HÍBULU 5 - Kɛ́lɛ Niinaí

¹ Ngala sááɣa gula mbélai ti wutúwɔɔ w̃ɔ́ɔ́ wala fíli aa ɣɛ nɔ́ɔ ngáá nuú Ngala ngáá lokoló mba ngi mbála nungáitii ndiiwáá ngáá í ɣɛ́ ngáá ngi mbála nuú búsaitii ngaah̃u Ngalá kákala, ná wáá ngáá, ááyaa fembɛ wɔ́lingaani fe ti háá ỹɔítii fááw̃a ɛ́ɣɛ ááyaa saáɣani kúla ti háá ỹɔítii fááw̃a.

² Aa hómbo í sítii ngaah̃ú w̃ááw̃aanu hóu tɛ́i ɣɛ́ Ngala sávaitii kɔ́lɔ. Ná vólu, aa mɔɔ hómbo í sítii ngaah̃ú w̃ááw̃aanu hóu taa ɣɛ́ káka péle wa bɔw̃álale, laá bútei suubangɔ́ láá lé ngáá ɔ́ɔ́ hómbo ɔ́ɔ́ fái kpɛ́lɛɛ kɛ́ péle w̃a nɔ́ɔ kíya savaí áá nde.

³ Ná lɔ́ áá kɛ, kɛ aa sááɣani kula ngi háá ỹɔítii fááw̃a laá bɛ́lɛ ɛ́ɣɛ nungáitii ti háá ỹɔítii fááw̃a.

⁴ Nuu fíli ɛi lokolo nɔ́ɔ bɔwɔ́ wa ngáá í ngúfema lóów̃ai sí w̃ááhɔlɔ, ná wáá ngáá, í ɣɛ́ ngáá Ngala sááɣa gula mbélai ti wutúwɔɔ w̃ɔ́ɔ́ wala, kɛ́ aá ɣéle, Ngalá tɔ áá lókolo nuu wa kíya nɔ́ɔ í lókoloi wɔ́lɔ siỹɛndópoi ná wa tɔ́ɔ́ ɣɛ́ ma Éél̃ɔ.

⁵ Ngimɔ́ɔ́ nɔ́ɔ jɔ́ í na ngáá Kílisitii ɣéle tɔ bɛ́lɛ aa lokolói nɔ́ɔ bɔ́wɔ wa ngáá í ngúfema lóów̃ai ná w̃ááhɔlɔ maanɛ́ɛ́ngɔ wálai, ná wáá ngáá, Ngala sááɣa gula mɔ́ɔ́ wala yengengí. Kɛ́ aá ɣéle, Ngalá tɔ́ í ndéi ma, i ɣɛ ma, “Yá lɔ́ ngáá ní H̃íỹɛndou Loí, í séi hááwɔ w̃a ngí ɣɛ́a ngáá í Kɛ́ɛ́ɣɛ.”

⁶ Ngala ngí mɔɔ ndeí ma ỹandái tá Ngala Kɔ́lɔi h̃u ngáá sí í ɣɛi ta, “Yá lɔ́ ngáá Ngala sááɣa gula mɔ́ɔ kúnafɔ kíya nɔ́ɔ Ngala sááɣa gula mɔ́i Mɛlɛkésedɛ í ɣɛ́i na ngi ndá Yála sááɣa gula ngéngengi h̃u.”

⁷ Ná h̃u Jísu í ɣɛ́i ngelewu ndɛɛh̃u h̃u, í Ngala fɛ́lini woo wála h̃u áá wɔ́lɔ ná í ɣɛ́i áá Ngála mɔ́ɔ́ni kpɔ́mba hááw̃a. Ngalá pá lɛ́i ngakpa ngí ngeyá ngáá áá nuu wúmaawo sái yáa, i mɛniní bɔw̃álale, Jísu í bɔwɔ́ gúlai kɛ́lɛma Ngalá mbɛ́.

⁸ Kíya bɛ́lɛ í ngáá Ngalángi H̃íỹɛndou Loí, kɛ́ i hómboni í naa wɔlí ngáá kíya ɔ́ɔ́ kɛ í gólo Ngalá mbɛ. Aáva i hómboni í sí ŋál̃aa wɔli maanɔw̃ɔ́i h̃u í ngéɣeni.

⁹ Maanɔw̃ɔ́i sí í híyai su, aá lɔ́ áá ngákɛ ngáá kɛ Jísu lɔ ngáá kolo mɔ́ɔ́ wála, aáva laá maa véle lɔ́ náa nuu áá kúnafɔ lɛ́ɛ́h̃ui w̃ááhɔlɔ ma, ná wáá ngáá, nuí fíli áá gólo mbɛ.

¹⁰ Ngala ngí lókoloni Jísu wa ngáá Ngala sááɣa gula mɔ́ɔ́ wala kíya nɔ́ɔ siỹɛndópoi ná tɔ́ɔ́ ɣɛ́ ma Mɛlɛkésedɛ í ɣɛ́i ngáá Ngala sááɣa gula mɔ́ɔ́ wala.

Wu h̃úú í ɣɛ́ áá bá Ngala fái h̃u

¹¹ Faa bíh̃iw̃aa lɔ́ na ngáá kule í má ngáá ngí ndé wú w̃á kɔwɔ́ato faí sí wa, kɛ́ suugúlandaa bangɔ́ wála le bɔw̃álale, faítii ngatɔ́ndaa mba wú yɛ́ kpangɔ́ɔ́ lé ngwála.

¹² Seímil̃a p̃ɛ́ɛ́, nuu ɣɛ́ gíte nuú ndé sí h̃úi kule lɔ náá ma wú ɣɛ́ wáá kalambo mbó kɔwɔ́ato Ngala fái sítii mba. Kɛ́ wú ɣɛ́ kíli sí w̃á nɛ́nɛ kpɛ́, kule lɔ́ ma wú ɣɛ́ wáá kalambo mááhɔlɔ kɔwɔ́ato hésendaa galambongitii mba tí Ngalá kééla woí h̃u. Maa hái gúlangɔɔ lé ngáá kule í ɣɛ́ngɔ náá ma wú ɣɛ́ ngáá kpakolongáá náa, wú ɣɛ́ wáá mɛ́ɛ́ni bákpa mɛ. Kɛ́ wú ɣɛ́ kíli gulangɔ́ɔ́ lé nɔ́ɔ nɛ́nɛ kpɛ́ ngáá ndoú lálani waa ɣɛ́ wáa nyiní bɔ́le nɛ́nɛ.

¹³ Nuí fíli áá ɣɛ́ nɛ́nɛ kpɛ́ áá nyíni bɔ́le, kɛ maa w̃ɔ́i lɔ ngáá ndoú lála. Náá hááw̃a, ɛi ɣɛ kulaɣɛ́i ngáá nuú ngáá áá hómbo í ɣɛ́ kɔ́lɔ kíya áá kalambo mbó kɔwɔ́ato sí wá áá ɣɛ́ péle w̃a ɛ́ɣɛ sí wa ɛ́i ɣɛ́ péle w̃a.

¹⁴ Mɛɛni bákpangai tɔ na kpakolongáitii faaw̃a tiyɛ́i ti galámbongɔ áá ɣɛ́ náá la ngáá taa ɣɛ́ léélaangi wɔ́lɔ fáá ỹɔ́ini ngaa faa vándaitii ndówah̃u.