GALÉSIYA 6 - Kɛ́lɛ Niinaí

A waayaa loko he ỹɔw̃ɔ́ ỹɔ́w̃ɔ yɛ

¹ Mu mbála Yalá fɛ́li mbélai, ná wɔ́lii wú tá fíli áá víli faa ỹɔ́u h̃u, wɛ́i Hɛ́ɛ́ma Ỹínangi áá wú wúto, a ndama tɔ́ wú bɔ́ maa w̃ɔ́i wa ngáá pángɔ kɛinɔɔ́ í hítɛ pele vandá wa. Kɛ́ wá bɛ́lɛ a w̃aah̃ú béle kɛinɔɔ́ wɔ́ɔ́ víli faa ỹɔ́i ná tá ɣɛ́ndaa h̃u.

² A waayaa bɔ́ ỹɔw̃ɔ́ ỹɔ́w̃ɔ wá wú háa bɔlundáitii su. Ná wáá ɣɛ́ wáá sí ɣɛ, kɛ wá lɔɔ gólo Kílisitii hávaitii mbu.

³ Ná nuu fíli áá gisíya ngáá kɛ laá lɔ́ ngáá ngangímba w̃ɔ́ɔ́ wála, laáva aa ngáá ngangímba w̃ɔ́ɔ́ wála fíli, kɛ aá lɔ́ɔ bɔ́wɔ vɛ́lɛ nɔ́ɔ.

⁴ Nuu yíla ngílangi fíli kɛ í bɔ́wɔ lúva veléi yásɔbɛ. Ná áá ɣɛ́ váni, aa ɣɛa bɔwɔ́ lɛ́ náa ngi háá vándai hááw̃a. Kɛ́ álaa ló suw̃áma nuu vékaa ndá lúva vele w̃a,

⁵ sífaa, kɛ nuí fíli í ɣɛ́ áá ngi ndá gɛ́ɛ́ háitii kɛ.

⁶ Nuí fíli áá ɣɛ́a kalambo mááhɔlɔ Ngala fái h̃u, sí fíli áá ɣɛ́ ngeyá ngáá ŋani vánda, kɛ í ngákɔlɛ ti lówah̃u taá ngí káámɔi.

⁷ A waá bɔ́wɔ vɛ́lɛ. Nuu fíli ɛ́i Ngalá ngákpolowa. Sí ŋaníi sí híí nuí áá sí, ngi híí lɔ nɔ́ɔ jɔ́ áá kúla.

⁸ Nuí fíli áá ɣɛ́ áá híya ngáá liivó fáa ỹɔ́itii, kúnafɔ sái lɔ áá mááhɔlɔ ngáá polú hái. Kɛ́ nuí sí áá ɣɛ́ áá híya ngáá Hɛ́ɛ́ma Ỹínangi liivó fáitii, aa kúnafɔ lɛ́ɛ́h̃ui w̃ááhɔlɔ ngáá polú hái Hɛ́ɛ́ma Ỹínangi w̃áá véle w̃a.

⁹ Náá hááw̃a, a málaa bɔ́lɔ ngáá faa vánda ɣɛ́ndaa, sífaa ná a mɔ́i ɣɛ́ bɔ́lɔni, naa hɔwɔí lɔɔ va folóma ma a maá kúlasuunuma w̃aahɔ́lɔ su.

¹⁰ Faalɔ, ná nɛ́nɛ toko í mu yɛ, a maa yáá faa vánda ɣɛ́ nuu fíli mbɛ́ ngungí í ndá mɛ́ɛ sítii ma a maá tiyéni mu ngáá nde ngiláá ndangí w̃áá véle w̃a a mu su ngáá Jísu Kílisitii.

Ngakɛɛlɛ́ ndááhi ngoí

¹¹ Tokovó ngwála walaí sí wáá tɔ wú ɣɛ́ kɔ́lɔ nɔ́ɔ ngáá kɛ nyá búte lɔ́ ngáá pɔ́nɛ ngáá bɔwɔ́ lóko.

¹² Nungái sítiini táá kpa wú w̃á ngáá kulé ngáá ti wú lɔ́ve pɛlɛ́ vólu, tiyá lɔɔ sí ɣɛ́ kɛinɔɔ́ Júsuai tí lókohei ti wu. Laáva sí í kɛ́a léi tíwaa sí ɣɛ ma aá wáa ngáá kɛinɔɔ́ tálaa faa bá maahɔ́lɔ keela wóo léndai h̃u kɔwɔ́ato Kílisitii váándai wa kúlɔsii w̃a.

¹³ Sítii kéle tɔ ti lɔ́vengɔ pɛlɛ́ vólu, taá góloma savaí sí wú Ngala ngí féni Muusé yaá. Kɛ́ ti longɔ́ɔ́ lé ti wú lɔ́ve pɛlɛ́ vólu kɛinɔɔ́ taá ɣɛ́a maayónga tevé ngáá kɛ tí kpángɔ wú w̃á ngáá kúle ngáá ti wú lɔ́ve pɛlɛ́ vólu.

¹⁴ Kɛ́ nyá laa ngɛ́i ŋáni fíli mááyonga tevé kɛ nɔ́ɔ léi sái mu Lemɔí Jísu Kílisitii í mbóngɔ kúlɔsii w̃a. Maa hái ná va í mbóngɔ kúlɔsii w̃a, í kɛ́a ngáá háwu ni ndá áá mɔ́ɔ ngeleí sí wúú háa ta fíli su aáva ngeleí sí wúú háá tá fíli aa mɔ́ɔ ní ndá h̃u kíya nɔ́ɔ nungáá taa ha ti háá ɛ́i mɔ́ɔ ɣɛ́ ỹɔw̃ɔ́ ỹɔ́w̃ɔ háá h̃u.

¹⁵ Faalɔ, tí nuú lɔ́vei pɛlɛ́ vólu ɔɔ taá nuu lɔ́vei pɛlɛ́ vólu aa ngáá faa fíli. Kɛ́ sí í ngáá faí, aá wáá ngáá Ngala ngí nuu ɣɛ́ ngáá nuu níína ɣɛ́ kíli.

¹⁶ Bɛlɛ́ Ngalángi lííhei ɛ́ɣɛ ngi yááh̃u w̃aaw̃aanumaí ti ɣɛ sítii kínɛi mbɛ́ taá gólo kalambongí sí wú ti lɛ́ɛ́h̃ui h̃u í báha náa Ngala fɛ́li mbélaitii kpɛ́lɛɛ mbá.

¹⁷ Ngundamái waa náa ngáá, nuu álaa mɔ́ɔ va ngáá faa báma mááh̃u, bɔw̃álale piliítii ti ndúwui w̃a tiyá lɔ́ taá ngákɛ ngáá kɛ nyá lɔ ngáá Jísu lúwɔ lopo.

¹⁸ Mu mbála Yála fɛ́li mbélai, bɛlɛ́ a mu Lemɔí Jísu Kílisitii haa bɔwɔí í ɣɛ́ wú kpɛ́lɛɛ mbɛ́. Amíína!