KƆ́L̃E HESENDAA GƆLƆÍ 12 - Kɛ́lɛ Niinaí

Ngenge tókoitii Hɛ́ɛ́ma Ỹínangi áá ngákɔlɛ wɔlɛ́

¹ Mu mbála Yála fɛ́li mbélai, bɛ́lɛ nɛ́nɛ ngí yɛ́pɛ wú yéle kɔwɔ́ato ngenge tókoitii mba Hɛ́ɛ́ma Ỹínangi áá ngákɔlɛ wɔlɛ́. Ndóngɔɔ lé wú ɣɛ́ tɔɔỹái wɔlɔ́ kɔwɔ́ato ti wa.

² Wú kɔlɔ́ ngáá na h̃u nɛ́nɛ wú ɣɛ́i ngáá Ngalá fɛ́li mbélaa kɔɔ kɔɔ́ ŋániaitii faaw̃a taa tí yeɣé ngáá ngalángaa tiyá lɔ́ wú ɣɛ́i ti wu tiyɛ́i ndɛɛh̃ú áá ti h̃u, táá wú hítɛ kaka péleitii mba.

³ Faalɔ, ndóngɔɔ lé wú ngátɔ mba ngáá kɛ nuu fíli Hɛ́ɛ́ma Ỹínangi áá ɣɛ́ polú, maa w̃ɔ́i ɛi Jísu haa h̃uuh̃ándɛ. Nuu fíli pá ɛi lokohéi Jísu wu ngáá Ndemɔí kɛ léi Hɛ́ɛ́ma Ỹínangi í ɣɛ́ maa w̃ɔ́i volú.

⁴ Ngenge tókoitii Hɛ́ɛ́ma Ỹínangi áá ngákɔlɛ wɔlɛ́ ti léélaa léélaa. Kɛ́ Hɛ́ɛ́ma Ỹína ngílaa kpéngi lɔ nɔ́ɔ́ áá tí yakɔ́lɛ wɔ́lɛ.

⁵ Ngengengítii ti léélaa léélaa, kɛ́ Ndemɔɔ yiláángi lɔ nɔ́ɔ a máá mbó mbɛ.

⁶ Nuu hómbondaa háitii tiyá lɔ na léélaa léélaa. Kɛ́ Ngalá ngílaa kpéngi lɔ nɔ́ɔ áá naa gúla kɛ́lɛma nungái mbɛ ngi yéngengitii mbo fááw̃a.

⁷ Mu yilá ngílangi kpɛ́lɛɛ Hɛ́ɛ́ma Ỹínangi aa ngakpá fé mu yaá ngéngengitii mbo fááw̃a bɛ́kpɛ kɛinɔɔ́ í ɣɛ́ ngáá kulasuunúma mu lɔ́ngɔ kpɛ́lɛɛ fááw̃a.

⁸ Hɛ́ɛ́ma Ỹína ngílaa kpéngi aa kɛ ngáá háwu nuí sí áá kele ɣelé kééla wóó le, ná vólu, í kɛ ngáá háwu pekaí áa faa gálangɔ gééla wóo le.

⁹ Hɛ́ɛ́ma Ỹína ngílaa kpéngi lɔ nɔ́ɔ múl̃ɔ áá kɛ ngáá háwu nuu í lá ngáá Jísu ngwala. Laá lɔ nɔɔ́ áá kɛ ngáá háwu nuu vékai ááyaa seebɛ híítiini mbaló.

¹⁰ Hɛ́ɛ́ma Ỹínangi aa kɛ ngáá háwu nuu vékai áá kááma haaní kɛ, í mɔ́ɔ́ kɛ ngáá háwu pekaí áá Ngalá ndaa háá lé, í mɔ́ɔ́ kɛ ngáá háwu pekai áá hómbo áá ɣɛ ndowah̃úngi wɔlɔ́ Ngalangí Hɛ́ɛ́ma Ỹínangi wa ɛ́ɣɛ ỹína nyɔu ỹɔungáitii, í mɔ́ɔ́ kɛ ngáá háwu nuu vékai áá híí woo vekaítii nde, í mɔ́ɔ́ kɛ ngáá háwu nuu vékai áá fái nátii suugúla áá ɣɛ léni híí woo vekaí nátii su.

¹¹ Hɛ́ɛ́ma Ỹína ngílaa kpéngi lɔ́ nɔ́ɔ áá fái sítii kpɛ́lɛɛ kɛ́. Ngengengí fíli áá ɣɛ́ loí nuí ááyaa mbo, laá lɔ́ áá kɛ ngáá háwu í ɣɛ́ ngáá maa w̃ɔ́i yénge tokoí.

Nuí búsai i yíla kpé, kɛ́ mbaawɔ́lingaitii kpih̃íngɔ mba

¹² Nuu búsai í yíla kpé, kɛ́ mbaawɔ́lingaitii kpíh̃ingɔ mba. Kɛ́ kɛ kíya bɛ́lɛ nuu búsai waawɔ́lingai kpih̃íngɔ mba, kɛ́ aa lɔ́ nɔ́ɔ́ ngáá kpusa yílaa. Aáva ngimɔ́ɔ́ nɔ́ɔ muỹɛ́i mu langɔ́ ngáá Kílisitii mu gúlangɔ ngáá kpúsa yílaa mbaa wɔ́li bih̃íngɔ mba.

¹³ Mu lɛ́ingaa muỹá lɔ́ ngáá Júsua, mu lɛ́ingaa maá ngáá Júsua, mu lɛ́ingaa mu ngáá nduwɔ lopóa, mu lɛ́ingaa maa ngáá nduwɔ lopóa, kɛ́ Hɛ́ɛ́ma Ỹína ngilaa kpéngi lɔ mu kpɛ́lɛɛ mú nguyaí w̃ááhɔlɔngɔ maa véle w̃a, mu gúlangɔ ngáá kpusa yílaa. Aáva Hɛ́ɛ́ma Ỹína ngiláá kpéngi lɔ áá ɣɛ́ mu yilá ngílangi kpɛ́lɛɛ pólu.

¹⁴ Nuu búsai aa nɔ́ɔ ngáá mbaawɔ́lingi ta yiláá kpé. Kɛ́ mbaawɔ́lingaitii kpɛ́lɛɛ kpahangɔ́ su, aá lɔ́ í ngáá nuu búsai.

¹⁵ Ná wɔ́lii kɔwɔ́i ɔ́ɔ́ nde, i ɣɛ ta, “Sífaa, ngáá ngáá tokoí, faalɔ, ngáá ngáá nuí búsai ta,” ná ɛ́i belé kɛ ɔ́ɔ́ bááh̃aa ɣɛ́ma ngáá nuí búsai ta.

¹⁶ Ɛ́ɣɛ ná ngolíí ɔ́ɔ́ nde, i ɣɛ ta, “Sífaa, ngáá ngáá ngaah̃ú, faalɔ, ngáá ngáá kpusaí ta,” ná ɛ́i belé kɛ ɔ́ɔ́ bááh̃aa ɣɛ́ma ngáá nuí búsai ta.

¹⁷ Kɛ bele nuu yááh̃ui lɔ nɔ́ɔ í ɣɛ́i ngáá nuu búsai, ɔ́ɔ́ ɣelé faa ỹɛ́ni náa? Kɛ bele nuu wólii lɔ nɔ́ɔ í ɣɛ́i ngáá nuu búsai, ɔ́ɔ ɣelé ŋani w̃ááku náa?

¹⁸ Kɛ́ aá ɣéle, Ngalá ngí mu waawɔ́lingaitii kpatɛí ti yilá ngíla kɛ kíya nɔɔ́ ndongɔ́ í ɣɛ́ngɔ lá ti ɣɛ́ na.

¹⁹ Kɛ bele ti kpɛ́lɛɛ ti ɣɛ́i nɔ́ɔ ngáá ŋani yílaa, ná ná ɔ́ɔ́ ɣɛ, kɛ kpusa ɛ́i béle ɣɛ́ na.

²⁰ Kɛ kíya í na, nuu wááwɔlingaitii tí bih̃í, kɛ́ kpusaí i yíla kpé.

²¹ Faalɔ, ngaah̃úi ɛi nde tokoí w̃a, ɔ́ɔ́ ɣɛ́ ma, “Ngáá béɣei í w̃á!” Kɛlaa ngungí ɔ́ɔ́ nde kɔwɔ́i w̃a, ɔ́ɔ́ ɣɛ́ ta, “Ngáá beɣéi í w̃a!”

²² Kɛ́ ná aa h̃íí, a mu waawɔ́lingai sítii maá ti yeɣé ngáá ti ya ngáá báni, kɛ nɔ́ɔ tí ɣɛ́ mu wa mu háitii su.

²³ Laáva, mu waawɔ́lingai sítii mu gísiyai áá nde mu w̃a ngáá nga ngáá ti wa ngwala, tiyá lɔ maá ti h̃úúhou vaí ngwála. Mu waawɔ́lingai sítii pa tí mú búsai wa, ti ngáá mu w̃ááwufemaa gélea, tiyá lɔ́ mu woli áá ɣɛ́ ti w̃a ngwala.

²⁴ Mu waawɔ́lingai sítii pa taa ngáá mu w̃ááwufemaa gélea tiyá lɔ́ kule áá mu w̃a mɔ́ɔ wolí ɣɛ́ ti w̃a. Ngala ngi mu búsai bátɛngɔ kɛinɔɔ́ ngúfema wála í ɣɛ́ mu waawɔ́lingai sítii mbɛ í mu gi má ngáá kɛ nga ngáá ti wa.

²⁵ I ná ɣɛ́ngɔ kɛinɔɔ́ kɔlɛ su fíli álaa ɣɛ́ mu búsai waawɔ́lingaitii ndowah̃u. Ti kpɛ́lɛɛ ti béɣengɔ í ɣɛ́ lá ỹɔw̃ɔ́ ỹɔ́w̃ɔ hááw̃a.

²⁶ Ná faa áá ɣɛ́ ngáá ngilaa ti lɔ́ngɔ kpɛ́lɛɛ taá ngátɔ. Ná taá faa vánda le ngiláá fááw̃a aa folo ti kpɛ́lɛɛ má.

²⁷ Wú kpɛ́lɛɛ wú gúlangɔɔ lé ngáá kpusa yílaa Kílisitii hááw̃a, aáva wú yíla ngílangi fíli wú gúlangɔɔ lé ngáá mbaawɔ́lingi tá.

²⁸ Ná ná áá ɣɛ, Ngala fɛ́li mbélaitii su, Ngalá ngí nuu kpɛ́lɛɛ tónga toow̃aá. Hésendaa loow̃aí waa ngáá sítii taa ɣɛ́ ti w̃a Ngalángi géélaitii, nátii kpélaa yélai mbaa ngáá Ngalá ndaa háá lé mbélaitii, ná vólu yélai mbaa ngáá kaamɔítii, ná vólu yélai mbaa ngáá káámaa haa ɣɛ mbélai, ná vólu yélai mbaa ngáá mbaló mbó mbélai, ɛ́ɣɛ kpɔmba hé mbélai, ɛ́ɣɛ sítii taá fáitii kɛ kíli ɣɛ ngáá nuu ye, ɛ́ɣɛ sítii taá yɛ́pɛ híí woo vekaítiini su.

²⁹ Ti kpɛ́lɛɛ táá le tɔɔ ɣɛ́ nɔ́ɔ ngáá Ngalángi géélaitii, ɔɔ tɔɔ ɣɛ́ nɔ́ɔ ngáá Ngalá ndaa háá le mbélaa, ɔɔ kaamɔítii Ngala fɛ́li mbélaitii faaw̃a. Ná vólu, ti kpɛ́lɛɛ táa le tɔɔ ɣɛ́ nɔ́ɔ ngáá káámaa haa ɣɛ mbélaa nɔ́ɔ,

³⁰ tí kpɛ́lɛɛ táá le tɔɔ́ ɣɛ́ nɔ́ɔ ngáá mbaló mbó mbélaa, ɔɔ tɔɔ ɣɛ́ nɔ́ɔ ngáá njɛpɛ yélaa híí woo vekaní su ɔɔ híí woo vekaní suugúla mbélaa nɔ́ɔ.

³¹ Kɛ́ a lii víli ngenge tóko wála waláitii polu Hɛ́ɛ́ma Ỹínangi áá kɛ ngáá háwu nuu ááyaa ti wo. Sí vá í ngáá pele vandái tɔvengɔ kpɛ́lɛɛ mbá aá wáá ngáá sí ngáá vá náa ndema.