KƆ́L̃E HESENDAA GƆLƆÍ 13 - Kɛ́lɛ Niinaí

Ndéé lɔ́ í ngáá ndongí?

¹ Ná ngɔ́ɔ́ hómbo ngí yɛ́pɛ híí woo vekani su ɔɔ ngɔ́ɔ́ bɔ́ɔ́ hómbo ngí yɛ́pɛ malékai ti ndái híí wói h̃u, kɛ́ ná ngɛ́i ɣɛ́ loí ngáá nungáá vékaa, kɛ ní yɛ́pɛi ná kpɛ́lɛɛ aá lɔ́ nɔ́ɔ ngáá sɔɔlɛ wóo nyááka.

² Ná bɛ́lɛ Ngalá ngɔ́ɔ́ naa gúla mbɛ́ kɛ́lɛma ngáá ngí ndaa háá le, ná vólu, í kele ɣeléngi kpɛ́lɛɛ fé ngéya ɛ́ɣɛ faa yátɔ mba ngákpangi ndɔɔwu h̃ú háitii kpɛ́lɛɛ mbá, ɛ́ɣɛ nda ngí ɣɛ́ sú ngwala ngaá ngáá ndé ngihéi w̃a ngáá í híɣe vomá aáva í híɣe vomá, kɛ́ ná ngɛ́i ɣɛ́ lói ngáá nungáá vékaa, kɛ ngáá ngáá nuu fíli.

³ Ná wɔ́lii ngɔ́ɔ́ hɔlɔ wɔlingáitii kpɛ́lɛɛ fé nungáá yaá, ná vólu, ngí bɔ́wɔ gula kɛlɛ́ma ngáá ti mɔ́ nungáá hááw̃a, kɛ́ ná ngɛ́i ɣɛ́ lói ngáá nungáá vékaa, kɛ ní gúlasuunuma fíli aa ná h̃u.

⁴ Nuu fíli í ngáá ndo mɔ́ɔ́ ndiilɔlɔngɔ́ɔ́ lé, faa bɔ́wɔ i su, kɛ́ tolóma ɛi ɣɛ́ su, yongangɔ́ ɛ́i ɣɛ́ la, kɛlaa í bɔwɔ́ h̃uu ɣɛ́ wɔ́ɔ́lɔ.

⁵ Maa w̃ɔ́i w̃aakɛ́ngɔ áá ɣɛ la, ɛi gakála béle nɔ́ɔ séɣe héɣe. Ndiiyáw̃al̃andaa bangɔ́ɔ́ lé aáva ɛi faa ỹɔ́u héi gi má.

⁶ Ɛi gooh̃unɛ́ɛ faa ỹɔ́i hááw̃a, kɛ́ aa gooh̃unɛ́ɛ́ tɔɔỹáa hááw̃a.

⁷ Ndongí aa nuu líílɔlɔ faa kpɛ́lɛɛ sú, í kɛ nda ngí ɣɛ́ maa w̃ɔ́ɔ́ h̃u, í kɛ kitómai kpɛ́lɛɛ í ɣɛ́ ngáá Ngala ɛ́ɣɛ maa w̃ɔ́i liibángɔ aa ɣɛ la ɛ́ɣɛ mɔ́ɔ maa w̃ɔ́i aa ndi nɔ́ɔ ngu ma fɔ́ ngáá maa hái.

⁸ Kɛɛlɛ ngáá ndongí wa. Ngalá ndaa háá léndai lɔ na, kɛ́ aa vaamá ɣɛ́ma na kúnafɔ. Sí Ngala ngáá kɛ nuu áá yɛ́pɛ híí woo vekaítii su, ná bɛ́lɛ ngí haa ɛi mɔɔ ɣɛ́ su. Kele ɣeléngi lɔ na, kɛ́ aá lɔɔ vá vílama.

⁹ Sífaa, mú kéle ɣeléngi ta wɔlɔ́ nɔ́ɔ, aáva keela woí áá gúla Ngalá ngéle ta lɔ nɔ́ɔ a maá maahɔ́lɔ.

¹⁰ Kɛ́ sítii ti yafɔ́ningɔ láa le ngí yɛ́pɛnga ti wa, taá váama ɣɛ́ma na kúna ná sí í ngáá faí sí kpɛ́lɛɛ ngáfɔningɔ áá vá.

¹¹ Ná ngí ɣɛ́i ngáá ndopo gúlo, njɛ́pɛ gilíi ɛ́ɣɛ ni gísiyai ɛ́ɣɛ sí ɔ́ɔ́ vú ndíí h̃u, ti ɣɛ́i ngáá ndopo gúlo ɣele. Kɛ́ ná naá ngí ɣɛ́a ngáá siỹɛ kpákolo ngáá múl̃ɔ beɣéni ndopo gúlo haí nátii ma.

¹² Ná kulangɔ ngáá muỹá lɔ Ngala tɔ h̃íí féyaa, kulangɔ́ɔ́ lé ngáá nuu w̃áá niini áá ɣɛ́ mɛl̃ɛ mɛl̃ɛ h̃u. Kɛ́ ná naa áá ɣɛ́ kpɛ́ɛ́, a muỹá lɔ́ vá lɔma kpál̃au maa tiyéni yaah̃u w̃a. Kíya suu í na, mú kéle ɣeléngi ta wɔlɔ́ nɔ́ɔ kɛ́ a muỹá lɔ́ vá faa kpɛ́lɛɛ kɔ́lɔma táingi ná w̃a kíya nɔ́ɔ Ngala ngí faa kpɛ́lɛɛ kɔ́lɔ kɔwɔ́ato mu wa.

¹³ Naa laa lówah̃u, faa sáángɔi sítii tɔ taa lo, ndangí ɛ́ɣɛ kitomái ɛ́ɣɛ ndóngi. Kɛ́ sí tɔvengɔ́i sítii kpɛ́lɛɛ mbá, aá wáá ngáá ndongí.