JIMISÍ 1 - Kɛ́lɛ Niinaí

Ndaalimaí

¹ Nyɛ́i ngí ngáá Jimisí ngí ngáá ngenge mɔ́ɔ́ Ngalá mbɛ taa Ndemɔí Jísu Kílisitii, nyá lɔ́ ngáá kɔlɔí sí vɔ́nɛ. Ngí há wú kpɛ́lɛɛ má wɛ́i wú ngáá Ngala fɛ́li mbélai wú váhangɔ hááli ndɔwɔlɔ́i kpɛ́lɛɛ su.

Faa bámai ɛ́ɣɛ ndángi

² Mu mbála Yalá fɛ́li mbélai, í ɣɛ́ wú w̃a ngáá kooh̃unɛ́ɛ́ wála ná faa báma bih̃íw̃aa áá lá wú w̃a,

³ bɔw̃álale wú kɔ́lɔ ngáá wú lángi h̃uugɔvɔndái volúi aa ɣɛ ngáá ndiibángi wáá ɣɛ́ su.

⁴ Ndiibángi í wú h̃ú ngáá wú híya faa báma h̃u maa álaa yéi. Kɛ́ láa ɣéle, í ndí nɔ́ɔ́ ngu ma hɔ́wɔ fíli, kɛinɔɔ́ wú ɣɛ́ ngáá nungáá tɔmbema w̃áá fíli álaa ɣɛ́ wú wá. Sí kpɛ́lɛɛ pá áá nuu ɣɛ́ ngáá Ngala fɛ́li mɔ́ɔ́ í ɣɛ́ wú h̃ú.

⁵ Ná wú tá fíli áá ɣɛ́ na kele ɣelé ngɛ́i ɣɛ́ mbɛ, í Ngála fɛ́li ngáá Ngalá ngí kɔ ngáá kele ɣelé. Ngalá pa, lɛ́i áá ŋáni he nuu kpɛ́lɛɛ ngéya ngáá ndiiwolé ɛ́i bóɣi kpoɣí, aa fé maa w̃ɔ́i yaá.

⁶ Kɛ́ ná maa w̃ɔ́i áá Ngalá fɛ́li fááw̃a, kɛ nda ngí í ɣɛ́ su, ki mái í ɣɛ́ kpál̃au, bɔw̃álale, nuí sí ki mái ɛ́i ɣɛ́ kpál̃au kɛ kíli gulangɔ́ɔ́ lé ngáá yívoi lákpa lakpangí mbéi véle fíli fɛfɛngí áá tukpé lá naa véle lɔ áá líí la.

⁷ Álaa ɣɛ́ nuí ná gí ma ngáá aa ŋani fíli mááhɔlɔ Ndemɔí Ngála ngéya,

⁸ sífaa maa w̃ɔ́i gi mái yakɔ́lɛngɔ áá ɣɛ́ láma ki mái hákangɔ faa kpɛ́lɛɛ sú áá kɛ.

Nyaani yélaitii ɛ́ɣɛ kpátɛ yélaitii

⁹ Ngala fɛ́li mɔ́i sí nyaaningɔ́ áá ɣɛ́ la í góóh̃unɛɛ, sífaa, Ngala tɔ́ɔ ngeɣé ngáá nuu wála.

¹⁰ Ngala fɛ́li mɔ́i va kpatɛngɔ́ áá ɣɛ́ la, kɛ í góóh̃unɛɛ ná Ngalá ngáá ngéɣe ngáá ndopó, sífaa, kpatɛ w̃ɔ́i lɔɔ vá wálama ngí bátɛi w̃a kɛ kíya nɔ́ɔ tufaí áá ɣɛ́ na ndɔbɔí h̃u,

¹¹ ná fóloi laa áá wó ngáá ngí bándi bandií aa tufaí húlu fúlu laáva ngi vúɣai áá ɣɛ́ nga í vú ngi vángi í ỹááni. Ngimɔ́ɔ́ nɔ́ɔ jɔ íwaa vá ɣɛ́ma ngáá kpatɛ w̃ɔ́i. Aa lo nɔ́ɔ ngi bátɛ yéle mbelengí h̃u í wála ma.

Faa bámai ɛ́ɣɛ faa vándai

¹² Nuí sí faa bá ngɔ́ɔ́ bɔ́ɔ́ maale ɛ́i lókogula Ngala fɛ́lindai h̃u, aa lɔ́ ngáá faa vánda maa w̃ɔ́i hááw̃a. Aá lɔ́ ngáá faa vánda faaw̃a bɔw̃álale ná áá ló ngi lííbangi h̃u í ló su maa háá bamaí í víla, Ngalá ngáá kúnafɔ lɛ́ɛ́h̃ui hé ngeyá, ndɛɛh̃úi sí í sítii kuulóngɔ lá ti longɔ́i ngáá laá Ngalá.

¹³ Ná faa báma áá la nuu fíli má ngáá í kɛ ngáá i faa ỹɔ́u ɣɛ, maa w̃ɔ́i álaa ɣɛ́ ta, “Ngalá tɔ́ áá súúgɔvɔ ngáá ngí faa ỹɔ́u ɣɛ́,” sífaa nuu ɛ́i Ngála suugɔvɔ́ ngáá ɔ́ɔ́ faa ỹɔ́u ɣɛ́ kɛlaa maa Ngalá kéle ɔ́ɔ́ nuu h̃úúgɔvɔ ngáá ɔ́ɔ́ faa ỹɔ́u ɣɛ.

¹⁴ Faí fíli núi áá maa lii víli góó ya ngwala ngáá faa ỹɔ́u, aá lɔ́ áá vá ngáá suugɔvɔ́ngi áá kɛ́ maa w̃ɔ́i áá víli faa ỹɔ́i h̃u.

¹⁵ Maa hái ná vá nuu áá maa líí víli góó ya ngwala ngáá faa ỹɔ́u, ngi gúlasuunumai aa ɣɛ ngáá faa ỹɔ́u ɣɛ́ndai. Faa ỹɔ́u ɣɛ́ndai va ngi gúlasuunumai aa ɣɛ ngáá kúnafɔ sái.

¹⁶ Mu mbála Yalá fɛ́li mbélaitii wú ngáá ndíívo mbélaa, a waá kɛ nuu fíli ɔ́ɔ́ wú vɛ́lɛ.

¹⁷ Faa vándai fíli a maá maahɔ́lɔ aáva tɔmbema w̃áá fíli ɛ́i ɣɛ́ mba, kɛ ná i gulangɔ́ ngelegóóh̃u. Ngalá pá tɔ áá ɣɛ́ féi a mu yaá, lɛ́i í ŋániaitii kpɛ́lɛɛ kpátɛngɔ tí ngeleya táá hólo, lɛ́i nɔ́ɔ́ mɔ́ɔ́ ɛ́i faa lé ɔ́ɔ́ síɣe ma ngáá volú yáfendaa kɛ kíya folói áá vólu yáfe kpindíí áá vɛ́lɛ.

¹⁸ Ngalá kpútei tɔɔỹaá gééla woí w̃aa véle w̃a i mu wɔngá ngáá ndɛɛh̃ú gítei. I kɛní h̃íí ná sífaa i kpatɛ́i gí ma ngáá í kɛ. Aáva i ɣɛngɔ loí mu ɣɛ́ ngáá maifɔ́lɔ mbélaa ngi bátɛ wɔlingái kpɛ́lɛɛ ndííwaa.

Faa ỹɛ́nindai ɛ́ɣɛ kɛ́ndai

¹⁹ Mu mbála Yalá fɛ́li mbélaitii wú ngáá ndíívo mbélaa, a ɣɛ́ fái sí wɔ́lɔ. A ɣɛ́ ngáá faa ỹɛ́ni mbélaa hɔ́wɔ fíli. Wálaa ɣɛ́ wáá bɛ́li ngáá yɛpɛndáá kalambo sú kɛlaa maa wú líí ɔ́ɔ́ ɣɛ́ kolo ngá,

²⁰ sífaa ndiiyaw̃ál̃ai ɛi kɛ ngáá háwu nuu ɔ́ɔ́ híya ngáá Ngalá ndiivó pélei.

²¹ A bé tuva velé ỹɔ́i kpɛ́lɛɛ mbá ɛ́ɣɛ nyaamá háá ɣɛndái. Ngalá ndaa wói sí í léngɔ wú w̃á, a lokohéi mbu lɛ́i lɛ́i, wú bɔ́wɔ gula kɛlɛ́ma mbɛ, aa hómbo í wú wúmaawo.

²² A waá bɔ́wɔ vɛ́lɛ ngáá ngoli lóngi nɔ́ɔ wáá mbó Ngalángi gééla woí w̃a, kɛ́ aá ɣéle, a hiya ngáá sí wáá mɛ́ni.

²³ Nuí fíli áá wólilo keela woí sí w̃a kɛ́ ɛ́i híya ngáá maa hái, kulangɔ́ɔ́ lé ngáá nuí sí áá bɔ́wɔ béle mɛl̃ɛ mɛl̃ɛí h̃u.

²⁴ Na áá bɔ́wɔ béle mɛl̃ɛ mɛl̃ɛí h̃u, aa pele hóu náá í lí, aáva ngamá nɔ́ɔ aa leew̃a ngáá kíya kpatɛ kilíí í na.

²⁵ Kɛ́ Ngalá ndaa wói í ngáá savaí tɔmbema w̃áá fíli áá mba, aa nuu wúmaawo. Nuí sí áá kála ngáá pangɔ́ aáva í ndi ngu ma ngáá sí ɣɛndáá áá ɣɛ́ kálani aáva ɛ́i lééw̃a sí w̃a áá ɣɛ́ mɛ́nini, kɛ́ í wáá kɛ, sí fíli áá lóko víli su aa ɣɛ ngáá faa vánda faaw̃a.

²⁶ Ná nuu fíli áá gisíya ngáá kɛ aá lɔ ngáá Ngala fɛ́li mɔ́ɔ́ vanda, aáva ɛi nɛɛ tó nɛɛ túwɔ, kɛ aá lɔ́ɔ bɔwɔ́ vɛ́lɛ, ngi Yála fái va pele áá su.

²⁷ Sí mu Kɛ́ɛ́ɣɛ Ngalá ngáá ngéɣe ngáá tɔɔỹaá Yála fɛlindái tɔmbema w̃áá fíli áá mbá aá wáa ngáá sí, kpɔmba wóndai pondengáitii mba ɛ́ɣɛ ponyah̃áitii mba ti háá bɔlundaítii su. Ná vólu, nuu í w̃aah̃ú béle ngáá ngeleí sí wuu háá ỹɔítii ta ɔ́ɔ́ vá híyama.