JIMISÍ 2 - Kɛ́lɛ Niinaí

Ndaahíngi kɔwɔ́ato nuu h̃úúwɔlɛndai wa

¹ Mu mbála Yalá fɛ́li mbélai, wɛ́i wú lángɔ ngáá Ndemɔí Jísu Kílisitii lɛ́i kaámaangɔ, a waá nuu h̃úúwɔlɛ.

² Ná náa wáá ɣɛ wú Yála fɛ́li máákpɔi h̃u, nuu tá í vá na, maayílingɔ ngáá kula vandá wála sɔw̃ɔ́ bangɔ́ áá ɣɛ́ la, góóli hule i tokoí wa, ná vólu, nyaani w̃ɔ́ɔ́ maayílingɔ ngáá kula háɣa laá bɛ́lɛ nɔ í vá na,

³ wú ngúfema hé léélaa nuí sí yɛ maayílingɔ áá ɣɛ́ la ngáá kula vandái, wú ɣɛ́ ma, “Vá, yí héi seiw̃aá vándai,” kɛ́ wú ɣɛ́ nyaani w̃ɔ́i ná w̃a, “Yá láá, ló múl̃ɔnda, ɔɔ vá, yí héi ndɔwɔlɔ́i wa kɔ́wɔ wú,”

⁴ kɛ ndowah̃u kɔlɛ́ wúl̃a áá ɣɛ́ wú h̃u, wú gísiyaitii pa wáá ɣɛ́ wáá ỹɔw̃ɔ́ ỹɔ́w̃ɔ yéɣe su, tɛ́i ɣɛ́ pele w̃a.

⁵ Mu mbála vandáitii, a wolílo. Kɛ́mbɛ Ngalá ngí lókolongɔ sítii mba ti ỹááningɔi tiyɛ́i ngeleí sí wú bátɛi ta áá ti yáa, ngáá ti ɣɛ́ ngáá kpatɛ yélaa ndangí h̃u taa ɣɛ́ su ngwala ngáá Jísu Kílisitii? Ngalángi w̃ásandai vá í ɣɛ́ ti w̃ááh̃u. Ngi w̃ásandai sí lɔ́ í sítii kuulóngɔ lá ti longɔ́ ngáá laá Ngála.

⁶ Kɛ́ ngufema áá wú yáá nyaani yélaitii fáaw̃a. Kɛ́mbɛ aáva kpatɛ yélaitii pa tɔ taá faa bá nda wú w̃a? Kɛ́mbɛ tiyá lɔ taá kɛ́ ngáá háwu wɛ́i wú háá lɔɔỹái w̃aahɔ́lɔ faa le sú masa kákala?

⁷ Kɛ́mbɛ tiyá lɔ nɔ́ɔ múl̃ɔ taá ndaaheí sínai ná ỹááni wú lókolangɔi ma, kɛ́lɛi?

⁸ Ná gíte wáá híya ngáá sava wúúỹingɔi sí pɔnɛngɔ́i Ngalá Kɔ́lɔi h̃u, ná ná áá ɣɛ, kɛ wá lɔɔ híya ngáá sí í péle w̃a. Ná wáa ngáá, sí í ɣɛ́ngɔ ta, “Ló ngáá í mbála nuú búsai kíya í lóngɔ ngáá bɔwɔ́.”

⁹ Kɛ́ ná wáá súúwɔlɛ mbó, kɛ wú faa ỹɔ́u ɣɛ́a aáva wú véle lálangɔ aa ɣɛ lá savaí h̃u ngáá sava ỹááni mbélaa.

¹⁰ Nuí fíli áá híya ngáá sávai kpɛ́lɛɛ kɛ́ ná fíli sú í ngílaa kéle tɔ nyaaní pelé lálangɔ áa ɣɛ la savaí kpɛ́lɛɛ nyááni fááw̃a.

¹¹ Bɔw̃álale Ngalángi nɔ́ɔ í ɣɛ́ngɔ ta, “Waá kɔ́lɔsiya mbó,” laá lɔ nɔ́ɔ múl̃ɔ í ɣɛ́ngɔ ta, “Waá núu váa.” Faale, bele pá wɛ́i kɔ́lɔsiya mbó, kɛ́ ná wáá nuu váá, kɛ wu ɣɛ́a ngáá sava ỹááni mbélaa.

¹² Wú yɛ́pɛ gilíí ɛ́ɣɛ wú lúva gilíí tí ɣɛ ngáá nuí sí Ngala ngáá va kɔ́sɔma ngáá savaí sí áá nuu wúmaawoma kɔ́sɔ su,

¹³ sífaa nuí sí ɛ́i nungáá yaah̃ú w̃ááw̃aanu hóu, ná Ngalá ngáá ɣɛ́ ngáá maa w̃ɔ́i gɔ́sɔ ɛi ngaah̃ú w̃ááw̃aanu hóu laá bɛ́lɛ. Kɛ́ núi sí áá nuu yááh̃u w̃ááw̃aanu hóu, Ngala ngáá maa w̃ɔ́i yaah̃ú w̃ááw̃aanu hóu kɔsɔ́ su.

Ndángi ɛ́ɣɛ maa háá ɣɛndái nuu lúva veléi h̃u

¹⁴ Mu mbála Yalá fɛ́li mbélai, aá lɔ́ ngáá faa ỹááka nuí sí hááw̃a áá ɣɛ́ ta, “Ndangɔ́ɔ́ lé ngáá Ngalá,” kɛ́ ɛi maah̃ú háá ɣɛ. Kɛ ná w̃aa lángi aa ngumááwo?

¹⁵ Ná wú mbála Yalá fɛ́li mɔ́ɔ́ áá ɣɛ́ na siỹɛ́ su ɔɔ nyah̃á h̃u, kula hɛ́li i ma ɔɔ mɛɛni wála ngí mba,

¹⁶ kɛ wú tá wú ɣɛ́a ma, “Ngalá ngí lúwɔɔ nɛ́ɛ, w̃aayíli ngáá pangɔ́, kɔɔlɛ́ álaa í lɔ, yí laaỹɛ́ í góó í hé kpé,” kɛ́ wɛ́i faa fíli kɛ́ kɔwɔ́ato kpeɣéma wɔ́lingaitii mba, ná áá ɣɛ nɔ́ɔ́ ngáá faa ỹááka.

¹⁷ Ngimɔ́ɔ́ nɔ́ɔ́ maa hái í na, ná nuu áá ɣɛ́ lái ngáá Ngalá aáva ɛ́i maah̃u haa ɣɛ́ híya gilí h̃u, kɛ nga ngáá ngi lángi ná wa.

¹⁸ Kɛ́ nuu tá aa ɣɛ ta, “Í lángɔɔ lé ngáá Ngalá. Nyá vá túva gilíítii pángɔ.” A wú lángi ɣɛ́ ná ngáá ngé wú su ngáá Ngalá tuva gilí vánda áá mba. Nyá ngí ní lángi ɣɛ́ ngáá wú ye túva gilíí h̃u.

¹⁹ Wú lángɔɔ lé la ngáá Ngalángi yíla kpé. Ná vángɔɔ lé. Ỹína ỹɔítii kele tɔ ti langɔ́ɔ́ lé ngáá ná, aáva aa nduwá vú ti h̃u.

²⁰ Faa yátɔ mba tála w̃ɔ́ɔ́ waa ngáá í ye, í lóngɔɔ lé ngí ngákɛ naa ngáá í ye kíya pele áá ndángi h̃u nuu áá ɣɛ́ su ngáá Ngalá ɛ́i maah̃ú háá ɣɛ?

²¹ Ndeé lɔ í kɛ́ni Ngalá ngí lókoheini a mu káwala Lébilah̃au wú ngáá telembo mɔ́ɔ́? Kɛ́mbɛ sí í kɛ́ni aá lɔ Ngalá ngí ngeɣéi su ngáá telembo mɔ́ɔ́? Ná wáa ngáá, ná í ngi h̃íỹɛndou loí Áise laní Ngala sááɣa gula tútui w̃a ngáá í kula ngáá saáɣa Ngalá ngéle.

²² Kɛ ngimɔ́ɔ́ maa hái í na, Lébilah̃au í ɣɛ́i laní ngáá Ngalá, í maa lángi wo hiya velé h̃u. Faí sítii í kɛ́ni, tiyá lɔ tí kɛ́ni tɔmbema w̃áá fíli áá ɣɛ́i ngi lángi wa í ɣɛ́i su ngáá Ngala.

²³ Aáva sí ndéngɔ Ngala Kɔ́lɔi h̃u, í hitɛní náa ngá ngáá sí, í ɣɛ́i ta, “Lébilah̃au i laní ngáá Ngalá, aáva ngi lángi ná w̃aa véle w̃a, Ngalá ngí ngeɣé ngáá telembo mɔ́ɔ.” Ná vá tɔ í kɛ́ni tɔ́ɔ́ Lébilah̃au lolí ngáá Ngalángi mbálai.

²⁴ Wú tɔngá náa ngáá kɛ Ngalá ngáá nuu yéɣe ngáá telembo mɔ́ɔ́ sí hááw̃a yáá kɛ aa nɔ́ɔ ngáá ndangí yílaa nuu áá ɣɛ́ su ngáá Ngalá.

²⁵ Nyɔkɔ faa waa nɔ́ɔ ngáá nyah̃ápoi sí tɔ́ɔ́ ɣɛ́ ma Léha lɛ́i ɔ́ɔ́ bɔwɔ́ w̃aa híya siỹɛngáitii ma naholói hááw̃a ngi ndá hái h̃u. Fái í kɛ́ni, laá lɔ Ngalá ngí ngéɣeni su ngáá telembo mɔ́ɔ́. Ná wáa ngáá, sí í siỹɛndópo félengɔi laaw̃áá vɛ́lɛni ti ɣɛ́i ngáá ngasɔbɛ́ mbélaa Ísulɔ yelái fááw̃a. Léha vá í ti w̃áálɔɔwuni, í ti lɔ́ve ngáá pele veká.

²⁶ Kíya nɔ́ɔ ná nuu h̃úúyafuw̃angi ɛ́i ɣɛ́ nuu h̃u, kɛ í háángɔɔ lé, ngimɔ́ɔ́ ndangí yáá ɣɛ́ su ngáá Ngalá yɛ́i maah̃u háá ɣɛ́ni, nga ngɛ́i ɣɛ́ mba.