GALÉSIYA 4 - Kɛ́lɛ Niinaí

¹ A bɛlɛ́ lɛ́ɛ́ hɔ́ɔ ngí nde h̃íí, siỹɛndóu loí áá ɣɛ́ áá vá ngí kɛ́ɛ́ɣɛ vóŋaniitii maahɔ́lɔma, taá suuhóu ngáá nduwɔ́ lopó ɣɛ́ kíli. Ná wáá ngáá, ngoo ɛi ɣɛ nda faa fíli sú ná áá ɣɛ́ nɛ́nɛ ngáá ndopo guló kíya bɛ́lɛ laa lɔ kpɛ́lɛɛ áá ɣɛ́ faaw̃a.

² Ná áá ɣɛ́ nɛ́nɛ ngáá ndopo gúlo, nungáá taá ɣɛ́ na taá maah̃ú béle, táa maa wɔ́lingaitii ngandɔ́ɔ́lɔ mbɛ í ló su kuí ngi kɛ́ɛ́ɣɛ áá ɣɛ́ téveni mba ngáá i ló maa wɔ́lingaitii ngútuwɔ i fólo ma.

³ Ngimɔ́ɔ́ nɔ́ɔ a mú ɣɛ́ngɔ na, ngakpa ŋáni ỹɔu ỹɔungáitii ti ngélewui sí w̃ááh̃u ti ɣɛ́i mu ɣɛní ngáá nduwɔ lopoá ɣɛ́ kíli ti wu, í ló su kpóloo mu ɣɛ́ tɔɔỹái wɔlɔ.

⁴ Kɛ́ ná kúi kái káingi í fóloni ma, Ngala ngí ngi H̃íỹɛndou Loí lɔ́veni ngelewu. Ngi njéé i ɣɛi ngáá nuu búsa, aáva i góloni sávaitii mbu Ngala ngí féni Muusé yáa,

⁵ ngáá í sítii ngumááwo ti ɣɛ́i savaí wu kɛinɔɔ́ a mu ɣɛ ngáá Ngala ndéngaa.

⁶ Sífaa wú ngáá Ngalá ndéngaa kíya nɔ́ɔ ní na, i kɛngɔ́ ngáá háwu ngi H̃íỹɛndou Loí Ỹínangi í ɣɛ́ mu volú, lɛ́i áá kɛ ngáá háwu aa maá Ngala tóli ndaanɛɛ h̃u, maa ɣɛ́ tá, “Kɛɛɣɛ́, Kɛɛɣɛ́.”

⁷ Faalɔ, wáá mɔ́ɔ ngáá nduwɔ lopóa, kɛ́ wá lɔ́ náa ngáá Ngala ndéngaa. Ná aáva wú ngáá ngi léngaa, Ngalá tɔ́ɔ sí kpɛ́lɛɛ fé wú yáá í ngeyá ngi léngaitii faaw̃a.

Pɔ́ɔ liihɛ́lɛngɔɔ lé ngáá Galésiyaitii

⁸ Wɔ́lɔ wɔ́lɔmai h̃u, ná wáá ɣɛ́i Ngalá kɔ́lɔ ngáá ele wáá ngáá laa, wú ɣɛ́i ngáá nduwɔ lopóa ɣɛ́ kíli ŋani tɛ́ingaani ti yákpangi wú tiyɛ́i taa ti yeɣé ngáá ngalángaa.

⁹ Kɛ́ ná naá wú Ngala kɔ́lɔ, aá ɣele bɛlɛ́ ngí ndé ngáá ná náa Ngala ngí pele laa wú lówah̃u, ndeénii le í kɛ́a wáá vóte múl̃ɔ ŋanii nátii mba tiyɛ́i ti h̃úúbangɔ láá lé ngwala, ná vólu, nga ngáá ti wa? Wú lóngɔɔ lé wú ɣɛ́ ngáá nduwɔ lopóa ti wu múl̃ɔ?

¹⁰ Wáá ngeɣé ngáá ngatɔ́ foló lɛ́ingaa wa, ɛ́ɣɛ ngalú tɛ́ingaa, ɛ́ɣɛ fowó lɛ́ingaani ngaa saw̃a lɛ́ingaa í lɔ́ve pekaítii mba wú Yála fɛlindái h̃u.

¹¹ Nduwa lɔ sú wú hááw̃a ngáá ngí hɛmbɛ́ héingɔ wú wú gbááma.

¹² Mu mbála Yalá fɛli mbélai, nyá lɔ́ɔ wú w̃áánɛɛnɛ, a ɣɛ́ ngáá kɛ́ kíli, wálaa wála savaí wú Ngala ngí féni Muusé yáa sífaa, kíya bɛ́lɛ ngí ngáá Júsu w̃ɔɔ ngáá savaí ná wú kíya nɔ́ɔ wɛ́i wáa ngáá Júsua wáá savaí ná wú. Wáá nɛ́ɛ faa ỹɔ́u fíli kɛ́ni ngáá ngé.

¹³ Wa gíte wú kɔ́lɔ ngáá kɛ seebɛí ngí ɣɛ́i su áa lɔ́ í kɛ́ni ngí lóni wú lóów̃a ngi Ngala kééla woo vándai lé wú w̃a hése.

¹⁴ Kɛ́ wáá ní háá baalɛí wa, kɛlaa maa wɔ́ɔ́ léle mba kíya bɛ́lɛ ní héébɛi í ɣɛ́i ngáá wú h̃úúbɛɛɣi fáá. Kɛ́ laá ɣéle p̃ɛ́ɛ́, wú lókoheini mbu kíya ngáá ɣɛ́ ngáá Ngalángi w̃áleka ɔɔ Jísu Kílisitii gítei.

¹⁵ Wú góóh̃unɛɛngɔ wála í ɣɛi lá fááw̃a. Kulangɔ́ i ɣɛi lá p̃ɛ́ɛ́ ngáá wɔ́ɔ́ bɔwɔ́ yaah̃ú gɛ́hɛi gúla su fááw̃a ná ɔ́ɔ́ wú góóh̃unɛɛ. Kɛ bɛɛ́ lɔ́ náa í ɣɛ́a ngáá ndií ná í ɣɛ́ngɔ wú góó ya fááw̃a?

¹⁶ Baa ngí ɣɛ́a náa ngáá wú wááhilima w̃ɔ́ɔ́ sífaa, ngíwaa tɔɔỹái le wú w̃a?

¹⁷ Nungáá vékai nátii tiyɛ́i taá ɣɛ́ tí tɔɔỹaá gééla woo vandaí w̃áálovi taá nda yaah̃ú ngáá ti bɛ́ndɛngɔɔ lé ngáá wú ye ngwala kɛ́ aa ngáá tɔɔỹaá, ti longɔ́ɔ́ lé nɔ́ɔ léi wú béteve mbá kɛinɔɔ́ wú vóte ti wa.

¹⁸ Aá ɣéle maanɛ́ɛ́ngɔɔ lé nuu í bɛ́ndɛ ngáá í ye ngwala h̃íí ná faa vánda hááw̃a. Ngimɔ́ɔ́ kulé í ma wú ɣɛ́ na hɔ́wɔ fíli, álaa ɣɛ́ nɔ́ɔ ngáá kɛ ngáá ɣɛ wú lóów̃a.

¹⁹ Wɛ́i wú ngáá ndíívo ndéngaa ɣɛ kíli Ngala fɛ́lindai h̃u, ndíí lɔ́ɔ́ hóólɛ wú hááw̃a kíya nɔ́ɔ nyah̃ái áá ɣɛ́ ndoú lé kóóh̃ubaalɛi h̃u. Aáva ndíí ɛ́i la í ló su kɛ Kílisitii luva veléi í ɣɛ́ wú h̃u.

²⁰ Ɔ́ɔ ɣɛ́ ngáá ndíívo fáá wála ná wɔ́li ngɔ́ɔ́ ɣɛ́ wú lííwaa sí h̃ui náa, ngɔ́ɔ́ ngapɔpɔ́ péle tá yéɣe kɔwɔ́ato wú wa. Wú gíndaa vili tɔ má!

Faí sí í ngáá Héégani ngáá Sééla ti léngaitii polú hái

²¹ Bɛlɛ́ lɛ́ɛ́ ngí wú w̃ɔ́ɔ́ni, wɛ́i wú lóngɔ wú ɣɛ́ sávai wú Ngalángi féni Muusé yáa. Sí sávai í ndéngɔ wú ngátɔngɔ mba?

²² I ndengɔ́ ngáá Lébilah̃au i siỹɛndóu lengaa félengɔ léni. I ngiláángi léni nyah̃ápo yiláá mbá í ɣɛ́i ngáá ngi lúwɔ lopoí, í pékai lé ngi húli ỹah̃aí wa.

²³ Nduwɔ ỹah̃ái ndá lói tí ndéni nɔ́ɔ kɛ kíya taá ndóu fíli ndé. Kɛ́ ngi húli ỹah̃aí ndá lói laá, tí ndéni kuulóngi w̃áá véle w̃a Ngala ngí mbóni ngáá Lébilah̃au.

²⁴ Faa lɔ́ Lébilah̃au lengaa félengɔi sítii ndendái volu. Ná wáá ngáá nyah̃á félengɔi sítii ti gúlangɔɔ lé ngáá kɛlɛ́ félengɔitii Ngala ngí ngéɣeni ti lówah̃u taá ngi vóngaitii. Hééga gúlangɔ lé ngáá kɛlɛngí sí í yéɣeni ngihéi sí wa taa tolí ngáá Sáinai na h̃u Ngala ngí sávai héni na Muusé yáa. Nungái sítii ti kɛ́lɛngi sí wú ti gúlangɔɔ lé ngáá nduwɔá ɣɛ́ kíli.

²⁵ Hééga gúlangɔɔ lé ngáá Sáinai Yihéi í tataí sí h̃u taa tolí ngáá Aléébiya. Hééga vá kulangɔ́ɔ́ lé múl̃ɔ ngáá Jɛlúsɛl̃ɛ taa walái lɛ́i í ngáá nduwɔ kpahangɔ́ Júsuaitii mba.

²⁶ Kɛ́ Jɛlúsɛl̃ɛ sí í ngelegóóh̃u, kulangɔ́ɔ́ lé ngáá Sééla lɛ́i í ngáá húli ỹáh̃ai laáva tɔ í ngáá mu njéé,

²⁷ sífaa, pɔnɛngɔ́ɔ́ lé Ngala Kɔ́lɔi h̃ú ngáá sí, “Yɛ́i yí ngáá nyah̃ái yáá nɛ́ɛ́ ndengáá w̃ááhɔlɔni aáva yáá nɛ́ɛ́ ndoú lé kóóh̃ubaalɛ luwu ya fuulɛ yeɣéni, gooh̃unɛ́ɛ́, yí kóóh̃unɛɛ wóó gula wo! Nyah̃ái sí ngi h̃íỹɛngi i béélenga mba, aa lɔɔ vá ndóu bíh̃i kpíh̃i ndema í lɔ́ve nyah̃ái sí wá ti héini taá ngi h̃íỹɛngi.”

²⁸ Mu mbála Yalá fɛ́li mbélai, muỹá lɔ́ ngáá Ngalá ndéngaa Ngalangí gúúlongi w̃áá véle w̃a kɛ kíya nɔ́ɔ wɔ́lɔ Áise í ɣɛi ngáá Lébilah̃au loí Ngalangí gúúlongi w̃áá véle w̃a.

²⁹ Aáva táingi ná h̃u Lébilah̃au h̃iỹɛndou loí ná lɛ́i tí ndení kɛ kíya taá ndóu vékaitii nde, i faa báma laní Lébilah̃au lou vekaí w̃a lɛ́i tí ndéni Hɛ́ɛ́ma Ỹínangi yákpangi w̃áá véle w̃a. Aáva maa háá bamaí híí lɔ nɔ́ɔ áa ndi ngu ma sí h̃úi nɛ́nɛ sítii ndowah̃u ti sávai wú ɛ́ɣɛ sítii ti langɔ ngáá Jísu Kílisitii.

³⁰ Kɛ́ sí pɔ́nɛngɔ Ngala Kɔ́lɔi h̃u kɔwɔ́ato maa hái wa aá wáa ngáá sí, “Nduwɔ ỹah̃ái sí bɛ́ taá ngí h̃íỹɛndou loí, sífaa ngi h̃íỹɛndou loí ndá aa vaamá ɣɛ́ma ti kɛ́ɛ́ɣɛ vómaa wɔ́lingaitii mba. Húli ỹáh̃ai h̃íỹɛndou loí lɔ áá vá ti w̃ááhɔlɔma.”

³¹ Faalɔ, mu mbála Yalá fɛ́li mbélai, a máá ngáá nduwɔ ỹah̃á goo h̃ú léngaa kɛ́ muỹá lɔ ngáa húli ỹáh̃ai goo h̃ú léngaa.