KƆ́L̃E HESENDAA GƆLƆÍ 16 - Kɛ́lɛ Niinaí

Ngala fɛ́li mbélai ti lóko bɔmbaí

¹ Bɛlɛ́ naá ngí yɛ́pɛ kɔwɔ́ato naholói wa kule í wú w̃á wú maakpɔ́ wú bɔ́ la Ngalángi vóngaitii mba ti Judíya lataí h̃u. Sí ngí ndengɔ́ Ngala fɛ́li mbélaitii ma tí ỹandáitii bɛ́kpɛ tí tataí sí h̃u taá náá lolí ngáá Galésiya, a waayaa ná ɣɛ́.

² Tɛnɛ́ma holo fíli má sí fíli nuu áá ɣɛ́ sɔ́lɔni, í tóko bɔ́mba kulaa mba í ngándɔɔlɔ. Aáva sí l̃ɔ́ngi áá ɣɛ́ mááhɔlɔni laa lɔ́ áá lókola ma í sí gula mba áá ɣɛ́ ngáá toko bɔ́mbai. Ná ná áá ɣɛ, ná ngáá vá, naholó gúla fáá ɛi mɔ́ɔ́ ɣɛ́ su.

³ Ná ngáá ɣɛ́ vááni, ngáá siỹɛngái sítii tɔve naa wú lókolonga tí wa ngáá ti lí ngáá wú lóko bɔmbaítii Jɛlúsɛl̃ɛ taa walái h̃u Yála fɛli mbélai ngelé. Ngáá kɔlɔ hé ti yaá áá ti lówawo ngáá ele wáá ngáá ti ye.

⁴ Ná wɔ́lii maa áá ɣɛ́ nɛ́ɛ́ni ngáá ngí báha ti wa naá tiyéi ni lí, naá tiyéni naá li.

Pɔ́ɔ hiyangí w̃aa haa h̃úúbatɛngi

⁵ Nyá lɔɔ vá vaamá wú yéle, ná ngáá ɣɛ́ ɣɛ́i lɔvení Mɛsedóniya lataí h̃u, bɔw̃álale, nyá lɔɔ vá liimá na.

⁶ Tɛingaa h̃u ngáá ló wu lóów̃a kuu félengɔ hááw̃a tɛingaa h̃u p̃ɛ́ɛ́ ngáá kɔɔlɛ́ hɔ́wɔi kpɛ́lɛɛ súúhiya na, aáva wáá bɔ́ náá mbá ngí ndí ngú ma ngáá ní híyangi mbéi fíli kule áá ɣɛ́ má ngí lí na.

⁷ Ngáá lói ngɔ́ɔ́ ɣɛ́ nɔ́ɔ siya sú a mɔɔ lɔ́ nɔ́ɔ ngɔ́ɔ́ lɔ́ve. Aá lɔ kí ma ngáá ngí kuu ɣɛ́ féle wú lóów̃a, ná Ndemɔí Jísu áá lúw̃a ma.

⁸ Kɛ́ nyá lɔɔ ló Ɛ́fɛsɔ taa h̃u í ló su kpóloo Júsuai a mu hóloi sí maa tolí ngáá Pɛnɛkɔ́sii í fóloma,

⁹ bɔw̃álale Ngalá ngí pele laawóa ngáá ngí ngenge pánda wo ngáá suuwɔ́ɔ́lɔngɔ mbéi, kɛ kíya bɛ́lɛ nungáá bih̃íngɔ tí na táá lápi ngáá tí lókola maa hái lúwɔ.

¹⁰ Ná wɔ́lii Tímoti áá ɣɛ́ vááni wú yéle péle, a ngakɛ́ la gíte ngáá kɛ wu lókoheingɔɔ lé paalái wu wú yéle, sífaa, aá lɔ́ɔ yénge Ndemɔí Jísu yɛ kíya nɔ́ɔ ngíwaa yénge mbɛ.

¹¹ Nuu fíli álaa ngufema lála hé mbɛ, kɛ́ kɛ wú bɔ́mba í ndí ngu ma ngáá ngi híyangi ndiilɛí h̃u kɛinɔɔ́ í yángaima ngéle, bɔw̃álale ngááh̃u lɔ tuwɔ ngaá ti yangáima taá mu mbála Yalá fɛ́li mbélaa vekaítii.

¹² Nyá ngáá yɛpɛ náa kɔwɔ́ato a mu mbála Yalá fɛ́li mɔ́i Apólo wa. Ngí ndénga ma ká ka ngáá í vá wú yéle taá mu mbá Yalá fɛ́li mbélaa vekaítii ngáá ti wu héi heí, kɛ́ aa ɣɛngɔ laí gíte ki má ngáá í vá náá sí h̃úi. Ná fíli su, aá lɔɔ vá vaamá ná áá lókohɔlɔ.

Ngapúmaa woítii

¹³ A w̃aahéi wó, wú ló kpáŋ ngáá ndangí wú su ngáá Jísu, wú lííbangɔ i ɣɛ la, ná vólu, wú h̃úú i ɣɛ báni.

¹⁴ A wú lóngi yákɛ faa kpɛ́lɛɛ sú.

¹⁵ Wú kɔlɔ́ ngáá Sitɛ́fɛnɔ vɛlɛ lowaí wúú yélai hése tɔ ti vílini Ngalá fɛ́lindai wa Akáya lataí h̃u aáva ti bɔ́wɔ gulaá kɛ́lɛma ngengengí hááw̃a Ngalángi vóngaitii mbɛ. Wú w̃áánɛɛnɛngɔɔ lé mu mbála Yalá fɛ́li mbélai,

¹⁶ a gólo ngutuwɔ́ láália sítii mbɛ kɛ kíya Sitɛ́fɛnɔni tí na, ɛ́ɣɛ nuí fíli nɔ́ɔ áá víli ngengengí sí h̃u, í báha ti wa.

¹⁷ Kóóh̃unɛɛngɔɔ lé ngáá sí Sitɛ́fɛnɔ ɛ́ɣɛ Fɔtunátɔ kpahangɔ́ náa Akáikɔ wa, tí váángɔ. Tiyá lɔ́ náá ti ngáá wú vótongi

¹⁸ bɔw̃álale, tí kɛ́a ngáá háwu nduwúh̃u í lɛ́ ngáá ngé kíya nɔ́ɔ tí kɛ́ngɔ ngáá háwu nduwúh̃u í lɛ́ɛ́ngɔ ngáá wú ye. Sítii taa ɣɛ́ h̃íí na, maa áá ɣɛ nɛɛni nuú í ti lɛ.

¹⁹ Mu mbála Yalá fɛ́li mbélai tí ỹándaitii bɛ́kpɛ Ésiya lataí h̃u tí hááni wú w̃a. Sítii taa w̃ɛ́ɛ́ Akúilani ngaa ngi yáh̃a Pilesíla ti vɛ́lɛi la í báha náá tiyá gítei wa tí hááni wú w̃á ngáá Ngala fɛ́li mbélaa ti láálimaa ɣɛ kíli.

²⁰ Ngala fɛ́li mbélaitii kínɛi ti mbéinda tí haaní wú w̃a. A haa ỹɔw̃ɔ́ ỹɔ́w̃ɔ w̃a ngáá ndiiwolé.

²¹ Sí nyá gíte ngáá pɔ́nɛ ngáá bɔwɔ́ lóko, áa wáa ngáá sí, nyɛ́i ngí ngáá Pɔ́ɔ, ngí há wú w̃a.

²² Nuí fíli ɛ́i ɣɛ́ lói ngáá Ndemɔí Jísu, Ngalángi háá bamaí í ɣɛ́ maa w̃ɔ́i w̃a. A mu Lemɔ́i Jísu, vá!

²³ Bɛlɛ́ Ndemɔí Jísu háá bɔwɔí í ɣɛ́ wú yɛ́.

²⁴ Ni lóngi í fólo wú kpɛ́lɛɛ má wɛ́i wú báhangɔ Ndemɔí Jísu Kílisitii wa.