KƆ́L̃E HESENDAA GƆLƆÍ 15 - Kɛ́lɛ Niinaí

Faí kɔwɔ́ato Kílisitii wuyoɣéndai wa saí h̃u

¹ Mu mbála Yalá fɛ́li mbélai, ndóngɔɔ lé náa ngí wú gísitɛ Ngalángi gééla woo vandaí wa ngí ndéngɔ wú w̃á, lɛ́i wú lókoheinga mbu aáva wú lángi í su ngwala.

² Ngalángi gééla woo vandaí sí wú lókoheinga mbu, ná wáá ngeɣé ngáá hɛmbɛ́ fíli, wú wúmaawongi wúl̃a. Ná láá lé, kɛ nda ngí hɔ́ɔ́ wú su ngáá maa gééla woí kulasuunúma aa su.

³ Kalambongí sí ngí mááhɔlɔngɔ, aá lɔ ngí mbónga ngáá wú ye. Aá lɔ í ngáá maifɔ́lɔ fái aáva tɔvengɔ́ɔ́ lé pekaítii kpɛ́lɛɛ mbá. Ná wáá ngáá, Kílisitii i haaní mu háa ỹɔítii fááw̃a kɛ kíya pɔnɛngɔ́ Ngalá Kɔ́lɔi h̃u.

⁴ Tí kpɔ́luni laáva ná foló félengɔ í lɔ́veni, sawa kélei w̃a, Ngala ngí mbuyoɣéni sái h̃u kíya pɔnɛngɔ́ Ngala Kɔ́lɔi h̃u.

⁵ Ná ná í gúlani su, i gulaní Pítɛ yááh̃u, ná vólu, í gúla volú yélaa púúngɔ maah̃úú félengɔitii ngaah̃ú sítii tɔ́ɔ́ ɣɛ́ ti w̃a Ngala kéélaitii.

⁶ Ná vólu, i mɔ́ɔ gulaní volú yélaa hɔ́ndɔ ndɔ́ɔ́lungɔ yaah̃ú ỹanda yílaa, tiyɛ́i ti híkaw̃aa tí ndɛɛh̃ú h̃u nɛ́nɛ kɛ kíya bɛ́lɛ ti lɛ́ingaa háángɔ.

⁷ Ná vólu, i gulaní Jimisí yááh̃u, ná vólu mɔ́ɔ́, Ngalángi gééla vekaítii kpɛ́lɛɛ.

⁸ Ngapúmai náa tɛ́ɛ́lɛ, nyá bútei i gulaí ngááh̃u nyɛ́i kɛ́ kíli gulangɔ́i ngáá ndoí tɛ́i ɣɛ́ ndéi lɛ́i lɛ́i,

⁹ sífaa, Ngalángi gééla vekaítii kpɛ́lɛɛ ti lɔ́vengɔɔ lé mbá aáva ngáá kúlaɣɛi p̃ɛ́ɛ́ ngáá nuu ngáá tɔɔ ngéɣe ngáá Ngalángi gééla, bɔw̃álale ngí fáá bá ndáni Ngala fɛ́li mbélaitii ma.

¹⁰ Kɛ́ Ngalángi háá bɔwɔí w̃áa véle w̃a, i kɛngá ngí ɣɛ́ ngáá kíya ngí na, aáva maa háá bɔwɔí í kɛ́ngɔ mbɛ́ ngi háá ya ngáá wálangɔ mba. Ngí yéngenga í lɔ́ve Ngalángi gééla vekaítii kpɛ́lɛɛ mbá, kíya bɛ́lɛ áá ɣɛ́ngɔ ngáá kpɔ́wɔ yákpa su, kɛ́ aá ɣéle, í naa gúlangɔ mbɛ́ kɛ́lɛma ngí háá bɔwɔí w̃aa véle w̃a ngí hómbo nda.

¹¹ Faalɔ, bele pá wáá keela woí sí w̃aahɔ́lɔ máá véle w̃a ɔɔ Ngalángi gééla vekaítii maa véle w̃a, faa láá na, keela wói sí lɔ́ nɔ́ɔ ni kpɛ́lɛɛ náa nde, aá va tɔ wú lángɔ la.

Ngala tɔ́ɔ vá mú wúyoɣema sái h̃u

¹² Kɛ́ ná ni gééla woí áá ɣɛ ngáá Ngalángi Kílisitii wuyóɣenga sái h̃u, aa ɣelé kɛ náa wú lɛ́ingaa wú nde ngáá ná nuu áá há Ngala ngáá vaamá mbuyoɣé sái h̃u?

¹³ Ná wɔ́lii mbúyoɣe saa h̃ú hái ɛ́i ɣɛ́ ngáá tɔɔỹaá, kɛ Kílisitii ɣéle tɔ Ngalá ngáá mbuyoɣéngɔ sái h̃u.

¹⁴ Aáva ná wɔ́lii Ngala ngɛ́i ɣɛ́ Kílisitii wúyoɣengɔ sái h̃u, kɛ ni Yála ngoo lendái lɔ ngáá faa ỹááka aáva kɛ wú laá ngáá faa ỹááka.

¹⁵ Í gúla bɛ́lɛ múl̃ɔ ná vólu, naá ɣɛ́ gulaní ngáá ndɛɛ gééla woo le mbélaa kɔwɔ́ato Ngalá mba, sífaa ní ndengɔ́ ngáá Ngala ngí Kílisitii wuyoɣéngɔ sái h̃u. Ná mbuyoɣe saa h̃ú háá ɛ́i ɣɛ́ su, kɛ Ngala ngáá mbuyoɣéngɔ hɔ́ɔ́ sái h̃u,

¹⁶ sífaa, ná ɛ́i ɣɛ́ ngáá tɔɔỹaá ngáá Ngala ngáá saa yelái mbuyoɣé sái h̃u, kɛ aa Kílisitii wúyoɣeni hɔ́ɔ sái h̃u.

¹⁷ Aáva ná wɔ́lii Ngalá ngɛ́i ɣɛ ɣɛ́ngɔ Kílisitii wúyoɣeni sái h̃u, kɛ wú lánga nɔ́ɔ lá gbááma, aáva kɛ wu háá ỹɔítii taá nɛɛ wuyaní wú w̃á.

¹⁸ Ná ná áá ɣɛ́, kɛ sítii kéle tɔ ti ɣɛ́ngɔ laí ngáá Kílisitii í lóngɔ su ti háángɔ kɛ ti betévengɔɔ lé Ngala mba.

¹⁹ Ná wɔ́lii mu lángi mu su ngáá Kílisitii áá ɣɛ́ nɔ́ɔ ngáá ngeleí sí wu háá séɣe héɣe mú na, kɛ muỹá lɔ mu ngáá maaw̃aanú yélaa í lɔ́ve nuu kpɛ́lɛɛ mbá ngeleí sí wu.

²⁰ Kɛ́ tɔɔỹái waa ngáá Ngalá ngí Kílisitii wuyoɣénga sái h̃u. Aáva sí lɔ́ áá ngákɛ ngáá sítii kele tɔ ti háángɔ aá lɔɔ vá ti wúyoɣema sái h̃u.

²¹ Kíya nɔ́ɔ saa hái í vááni siỹɛ ngílaa máá véle w̃á, ngimɔ́ɔ́ nɔ́ɔ mbuyoɣe saa h̃ú hái bɛ́lɛ nɔ́ í vááni siỹɛ ngílaa máa véle w̃a,

²² ná waa ngáá, a muỹa lɔ ngáá Ádau laala lengáitii, ná hááw̃a, kɛ kule lɔ mú w̃a mu kpɛ́lɛɛ mú saa w̃ááhɔlɔ aáva ngimɔ́ɔ́ nɔ́ɔ mɔ́ɔ mu báha gílii wa Kílisitii wa í kɛ́a Ngala ngáá vá mu wúyoɣema sái h̃u.

²³ Kɛ́ Ngalá tɔɔ maa hái yeɣé kɔ́wɔ w̃a ngáá ngila ngíla. I Kílisitii hése mbuyoɣénga sái h̃u, ná vólu, aá lɔ́ɔ vá sítii mbuyoɣéma sái h̃u ti Kílisitii hááw̃a folói ná w̃a íwaa vá yangáima má ngeleí sí wu.

²⁴ Aáva ngetéyangi yakɛ́ɛ́lɛmai aa foló náa. Kílisitii vá aa ɣɛ náá vilái ngakpa ŋániaitii kpɛ́lɛɛ nyááni ma í masandái lɔ́ve Kɛɛɣɛí Ngalá ngelé.

²⁵ Kɛ Kílisitii í lo ngi w̃ásandai h̃u í ló su kpóloo Ngalá ngí mbaahílima yélaitii kpɛ́lɛɛ pú í gɔ́wɔ wú.

²⁶ Ngapúmaa waahilima w̃ɔí Kílisitii áá vá ngi háá h̃uu nyááni ma aá waa ngáá sái,

²⁷ sífaa, sí pɔnɛngɔ́i Ngalá Kɔ́lɔi h̃u aá wáá ngáá sí, “Ngalá ngí faa kpɛ́lɛɛ púnga mbu.” Aáva faa kpɛ́lɛɛ fái í ndéngɔ ngakɛ́ngɔɔ lé gíte kpál̃au ngáá kɛ laá le Ngalá, kpahangɔ láá le sítii mba áá ti vú Kílisitii gɔ́wɔ wú.

²⁸ Kɛ́ ná Ngalá ngáá faa kpɛ́lɛɛ pú Kílisitii yákpangi wu, Kílisitii bútei í ngáá Ngalángi H̃íỹɛndou Loí, aa bɔwɔ́ ɣɛ́ náa Ngalángi yákpangi wu lɛ́i Ngalá ngi faa kpɛ́lɛɛ púngɔ ngi yákpangi wu. Ngalá pa ngi yákpangi áá ɣɛ náa faa kpɛ́lɛɛ mááh̃u.

²⁹ Ná wɔ́lii mbuyoɣe saa h̃úi ɛ́i ɣɛ́ ngáá tɔɔỹaá, kɛ ndeé le hɔ́ɔ́ nungáá lɛ́ingaa taa ngúyai wo ngáá nungáitii saa yelái faaw̃a? Ndeé lɔ nguyaí na áá kɛ saa yelái mbɛ ná Ngala ngɛ́i ɣɛ́ ngáá vá ti wuyoɣéma sái h̃u kíya nungái taá ndé?

³⁰ Niỹá va, ndeé lɔ́ náá ɔ́ɔ́ kɛ ní ɣɛ́ nɔ́ɔ faa h̃u ngáá ní lɛ́ɛ́h̃ui i saa lowá la hɔ́wɔ fíli?

³¹ Nyá lɔ saa lowá lá foló fíli má. Mu mbála Yalá fɛ́li mbélai, sí lɔ́ ngáá tɔɔỹaá aáva aá lɔ mɔ́ɔ́ ngáá tɔɔỹaá ngáá ngáá yónga téve wú hááw̃a, mu báha gilíí wa su a maá Ndemɔí Jísu Kílisitiini. Ná lɔ́ í kɛ́a ngáá nde wú w̃á ngáá nyá lɔ́ nɔ́ɔ saa lowá la foló fíli má.

³² Sí í híyani ngáá ngé Ɛ́fɛsɔ taa h̃u, i ɣɛi nɔ́ɔ kíya kpéi ngí ɣɛ́i ngáá lápi ngáá suwa walá wála. Kɛ́ ná wɔ́lii ɔ́ɔ́ ɣɛ́ ngáá nuu búsa ndá gísiya ɣɛ kílii, kɛ ndée lɔ náa ɔ́ɔ́ ɣɛ ngáá ní gúlasuunumai ná sí nungáitii taá ndé áá ɣɛ́ ngáá tɔɔỹaá? Ná wáá ngáá sí taa ɣɛ́ ta, “Ngala ngɛ́i nuu wúyoɣe sái h̃u.” Ná wɔ́lii áá ɣɛ ngáá tɔɔỹáa, kɛ a mu hítɛ sí vólu nungáitii táá nde ngáá a mú laaỹɛ́, mu ndɔɔ bɔ́le, sífaa ná á maa há, kɛ kɛɛlɛ́ míl̃a.

³³ Wálaa kɛ nuu ɔ́ɔ́ wú vɛ́lɛ. Kíya nɔ́ɔ nungáá lɛ́ingaa taá nde, ti ɣɛ́ ta, “Nungái sítii ti gɛ́ɛ́hɔ ỹɔ́ungɔ ná wáá ɣɛ́ w̃a, taa í gɛ́ɛ́hɔ pándai ỹááni.”

³⁴ A vá bɔ́wɔ h̃u, wú fáa yátɔ mba múl̃ɔ ngáá pangɔ́, wú bé wú lúva vele ỹɔ́itii mba, sífaa wú lɛ́ingaa wáá Ngalá kɔlɔ́ ngáá ele gíte waa ngáá laa. Aáva nyá ngáá sí le ngáá wú yángufe.

Kíya máá vá ɣɛ́ma na ná Ngala ngáá mu wúyoɣe sái h̃ú kúna

³⁵ Nuu tá áa mɔ́ɔ́ni mbó, i ɣɛ ta, “Ngala ngaa ɣelé saa yeláitii mbuyoɣé náa sái h̃u tí va ndɛɛh̃ú h̃u? Nduwúi híi bɛɛ ɣéle lɔ́ áá ɣɛ́ ti w̃a?”

³⁶ Í wútɔngɔɔ le! Ná yáá ŋáni huwú hi, kɛ í ha p̃ɛ́ɛ́ ɔ́ɔ́ ɣɛ́a halé.

³⁷ Sii hií ŋáni gíte laa le yɔ́ɔ́ ɣɛ́ yáá sí, kɛ́ ngi húwui lɔ́ nɔ́ɔ yáá sí, tɛingaa aa ɣɛ ngáá ngɛ́ingi sí taa tolí ngáá wííti húwui ɔɔ ŋani huwú tá nɔ́ɔ.

³⁸ Ngala ngí kɛngɔ́ ngáá háwu ŋaní fíli ngi húwui í hále kpatɛ kíli í ɣɛ́ ngáá kíya ndongɔ́i ɣɛ́ na. Aa nduwú he kule áá ɣɛ́ ma í ɣɛ́ ŋani huwúi ná w̃a.

³⁹ Fulú wɔ́lingai kpɛ́lɛɛ ti luwúi ɣɛ kíli aa yíla ti w̃a, nuu búsai ndái híí lɔ na. Suwaítii ti ndái híí i na. W̃ɔniáitii ti ndái híí í na ɛ́ɣɛ nyɛáitii ti ndái híí i na.

⁴⁰ Sítii tí ngelegóóh̃u ti bátɛ kíli i gba ɛ́ɣɛ sítii ti ngeleí sí wu ti bátɛ kíli i gba. Sítii ti ngelegóóh̃u ti vángi ɣɛ kíli í léélaa, sítii pa tí ngeleí sí wu ti ndá vángi ɣɛ́ kíli i léélaa.

⁴¹ Folói ndá vángi híi i gba. Ngalúngi bɛ́lɛ ngí ndái híí i gba ɛ́ɣɛ temúleɣaitii ti ndái híí bɛ́lɛ ngí gba. Aáva temúleɣaitii kéle tɔ ti vángi híí i léélaa léélaa.

⁴² Ngimɔ́ɔ́ áá vá ɣɛmá ná Ngalá ngáá saa yeláitii mbuyoɣé sái h̃u. Ná núi áá há tí kpɔ́lu, nduwúi aa luulá. Kɛ́ ná Ngalá ngáá mbuyoɣé sái h̃u, nduwúi áá ɣɛ́ ma ɛi mɔ́ɔ́ luulá.

⁴³ Ná táa kpɔlú nyɔúngɔ áá ɣɛ lá njɔ njɔngɔ́. Kɛ́ ná Ngalá ngáá mbuyoɣé sái h̃u, pangɔ́ áá ɣɛ lá ngwala aáva suubangɔ́.

⁴⁴ Ná táa kpɔlú aa ɣɛ ngáá nuu búsa luwú gíte. Kɛ́ ná Ngalá ngáá mbuyoɣé sái h̃u, ndɛɛh̃úi sí áá ɣɛ́ nduwúi ná h̃u áá ɣɛ ma Hɛ́ɛ́ma Ỹínangi lɔ́ áá ɣɛ́ púi su. Nduwúi sí í mu w̃a ná lɔ na, sí vá í ngáá nduwúi Hɛ́ɛ́ma Ỹínangi áá ndɛɛh̃úi vú su, ná bɛ́lɛ i na,

⁴⁵ kíya nɔ́ɔ pɔnɛngɔ Ngalá Kɔ́lɔi h̃u ngáá sí, “Hésendaa nuí Ngala ngi kpatɛí tɔ́ɔ ɣɛ́ ma Ádau, Ngalá ngí kpatɛí, í ndɛɛh̃ú vú su.” Kɛ́ nuí sí taa ɣɛ́ ma Ádau vekaí, aá lɔ í ngáá ndɛɛh̃u gítei he Ỹína pandaí.

⁴⁶ Aá va taa le hése ɔ́ɔ́ ɣɛ́ vaaní, kɛ́ sí nuu búsa lúwui í ma laa hése tɔ́ í vááni, sí í ngáá pekai Hɛ́ɛ́ma Ỹínangi áá ndɛɛh̃úi vú su ɔ́ɔ́ ɣɛ́a va.

⁴⁷ Ngalá ngí hésendaa nuí Ádau bátɛi ngáá pɔlɔ́i, aáva í gulangɔ́ ngeleí sí wu. Ádau vekaí vá i gulangɔ́ ngelegóóh̃u.

⁴⁸ Sítii ti ngáá ngeleí sí wuu yélai ti ɣɛ kíli gulangɔ́ɔ́ lé ngáá nuí sí hése Ngalángi kpátɛi ngáá pɔlɔ́i. Sítii pa tí ngelegóóh̃u, ti gúlangɔɔ lé ngáá nuí sí í gúlangɔ ngelegóóh̃u.

⁴⁹ Kɛ kíya nɔ́ɔ mu gúlangɔɔ ngáá nuí sí Ngalá ngí kpátɛi ngáá pɔlɔ́i, ngimɔ́ɔ́ nɔ́ɔ máá vá ɣɛ́ma gulaní ngáá nuí sí í gúlangɔ ngelegóóh̃u.

⁵⁰ Mu mbála Yalá fɛ́li mbélai, sí ngí ma aá lɔ ngáá sí, mu búsai sí kpatɛngɔ́i ngáá nduwúi ɛ́ɣɛ ŋaaw̃ɔí ɛi ɣɛ Ngalángi w̃ásandai wu aáva mu luwúi sí vá í mu w̃a áá lúúla, ɛi ndɛɛh̃úi sí w̃ááhɔlɔ áá ló na kúnafɔ.

^51-52 A wolílo lɛ́ɛ́ ndɔɔwu h̃ú hái sí w̃a. A mu kpɛ́lɛɛ táá le mɔɔ ɣɛ́a vá hááma. Kɛ́ a mu w̃áá lɔɔ vá lovimá ngamá nɔ́ɔ kɛ kíya nɔ́ɔ nuu yááh̃ui áá ɣɛ́ ma kpáɣe. Ná búlui áá ɣɛ́ hɛ́ni ngetéyangi yakɛ́ɛ́lɛmai, Ngala ngáá saa yeláitii mbuyoɣé sái h̃u tɛ́i mɔ́ɔ ha, ná vólu, a mu kpɛ́lɛɛ a mu bátɛ gíli w̃aa áá lóvi.

⁵³ Mu luwúi sí áá lúúla kɛ maa í lóvi ngáá sí ɛ́i mɔ́ɔ́ luula. Aáva aa ɣɛ náa ngáá nduwú ɛ́i mɔɔ há.

⁵⁴ Aáva ná a mu nduwúi sí h̃u áá lúúla maa áá lóvi ngáá sí ɛ́i mɔ́ɔ lúúla, ná vólu, í ɣɛ́ ngáá nduwú ɛ́i mɔɔ ha, kɛ sí pɔ́nɛngɔ Ngalá Kɔ́lɔi h̃u, aa hitɛ náa nga, sí vá pɔnɛngɔ aá wáá ngáá sí, “Sái wú ngí lónga su, mu ndái i ndoá náa ma!”

⁵⁵ Pɔnɛngɔ́ɔ́ lé mɔ́ɔ́ ngáá sí, “Saí, í ndái aa ndongɔ ma. Ngakpá ngáá í yáa yáá ỹánda héi la ni wa.”

⁵⁶ Ngakpángi i sái yáa áá ỹanda héi la mu wa, aa gula faa ỹɔ́i h̃u. Faa ỹɔ́i va ngi yákpangi aa gula savaí h̃u Ngalá ngí féni Muusé yaá.

⁵⁷ Kɛ́ sɛ́ɣɛɛ gulama í ɣɛ́ Ngalá mbɛ lɛ́i í kɛ́a ngáá háwu mu ndái í ndoá ma saí w̃ááh̃u a mu Lemɔ́i Jísu Kílisitii w̃áa véle w̃a!

⁵⁸ Faalɔ, mu mbála Yalá fɛ́li mbélai, a ló kpáŋ! Waá kɛ faa fíli ɔ́ɔ́ wú híɣe vomá. A bɔwɔ́ gula kɛlɛ́ma hɔ́wɔ fíli Ndemɔí Jísu yengengí hááw̃a, bɔw̃álale wú kɔ́lɔ ngáá sí fíli wáá mbo Ndemɔí Jísu yengengí h̃u aa gbááma.