HÍBULU 7 - Kɛ́lɛ Niinaí

Ngala sááɣa gula mɔ́i Mɛlɛkésedɛ

^1-2 Siỹɛndópoi sí tɔ́ɔ́ ɣɛ́ ma Mɛlɛkésedɛ i ɣɛi ngáá masa ngwála taí sí hááw̃a tɔ́ɔ́ naa lolí ngáá Sel̃ɔ. Taí sí laahéingi vá mbuí wáá ngáá ndiihéi. Aáva Mɛlɛkésedɛ i ɣɛi ngáá Ngala sááɣa gula mɔ́ɔ́ Ngutuwɔ́ Yála Ngwalaí yɛ́. Mɛlɛkésedɛ laahéingi ngi h̃úúgulamai waa ngáá, telembo ndɔ́wɔlɔ w̃ásangi. Ngi lááheingi h̃úúgulamai waa múl̃ɔ ngáá masa ngwálai ndiihéi hááw̃a sífaa, Mɛlɛkésedɛ i ɣɛi ngáá masa ngwálai Sel̃ɔ haaw̃a. Ná Lébilah̃au í ɣɛ́i áá gúla kɔ́ɔ́ wɔ́mai ná h̃u í ndɔ́wɔlɔ w̃ása ngwala waláitii kulaí kɔ́i h̃u, Mɛlɛkésedɛ í hɛ́ɛ́ni ma ná ti w̃ɛ́ɛ́ni peleí h̃u. Sí kínɛi pá Lébilah̃au í mááhɔlɔni kɔ́i ná h̃u, ɔ́ɔ́ kpáɣa taávu bɛ́kpɛ puu kéleitii í tí kpɛ́lɛɛ fé Mɛlɛkésedɛ yaá.

³ Nuu fíli áá faa wɔ́lɔ Mɛlɛkésedɛ kɛ́ɛ́ɣɛ ɛ́ɣɛ ngi njéé wa, kɛlaa maa nuu ɔ́ɔ́ ɣɛ́ faa wɔ́lɔ ngi káwalani ngaa ngi mámani mba. Nuu fíli aa kɔ́lɔ táingi na h̃u ti ndéni ɛ́ɣɛ táingi ná í hááni. Kɛ́ kulangɔ́ɔ́ lé nɔ́ɔ ngáá Ngalángi H̃íỹɛndou Loí Ngala sááɣa gulandái h̃u sífaa, aa lɔ ngáá Ngala sááɣa gula mɔ́ɔ́ kúnafɔ fááw̃a.

⁴ A gisíya lɛ́ɛ́ ngáá kíya Mɛlɛkésedɛ yakpángɔ wala í ɣɛ́i la ngáá i mú káwala Lébilah̃au ɣéle tɔ ngeyá wɔ́lingaitii í mááhɔlɔni kɔí h̃u i ti kpɛ́lɛɛ kpáɣani ngáá taávu táávu í púú kéleitii kpɛ́lɛɛ fé ngeyá.

⁵ A mu káwala Lívai laala lengáitii tiyɛ́i taa ɣɛ́ tí w̃a Lívaingaitii ti ngáá Ngala sááɣa gula mbélaa, tiyá lɔ́ Ngala sávai í ndéngɔ ngáá kule lɔ ti w̃a ti ɣɛ́ taá Ísulɔ yeláitii ti yaá wɔ́lingaitii puu kéleitii mááhɔlɔ kíya bɛ́lɛ ti lɔ́ngɔ tiyá lɔ́ nɔ́ɔ ngáá mbolondáá yílaa, ti ngáá Lébilah̃au laala lengaa.

⁶ Mɛlɛkésedɛ aa ɣɛi ngáá Lívai laala lou, kɛ́ ná fíli su, i Lébilah̃au yaá wɔ́lingaitii puu kéleitii mááhɔlɔni aáva í hɛ́ɛ́ni Lébilah̃au yɛ, Lébilah̃au va tɔ Ngala ngí ɣɛ́i kuuló mbóni la.

⁷ Aáva aá lɔ́ ngáá tɔɔỹaá ngakɛ́ngɔ kpál̃au ngáá, nuí áá hɛ́ɛ́ nuí yɛ́, kɛ í yákpangi lɔ́vengɔ í ɣɛ́ lá ngi ndái wa.

⁸ Ngala sááɣa gula mbélaitii ti ɣɛ́i taá nungái ngeyá wɔ́lingaitii puu kéleitii mááhɔlɔ tiyá lɔ ngáá nungáá taa há. Kɛ́ Mɛlɛkésedɛ laá í nungáá yáá wɔ́lingaitii puu kéleitii mááhɔlɔni Ngala Kɔ́lɔi i ndengɔ́ ngáá aá lɔ́ ndɛɛh̃ú h̃u.

^9-10 Lívai laala lengáitii tɔ náa tíwaa nungáá yáa wɔ́lingai puu púú kéleitii mááhɔlɔ. Kɛ́ nuu ɣɛ́ náá p̃ɛ́ɛ́ nuú ndé, ná Lébilah̃au í yáa wɔ́lingaitii puu púú kéleitii fení Mɛlɛkésedɛ yaá, kɛ Lívai bɛ́lɛ nɔ́ i yaá wɔ́lingaitii puu púú kéleitii fení Mɛlɛkésedɛ yáa, sífaa, ti ɣɛ́i taa vá Lívai lemá naa wutúwɔ Lébilah̃au le kpámbii h̃u.

Jísu gulangɔ́ɔ́ lé ngáá Mɛlɛkésedɛ

¹¹ Ngala ngí ngi hávaitii féi mu vóngaitii ngeyá aáva Lívaingai tɔ tɔ́ɔ́ kɛ ngáá háwu ti híya ngáá ti ye ti Yála saaɣa gula ngéngengi w̃áá véle w̃a. Kɛ́ Ngala sááɣa gula mbélai ti yéngengi ná ɛ́i béle nuu ɣɛ́ kíli batɛ́ fó fóndei Ngala ngaah̃u. Náá hááw̃a, kɛ Ngala sááɣa gula mɔ́ɔ́ veka ɔ́ɔ́ vá kíya Mɛlɛkésedɛ í ɣɛ́i na ngi ndá Yála sááɣa gula ngéngengi h̃u, áá ɣɛi ngáá siỹɛndópoi sí ɣɛ́ kíli tɔ́ɔ́ ɣɛ́ ma Éél̃ɔ ngi ndá Yála sááɣa gula ngéngengi h̃u.

¹² Ná nde kpámbi veka áá víli Ngala sááɣa gulandái h̃u, kɛ sávaitii bɛ́lɛ ti w̃áá í lóvi.

¹³ A mu Lemɔ́i Jísu lɛ́i fái sítii ndéngɔ kɔwɔ́ato mba i gulangɔ́ nde kpambi véka h̃u. Nuu fíli pá aa ngi lé kpámbii h̃u yɔ́ɔ́ ɣɛ́ i Ngala sááɣa gula ngénge mbongá nápa.

¹⁴ Ngakɛngɔ́ɔ́ lé kpál̃au ngáá a mu Lemɔ́i Jísu i gulangɔ́ nde kpambíi sí h̃u taa tolí ngáá Júda. Aáva nápa ná Muusé ɔ́ɔ́ ɣɛ́a yɛ́pɛ kɔwɔ́ato Ngala sááɣa gula fáá wa, aa nde kpambíi ná laahéi tólini na.

¹⁵ Ngala sááɣa gula ngéngengi sí Lívaingaitii tɔ́ɔ́ mbo, ná ɛ́i belé nuu ɣɛ́ kíli batɛ́ fó fóndei Ngala ngááh̃u. Aáva fái sí yá ngí ɣɛ́nga kpál̃au ná Ngala ngí Ngala sááɣa gula mɔ́ɔ́ veka lɔvengá kíya Mɛlɛkésedɛ í ɣɛ́i na.

¹⁶ Ngala sááɣa gula mɔ́i sí Ngala ngí tɔ́vengɔ, ngi ndá Yála sááɣa gula ngéngengi í mááhɔlɔngɔ, kɛ́ aa maahɔ́lɔngɔ ngi lé kpambíi w̃áá véle w̃a, kɛ́ laá ɣéle, sífaa, ngakpá tɔ́ ngeyá áá gúla ndɛɛh̃úi sí h̃ú ɛ́i ỹááni kúnafɔ.

¹⁷ Sífaa, sí pɔ́nɛngɔ Ngala Kɔ́lɔi h̃u kɔwɔ́ato mba aá waa ngáá sí, “Yá lɔ́ ngáá Ngala sááɣa gula mɔ́ɔ kúnafɔ kíya nɔ́ɔ Ngala sááɣa gula mɔ́i Mɛlɛkésedɛ í ɣɛ́i na ngi ndá Yála sááɣa gula ngéngengi h̃u.”

¹⁸ Hésendaa havaí ná aá mɔ́ɔ́ nga bɔw̃álale, maa hávai ngakpá ngáá ɣɛi su ngáá ɔ́ɔ́ nuu gúla faa h̃u.

¹⁹ Saváitii Ngala ngí féni Muusé yaá ngakpá ngáá ɣɛi ti h̃u tɔ́ɔ́ núu ɣɛ́ kíli batɛ fó fóndei Ngala ngááh̃u. Kɛ́ Ngala ngí kitomáá vánda gulái kɛ́lɛma a mu yɛ áá kɛ́ ngáá háwu a mú fólo laa Ngalá ma.

²⁰ Sí mɔ́ɔ́ gíte í maa hái wá aá waa ngáá, Ngala ngí faa h̃uubátɛngi sí wóni í maa véle mbo. Nungáá vékaitii tɔ́ɔ́ Ngala sááɣa gula ngéngengi sí w̃ááhɔlɔ pele faa fíli ɛ́i belé ɣɛ mba.

²¹ Kɛ́ Jísu laá i Ngala sááɣa gula ngéngengi sí w̃ááhɔlɔni péle mááh̃u. Ná wáá ngáá, sí Ndemɔí Ngala ngí ndéi, í ɣɛ ta, “Ngí máá véle mbónga gíte kúnafɔ ngáá ngɛ́i gí mái w̃áálovi. Yá lɔɔ ɣɛ́ ngáá Ngala sááɣa gula mɔ́ɔ́ kúnafɔ.”

²² Peléngi ná Ngala ngí mbóni aá lɔ́ í Jísu ɣɛ́a ngáá tokolá ma w̃ɔ́ɔ́ a mu yaá. Ná ná áá ɣɛ, kɛ kɛ́lɛ pánda lɔ Ngala ngí ngéɣenga a mu lówah̃u a maá láa í lɔ́ve hése keleí wa.

²³ Léélaangi múl̃ɔ í Ngala sááɣa gula kúúwu félengɔi sítii ndowáh̃u aá wáá ngáá, hésendaa guuwuí h̃úú yélaitii tɛ́i belé ndí ngú ma ngáá ngengengí sí wóndaa kúnafɔ sífaa, ti ɣɛ́i ngáá nungáá kɛ tɔ́ɔ́ há nɔ́ɔ faalɔ, kɛ tɔ́ɔ́ ɣɛ́ bih̃í.

²⁴ Kɛ́ Jísu laá aá lɔ́ ndɛɛh̃ú h̃u kúnafɔ. Faalɔ, laá lɔɔ ɣɛ́ ngáá Ngala sááɣa gula mɔ́ɔ́ a mu haáw̃a kúnafɔ.

²⁵ Náá hááw̃a, nuí fíli áá lí Ngalá ngéle Jísu w̃áá véle w̃a, Jísu aa hómbo í maa w̃ɔ́i wumááwo kpésekele bɔw̃álale, lɛ́i í ngáá Jísu aá lɔ́ na kúnafɔ íwaa yɛ́pɛ nungáitii faaw̃a Ngalá ngéle.

²⁶ Jísu ndá Yála sááɣa gulandái h̃u, aa hombó í mú gúla a mu beɣéma háitii sú bɔw̃álale, aá lɔ́ ngáá hɛ́ɛ́ma w̃ɔ́ɔ́, tɔmbema w̃áá fíli aa mba aáva aa ngáá faa ỹɔ́u ɣɛ mɔ́ɔ kíya mu ngáá faa ỹɔ́u ɣɛ́ mbélaa. Ngalá pa i kɛngá ngáá ngangímba w̃ɔ́ɔ́ wála ngelegóóh̃u.

²⁷ Aa ngáá Ngala sááɣa gula mbélai ti wutúwɔɔ w̃ɔ́ɔ́ wala vekáitii kɛ kíli. Ná wáá ngáá, ngele fíli táá le áá wó yɔ́ɔ́ ɣɛ́ kɛ aa sááɣa gula bɔ́wɔ hááw̃a hése ngi háá ỹɔítii fááw̃a ɔ́ɔ́ ɣɛ́a sááɣa gula nungái ti háá ỹɔítii fááw̃a. Kɛ́ aá ɣéle, i sááɣai gúlai nɔ́ɔ su yíla faa ỹɔ́itii kpɛ́lɛɛ fááw̃a ná h̃ú í lɛ́ɛ́h̃ui gúlai kɛ́lɛma ngáá sááɣa.

²⁸ Sávaitii maa véle w̃á Ngala ngí féni Muusé yáá tɔ́ɔ́ lokoló nungáá wa ngáá ti ɣɛ́ ngáá Ngala sááɣa gula mbélaa. Taá ɣɛ́i ngáá nungáá yɔ́ɔ́ ɣɛ́ ta faa ỹɔ́u vó ngáá ɣɛ́i tí w̃a. Kɛ́ ná savaí nátii ti háá í gúlani su, kɛ́lɛngi Ngala ngí ngeɣéni maa véle w̃aa lɔ́ í kɛ́ni í lókoloni ngi H̃íỹɛndou Loí wa ngáá ná í ɣɛ ngáá ngi hááɣa gula mɔ́i lɛ́i í ngáá nuú kɛ kíli batɛngɔ́ fó fóndei ná ɣɛ́ fááw̃a kúnafɔ.