GALÉSIYA 5 - Kɛ́lɛ Niinaí

Í wúmaawongi w̃aah̃ú béle

¹ Á maá mɔ́ɔ ngáá nduwɔá bɔw̃álale Kílisitii i mu wúmaawonga. Faalɔ, aa ngumááwongi hái yeɣé ngáá hɛmbɛ́, wálaa mɔ́ɔ ɣɛ ngáá nduwɔá ɣɛ́ kíli.

² A wolílo sí w̃a nyɛ́i ngí ngáá Pɔ́ɔ ngáá nde wú w̃á! Ná wáá lúw̃ama ngáá ti wú lɔ́ve pɛlɛ́ vólu kɛinɔɔ́ wú ɣɛ́ ngáá telembo mbélaa Ngala ngááh̃u, ná ná áá ɣɛ́, kɛ kulasuunúma fíli aa wú yɛ́ Kílisitii hái h̃u.

³ Faalɔ, nyáá ngáá ndaahi ngói sí lé múl̃ɔ nuu fíli mbɛ́ ngáá nuí áá lúw̃ama tí tɔ́ve pɛlɛ́ vólu kɛinɔɔ́ í ɣɛ́ ngáá telembo mɔ́ɔ Ngalá ngááh̃u, kɛ kule lɔ́ máa w̃ɔ́i w̃a í gólo Ngala sávai kpɛ́lɛɛ mbú.

⁴ Wɛ́i va wáá yakpá ngáá wú gólo sávai wu kɛinɔɔ́ wú ɣɛ́ ngáá telembo mbélaa Ngalá ngááh̃u, wú bɔ́wɔ bétevenga Kílisitii wa. Wáá mɔ́ɔ Ngalangí háá bɔwɔí wu.

⁵ Kɛ́ ni gitóngɔɔ lé Ngalá mbá ngáá í ni ɣɛ́ ngáá telembo mbélaa. Ná vá tɔ náa máá maalɛ́lɛ ngi H̃ɛ́ɛ́ma Ỹínangi yákpangi w̃áá véle w̃a ɛ́ɣɛ ni lángi ní sú ngáá Jísu Kílisitii.

⁶ Ná nuu báhangɔ áá ɣɛ́ la Jísu Kílisitii wa, bele bɛ́lɛ í lɔ́vengɔ aa ɣɛ lá pɛ́lɛ vólu ɔɔ í lɔ́vengɔ ɛi ɣɛ lá pɛ́lɛ vólu, ná aa ngáá faa fíli kpósouŋ. Kɛ́ sí í ngáá faa bíkpingi laá wáa ngáá ndangí nuu áá ɣɛ́ sú ngáá Jísu Kílisitii. Ná vá tɔ áá kɛ ndongí áá ɣɛ nuu h̃u nuu vekáitii fááw̃a.

⁷ Wú ɣɛ́ngɔ wáá fáitii kɛ pele w̃a í ló sú kpóloo nuu ta i wú wú ngápote wú híɣe tɔɔỹaá vélei wa.

⁸ Ngalá lɛ́i í wú lólingɔ, laá láá le ɔ́ɔ́ ná ɣɛ.

⁹ Taá ndé ngáá faanɛ́ɛ́, ti ɣɛ́ ta, “Ngɛí gúloi ná taa ɣɛ́ ma yíísii, kulo kw̃ɛ́ɛ́ tɔ nɔ́ɔ léi taá pú fuláwai h̃u í kpɛ́lɛɛ tɛ́nga.”

¹⁰ Kɛ́ ndángɔɔ lé ngáá wú ye nɛ́nɛ. A mu báha gilíí wa Ndemɔí Jísu wa, ndángɔɔ lé lá ngáá kɛ wɛ́i kisiyá véka wo. Aáva nuí sí fíli áá wú yákpolowa, i ɣelé ɣɛ́i naa fíli Ngalá ngáá faa bá ndá ma.

¹¹ Mu mbála Yalá fɛ́li mbélai, ná wɔ́lii ngɔ́ɔ́ ɣɛ́ ngáá ndé ngáá nuu lɔ́vendaa pɛlɛ́ vólu aá lɔ́ pele w̃a, kɛ́ ndeé lɔ́ ɔ́ɔ́ kɛ nungáá tɔ́ɔ́ ɣɛ́ táá fáa báma la má nɛ́nɛ kpɛ́? Aáva bele ná lɔ́ ngí ɣɛ́i ngáá nde, kɛ sí ngáá nde kɔwɔ́ato Jísu váándai wa kulɔ́sii w̃a, ɛ́i belé vá ngáá ngoo ya fáha fíli.

¹² Nungái sítii táa wú wú ngapóte, ngáá ɣɛ́ nɔ́ɔ ngí tɔ́ ngáá taá kɛ́ɛ́lɛma tɔve pɛ́lɛ vólui wa, kɛ́ aá ɣele, tiyá lɔ́ bɔwɔ́ wúú váá p̃ɛ́ɛ́.

¹³ Kɛ́ wɛ́i wú ngáá mu mbála Yalá fɛ́li mbélai, Ngala ngí wú lólingɔ ngáá wú wúmaa í wó, kɛ́ wálaa lokola náa wú wúmaawongi w̃a ngáá sí fíli áá ɣɛ́ ngáá wú líívo fáa ỹɔ́itii wááyaa ti ɣɛ. Kɛ́ aá ɣéle, a yenge ỹɔw̃ɔ́ ỹɔ́w̃ɔ yɛ sífaa, wú lóngɔ ngáá ỹɔw̃ɔ́ ỹɔ́w̃ɔ.

¹⁴ Ngalá sávaitii kpɛ́lɛɛ pá ngungí í yíla aáva mbaa ngáá sí í ɣɛ́ngɔ ta, “Ló ngáá í mbála nuú búsaitii kíya í lóngɔ ngáá bɔwɔ́.”

¹⁵ Kɛ́ ná wú lúva gilíí áá ɣɛ́ ngáá kíya ndɔbɔ huwáitii tí na, wáá bɔwɔ́ lúwu yá fúúlɛ, wáá ỹanda héi heí ỹɔw̃ɔ́ ỹɔ́w̃ɔ wa, kɛ ná wáá ɣɛ́ wáá fái sítii kɛ, kɛ́ a nda gi sú ngáá kɛ wá lɔ́ɔ vá bɔ́wɔ háá h̃uu ỹáánima pɔ́lɛɣɛ pɔ́lɛɣɛ.

Bɛlɛ́ Hɛ́ɛ́ma Ỹínangi í ɣɛ́ áá wú wúto

¹⁶ Faalɔ, nyá lɔ́ɔ nde wú w̃á ngáá bɛlɛ́ Hɛ́ɛ́ma Ỹínangi í ɣɛ́ áá wú wúto wú lɛ́ɛ́h̃ui h̃uuhíya kílii h̃u. Ná lɔ́ áá kɛ wɔ́i mɔ́ɔ hiya nɔ́ɔ ngáá faa ỹɔ́u fíli áá wú líívo.

¹⁷ Sífaa, sí í ngáá faa ỹɔ́i a mu líi áá mú ló ma, Hɛ́ɛ́ma Ỹínangi áá loí ngáá ná. Sí vá í ngáá faa vándai Hɛ́ɛ́ma Ỹínangi áá mú ló ma, a mu lií áá loí ngáá na. Faalɔ, ti héi h̃ú félengɔ ti hilingɔ́ɔ́ lé w̃a. Náá hááw̃a, sí maa ɣɛ́ lói mú kɛ a mɔí kɛ.

¹⁸ Kɛ́ ná Hɛ́ɛ́ma Ỹínangi áá ɣɛ́ áá mú wúto, a mɔí mɔ́ɔ ɣɛ savaí wú Ngala ngí féni Muusé yaá.

¹⁹ Sítii ti ngáá faa ỹɔ́itii nuu líí áá nuu ló ti w̃a ti yakɛngɔ́ɔ́ lé kpál̃au. Tiyá waa ngáá kɔlɔsiyángi, njée sína w̃ááluva wóndai, ɛ́ɣɛ njɔlɔ háitii.

²⁰ Ná vólu, kɔɔ kɔɔ́ ŋániaitii fɛ́lindai nungáá táa ti yeɣé ngáá ngalángaa ɛ́ɣɛ kala ndoolí wóndai. Ná vólu, silíí ngáá ỹɔw̃ɔ́ ỹɔ́w̃ɔ, ɛ́ɣɛ ndaahasái ɛ́ɣɛ tolómai, ndiiyatɛtɛ́i ɛ́ɣɛ ndiíkooya háá wálai. Ná vólu, ngasolángi ɛ́ɣɛ kɔlɛ wɔlɛ suí ngáá kuuwu kuuwú.

²¹ Ná vólu, nuu líí aa kɛ nungáá yáa wɔ́li faa áá víli nuu líí vólu, aa kɛ nuu í ɣɛ́ ndɔɔ hoú h̃ú ɛ́ɣɛ kooh̃unɛɛ lóóli wala walaní su, ɛ́ɣɛ sí w̃áa ỹɔ́kɔ faa vekáitii. Kɛ kíya nɔ́ɔ ngí ndéngɔ wú w̃a, nyá lɔ́ɔ ndé múl̃ɔ wú w̃a ngáá sítii taa lúva h̃íí na tɛ́i ɣɛ́ Ngalángi w̃ásandai wu.

²² Kɛ́ sítii Hɛ́ɛ́ma Ỹínangi áá kɛ ngáá háwu taa ɣɛ́ nuu h̃u tiyá wáa ngáá, ndongí, kooh̃unɛ́i, ndiihéi ɛ́ɣɛ ndiilɔlɔ́i. Ná vólu, faa bɔ́wɔ ɣɛndái ɛ́ɣɛ tuva velé vándai, ɛ́ɣɛ tɔ́wɔbaɣai.

²³ Ná vólu, suuwɔɔlɔ́ lálai ɛ́ɣɛ nuu bɔwɔ́ h̃úúhoundaa w̃a. Sava fíli aa faa láálii sítii ma.

²⁴ Sítii ti ngáá Jísu Kílisitii volú yélaitii, faa ỹɔ́u ɣɛ́ ndíívo kɛí ɛ́ɣɛ ndíívo kɛɛ́ háá walái áá víli nuu líí vólu ngwala, tí bénga nátii kpɛ́lɛɛ mbá.

²⁵ Faalɔ, ná Hɛ́ɛ́ma Ỹínangi í kɛ́a ngáá háwu a mu ndɛ́ɛ́h̃u gítei h̃u, kɛ i ɣɛ áá mú wúto mu lɛ́ɛ́h̃ui h̃uu híya kílii h̃u.

²⁶ A mu h̃úú álaa ɣɛ́ wɔ́ɔ́lɔ. Ná vólu, a málaa bɔwɔ́ báálɛ mba hááni kɛ, kɛlaa mɔɔ ɣɛ́ máá tóloma ngúla ngáá ỹɔw̃ɔ́ ỹɔ́w̃ɔ.