótii h̃u ngáá sítii taa ngáá Ngala fɛ́li mbélaa tí kɔ́sɔ.

⁷ Sí gíte wáá lí ngáá wú lówah̃u háitii kóótii h̃u ná í ngakɛ́a kpál̃au ngáá kɛ wú baah̃áánga bɔwɔ́ wu fɔ́. Maa áá ɣɛ́ nɛɛni yí lúw̃a ma ti báɣa í w̃á ti í gáha í lɔ́ve sí wa wáá lí kóoti h̃u.

⁸ Laá ɣéle, wá bútei wáá báɣa ỹɔw̃ɔ́ ỹɔ́w̃ɔ w̃a wáa ỹɔw̃ɔ́ ỹɔ́w̃ɔ gahá í báha wú mbála Yála fɛ́li mbélaitii kele tɔ mba.

⁹ Wú súúwɔlɔ pánda vánda ngáá kɛ nyaama yélaitii taá vaamá ɣɛ́ma Ngalá mbu ngi w̃ásandai h̃u. Wálaa bɔwɔ́ vɛ́lɛ, sítii ti ngáá kɔlɔsiyá mbélaa, ɔɔ sítii taá kɔɔ kɔɔ́ ŋániaitii fɛ́li taa ti yeɣé ngáá ngalángaa, ɔɔ nuí taa ɣɛ́ séi h̃u í mɔ́ɔ́ kɔlɔsiyá mbó, ɔɔ kɔlɔsiyá mbó mbélaa ngáá ti mbála ỹah̃ái ɔɔ tí mbála h̃iỹɛ́,

¹⁰ ɔɔ nungáá wɔ́li ngeɣe mbélaa ngáá ngakpá, ɔɔ mɔní mɔ́ni mbélaa, ɔɔ ndɔɔ bɔ́le mbélaa tí ndɔɔ hóu h̃ú nɔ́ɔ fɔ́, ɔɔ sítii ti ngáá ti mbálangaa w̃ááboo mbélaa, ɔɔ ŋúỹa yélaa, ti tá fíli tɛ́i ɣɛ́ Ngalá mbú ngi w̃ásandai h̃u.

¹¹ Aáva ngimɔ́ɔ́ wú lɛ́ingaa wú ɣɛ́ngɔ na. Kɛ́ wú wúyangɔɔ lé náa faa ỹɔ́i yaa. Ngala ngí kɛ́a ngáá háwu tɔmbema w̃áá fíli aa wú wá. Wú ɣɛ́a ngáá telembo mbélaa Ngala ngááh̃u Ndemɔí Jísu Kílisitii laahéingi h̃u ɛ́ɣɛ Hɛ́ɛ́ma Ỹínangi w̃áá véle w̃a.

Ndaahíngi kɔwɔ́ato kɔlɔsiyángi wa

¹² Tɛingaa nuu tá aa ɣɛ ta, “Sí fíli ngáá ɣɛ́ loí ngí kɛ, naa gúlangɔɔ lé kɛ́lɛma mbɛ́ ngáá ngí kɛ.” Tɔɔỹáá le, kɛ́ sí kpɛ́lɛɛ táa le nuí áá ɣɛ loí í kɛ pangɔ́ áá ɣɛ́ la faaw̃a. Nyá ɣéle tɔ ngáá ná le, ngí ɣɛ́ ta, “Sí fíli ngáá ɣɛ́ loí ngí kɛ, naa gúlangɔɔ lé kɛ́lɛma mbɛ́ ngáá ngí kɛ.” Kɛ́ aáva ngɛ́i kɛ ngɔ́ɔ́ ɣɛ́ ngáá nduwɔ lopó ɣɛ́ kíli faa fíli mbú.

¹³ Nuí tá áá ɣɛ́ tá, “Mɛɛníi lɔ́ na nuu gói hááw̃a, aáva nuu gói vá tɔ na mɛɛníi hááw̃a.” Tɔɔỹáa le, kɛ́ Ngalá tɔɔ vá ti héi h̃u félengɔ ỹáánima. Nuu lúwui aa na kɔlɔsiyá fááw̃a. Kɛ́ laá lɔ na ngáá kɛinɔɔ́ Ndemɔí Jísu í ngúfemaa w̃ááhɔlɔ maa véle w̃a. Ndemɔí Jísu va tɔ́ áá maah̃u béle.

¹⁴ Ngalá ngí Ndemɔí Jísu wuyoɣéni sái h̃u aáva aá lɔɔ vá muỹá bɛ́lɛ a mu yóóɣema sái h̃u ngáá ngi yákpangi ná.

¹⁵ Wú súúwɔlɔ kpál̃au ngáá kɛ a muỹɛ́i mu ngáá Ngala fɛ́li mbélaitii a mu báhangɔɔ lé su a maa Kílisitiini. Ná ná áá ɣɛ́, kɛ aa pele w̃a ngáá mɔ́ɔ́ báha nyah̃ái sí wa áá bɔwɔ́ ɣɛ ngáá yaawo kɔlɔsiyá su naholó hááw̃a. Ngalá ngí gílihoo ná w̃a!

¹⁶ Wáá kɔlɔ́ ngáá nuí áá bɔwɔ́ báha nyah̃ái sí wa áá bɔwɔ́ ɣɛ́ ngáá yaawo kɔlɔsiyá su naholó hááw̃a taá ɣɛ ngáá nuu yíla ti luwúi w̃aa véle? Wú ná h̃úúwɔlɔ sífaa, sí pɔnɛngɔ́ Ngala Kɔ́lɔi h̃u aá wáá ngáá sí, “Ti félengɔ taá ɣɛ́ ngáá nuu yílaa kpé.”

¹⁷ Kɛ́ nuí áá bɔwɔ́ báha Ndemɔí Jísu wa, taá laa tí h̃úúyafuw̃angi aa ɣɛ yíla.

¹⁸ A w̃aavéla kɔlɔsiyángi wa. Faa ỹɔ́u vékaitii kpɛ́lɛɛ nuí áá kɛ tɛí faa ɣɛ́ ngáá nduwúi. Kɛ́ nuí áá kɔ́lɔsiya mbó, kɛ aá lɔ́ɔ faa vɛ́lɛ bɔwɔ́ lúwui wa.

¹⁹ Wáá kɔ́lɔ ngáá kɛ wú lúwui lɔ ngáá hɛ́ɛ́ma vɛ́lɛ Hɛ́ɛ́ma Ỹínangi hááw̃a lɛ́i Ngala ngí kɛ́nga ngáá háwu í wú vólu? Wáá bɔwɔ́ haaw̃a, kɛ́ wá lɔ́ Ngalá fááw̃a.

²⁰ I wú h̃ɔ́w̃ɔ hengɔ́ ngáá ŋani. Faalɔ, bɛlɛ́ í ngúfema w̃ááhɔlɔ wú lúwui w̃aa véle w̃a.