JIMISÍ 5 - Kɛ́lɛ Niinaí

Ndaahíngi kpatɛ yélaitii faaw̃a

¹ Wɛ́i va wú ngáá kpatɛ yélaitii, a wolílo náa. A wɔ́lɔ wú lúwu yá ngí lɛ́tɛ wú w̃a, sífaa faa báma wála wála lɔɔ vá wú w̃ááh̃u.

² Wú bátɛitii tí ỹááninga, aáva ngiliái ti wú gúlaitii mɛ́nga.

³ Kaaheí í wu góóliini ngaa wú gáni kolengáitii soungá. Maa gááhei sí va tɔ í waa vá ngákɛma kpál̃au kúna ngáá wáá véleni aáva aa wu lúwui ỹɛ kíya kpéi ngɔmbuí áá ŋani w̃ɔ́. Kɛ́ wu kpatɛ́ yatɛngá mba bɔwɔ́ hááw̃a ngetéya ngákɛɛlɛmai.

⁴ A wɔlɛ lɛ́ɛ́ sítii mba táá yénge wú híí hii ŋani beleítii su, wáá kɛngɔ́ wɔ́ɔ́ ti pávaitii fe ti yaá. Tiyá lɔɔ́ woo gúla ngáá maa w̃áh̃a behengí. Ti wɔlɔ́ woí i folónga Ndemɔí Ngalá ma lɛí í ngáá ngakpa mɔ́ɔ́ walaí.

⁵ Wú wú lɛ́ɛ́h̃ui h̃uuhíyanga ndiilɛí ɛ́ɣɛ ndiivo kɛɛ́ wála h̃u ngeleí sí wu. Aáva kíya nɔ́ɔ wáá níkai laa wɔ í ɣɛ́ wɔɔlɔ paa fááw̃a, ngimɔ́ɔ́ nɔ́ɔ wú bɔwɔ́ ɣɛ́nga wɔ́ɔ́lɔ folói sí hááw̃a wáá vá hááma.

⁶ Sítii taá faa wɔ́lɔ faa wá wú tí waalévenga ngáá faa ỹɔ́u yélaa wú tí váa, aáva taá lói wú láá wu.

Ndiilɔlɔ́i ɛ́ɣɛ Ngala fɛ́lindai

⁷ Faalɔ, mu mbála Yalá fɛ́li mbélai, a liilɔ́lɔ í ló su kpóloo Ndemɔí Jísu í yángaima. A tɔ lɛ́ɛ́ kíya kpaala la mɔ́i áá liilɔ́lɔ í ngi hí ŋánii w̃áálɛlɛ ná í mba pánda wo mbɛ. Aa liilɔ́lɔ ngwala í maifɔ́lɔ njɛ́i ɛ́ɣɛ ngapúmaa yɛítii mbandái w̃aalɛ́lɛ.

⁸ Wa bɛ́lɛ a liilɔ́lɔ wú ló kpáŋ, bɔw̃álale Ndemɔí Jísu vaalái volu bɛ́ɛ́ngɔɔ lé náa mba.

⁹ Faalɔ, mu mbála Yalá fɛ́li mbélai, a wálaa ɣɛ́ wáá ỹɔw̃ɔ́ ỹɔ́w̃ɔ baalɛ hóu. A waláa ná ɣɛ kɛinɔɔ́ Ngalá ngɔ́ɔ́ va wú gɔ́sɔ, sífaa kɔsɔ́ mbááleve mɔ́i lɔ náa naa bélaa.

¹⁰ Mu mbála Yalá fɛ́li mbélai, a gisíya lɛ́ɛ́ ngáá Ndemɔí Ngalá ndaa háá lé mbélaitii wɔ́lɔ, ti ɣɛ́ ngáá tɔmaseí wú hááw̃a. Ti liilɔ́lɔngɔ i ɣɛ́i lá faa báma fíli su.

¹¹ Aa lɔ ngáá faa vánda sítii fááw̃a taá líiba faa bámai h̃u. Wú faa ỹɛ́ninga kɔwɔ́ato Ngala fɛ́li mɔ́i wa tɔ́ɔ́ ɣɛ́ ma Jóo ngi líílɔlɔi wa. Aáva wú kɔ́lɔ kíya Ndemɔí Ngála ngí bɔ́i mba ngapúmai sífaa, Ndemɔí Ngala tɔ ngáá maanuma w̃ɔ́ɔ́ ɛ́ɣɛ tuva velé vándaa w̃ɔɔ.

¹² Mu mbála Yála fɛ́li mbélai, fái bíkpingi lɔ ngáá sí, a waá péle fíli mbó ngelegóóh̃u w̃a kɛlaa ndɔwɔlɔ́i sí h̃uu w̃a ɔɔ ŋani fíli nɔ́ɔ má kpósouŋ. Kɛ́ aá ɣéle faa fíli su, a lúw̃a nɔ́ɔ na wáá ɣɛ́ wáá kɛ ɔɔ wu léle ná wɔ́i ɣɛ́ wáá kɛ, kɛinɔɔ́ Ngalángi gɔ́sɔngi íwaa vá mbóma ngáá nungái kpɛ́lɛɛ, ta álaa ỹááni wú w̃a.

¹³ Ná nuu fíli áá ɣɛ́ wú lííwaa faa áá bɔ́lunda, maa w̃ɔ́i í Ngala fɛ́li. Ná vólu, ná nuu áá ɣɛ́ wú lííwaa kooh̃unɛ́ɛ́ngɔ, maa w̃ɔ́i í sɛ́ɣɛɛ gulama wúleni sɔɔlɛ́ Ngála mbɛ.

¹⁴ Ná nuu fíli áá ɣɛ́ wú lííwaa seebɛngɔ́, maa w̃ɔ́i í ndé Ngala fɛ́li kéle ɣele mbeláitii ma nátii tí ngúlɔ híya ma, tí Ngala fɛ́li ma Ndemɔí Jísu laahéingi h̃u.

¹⁵ Ná taa Ngala fɛ́li, ti lángi ná taa ɣɛ́ su ngáá Ngalá aa kɛ ngáá háwu maa héébɛ w̃ɔ́i í waló Ndemɔí Ngalá ngáá kɛ ngáá háwu maa w̃ɔ́i luwú h̃ú wúyangɔ í ɣɛ́ la mɔ́ɔ. Ná ná áá ɣɛ́ ɣɛ́ni faa ỹɔ́u fíli áá ɣɛ́ kɛ́ni suuhaa áá lo.

¹⁶ Náá hááw̃a, faa ỹɔ́itii wú tí ɣɛngá a gáhe ngáá ti ye ỹɔw̃ɔ́ ỹɔ́w̃ɔ w̃a. Ná vólu, wú Ngala fɛ́li ỹɔw̃ɔ́ ỹɔ́w̃ɔ haaw̃a kɛinɔɔ́ Ngalá ngí wú wálo. Nuí sí télembongɔ áá ɣɛ́ la Ngalá ngeyá, ngi Yála fɛli ngói yakpángɔɔ lé.

¹⁷ Ngalá ndaa háá lé mɔ́i Iláija ndá núú busalaí aa ɣɛi lééla a mu ndái wa, aáva i Ngala fɛ́lini ngáá hɛmbɛ́i kpɛ́lɛɛ ngáá njɛ álaa wa, aáva njɛ áá wáni fowó sáángɔ síkpɛ ndáá lówah̃u.

¹⁸ Aáva ná Iláija í mɔ́ɔ́ Ngala fɛ́lini njɛ wá fááw̃a, njɛí í mɔ́ɔ́ ɣɛi náá áá wa. Sii híí ŋániitii ti mɔ́ɔ pɛlɛ wamá.

^19-20 Mu mbála Yalá fɛ́li mbélai, a giséi sí w̃a. Ná wɔ́lii wú ta yílaa áá híɣe Ngala fái volú, nuu tá í kɛ ngáá háwu í yángaima Ngala fái h̃u. Nuí fíli áá kɛ ngáá háwu faa ỹɔ́u w̃ɔ́i áá vólu yafé ngi háá ỹɔítii mba, kɛ i maahaalónga kúnafɔ sái yaá aáva Ngalá ngáá ngi w̃ɔ́i háá ỹɔu bih̃i bih̃ingái suuhaaló.