KƆ́L̃E HESENDAA GƆLƆÍ 11 - Kɛ́lɛ Niinaí

¹ A túva veléi yangéɣe kíya nɔ́ɔ ngíwaa Kílisitii ndái yangéɣe.

Kaɣáitii ti Ngala fɛ́lindai w̃a

² Ngáá wú lɛ́ sífaa, nápa wɔ́i lééw̃a má, ná vólu, wáá híya ngáá kalambongí sítii ngí maahɔ́lɔngɔ ngáá mbo ngáá wú ye.

³ Ndóngɔɔ lé wú ngátɔ mba ngáá kɛ siỹɛ́ngi fíli maah̃u w̃ɔ́i waa ngáá Kílisitii. Aáva nyah̃ái fíli maah̃u w̃ɔ́i waa ngáá ngi h̃íỹɛngi. Kílisitii vá maah̃u w̃ɔ́i waa ngáá Ngalá.

⁴ Faalɔ, siỹɛ́ngi fíli áá Ngala fɛ́li ɔɔ í Ngalá ndaa háá lé ngu mbá vɛ́lɛngɔ ngáá ŋani tá, kɛ aá lɔɔ́ nguféma lála hé Kílisitii yɛ.

⁵ Nyah̃ái fíli pá áá Ngala fɛ́li ɔɔ í Ngalá ndaa háá le ngáá wu mbaá ỹaaká, kɛ aa lɔ́ɔ nguféma lála hé ngi h̃íỹɛngi yɛ. Sífaa, ndowah̃u kɔ́lɛ ngɛi ɣɛ wa taá nyáh̃ai sí táá ngungí bulé ma ngáá tí ngangúfe.

⁶ Ná nyáh̃ai ɛ́i ɣɛ́ wú mbaa vɛ́lɛni, kɛ í wúngi búle ma hɔ́ɔ́. Kɛ́ ná wɔ́lii áá ɣɛ́ ngáá ngangúfe faa ngáá ná nyah̃ái áá wúngi wóle, kɛ í maa vɛ́lɛ hɔ́ɔ.

⁷ Kule áá siỹɛ́ngi w̃a ɔ́ɔ́ ŋani vɛ́lɛ wu mbá sífaa aá lɔ ngáá Ngalángi gúla wole aáva Ngalá ngáá ngúfema w̃ááhɔlɔ maa véle w̃a. Kɛ́ nyah̃ái lɔ na ngáá ngi h̃íỹɛngi i ngúfema w̃ááhɔlɔ maa véle w̃a,

⁸ Sífaa, siỹɛ́ngi aa gulangɔ́ nyah̃ái h̃u, kɛ́ nyah̃ái i gulangɔ́ siỹɛ́ngi h̃u.

⁹ Kɛlaa, Ngalá ngɔ́ɔ́ ɣɛ siỹɛ́ngi bátɛngɔ nyah̃á hááw̃a kɛ́ Ngalá ngí nyah̃ái bátɛni siỹɛ́ngi hááw̃a.

¹⁰ Náá hááw̃a, kule lɔ́ nyáh̃ai w̃a í wu mbaavɛ́lɛ ngáá í ngákɛ ngáá kɛ áá lɔ ngí h̃íỹɛngi wu. Ná vólu, malékaitii fááw̃a.

¹¹ Kɛ́ Ngala fɛ́lindai laá su, siỹɛngíni ngaa nyah̃ái ti lókolangɔɔ lé ỹɔw̃ɔ́ ỹɔ́w̃ɔ w̃a,

¹² sífaa, kɛ kíya nɔ́ɔ nyah̃ái í gúlangɔ siỹɛ́ngi h̃u, ngimɔ́ɔ́ nɔ́ɔ nyah̃ái í siỹɛ́ngi léngɔ. Kpɛ́lɛɛ pa aa gula nɔ́ɔ Ngalá ngéya.

¹³ A ngakúla náa mba bɔwɔ́ yɛ, ná wɔ́lii aá lɔ pele w̃a ngáá nyah̃ái í Ngala fɛ́li kpɔ sú ngáá wu mbaá ỹaaká.

¹⁴ Kɛ́mbɛ nuu búsai batɛ gilíi Ngalá mbɛ ná gíte aa ngákɛ ngáá ná síỹɛngi áá bé wúndeɣai wa í ɣɛ́ gooh̃á kɛ ná lɔ́ ngáá ngángufe laá fááw̃a?

¹⁵ Kɛ́ nyáh̃ai laá, ngi wóóle wɔli mbaa ngáá ngi wúndeɣa góóh̃ai. Ngala ngí ngundeɣá góóh̃ai héngɔ nyáh̃ai yɛ ngáá í wúngi w̃aavɛ́lɛ la.

¹⁶ Kɛ́ ná nuu fíli áá ɣɛ́ í w̃ááɣaali kɔwɔ́ato sí wa, sí léi ngáá nde aá waa ngáá niỹá gítei ɣele tɔ ɛ́ɣɛ Ngala fɛ́li mbélaa vekáitii ni ndá lúva veleí wúl̃a ngáá na.

Kaɣáitii Ngala fɛ́li ndááỹɛngi wó fááw̃a

¹⁷ Sítii náa ngáá vá yɛpɛ má kɔwɔ́ato mba, taa ngáá tɛ ngóó wú hááw̃a bɔw̃álale kw̃ɛ́ɛ́ngi wáá mbo wú Yála fɛli mái aa faa vánda fíli kɛ́ma wú yɛ́ ngwala ɔ́ɔ́ híti ngi ỹɔ́i h̃u wáá maahɔ́lɔ su.

¹⁸ Maifɔ́lɔ mbáá ngáá, ngí mɛ́ningɔ ngáá ná wáá yatɛ́ mba ỹandá yiláa Ngala fɛ́limai, ndowah̃u kɔlɛ́ lɔ wú lííwaa aáva naá ɣɛ kílii w̃a ndángɔɔ lé la ngáá tɔɔỹaá lɔ su sáh̃a.

¹⁹ Maanɛ́ɛ́ngɔɔ lé ngáá wú lówah̃u kɔ́lɛngɔ í ɣɛ́ la ma ngáá kɛinɔɔ́ nga ngi ɣɛ́ kpál̃au nungáá tí ɣɛ́ kɔ́lɔ ngáá sítii tíwaa sí ɣɛ́ í pele w̃a.

²⁰ Ná wáá yatɛ́ mba ỹandá yiláa ngáá wú wú Yála fɛ́li ndááỹɛngi wo, ɛi ɣɛ́ gíte ngáá wú Yála fɛ́li ndááỹɛngi,

²¹ sífaa, ná wáá ɣɛ́ wáá mɛ, nuí fíli aa ngí ndái ỹɛ nɔ́ɔ. Wɔ́i ỹɔw̃ɔ́ ỹɔw̃ɔ́ w̃aalɛ́lɛ, faale, wú lɛ́ingaa waá lí ngáá ndɔlɛí wú vɛ́lɛitii nda, wú lɛ́ingaa vá wú lí ndɔɔ hóu h̃u ngáá koohe.

²² Kɛ pɛlɛ́a taa wú yáá wɔ́ɔ́ lááỹɛ na wɔ́ɔ́ kpɔle wɔ́lingaa bɔle na? Ndeé le kɛ wáá yááh̃u víli Ngala fɛ́li mbélaitii mááh̃u, wúwaa nungái ngangúfe tiyɛ́i ti ngáá Ngala fɛ́li mbélaitii taa ɣɛ́ kpéɣe su? Ndeé lɔ́ í wú gí ma ngáá ngí ndé kɔwɔ́ato fái sí wá? Wú lóngɔ ngí wú lɛ́? Aá ɣéle fɔ́ ngɛ́i wú lɛ́.

²³ Kalambongí ngí mááhɔlɔngɔ Ndemɔí yaá laá lɔ ngí mbónga ngáá wú ye. Ná wáá ngáá kpɔkɔ́i ná tí Ndemɔí Jísu lokolevéni, i biléi yeɣeí,

²⁴ í sɛ́ɣɛɛ gula Ngalá ma, í ngále ngále su, i ɣɛ volú yélaitii ma, “Ndúwui lɔ ngáá sí íwaa hé wú hááw̃a. A waayaa sí ỹɛ́ wú gíndo fááw̃a sú.”

²⁵ Ngimɔ́ɔ́ nɔ́ɔ í kɔ́pungi bɛ́lɛ ngéɣeni ná ti vílai laaỹɛ́ma, i ɣɛ ta, “Ndɔí í kɔ́pungi sí h̃u aa lɔ́ í ngáá kɛ́lɛ niinaí Ngalá ngí ngéɣengɔ ti lówah̃u taá ngi vóngaitii ní ỹááw̃ɔi w̃áá véle w̃a. Kíya fíli wáá sí bɔ́le áá ɣɛ́ kɔ́pungi sí h̃u, a waayaa kpɔle wú gíndo fááw̃a sú.”

²⁶ Ná wáá ngáá, mbéi hɔ́wɔi fíli wáá biléi sí ỹɛ ɛ́ɣɛ wú sí bɔ́le áá ɣɛ́ kɔ́pungi sí h̃u, kɛ wá lɔɔ́ Ndemɔí Jísu haalái yakɛ́ í ló su kpóloo í vá vólu.

²⁷ Faalɔ, nuí fíli áá Ndemɔí Jísu biléi ỹɛ, ɔɔ í sí bɔ́le áá ɣɛ́ ngi gɔ́pungi h̃u ngáá peleí sí áá va ngáá ngángufe Ndemɔí Jísu yɛ, pelé lálangɔ aa ɣɛ́ la faa ỹɔ́u ɣɛ́ fááw̃a ngáá Ndemɔí luwúi taá ngi ỹááw̃ɔi.

²⁸ Faalɔ, nuu fíli í gísiya ngáá bɔwɔ́ ɣɛ́ kíli hése p̃ɛ́ɛ́ ɔ́ɔ́ ɣɛ́a maa bílei ỹɛ ɛ́ɣɛ í maa gɔ́pɔngi h̃úúbɔle.

²⁹ Kɛ́ nuí fíli ɛ́i ɣɛ́ kpeléi mba ngáá kɛ biléi ná lɔ ngáá Ndemɔí Jísu luwúi aáva í máá bílei ỹɛ, ná vólu, ɛ́i ɣɛ́ kpélei mba ngáá sí í kɔ́pungi ná h̃u aá lɔ ngáá Ndemɔí Jísu ỹaaw̃ɔi, aáva í kpɔle, kɛ aa lɔ kɛ ngáá háwu Ngala fáá báma í vú ma.

³⁰ Ná lɔ́ í kɛ́nga wú bíh̃iw̃aa wú héébɛngɔ ɛ́ɣɛ wú ɣɛ́ngɔ yɔ́ɔ́lɛɛ yɔɔlɛɛ, ná vólu, wú lɛ́ingaa wú haangá.

³¹ Kɛ bele mu ɣɛ́i maá gisíya bɔwɔ́ h̃u hése, faa ɛ́i belé ɣɛ mu wa.

³² Kɛ́ Ndemɔí Ngala ngáá mu yeɣé ngáá faá mbá yélaa, í faa bá ndá mu w̃a kɛinɔɔ́ faa ba ngwálai íwaa vá lamá ngeleí sí wuu yélai ma, álaa lá a mu lɔ́ngɔ w̃a.

³³ Faalɔ, mu mbála Yála fɛ́li mbélai, ná wáá w̃aakpɔ́ mba ngáá wú wú Yála fɛli ndááỹɛngi wó, a waayaa ỹɔw̃ɔ́ ỹɔ́w̃ɔ w̃áálɛlɛ,

³⁴ kɛinɔɔ́ wɔ́ɔ́ kɛ ngáá háwu Ngalángi háá bamaí ɔ́ɔ́ vú wú w̃a. Ná nuu fíli ndɔlɛ áá ɣɛ́ ma, í mɛɛní yɛ ngi vɛ́lɛ la. Ná ngáá va, ngáá faa vékaitii kɛ kíli ɣɛ náa.