JIMISÍ 3 - Kɛ́lɛ Niinaí

Mu nɛɛngí w̃áágolondai

¹ Mu mbála Yalá fɛ́li mbélai, wú bih̃íw̃aa wálaa ɣɛ́ ngáá kalambo mbó mbélaa, sífaa wú súúwɔlɔ nɔ́ɔ ngáá muỹɛ́i máá kalambongí wo, Ngalá tɔ́ɔ vá a mu gɔsɔ́ma ngwala í lɔ́ve nungáá vékaitii mba.

² A mu kpɛ́lɛɛ a maá pɔɔla vú faa yá pele bih̃íw̃aa h̃u. Ná nuu fíli ɛ́i ɣɛ́ pɔɔla vuí sí ya áá nde, kɛ tɔmbema w̃aá áá maa w̃ɔ́i wa. Aáva aa hombó ndehé í ɣɛ bɔwɔ́ w̃a,

³ kíya nɔ́ɔ ná máa ngísa gulói ná wála soí la áá kɛ ngáá háwu í gólo mu yɛ, a maá kpúsai kpɛ́lɛɛ póte mbéi véle maa ɣɛ́ lói í vóte na.

⁴ Ɔɔ ná láá lé, a gisíya lɛɛ ngáá kelé ngwálai, kíya mbɔɔlɔngɔ́ wala áá ɣɛ́ la, aáva fɛfɛ súúbangɔ wala áá ɣɛ́ áá máá lúkpe njɛi ya. Ngɛingí ná áá ɣɛ́ kéle síya mɔ́i yaá áá kélengi wú póte la, kulo kwɛ́ɛ́ngɔɔ lé. Kɛ́ laá lɔ kelé síya mɔ́i áá kélengi wú póte lá mbéi véle fíli áá ɣɛ́ lói kélengi í líí la.

⁵ Ngimɔ́ɔ́ nɔ́ɔ nuu nɛ́ɛ́ngi hái í na, kulo kwɛ́ɛ́ngɔɔ lé, kɛ́ aa yonga téve kɔwɔ́ato faa wála wála wa. A gisíya nɔ́ɔ múl̃ɔ ngáá kɛ kíya ngoolá wálai áá ɣɛ́ na, ngɔmbu leká lékai áá mɔ.

⁶ Nuu nɛ́ɛ́ngi ɣéle tɔ aá lɔ nɔ́ɔ ngáá ngɔmbu ɣɛ́ kíli. Aa lɔ ngáá faa ỹɔ́u ỹáni, í ngi ndá ỹánda mu luwúi wa, aáva tɔ áá kɛ ngáá háwu nuí ɣɛ kíli kpɛ́lɛɛ í ỹááni. Sí gíte mú wáa kɛ ndɛɛh̃úi h̃u, aa kpɛ́lɛɛ kɛ́ kíli ỹaaní kpahangɔ́ laá gíte wa ngáá njahááma wɔ́mbui.

⁷ Nuu búsa aa hombó í kɛ ngáá háwu fulú wɔ́lingaitii kpɛ́lɛɛ tí gólo mbɛ. Ná wáa ngáá, kíya ndɔbɔ huwáitii tí na ɛ́ɣɛ w̃ɔ́niaitii ɛ́ɣɛ sítii taa bókpo kóó w̃a ɛ́ɣɛ fulú wɔ́lingaitii tí yívoi wu. Aáva nuu búsa i kɛngá ngáá háwu tí gólo mbɛ.

⁸ Kɛ́ nuu fíli aa nɛɛ hombói ɔ́ɔ́ nɛɛngí w̃áágolo ngáá í ɣɛ́ áá faa kpɛ́lɛɛ ndé péle w̃a. Nuu nɛ́ɛ́ngi gúlangɔɔ lé ngáá kaali ỹɔ́u ỹɔ́u áá nuu vaa h̃umbuwa aáva ndɛɛlɛmbó ngáá ngeyá ngi háá ỹɔu ɣɛndái h̃u.

^9-10 Mu mbála Yála fɛ́li mbélai, mu nɛɛngí lɔ nuu áá Ndemɔí Ngála ndaaw̃áálɛ la, lɛ́i í ngáá mu Kɛ́ɛ́ɣɛi. Laáva tɔ nɔ́ɔ́ múl̃ɔ nuu áá faa ỹɔ́itii nde la nuu vékaitii mba, tiyɛ́i Ngala ngí tí bátɛngɔ kíya laá Ngalá í na. A mú lái sí nɔ́ɔ maá tɛ́ngi wó la, laá lɔ́ nɔ́ɔ múl̃ɔ a maá faa ỹɔ́itii ndé lá. A málaa ɣɛ́ maa ná ɣɛ.

¹¹ Kɛ́mbɛ njɛ vandáini ngaa kpolo yɛ́i tɛ́i gúla ndowa yílaa sú w̃ɔ́ima, kɛ́lɛi?

¹² Mu mbála Yalá fɛ́li mbélai, ɔ́levi ɛ́i wa féki wulúi ya kíya nɔ́ɔ féki ɛ́i wa gilépi bɔmbɔí ya. Aáva ngimɔ́ɔ́ nɔ́ɔ njɛ vandá ɛ́i gúla mbéi kpolo yɛ́ áá gúla na.

Kele ɣeléngi áá gúla Ngala ngéya

¹³ Ele lɔ kele ɣeléngɔ aáva áá faa yátɔ mba wú lííwaa? Maa w̃ɔ́i í ngákɛ nuu ɣɛ́ kɔ́lɔ ngi híya gili vánda h̃u ɛ́ɣɛ ngi lúva velé vánda wa áá gúla kele ɣelé su aáva maa w̃ɔ́i ɣɛngɔ́ lúúỹaa.

¹⁴ Kɛ́ ná wu lííyatɛtɛngɔ áá ɣɛ́ la, wu lólomangɔ, ná vólu, wú béɣengɔ nɔ́ɔ bɔwɔ́ hááw̃a, ná ná áá ɣɛ́, wálaa maayónga tevé ngáá kɛ wú géle ɣeléngɔɔ lé wɔ́ɔ́ ndɛɛ vɛ́lɛ tɔɔỹái wa.

¹⁵ Kele ɣelé táálii ná ɛi gula Ngalá ngeyá kɛ́ aa ɣɛ ngáá ngetéyangi sí h̃uu géle ɣelengí sí Hɛ́ɛ́ma Ỹínangi ndá ɛ́i ɣɛ́ mba, kɛ́ aa ɣɛ gulaí ỹína nyɔítii ngeyá.

¹⁶ Mbéi fíli tolóma áá ɣɛ́ na, aáva nungái ti beɣéngɔ nɔ́ɔ bɔwɔ́ haaw̃a, naa lɔ faa fíli ngundangɔ́ ɛ́i ɣɛ́i lá na, aáva faa ỹɔ́u híí kpɛ́lɛɛ aa ɣɛ́ na.

¹⁷ Nungái sítii taa kéle ɣelengí na w̃aahɔ́lɔ áá gúla Ngalá ngéya, tiyá lɔ́ tɔmbema w̃áá fíli ɛ́i ɣɛ́ ti wa. Tiyá lɔ́ nuu haa ỹɔu ɛ́i ɣɛ́ ti gi ma ɛ́ɣɛ ti ɣɛngɔ́ lúúỹaa, ti ngáá kisiya faa h̃ú yélaa. Ná vólu, ti h̃úúlaahengɔ ngáá ngaah̃u w̃aaw̃aanúmai ɛ́ɣɛ faa bɔ́wɔi. Ná vólu, tɛ́i suuwɔlɛ́ mbó ɛ́ɣɛ taa ngáá faa lá mbélaa yaah̃ú.

¹⁸ Ndowah̃u batɛ́ wo mbélaitii telembongí lɔ taá maahɔ́lɔ ngáá polú hái.