KƆ́L̃E HESENDAA GƆLƆÍ 14 - Kɛ́lɛ Niinaí

Faítii kɔwɔ́ato ngenge tókoitii mba

¹ Ndongí nuu áá ɣɛ́ su ngáá nungáá vékaitii a ná w̃ɔ́ni ɣɛ́ ngwala í lɔ́ve faa kpɛ́lɛɛ mbá. Wú gí ngi ɣɛ́ ngenge tókoi sítii mba Hɛ́ɛ́ma Ỹínangi áá kɛ ngáá háwu nuu áá hómbo áá ti wo ngungí ndá mɛ́ɛ́ Ngalá ndaa háá léndai wa.

² Nuí áá yɛ́pɛ híi woo veka h̃u, ɛi ɣɛ áá yɛ́pɛ nuu búsa yelé, kɛ́ áá ɣɛ áá yɛ́pɛ Ngalá ngéle, sífaa, sí áá ɣɛ́ áá nde, nuu fíli ɛi ngatɔ́ mba. Aa ɣɛ áá tɔɔỹáá háitii nde tí ndɔ́ɔ́wu h̃ú Hɛ́ɛ́ma Ỹínangi yákpangi w̃áá véle w̃a.

³ Kɛ́ núi fíli áá Ngalá ndaa háá lé, aa ɣɛ áá yɛ́pɛ nuu búsaitii ngéle ná va ngaa ɣɛ ngáá kpɔmba ɛ́ɣɛ ndiiwuulɛ́, ná vólu, ndiiyapɔ́pɔ ti haáw̃a.

⁴ Nuí sí áá yɛ́pɛ híí woo vekaítii su, aa ɣɛ ngáá kulasuunúma laa fááw̃a nɔ́ɔ. Kɛ́ nuí sí áá Ngalá ndaa háá lé, ná aa ɣɛ́ ngáá kulasuunúma Ngala fɛ́li mbélaitii kpɛ́lɛɛ fááw̃a.

⁵ Ngáá ɣɛ́ loí wú kpɛ́lɛɛ wááyaa yɛ́pɛ híí woo vekaítii su, kɛ́ ɔ́ɔ́ nɛ́ɛ́ mbɛ́ ngwala ná wɔ́ɔ́ Ngala ndaa háá lé. Sífaa nuí sí áá Ngalá ndaa háá lé, tɔvengɔ́ɔ́ lé nuí sí wa áá yɛ́pɛ híí woo vekaítii su, kɛ nɔ́ɔ léi nuu í ɣɛ na í núi sí laa háá lé, áá yɛ́pɛ híi woo vekaítii su kɛinɔɔ́ í ɣɛ́ ngáá kulasuunúma Ngala fɛ́li mbélaitii kpɛ́lɛɛ fááw̃a.

⁶ Mu mbála Yalá fɛ́li mbélai, ná wɔ́lii ngáá vá ngí yɛ́pɛ wú yéle híí woo vekani su, ná ɛi ɣɛ́ ngáá kulasuunúma wú hááw̃a. Ɛi ɣɛ ngáá kulasuunúma kúlo bɛ́lɛ wú hááw̃a ná ngɛ́i ɣɛ́ sí léi wú w̃a Ngala ngáá ɣɛ́ ngakɛ́i ngáá ngé, ɔɔ faa gálangɔi áá ɣɛ́ kɛ́i ngáá ngé ɔɔ ndaa háá léndai áá ɣɛ́ kɛ́i ngáá ngé ɔɔ kalambo mbóndaa áá ɣɛ́ kɛ́i ngáá ngé.

⁷ Ngɛíngai sítii kele tɔ ndɛɛh̃uu áá ti h̃u, ná wáá ngáá, kíya ndooli wɔlíngi sí kulangɔ́ ngáá ndowó ɛ́ɣɛ mbaka í ná, ná yɛ́i ɣɛ́ náá wɔlɔ́ ti yangénge má, nuu áá ɣéle ɣɛ náá kɔlɔ́ ngáá ndéé wúle lɔ yáá ngeɣé tí h̃u?

⁸ Ɛ́ɣɛ ná wɔ́lii búlu hɛ́ mɔ́i ɛ́i ɣɛ́ búlui hɛ́ni nga ngɔ́ɔ́ ɣɛ́ kpál̃au kɔɔ wɔ́ tóli mbo fááw̃a, kɛ ele lɔ náa áá w̃ááhei wo kɔɔ wɔ́ fááw̃a?

⁹ Ngimɔ́ɔ́ nɔ́ɔ áá ɣɛ́ na, nuu fíli ɛi wú gééla woí yatɔ́ mba ná wɔ́lii wáá ɣɛ́ wáá nde híi woo vekaní su laáva nga ngáá kpál̃au. Ná ná áá ɣɛ́, wú láá wói nátii taá ɣɛ́ nɔ́ɔ ngáá faa ỹááka.

¹⁰ Híí woo bih̃íw̃aa lɔ́ na ngeleí sí wu, kɛ́ ta fíli aa na yɔ́ɔ́ ɣɛ́ nga ngɛ́i lɔ.

¹¹ Kɛ́ ná nuu áá híí woo lé ngɛ́i ɣɛ́ kɔlɔ́ kɛ maa w̃ɔ́i lɔ ngáá koha w̃ɔ́ɔ. Ná ná áá ɣɛ́, naa ɣɛ ngáá koha yelaa ỹɔw̃ɔ́ ỹɔ́w̃ɔ w̃a.

¹² Faalɔ, kɛ kíya pilingɔ wú líí vólu ngáá wú ɣɛ́ wáá fáitii kɛ Hɛ́ɛ́ma Ỹínangi áá kɛ ngáá háwu ti ɣɛ́ ngáá nuu yénge toko, a hɛmbɛ́ héi nátii kɛndái h̃u taá kɛ́ ngáá háwu Ngala fɛ́li mbélaitii súú áá bá Ngala fái h̃u.

¹³ Faalɔ, nuí sí áá yɛ́pɛ híí woo vekáitii su, í Ngala fɛ́li ngáá í hómbo suugúlandai lá.

¹⁴ Ná ngáá Ngala fɛ́li híi woo vekaní su, kɛ súúyafuw̃angi lɔɔ́ Ngala fɛ́li kɛ́ kí mai va ɛi ngatɔ́ mba.

¹⁵ Sí kule í má ngí kɛ aá wáa ngáá sí, ngáá Ngala fɛ́li súúyafuw̃angi w̃aa véle w̃a kɛ́ ngáá mɔ́ɔ́ Ngala fɛ́li ngoí sítii su ngáá ngatɔ́ mba ngáá gí mai. Ngáá ngule hɔ́ɔ́lɛ súúyafuw̃angi w̃aa véle w̃a kɛ́ ngáá mɔ́ɔ́ ngule hɔ́ɔ́lɛ ngoí sítii su ngáá ngátɔ mba ngáá gí mái.

¹⁶ Ná yáá sɛ́ɣɛɛ gula Ngalá má í h̃úúyafuw̃angi w̃aa véle w̃a nɔ́ɔ, Ngalá fɛ́li mɔ́i sí ná w̃aa yákpangi ɛ́i ɣɛ́ mbɛ, áá ɣɛ wú w̃áákpɔi h̃u, aa ɣelé mbuu hóu náa áá ɣɛ ta, “Amíína.” Sífaa, péle fíli aa na áá kɛ ɔ́ɔ́ ɣɛ faa wɔ́lɔ sí wá yaá ɣɛ́ yáá nde.

¹⁷ Bele pa yáá ɣɛ́ yáá sɛ́ɣɛɛ gula Ngalá má fɛli ngóó vánda h̃u nuí ná wáá ɣɛ́ wáá Ngala fɛ́li ỹanda yílaa, maa w̃ɔ́i ɛi kulasuunúma w̃aahɔ́lɔ su.

¹⁸ Ngáá sɛ́ɣɛɛ gula Ngalá má ngaá ngáá yɛ́pɛ híí woo vekaní su ngwala í lɔ́ve wú kpɛ́lɛɛ mbá.

¹⁹ Kɛ́ ná maa ɣɛ́ náa Ngala fɛ́lindai w̃a, ngɔ́ɔ́ bɔ́ɔ́ ngoo ndɔ́ɔ́lungɔ bɛ́lɛ ndé nungáá taá ngátɔ mba kɛinɔɔ́ tí kálambo mááhɔlɔ su. Ná w̃áá áá ɣɛ nɛɛni í lɔ́ve sí wa ngáá ngoo bíh̃i bíh̃i nde híí woo vekaní su nungáá tɛ́i ngátɔ mba.

²⁰ Mu mbála Yalá fɛ́li mbélai, wú gísiyai h̃uubɛ́ɛ́ngɔ álaa ɣɛ́ la ngáá ndopoá ti ndá ɣɛ kíli. Ná áá to faa ỹɔ́u ɣɛ́ndai wa, a ɣɛ́ ngáá ndopoá ɣɛ́ kíli. Kɛ́ wú ɣɛ́ wáá faa yátɔ mba wú gísiyaitii su kíya kpakolo ngáá gísiya.

²¹ Pɔnɛngɔ́ɔ́ lé Ngalá Kɔ́lɔi h̃u ngáá sí Ndemɔí Ngalá ngí ndéngɔ, i ɣɛ́ ta, “Nyá lɔɔ vá yɛ́pɛma ní vóngaitii ngelé nungái sítii maa véle w̃á taá híi woo vekaítii nde. Nyá lɔɔ vá yɛ́pɛma ní vóngaitii ngelé koha yeláitii maa véle w̃a. Kɛ́ ná fíli su, taá vaamá wóliloma má.”

²² Faalɔ, híí woo vekaa lendái lɔ na ngáá í Ngálangi yákpangi yákɛ ngáá sítii taá lái ngáá Jísu. Kɛ́ aa na ngáá í faa yákɛ ngáá sítii ti langɔ́ ngáá Jísu. Ngalá ndaa háá léndai vá tɔ na ngáá í Ngálangi yákpangi yákɛ ngáá sítii ti langɔ́ ngáá Jísu. Kɛ́ aa na ngáá í faa yákɛ ngáá sítii taá lái ngáá Jísu.

²³ Faalɔ, ná Ngala fɛ́li mbélaitii kpɛ́lɛɛ taá yátɛ mba ỹanda yiláá aáva ti kpɛ́lɛɛ tí pɛ́lɛ yɛpɛmá híi woo vekaítii su, ná wɔ́lii Ngalá fɛ́li mbélai sítii taa faa wɔ́lɔ kɔwɔ́ato ná ta wá ɔɔ sítii taa lái ngáá Jísu taa vá na, tɛí nde ngáá sítii tɔ ngáá bólowa yélaa?

²⁴ Kɛ́ ná wú kpɛ́lɛɛ wáá ɣɛ́ wáá Ngalá ndaa háá lé, ná núngai sítii tɛ́i ɣɛ́ lái ngáá Jísu ɔɔ sítii taa faa wɔ́lɔ kɔwɔ́ato ná tá wa tí vá na, maa yélaitii taa ngátɔ mba ngáá kɛ tiyá lɔ́ ngáá faa ỹɔ́u ɣɛ́ mbélaa kɔwɔ́ato sí wa táá ɣɛ́ táá mɛni. Ngoí sítii táá ɣɛ táá mɛni tiyá lɔ taa ɣɛ́ táa ti gɔ́sɔ ti líítii su.

²⁵ Ti háá ỹɔítii taa ɣɛ́ ti lií h̃u kaa ngáá híɣe ma, aáva taa hítɛ wumbú ya tí Ngalá fɛ́li, táá ɣɛ́ ta, “Ngalá tɔ́ wu vólu kái kái ngáá tɔɔỹaá!”

Faítii ngeɣé kílii kɔwɔ́ w̃a Ngala fɛ́lindai h̃u

²⁶ Mu mbála Yalá fɛli mbélai, sí gíte ngí ma aá wáá ngáá sí, ná wáá yatɛ́ mba ỹanda yílaa Ngala fɛ́limai, nuu tá áa ɣɛ́ na ngule í ngéya, pekaí va kalambo ngóó i ngeyá, pekaí vá Ngalángi faa yákɛ lá, pɛkaí vá áá ɣɛ́ í híí woo vekaní ndé, pekaí va sí taa ɣɛ́ ndéi híí woo vekaítii su, í suugúla. A sítii kpɛ́lɛɛ kɛ́ ngáá peleí sí áá kɛ Ngala fɛ́li mbélai taa kulasuunúma w̃aahɔ́lɔ su.

²⁷ Ná nungáá taa yɛ́pɛ híí woo vekaítii su, tálaa lɔ́ve nuu félengɔ ɔɔ nuu sáángɔ wa. Aáva tálaa yɛ́pɛ w̃ɔíma, ná vólu, nuu véka í sí h̃úúgula taa ɣɛ́ ndéni.

²⁸ Kɛ́ ná nuu fíli ɛ́i ɣɛ́ na ɔ́ɔ́ suugúla, kɛ híí woo vekaítii nde mɔ́i ná álaa nde kɛ́ í yɛ́pɛ nɔ́ɔ gi ma ɛ́ɣɛ Ngalá ngéle.

²⁹ Sítii taá Ngalá ndaa háá lé, tálaa lɔ́ve nuu félengɔ ɔɔ nuu sáángɔ wa, aáva tálaa yɛ́pɛ w̃ɔíma. Nuu vékaitii pa ti ɣɛ́ taa maa láa haa le ngói ná yá kpɛ́ kpɛ́.

³⁰ Kɛ́ ná Ngalá ngáá faa yákɛ ngáá nuu tá áá ɣɛ́ kpɔngí ná h̃u ngáá í nde, nuí síí w̃ɔ́i áá ɣɛ́ áá yɛ́pɛ hése í w̃áá ɣɛ ló.

³¹ Wú kpɛ́lɛɛ wááyaa Ngalá ndaa háá lé ngáá ngilá ngíla kɛinɔɔ́ wú kpɛ́lɛɛ wú faa gála, ná vólu, nduwúh̃u í lɛ́ ngáá wú ye.

³² Nuí ngí ndá yénge tokoí áá ɣɛ́ ngáá Ngalá ndaa háá léndai, maa w̃ɔ́i lehé í ɣɛ́ maa yénge tókoi ná w̃á.

^33-34 Sífaa Ngalá tɔ́ ngáá Ngalá áá faa yéɣe kɔwɔ́ w̃a, í kɛ ngáá ndiiheí véle kɛ́ aa ngáá faa yáfahangɔ Yála. Kule lɔ́ nyah̃áitii ma ti w̃ááɣɛngɔ í ɣɛ́ la ló, tálaa yɛ́pɛ Ngala fɛ́li máákpɔitii su kíya nɔ́ɔ í na Ngalá fɛ́li mbélaitii ndiiwáá tí ỹándaitii kpɛ́lɛɛ kpɛ́lɛɛ. Ngutuwɔ́ háá álaa ɣɛ́ nyah̃áitii toko h̃u Ngala fɛ́li máákpɔitii su kíya Ngalángi hávai í féni Muusé yaá í ndéngɔ.

³⁵ Ná wɔ́lii nyah̃áitii taa ɣɛ́ lói tí mɔ́ɔ́ni mbó, ngáá ti ɣɛ́ faa wɔ́lɔ kɔwɔ́ato faa wá, tí tí h̃íỹɛngaitii mɔɔní ti vɛ́lɛitii nda. Sífaa aá lɔ ngáá nga ngufé ngáá nyah̃á áá yɛ́pɛ Ngala fɛ́li máákpɔ h̃u.

³⁶ Baa aá lɔ wú gí ma ngáá Ngalángi gééla woí i gulangɔ́ wú yéle? Baa aá lɔ́ wú gí ma ngáá kɛ wá lɔ́ nɔ́ɔ í fólonga wú w̃a?

³⁷ Ná wɔ́lii nuu fíli áá gísiya ngáá kɛ aá lɔ́ ngáá Ngala ndaa háá lé mɔ́ɔ, ɔɔ Hɛ́ɛ́ma Ỹínangi i kɛngá ngáá háwu faa tá í ɣɛ́ ngáá ngi yénge toko, maa w̃ɔ́i í ngatɔ́ mba ngáá kɛ sí ngáá pɔ́nɛ wú yéle aá lɔ ngáá Ndemɔí Jísu ngi háva langɔ́.

³⁸ Ná ɛ́i ɣɛ́ wóliloni sí w̃a, laá bɛ́lɛ wáá wóliloma.

³⁹ Faalɔ, mu mbála Yalá fɛ́li mbélai, wú gí ngí í ɣɛ́ Ngalá ndaa háá léndai wa, kɛ́ wálaa híí woo veka lendái bɛ́nga.

⁴⁰ Kɛ́ a kpɛ́lɛɛ ngéɣe kɔwɔ́ w̃á wú ti ɣɛ pele w̃a ngáá pangɔ́.