HÍBULU 2 - Kɛ́lɛ Niinaí

Wolíɣɛ Ngalángi gééla woí w̃a

¹ Ná lɔ́ í kɛ́a kɛ a mú wóliɣɛ Ngalá kééla woí w̃a mú maahɔ́lɔngɔ tɔɔỹaá gálambo sú ngáá kɛinɔɔ́ a mɔ́ɔ́ va híɣe Ngala pélei wa.

² Ngala kééla woí malékaitii tí ndéni wɔ́lɔ, nga ngí ɣɛ́i kpál̃au ngáá kɛ tɔɔỹaá le. Faalɔ, nuí fíli ɔ́ɔ́ ta ỹááni kɛ tɔ́ɔ́ maa ỹɔ́kɔ faa ba nda í w̃a.

^3-4 Ngimɔ́ɔ́ nɔ́ɔ mɔ́ɔ́ í ná ngáá Ndemɔí Jísu hése tɔ í fáá léni mu w̃a kɔwɔ́ato ngumaawóngi wa. Sítii pa tí ngoo ỹɛ́nini tiyá lɔ́ náá tí ngákɛngɔ ngáá mu ye ngáá kɛ tɔɔỹaá le. Ngalá bɛ́lɛ i ngakɛ́ngɔ ngáá mu ye ngáá tɔɔỹaá le ngáá faí sítii kɛ́ndaa bɛ́kpɛ. Ná wáá ngáá, káámaa haítii ɛ́ɣɛ kíndaa vilí fáitii kɛ́ndaa ɛ́ɣɛ múl̃ɔ kíya áá kɛ ngáá háwu Hɛ́ɛ́ma Ỹínangi áá ɣɛ́ mú volú kíya áá ɣɛ́ loí í ɣɛ́ mu yilá ngíla pólu. Ná ná áá ɣɛ, a maá ɣéle w̃áávela faa bámai wa Ngala ngáá vá ndáma mu w̃a ná á maá wóli híɣe ngumaawó kééla woo walaí sí w̃a Ngala ngí kúlangɔ kɛ́lɛma?

Jísu i haaní mu kpɛ́lɛɛ fááw̃a

⁵ Ngetéya níínai sí í náá wutúwɔ ngumaawóngi w̃áá véle w̃a múwaa yɛ́pɛ kɔwɔ́ato mba, Ngalá ngáá maléka lóngɔ máá véle la.

⁶ Kɛ́ ỹánda lɔ na Ngala Kɔ́lɔi h̃u faa vɔ́nɛngɔɔ lé na, aá wáá ngáá sí, “Ngalá, ndeé búte waa ngáá nungáitii í béɣengɔ ti haáw̃a ɔɔ nuu búsaa ngáá ti béɣe ngí wa?

⁷ Yí tí ndá yákpangi ya njéinga kulo malékaitii tí ndá yákpangi wa. Yí kɛ́a ngáá háwu faa w̃áánɛɛnɛɛ ɛ́ɣɛ ngúfema tí ɣɛ́ ti yɛ kíya nɔ́ɔ taá mása mbɔ́ɔ́lɔ vɛ́lɛ ndɔwɔlɔ́ w̃ása ngu mba.

⁸ Yí tí ɣɛ́nga ngáá masa faa kpɛ́lɛɛ mááh̃u.” Ná Ngala ngí ti ɣɛí ngáá masa faa kpɛ́lɛɛ mááh̃u, faa fíli áá na yɔ́ɔ́ ɣɛ́ ta aa mbalái ti w̃ásandai wu. Kɛ́ maá tɔ́ma nuu búsaitii ti léhe ɔ́ɔ́ ɣɛ́ faa kpɛ́lɛɛ mááh̃u náa.

⁹ Kɛ́ aa vá mú kɔ́lɔ ngáá kɛ Ngala ngí Jísu wunga njéini kulo, ngi ndá yákpangi aa ɣɛi hitií malékaitii ti ndá yákpangi h̃u. Sí i ɣɛní kɛinɔɔ́ Ngalángi háá bɔwɔí w̃áá véle w̃a Jísu í há nuu kpɛ́lɛɛ fááw̃a. Kɛ́ a mú kɔ́lɔ náa sí h̃úi ngáá kɛ Ngala ngí faa w̃aanɛ́ɛ́ nɛɛ ɛ́ɣɛ ngufema hénga mbɛ kíya nɔ́ɔ masa mbɔ́ɔ́lɔ áá ɣɛ́ ndɔwɔlɔ́ w̃ása ngu mba bɔw̃álale, i w̃aanɔw̃ɔ́ngɔ ɔ́ɔ́ ɣɛ́a ha.

¹⁰ Ngalá tɔ́ í ŋani kpɛ́lɛɛ kpátɛngɔ aáva í kpɛ́lɛɛ kpátɛngɔ ngi wúfemai hááw̃a. I ɣɛi loí í kɛ ngáá háwu ngufemaí í mbɛ́ í ɣɛ́ polú yélaa bih̃íw̃aa yɛ́. Faalɔ, í ɣɛi pele w̃a ngáá nuí sí áá kɛ ngáá háwu nuu áá ngumaawóngi w̃ááhɔlɔ, í máá w̃ɔ́i ɣɛ kíli batɛ́ fó fóndei sái w̃áá véle w̃a ná í mbóni.

¹¹ Jísu aa kɛ ngáá háwu nungáá ti w̃ááw̃uỹangɔ í ɣɛ́ la fó faa ỹɔ́i yaá aáva maa nungái nátii ti báha mba ti kpɛ́lɛɛ ti ɣɛ́ náa ngáá nuu yílaa, ti Kɛ́ɛ́ɣɛi í ɣɛ́ yíla ná wáá ngáá, Ngalá. Ná lɔ́ í kɛ́a Jísu ɛ́i wúfe ngáá ti lolindáá ngáá ngi vóngaa.

¹² Jísu aa ɣɛ Ngalá ma, “Nyá lɔ́ɔ́ faa lé ní vóngaitii ma kɔwɔ́ato sí wa yí kɛ́ngɔ, ngí mɔ́ɔ́ í lááw̃aalɛ ti yaah̃ú w̃a ná taa vá í hɛ́lima.”

¹³ Jísu í mɔ́ɔ́ ɣɛ ta, “Nyá lɔɔ lokolá Ngalá ma.” Í mɔ́ɔ ɣɛ ta, “Nyá belé náá ndengái sítii Ngala ngí tí hénga ngéya.”

¹⁴ Sífaa, nduwú lɔ́ ndengái sítii ma, ŋaaw̃ɔ í tí h̃u, ná lɔ́ í kɛ́i Ngala ngí Jísu bɛ́lɛ kpátɛni ngáá ti ɣɛ́ kíli ngáá kɛinɔɔ́ saí w̃áá véle w̃a í ɣɛ́i áá vá mbó má í Ngutuwɔ́ Ỹína Nyɔí ɣɛ́ kíli ỹááni lɛ́i ngákpa ngí ngéya sái w̃ááh̃u.

¹⁵ Ná ná áá ɣɛ, Jísu ɔ́ɔ́ sítii ngumááwo náá ti ɣɛ kíli gulangɔ́ ngáá nduwɔá Ngutuwɔ́ Ỹína Nyɔí yáa ti lɛ́ɛ́h̃ui h̃u kínɛi sífaa nɔ́ɔ taa ɣɛ́ taa lúwa saí wa.

¹⁶ Ngakɛngɔ́ɔ́ lé kpál̃au ngáá kɛ Jísu aa vaangɔ́ bɔ́ma malékaitii mba, kɛ́ aá ɣéle, aá lɔɔ bɔ́ Lébilah̃au laala lengáitii mba kíya nɔ́ɔ pɔ́nɛngɔ Ngala Kɔ́lɔi h̃u.

¹⁷ Ná lɔ́ í kɛ́i kɛ Jísu ɣɛ kíli ɔ́ɔ́ ɣɛ ngáá nuu búsa pele fíli sú nɔ́ɔ. Ná ná áá ɣɛ́, ɔ́ɔ́ ɣɛ́ náa ngáá Ngala sááɣa gula mbélai ti wutúwɔɔ w̃ɔ́ɔ́ walaí nungáitii fááw̃a í ngáá nuu yááh̃u w̃ááw̃aanu hóu mɔ́ɔ́ ɛ́ɣɛ tókola ma w̃ɔ́ɔ́ Ngalá ngeyá kɛinɔɔ́ Ngala ngí nungáitii ti háá ỹɔítii suuhaaló.

¹⁸ Ná aá vá Jísu í w̃áánɔw̃ɔngɔ suugɔvɔ́ngaitii ngeyá ngáá i faa ỹɔ́u ɣɛ, ná lɔ́ áá kɛ áá hómbo í bɔ́ sítii mba suugɔvɔ́ ngáá wó ngáá ti ye ngáá ti faa ỹɔ́u ɣɛ́.