KƆ́L̃E HESENDAA GƆLƆÍ 4 - Kɛ́lɛ Niinaí

Ngalangí géélaitii ti ngáá Kílisitii yénge mbalái

¹ Faalɔ, a gi síya ngáá ni ye ngáá Kílisitii yénge mbeláa niỹɛ́i Ngalá ngí ni ɣɛa ngáá ngi lɔ́ɔ́wu h̃u lɔ́ɔ́ỹaa haítii maah̃ú belé mbélaa.

² Laáva nuí áá ɣɛ́ ngáá ŋani w̃ááh̃u béle mɔ́ɔ, kule lɔ́ ma í ɣɛ́ ngáá tokola ma w̃ɔ́ɔ.

³ Ná áá gɛ́ɛ́lɛ mbá, ngáá béɣei p̃ɛ́ɛ́ kɔ́sɔ fááw̃a wú yɛ, ɔɔ kɔ́sɔ fááw̃a nuu fíli mbɛ́ nɔ́ɔ nuu búsa gísiya haa yéɣe péle w̃a. Séimil̃a p̃ɛ́ɛ́, nyá bútei ngɛ́i bɔ́wɔ gɔsɔ́.

⁴ Kí maa i kpál̃au síya gilíí h̃u, kɛ́ ná aa kulaí ngáá kɛ faa fíli aa mbá. Ndemɔí Jísu lɔ áá kɔ́sɔ.

⁵ Náá hááw̃a, waá nuu fíli mbááleve p̃ɛ́ɛ́ kɔsɔ́ kuí ɔ́ɔ́ ɣɛ́a foló ma. Ngakɛɛlɛ́ kɔ́sɔngi lɔɔ vá ná h̃u Ndemɔí Jísu áá va vááma ma. A naa w̃áálɛlɛ Ndemɔí Jísu í vá. Laá lɔ sí ndɔɔwungɔ́i áá kula kalá kála ma aáva aa nuu búsai lii h̃ú haítii maa ɣɛ kpál̃au. Táingi ná h̃úu vá, nuí yíla ngílangi kpɛ́lɛɛ aa tɛ ngóó w̃ááhɔlɔ ngáá kule í ma í mááhɔlɔ Ngala ngeyá.

⁶ Mu mbála Yalá fɛ́li mbélai, ngí yɛ́pɛnga fái sítii mba ngí súw̃a Apólo w̃a ɛ́ɣɛ nyá búte wú gúlasuunuma haaw̃a, kɛinɔɔ́ ná í ni ɣɛ ngáá tɔmaseí wú fái sí vólu hái yátɔ náa mba ndengɔ́i ngáá sí, “A waa víli sí vólu pɔnɛngɔ́i.” Wú tá fíli álaa nuu ta yeɣé wu h̃u ngáá ngangímba w̃ɔ́ɔ́ ɔ́ɔ́ lɔ́ve pékaitii mba.

⁷ Kɛ ele lɔ í wú lɔ́vengɔ wú mbála vekáitii mba? Bɛɛ́ gíte lɔ í wú yáá wáá mááhɔlɔngɔ Ngalá ngeyá? Kɛ ndeénii le hɔ́ɔ wáá maayónga tevé kíya kpéi sí í wú yáa ɛ́i ɣɛ́ ngáá fembɛ wɔ́li?

⁸ Aá lɔ wú gí ma ngáá kɛ sí kínɛi wú béɣengɔ ma aá lɔ náa wú yáá? Aá lɔ́ wú gí ma ngáá wú bátɛngɔɔ le náa? Wú ɣɛ́a ngáá ndɔwɔlɔ́ w̃ásangaa niỹá vá naá ngáá ta? Nyá ɣéle ngáá ɣɛ́ nɔ́ɔ ngáá wɔ́ɔ ɣɛ́ ɣɛi náa ngáá ndɔwɔlɔ́ w̃ásangaa. Ná ná ɔ́ɔ́ ɣɛ́, nɔ́ɔ ɣɛ́ náa báhai wú wá ní ɣɛ́ ngáá ndɔwɔlɔ́ w̃ásangaa.

⁹ Aá lɔ kí ma ngáá niỹɛ́i ni ngáá Ngalángi géélaitii Ngalá ngí ni wúnga njéinga nuu kpɛ́lɛɛ mbú. Ni gulangɔ́ɔ́ lé ngáá nungáá taá tí waaléve ngáá taá vélei kɛ taá saa w̃ááhɔlɔ kpɔ ndííwaa. Ni ɣɛ́a ngáá ngangɛlɛ́ ŋáni ngeleí sí wu kpɛ́lɛɛ malékaa yaá ɛ́ɣɛ nuu búsaa yáa.

¹⁰ Niỹá lɔ ngáá kutɔ́ mbélaa Kílisitii hááw̃a. Kɛ́ wá lɔ ngáá kele ɣelé mbélaa kpahaí wa wú su Kílisitii wa. Niỹá laá ni h̃úúbangɔ láá le, kɛ́ wálaa wú h̃úúbangɔɔ lé, ná vólu, niỹa láá silí lɔ́ ni w̃a, kɛ́ wálaa ngufema lɔ́ wú yɛ.

¹¹ Kíya bɛ́lɛ suu í na, ndɔlɛíni ngaa njɛ w̃ɔní lɔ́ ni w̃a ɛ́ɣɛ niỹá lɔ́ nɔ́ɔ kula haɣá h̃u, náa ndeve w̃ááhɔlɔ, ná vólu, ní gɔwɔ́ h̃u nɔ́ɔ náá lɛ́ náá yéi ndaaw̃áá áá ni yɛ,

¹² níwaa w̃ɔ́nɛ ngwala ngáá ni háá álaa ɣɛ́ nuu wá. Ná nungáá taá ni yɛ́ɛ́li, ní hɛ́ɛ́ tí yɛ. Ná taá faa bá nda ni w̃a, ní liilɔ́lɔ nga.

¹³ Ná taa yɛ́pɛ ni w̃a ỹɔú, ní ti woo yápote ngáá pangɔ́. Ni gulangɔ́ɔ́ lé ngáá kaawoló ngeleí sí wu, ná vólu, niỹa lɔ ngáá kaa kɛ́ kíli kíya su í ná bɛ́lɛ ngeleí sí wu.

¹⁴ Ngáá sí vɔ́nɛma ngáá ngí wú yángufe, kɛ́ ngí wú lááhi sífaa wú ngáá kpɔ́wɔ bɔ́wɔ léngaa ɣɛ kíli wú ndíívongɔ.

¹⁵ Wú w̃ááliɣiaitii tɔɔ bɔ́ɔ́ ɣɛ ngáá nuu tásu púúngɔ Kílisitii w̃aa véle w̃á, kɛ́ kɛɛɣɛí i yíla wú yáá. Ngí ɣɛ́a ngáá kɛɛɣɛ́ wú hááw̃a kpahái wa wú su Jísu Kílisitii wa bɔw̃álale wú Ngalángi gééla woo vandaí w̃ááhɔlɔngɔ ngéya.

¹⁶ Wú w̃áánɛɛnɛngɔ le kái, ngáá wú túva veléi ya ngéɣe, ngí ɣɛ́ ngáá tɔmaseí wú hááw̃a.

¹⁷ Háwui sí hááw̃a, nyá ngaá Tímoti lɔ́ve wú yéle lɛ́i kulangɔ́ ngáá ndíívo síỹɛndou lou tɔwɔ́baɣangɔ Ngala fái h̃u. Laá lɔ áá va í wú gísitɛ síya gilíí wa kpahaí wa ngí su Jísu Kílisitii wa. Aá va tɔ ngáá mbó ngáá kalambo Ngala fɛ́li mbélaitii ma ỹanda kpɛ́lɛɛ.

¹⁸ Wú lɛ́ingaa wú bɔwɔ́ h̃uu ɣɛa wɔ́ɔ́lɔ, wáa gisíya ngaá ngáá mɔ́ɔ́ vaamá wú yéle.

¹⁹ Kɛ́ nyá lɔɔ vá vaamá wú yéle h̃umbuwa ná wɔ́li áá ɣɛ́ ngáá Ndemɔí Ngalá túw̃ama háa. Aáva ná ngáá ɣɛ́ vááni, sítii ti h̃úúwɔɔlɔngɔi, ngáá súúbɛ náá ngí ɣɛ́ kɔlɔ́ ngáá njɛpɛí taá pu. Aáva ɛi gɛɛlɛ nɔ́ɔ léi ná wa, kɛ́ ngakpángi ɣéle tɔ í ti yaá ngáá ɣɛ náa kɔlɔ́.

²⁰ Sí núi áá kɛ aá lɔ́ áá Ngalángi w̃ásandai yákɛ, kɛ́ aa nɔ́ɔ ngáá sí áá ɣɛ́ áá ndé.

²¹ Bɛɛ́ lɔ áá wú líívo? Ngí vá wú yéle ngáá kpámgba? Baa ngí vá wú yéle ndosú taá tuva velé w̃áánɛɛnɛ su?