HÍBULU 8 - Kɛ́lɛ Niinaí

Jísu Kílisitii lɔ́ í ngáá mu Yála sááɣa gula mɔ́ɔ́ walaí

¹ Njɛpɛí sí kpɛ́lɛɛ ngungí wáá ngáá, Ngala sááɣa gula mɔ́ɔ́ wala lɔ mu yaá kíya nɔ́ɔ sí í na mu yɛ́pɛngɔ kɔwɔ́ato mba. Laá va tɔ náa héini ngufema ỹándai ngelegóóh̃u Ngakpa Ngála Ngwalaí bélaa masandáá h̃u.

² Aá lɔ́ɔ Ngala sááɣa gula ngéngengi wo Hɛ́ɛ́ma Wála Ỹándai i Ngala Pɛ́lɛ giteí wú Ndemɔí Ngala kíte í tóngɔ ngelegóóh̃u. Aa ngáá nuu búsaa vɛ́lɛ lóngɔ.

³ Ngalá sááɣa gula mɔ́ɔ wala fíli kɛ ɔ́ɔ́ fembɛ wɔ́lingi hé Ngalá mbɛ í mɔ́ɔ Ngala sááɣa gula. Náá hááw̃a, a mu Yála sááɣa gula mɔ́ɔ walaí bɛ́lɛ kɛ ŋani í ɣɛ́ ngeyá ngáá áá kula ngáá sááɣa mu haáw̃a.

⁴ Kɛbei i ɣɛi ngelewu ɛ́i béle ɣɛ́ ngáá Ngalá sááɣa gula mɔ́ɔ́ kpósouŋ sífaa Ngala sááɣa gula mbélaa lɔ náá na tíwaa Ngala sááɣa gúla savaí laa wói w̃áá véle w̃a Ngala ngí féni Muusé yáá.

⁵ Ngala sááɣa gula ngéngengi sí taá mbó ngelewu aá lɔ́ nɔ́ɔ́ ngáá faa w̃áábale kɛ kíli, i ngáá sí ɣɛ́ kíli áá wó ngelegóóh̃u. Maa hái gúlangɔɔ lé nɔ́ɔ ngáá sí ɣɛ́ kíli í ɣɛ́i Muusé ndái h̃u. Ná wáá ngáá, ná í ɣɛ́i áá vá kula ỹɛpɛ́l̃ɛngi ná bátɛma tɔ́ɔ́ Ngala fɛ́li na sí Ngala ngí ndéi ma, i ɣɛi ngáá sí, “Kíya nɔ́ɔ kpatɛ kíli í ɣɛ́ngɔ ngáá í ye bɛ́kpɛ ná h̃u yí ɣɛ́ngɔ ngihéngi wá, ndama gíte tɔ́ yí kpátɛ nɔ́ɔ ngáá naa híya veléi ná kpóloo.”

⁶ Kɛ́ Jísu ndá Yála sááɣa gula ngéngengi sí láa tɔvengɔ́ɔ́ lé Ngala sááɣa gula mbélai sítii ti ndái wa kíya nɔ́ɔ kɛ́lɛngi sí í súúbatɛngɔ Ngalá ndówah̃u taá ngi vóngaitii pangɔ́ hése keleí wa bɔw̃álale kuulóngaitii pangɔ́ɔ́ lé hése guulóngaitii mba.

⁷ Kɛbei faa fíli áá ɣɛi hésendaa gɛlɛngí wa, kɛ kule ɛ́i belé ɣɛ́ múl̃ɔ ma féle kéle ɔ́ɔ́ ɣɛ na.

⁸ Kɛ́ Ngala ngí ngatɔ́i mba ngáá kɛ faa lɔ́ ngi vóngaitii mba áá ɣɛ́i pele w̃a ná wáá ngáá, sí Ndemɔí Ngala ngí ndéni, i ɣɛ ta, “Naa hɔwɔ́i lɔɔ vá fóloma ma ná h̃u ngáá vá kɛ́lɛ niina yeɣéma ni lówah̃u naa Ísulɔ yélaitii ɛ́ɣɛ Júda yeláitii.

⁹ Ɛi ɣɛ ngáá kɛ́lɛngi sí ɣɛ́ kíli í ɣɛ́i ní lówah̃u naá tí káwalani wɔ́lɔ ná h̃u ngí kɛ́ni ngáá háwu ti gúlani ndɔwɔlɔ́i sí wa taa tolí ngáá Íjepi. Taá híyai ngáá tɔɔỹaá véle kɛ́lɛngi sí h̃u ngí ngéɣei ní lówah̃u naá tiyéni. Faalɔ, ngí vólu yáfeni ti wa.

¹⁰ Kuu tá lɔɔ vá fóloma ma, kɛ́lɛngi ngáá vá ngéɣema náa ni lówah̃u naa Ísulɔ yeláitii, aá wáá ngáá, ngáá kɛ́ ngáá háwu ní hávaitii ti héi ti gi má, tí ɣɛ́ ti líítii su. Ngáá ɣɛ́ ngáá Ngalángi tí haáw̃a, tiyá vá tí ɣɛ́ ngáá ní vóngaa.

¹¹ Nuu fíli ɛi mɔɔ lo ɣɛ́ma ngí létɔ ɔɔ ngi mbála w̃a, ‘Ɣɛ́ Ndemɔí Ngalá kɔ́lɔ,’ bɔw̃álale ti kpɛ́lɛɛ taá ɣɛ́ kɔ́lɔ tí ɣɛ́i ngáá ndaahéi mbá yélaa, taa ɣɛ́i ngáá ndaahéi mbá yélaa.

¹² Ngáá ti yaah̃u w̃ááw̃aanu hóu ti háá ỹɔítii su aáva kúnafɔ ngɛ́i mɔ́ɔ́ ti háá ỹɔítii séi gi má.”

¹³ Ná Ngála ngáá yɛ́pɛ kɛ́lɛ níína wa, ná lɔ́ áá ngákɛ kpál̃au ngáá kɛ hésendaa geleí i vɔ́lɔnga, aáva ŋani fíli pá áá ɣɛ́ áá vɔ́lɔ ngi háá ya ngáá wála walá mba í ɣɛ ngáá ŋani áá mɔ́ɔ́ vaamá ɣɛ́ma na.