HÍBULU 9 - Kɛ́lɛ Niinaí

Ngelewu ɛ́ɣɛ ngelegóóh̃u Yála fɛlindái ɣɛ kílitii

¹ Savaní ti ɣɛ́i Ngala fɛ́lindai ɣɛ kíli w̃a bɛ́kpɛ hése kɛlɛngí h̃ú Ngala ngí ngéɣeni ti lówah̃u taá ngi vóngaitii. Nungáitii ti kula ỹɛpɛ́l̃ɛngi bátɛni ngáá ti Yála fɛli máa.

² Nyɛpɛ́l̃ɛngi sí tɔ́ɔ́ kpatɛ kɔlɛngɔ́ i ɣɛi lá su féle ngáá kula wala. Hése keleí i ɣɛi ngáá mbéi tɔ́ɔ́ náá lolí ngáá Hɛ́ɛ́ma Ỹándai. Lámbo towaí i ɣɛi ná, téévei i na ɛ́ɣɛ bílei í ɣɛ́i ngáá Ngala kɔ́ngi.

³ Kula walái vólu vélei lɔ tɔ́ɔ́ náá lolí ngáá Hɛ́ɛ́ma Wála Ỹándai.

⁴ Hɛ́ɛ́ma Wála Ỹándai ná vá tɔ Ngala sááɣa gula tútui í ɣɛ́i na kpatɛngɔ́ ngáá góóli tɔ́ɔ́ ngɛí w̃ááku nɛɛ nɛɛngí ná w̃ɔ́ na taá tolí ngáá ísɛngi. Ná vólu, Kɛ́lɛ Kal̃áŋal̃a Ngwalaí i na góólii i ma hááli hááli. Jái i ɣɛi mɔ́ɔ́ su kpatɛngɔ́ ngáá góóli, mɛɛníí sí taa tolí ngáá máánai ta guló í jái ná h̃u. Ná vólu, Éél̃ɔ lukpɔ walaí í ɣɛ́i náá buulɛ́i mba í ɣɛi su, ná vólu, kɔtu hɛvɛ́ gúlo gulo félengɔi nátii tí su Ngalángi háva púúngɔitii ti vɔ́nɛngɔ í ɣɛ́i la tí w̃a.

⁵ Kal̃aŋál̃angi ná w̃ááh̃u véle, tí ŋáni félengɔ bátɛi kovó ngi ti wa gúlangɔ ngáá fúlu wɔ́li kɛ́ kíli tí na. Tiyá vá tɔ tɔ́ɔ́ ngákɛ ngáá mbéi fíli kal̃aŋál̃angi ná ɔ́ɔ́ ɣɛ́ na, kɛ Ngalá tɔ́ na. Ti góvongitii ti ɣɛ́i ỹandái mbéi w̃ááh̃u faa ỹɔ́itii suuháá ɔ́ɔ́ ló ná kal̃aŋál̃angi ná w̃ááh̃u. Kɛ́ ngɛ́i mɔ́ɔ́ lo maa háitii kpɛ́lɛɛ súúgulama tɛ́ɛ́lɛ tɛ́ɛ́lɛ.

⁶ Ná maa háitii suubatɛngɔ́ ɔɔ ɣɛ náa lá, Ngala sááɣa gula mbélai tɔ́ɔ́ lɛ́ mbéi í ɣɛ́i ngáá Hɛ́ɛ́ma Ỹándai kula ỹɛpɛ́l̃ɛngi ná wú. Naa lɔ tɔ́ɔ́ ti Yála ngéngengitii mbó na foló fíli.

⁷ Kɛ nɔ́ɔ léi Ngala sááɣa gula mbélai ti wutúwɔɔ w̃ɔ́ɔ́ walaí ɔ́ɔ́ lɛ́ ngapúmaa geleí ná ŋál̃a mbéinda í ɣɛ́i ngáá Hɛ́ɛ́ma Wála Ỹándai, aáva ɔ́ɔ́ lɛ́ nɔ́ɔ na yíla kpé fowói h̃u. Ɛ́i béle lɛ́ nɔ́ɔ na bɔɔw̃á, kɛ léi ɔ́ɔ́ lɛ́ ngáá toŋani ỹááw̃ɔi ɔ́ɔ́ kula ngáá saaɣái bɔwɔ́ hááw̃a ɛ́ɣɛ nungái ti háá ỹɔítii fááw̃a tɛ́i béle ɣɛ́ faa wɔ́lɔ ti wa ngáá kɛ faa ỹɔ́u le.

⁸ Hɛ́ɛ́ma Ỹínangi aa hómbo í kɛ mu ɣɛ́ kɔlɔ ngáá kɛ fái sítii ngéɣe kílii kɔwɔ́ w̃a kpóloo aá lɔ ngákɛ ngáá kɛ Hɛ́ɛ́ma Wála Ỹándai sí laawóngɔ áá ɣɛ́ngɔ lá nɛ́nɛ nuu kpɛ́lɛɛ fááw̃a, ná nɔ́ɔ léi nungáá ti ɣɛ́i taa yénge kula ỹɛpɛ́l̃ɛngi ná wu.

⁹ Ỹandái sítii kpatɛ kílii h̃íí ná, tiyá lɔ́ taá faa yákɛ ngáá mu ye kɔwɔ́ato sí h̃úi wa. Kɛ ná wáá ngáá, Ngala fémbɛ wɔ́lingai nátiini ɛ́ɣɛ toŋanií nátii tɔ́ɔ́ kula ngáá saáɣa Ngalá ngéle tɛ́i belé kɛ ngáá háwu Ngala fɛ́lindaa laalíí na ɔ́ɔ́ nuu gí máá ɣɛ́ kpál̃au Ngalá kákala.

¹⁰ Nátii tiyá lɔ́ nɔ́ɔ́ ngáá faaní kɔwɔ́ato mɛɛníni mba ɔɔ kpɔle wɔlíngaani mba ɔɔ pele vekáitiini nuu búsa áá kɛ bɛ́kpɛ faa ỹɔ́itii ngúya fááw̃a nuu w̃a. Nátii kpɛ́lɛɛ taa ngáá faá tɔ́ɔ́ nuu búsa líí w̃áálovi, ti ɣɛ́i nɔ́ɔ́ na ngáá ti ló ná kpóloo í ló su Ngala ngí fáitii kpɛ́lɛɛ kɛ́ kíli batɛ́ vólu.

¹¹ Kɛ́ Kílisitii i ngáá Ngala sááɣa gula mɔ́ɔ walaí, i vaangá náa kílii aáva í kɛa ngáá háwu mu faa vándaitii maahɔ́lɔnga. Mbéi áá ngí Yála sááɣa gula ngéngengi wó na, naa lɔvengɔ́ɔ́ lé ngeleí sí wuu géleaitii mba aáva faa ỹɔ́u vó fíli aa naá wa. Nuu búsa láá le ɔ́ɔ́ kpátɛ, ná wáá ngáá, aa ngáá ngeleí sí wú géle.

¹² Kílisitii í lɛ́ɛ́ni yíla kpé Hɛ́ɛ́ma Wála Ỹándai, aa mɔɔ lói naa w̃áálɛlɛma ngáá ɔ́ɔ́ ɣɛ́a lɛ́ na yíla fówo fíli sú. Aa ɣɛ́i ngáá toŋaní ỹááw̃ɔ ɔ́ɔ́ lɛ́ɛ́ la na kíya njeé ɔɔ nikaní ti ỹááw̃ɔ áá ɣɛ́ na, kɛ́ i ɣɛi ngáá kpɔwɔ́ bɔ́wɔ ỹááw̃ɔi í lɛ́i la na ngáá í kula ngáá Ngala sááɣai aáva ná i kɛní ngáá háwu mu kúnafɔ wúmaawongi w̃ááhɔlɔ.

¹³ Ngala sááɣa gula mɔ́i ɔ́ɔ́ nika yivói w̃ɔ, í maa lúwui bɛ́kpɛlɛ nungáitii ma, í mɔ́ɔ́ njééngi ɔɔ nika ỹaaw̃ɔ́i vahá múl̃ɔ ti w̃a. Ɔ́ɔ́ ná ɣɛ́ ngáá nungái sítii kpaló ɔ́ɔ́ ɣɛ́ ti wa Ngalá sávai w̃áá véle í w̃a, í wúya ti w̃a.

¹⁴ Ná ɣɛ́ndai ɣéle na ɔ́ɔ́ kpalo wúya nuu w̃a kɛlaa Kílisitii ỹááw̃ɔi, laá ɣéle p̃ɛ́ɛ́, aa hombó í faa wála ɣɛ́ í lɔ́ve ná wa. Hɛ́ɛ́ma Ỹínangi w̃áá véle w̃a í na kúnafɔ, Kílisitii í bɔwɔ́ gúlani ngáá Ngala sááɣa faa ỹɔ́u vó fíli áá mba. Ngi ỹááw̃ɔi w̃áá véle w̃a, a mu gi máitii kɛ kíli aa batɛ́ ngáá a mu lóko ɛ́i mɔ́ɔ́ ɣɛ ngangímba lála háitii mba nuu áá kɛ kɛinɔɔ́ a maayáá yengé Ngalá mbɛ lɛ́i í ndɛɛh̃ú h̃u.

¹⁵ Háwui sí hááw̃a, Kílisitii lɔ í kɛ́lɛ niinaí sí bátɛngɔ Ngalá ndówah̃u taá nungáitii, ngáá kɛinɔɔ́ sítii Ngalá ngí lókolongɔ ti wa ngáá ngí vóngaa tí kulasuunúmai sítii maahɔ́lɔ i na kúnafɔ Ngala ngí ti guulónga la. Sí aa ɣɛ bɔw̃álale, Kílisitii i sái sí wónga áá kɛ́ ngáá háwu nuu búsaa wumáá í wo faa ỹɔ́itii ngéya tí kɛ́ni ná h̃u nɛ́nɛ kɛlɛ pɔ́lɔi í ɣɛ́i ti lówah̃u taá Ngalá.

¹⁶ Ná kɔlɔí áá ɣɛ ngáá poŋaní lówawo kɔ́lɔ, kɛ í ɣɛ́ ngáá tɔɔỹaá ngáá nuí í pɔ́nɛngɔ i haangá,

¹⁷ sífaa, kɔlɔ laalíí ná pele ɛ́i ɣɛ́ su ná núi áá ɣɛ́ pɔ́nɛni áá ɣɛ́ nɛ́nɛ ndɛɛh̃ú h̃ú. Kɔlɔí ná h̃úú hái aa ɣɛ nɔ́ɔ léi ná nuí ná áá ɣɛ́ pɔ́nɛni ɛ́i ɣɛ́ ndɛɛh̃ú h̃u.

¹⁸ Ná lɔ́ í kɛ́ni hésendaa gɛlɛngí ná ɣéle tɔ bɛ́lɛ i ɣɛi nɔ́ɔ léi ngáá fáá ngangímba ngáá ná ŋaaw̃ɔ í vúni pólu véle h̃u, ná wáá ngáá, kɛ ŋani ɔ́ɔ́ há.

¹⁹ Hésendaa haí Muusé í kɛ́ni, í sávai kpɛ́lɛɛ súúgulani nungáitiini ma kíya pɔnɛngɔ́ Ngala Kɔ́lɔi h̃u. I nika ỹaaw̃ɔ́ini ngaa njéé ŋááw̃ɔi báhai náá njɛ́i wa í fáha maa Yála Kɔ́lɔi w̃a ngáá ngulúi sí taa tolí ngáá héésɔi ɛ́ɣɛ múl̃ɔ mbaala belé kpíỹangi. Ná vólu, í mɔ́ɔ́ fahá lá nungáitii kpɛ́lɛɛ má.

²⁰ Muusé i ndení, i ɣɛ ta, “Ŋaaw̃ɔ́i sí lɔ́ í ngáá kɛ́lɛngi sí w̃ááh̃u yílingɔi Ngala ngí ngéɣeni a mu lówah̃u maá laa í ndéngɔ mú w̃a ngáá a mu híya la.”

²¹ Ngimɔ́ɔ́ nɔ́ɔ múl̃ɔ jɔ́ Muusé í ŋááw̃ɔi váha fáhani kula ỹɛ́pɛl̃ɛngi ná w̃a ɛ́ɣɛ sítii kpɛ́lɛɛ ma í ɣɛ́i na Ngala fɛ́li fááw̃a.

²² Tɔɔỹaá kái kái te ngáá savaí í ndéngɔ ngáá kɛ nɔ́ɔ léi ŋaaw̃ɔ́i w̃áá véle w̃a áá kɛ ngáá háwu faa ỹɔ́u áá wúya ŋani fíli má Ngalá ngááh̃u aáva ná ŋááw̃ɔ ɛ́i ɣɛ́ vúúni faa ỹɔ́u h̃úúhaa ɛ́i ló.

Saáɣa haí Jísu Kílisitii í mbóni laá lɔ áá faa ỹɔ́i w̃úỹa

²³ Fái sítii ti bátɛ gilíí gúlangɔɔ lé ngáá sítiini tí ngelegóóh̃u ti w̃áábale, aáva kɛ tɔ́ɔ́ ti wúya h̃íí na. Kɛ́ sítii ti ngáá ngelegóóh̃u géleaitii, kɛ saáɣa ya ngúyangɔ í lɔ́ve ngelewu hááɣai sítiini mba áá kɛ́ ngáá háwu ti w̃áá í w̃úỹa.

²⁴ Aa ngáá nuu búsa Hɛ́ɛ́ma Wala Ỹándai batɛngɔ́i nɔ́ɔ Kílisitii ɔ́ɔ́ ɣɛ́ lɛɛngɔ́ ná lɛ́i gúlangɔ ɔɔ la nɔ́ɔ́ ngáá sí í ngélegooh̃u ngi w̃áábale. Kɛ́ i lɛɛngɔ́ ngelegóóh̃u gíte mbéi náá í na íwaa mu w̃áánɛɛnɛ mbó Ngalá ma.

²⁵ Kílisitii aa lɛɛngɔ́ ngelegóóh̃u ngáá ɔ́ɔ́ ɣɛ́ áá bɔwɔ́ gúla nɔ́ɔ kélei ngáá saáɣa múl̃ɔ kíya Ngala sááɣa gula mbélai ti wútuwɔɔ w̃ɔ́ɔ́ walaí ɔ́ɔ́ toŋaní ỹááw̃ɔ haaɣaí gúla fowó fíli má Hɛ́ɛ́ma Wála Ỹándai áá ɣɛ́i ngáá kpɔwɔ́ ỹááw̃ɔ.

²⁶ Kɛ bele ngí múl̃ɔ kule í ɣɛ́i ma í ɣɛ́ na, kɛ ná ná ɔ́ɔ́ ɣɛ, kɛ Kílisitii w̃áánɔw̃ɔndai hei h̃úú ɔ́ɔ́ ɣɛ́ bíh̃i ká ka í séi ngeléwu bátɛ sɔ́wɔi w̃a. Kɛ́ áá ɣéle, fáitii ngákɛɛlɛmaa bɛɛngɔ́i sí náá mba i bɔ́wɔ gúlanga kɛ́lɛma nuu kpɛ́lɛɛ fááw̃a ngáá kɛinɔɔ́ í faa ỹɔ́i wúya nuu kpɛ́lɛɛ má ngáá bɔwɔ́ gúlandai ngáá saáɣa naa héiw̃aa í ɣɛ́i yíla kpé.

²⁷ Kíya nɔ́ɔ kɛ nuu fíli í há yíla ná ná áá gúla su Ngala ngí nuu gɔ́sɔ,

²⁸ ngimɔ́ɔ́ nɔ́ɔ Kílisitii í bɔwɔ́ gúlani ngáá saáɣa naa héiw̃aa í ɣɛ́i yíla kpé ngáá kɛinɔɔ́ í nuu bíh̃iw̃aa ti háá ỹɔítii nguyá ti w̃a. Aá lɔɔ vá vaamá vólu múl̃ɔ kɛ́ sí h̃úi ɛi mɔɔ ɣɛ ngáá faa ỹɔ́u wúya fáá nuu w̃a, kɛ́ aá ɣéle, aá lɔɔ vá naá sí h̃úi ngáá í sítii ngumááwo tí yaah̃ú í túwɔ.