GALÉSIYA 3 - Kɛ́lɛ Niinaí

Yáá híya ngáá savaí ɔɔ ndangí?

¹ Wɛ́i wú ngáá Ngala fɛ́li mbélaitii wu Galésiya, wáá kisíya vánda womá. Ele lɔ í wú yákpolowangɔ? Wú faa wɔ́lɔ kpál̃au kɔwɔ́ato kpakpángi wa tí mbóni ngáá Jísu Kílisitii kulɔ́sii w̃a í ló na í há.

² Faa yíla kpé tɔ́ ndóngɔ ngí ɣɛ́ kɔ́lɔ wú yáá, aá waa ngáá, Hɛ́ɛ́ma Ỹínangi i vɛlɛngɔ́ wú vólu ngáá hiyandáá ngáá savaí Ngala ngí féni Muusé yáa? Baa keela wóo vándai wú mɛ́ningɔ wú la la?

³ Kɛ ngimɔ́ɔ́ wú lámal̃angɔ? Wú vílingɔ Jísu Kílisitii hítɛ polulai h̃u Hɛ́ɛ́ma Ỹínangi w̃áá véle w̃a, wú lóngɔɔ lé náa wú ngapú ngáá wú wú maa yákpangi?

⁴ Faí sí wú híyangɔ su kɛ wáá kúlasuunuma fíli sɔ́lɔngɔ su? Ndángɔ la gíte wú kúlasuunuma w̃aahɔ́lɔngɔ su.

⁵ Ngalá ngí kɛ́a ngáá háwu Hɛ́ɛ́ma Ỹínangi í ɣɛ́ wú vólu, ná vólu, i kɛ́ ngáá háwu wú wáa kááma haaní kɛ. Aá lɔ́ wú gí ma ngáá i ná ɣɛ́ngɔ sífaa nɔ́ɔ wú gólongɔ ngi hávai wu? Baa sífaa wú kééla woó vándai ỹɛ́ninga wú lá la?

⁶ Wá gíte a Lébilah̃au lɔ lɛ́ɛ kíya pɔnɛngɔ́ Ngalá Kɔ́lɔi h̃u kɔwɔ́ato mba ngáá sí, “Lébilah̃au i laní ngáá Ngalá aáva ngi lángi ná w̃áá véle w̃a, Ngalá ngi ngeɣéni ngáá telembo mɔ́ɔ.”

⁷ Faalɔ, wú ɣɛ́ kɔ́lɔ ngáá kɛ sítii taa lá ngáá Ngalá tiyá lɔ ti ngáá Lébilah̃au laala lengaa votó kái kái.

⁸ Ndengɔ́ɔ́ lé Ngalá Kɔ́lɔi h̃u wɔ́lɔ p̃ɛ́ɛ́ ngáá Ngalá tɔ́ɔ vá sítii taa ngáá Júsua kɛma ngáá telembo mbélaa bɔwɔ́ yááh̃u ndangí w̃aa véle w̃a taa ɣɛ́ su la. Aáva Ngala Kɔ́lɔi w̃áá vele w̃a, keela wóo vándai sí i ɣɛi lení Lébilah̃au w̃a naa wutúwɔ sí pɔ́nɛngɔi ngáá, “Ngalá tɔɔ vá nɛ́ɛ́ma yéima nuu kpɛ́lɛɛ má í w̃áá véle w̃a.”

⁹ Lébilah̃au i laní ngáá Ngalá aáva Ngalá ngí nɛ́ɛ́ma yéini ma, faalɔ, sítii kínɛi taa la ngáá Ngalá, Ngala ngáá nɛ́ɛ́ma yéi ti w̃a kíya nɔ́ɔ í njéini Lébilah̃au w̃a.

¹⁰ Sítii í ti gi ma ngáá Ngalá ngáá lokohéi ti wu bɔw̃álale tiyá lɔ́ híya ngáá ngi hávai, pelé tɔ́ ti wa. Sífaa pɔnɛngɔ́ɔ́ lé Ngalá Kɔ́lɔi h̃u ngáá sí í ɣɛ́ngɔ ta, “Péle tɔ́ nuu fíli mbá ɛ́i ɣɛ́ hɔ́wɔ fíli áa híya ngáá Ngala sávai kínɛi pɔnɛngɔ́i Ngala Kɔ́lɔi h̃u.”

¹¹ Ngakɛ́ngɔɔ lé kpál̃au ngáá nuu fíli ɛi ɣɛ́ ngáá telembo mɔ́ɔ́ Ngala ngaah̃ú ngáá hiyandái ngáá ngi hávai. Bɔw̃álale, pɔnɛngɔ́ɔ́ lé Ngala Kɔ́lɔi h̃u ngáá sí, “Sítii ti ngáá telembo mbélaa Ngala ngaah̃ú, tiyá lɔ́ɔ vá ndɛɛh̃ú gítei h̃úúhiyama ngáá ndangí taa ɣɛ su ngáá Ngalá.”

¹² Nuu híyalai ngáá Ngala sávai aa ngáá kɛ nda ngáá ɣɛ nuu h̃u. Kɛ́ aá ɣéle, sí pɔ́nɛngɔi Ngala Kɔ́lɔi h̃u aá wáa ngáá sí, “Nuí fíli áá híya ngáá sí kínɛi savaí í ndéngɔ, ná áa kɛ í ɣɛ́ ndɛɛh̃u gítei h̃u.”

¹³ Kílisitii i mu wúmaawongɔ peléngi yáa Ngala sávai í kɛ́ngɔ ngáá háwu í vúngɔ mu w̃a. I longɔ́ a mu lóów̃ai ngáá peléngi í vú ma, bɔw̃álale, sí pɔ́nɛngɔi Ngalá Kɔ́lɔi h̃u aá wáa ngáá sí, “Nuí fíli táa páa ngáá sɛlɛndái ngulúi w̃a, kɛ Ngalá péle tɔ́ mba.”

¹⁴ Jísu Kílisitii í sí ɣɛ́ni kɛinɔɔ́ nɛ́ɛ́mai Ngala ngí maa gúúlomboni ngáá Lébilah̃au, maanɛ́ɛ́mai í fólo sítii ma taa ngáá Júsua aáva taa maahɔ́lɔ Jísu Kílisitii w̃áá vele w̃a, ná vólu, kɛinɔɔ́ ndangí w̃áá véle w̃a a maa ɣɛ́ su ngáá Jísu, Hɛ́ɛ́ma Ỹínangi Ngala ngí maa gúúlo mboní í ɣɛ́ mu vólu.

Savaíni ngaa kuulóngi

¹⁵ Mu mbála Yalá fɛ́li mbelái, sí ngáá vá ndéma wú w̃a, kulangɔ́ɔ́ lé nɔ́ɔ ngáá faa ta maá kɛ hɔ́wɔ fíli. Maa hái waa ngáá sí, ná nuu félengɔ áá kɛ́lɛ ngeɣé faa h̃u aáva tí mááh̃u yíli kpé, ti tá fíli tɛ́i ngá nyááni kɛlaa maa tɔ́ɔ́ maalóvi.

¹⁶ Ngalangí kuulóngitii í mbóni ngáá Lébilah̃au ɛ́ɣɛ Lébilah̃au láála loí. Ndengɔ́ láá le Ngalá Kɔ́lɔi h̃u ɔ́ɔ́ ɣɛ́ ta, “Lébilah̃au laala lengáitii.” Ná ná áá ɣɛ́, kɛ tɔ́ɔ́ ɣɛ́ bíh̃i, kɛ́ sí ndéngɔ aá wáá ngáá sí, “Lébilah̃au laala loí.” Ná wáa ngáá taala lou yílaa kpé, laáva mbaa ngáá Kílisitii.

¹⁷ Sí ngáá ɣɛ́ ngí nde laá waa ngáá sí, Ngalá ngí kɛ́lɛ ngeɣéngɔ Lébilah̃au yaá í maa gúúlo mbo ngáá ɛi gulá mbu. Ná fówo hɔ́ndɔ nááningɔ fowó vúú sáángɔ í gúlani su, savaí ná Ngala ngí féni ɛ́i bele kɛ́lɛngi ná ỹááni, kelaa maa ɔ́ɔ́ Ngalángi gúúlongi híɣe ma.

¹⁸ Nɛ́ɛ́mai sí Ngala ngáá fé, a mɔí maahɔ́lɔ ngáá mu híyalai ngáá Ngala sávai, sífaa, ná a maá maahɔ́lɔ h̃íí, kɛ́ a mu híyalai ngáá savaí ná lɔ áá kɛ maá mááhɔlɔ, ɛi ɣɛ mɔ́ɔ ngáá ngi gúúlongi w̃áá véle w̃a. Kɛ́ aáva Ngala ngí féni Lébilah̃au yaá sífaa i ɣɛi maa gúúlomboni lá.

Háwui savaí í ná faaw̃a

¹⁹ Kɛ ndeé lɔɔ́ náa hɔ́ɔ savaí í ná faaw̃a? Ngala ngí fení kɛinɔɔ́ í faa ỹɔ́itii ngákɛ nungáitii taa kɛ. Savaí í ɣɛi na ngáá í lo ná kpóloo í ló su Lébilah̃au laala loí ná kái kái kuulongí í ɣɛ́ngɔ woí faaw̃a í vá. Ngalá ngɔ́ɔ́ kɛ ngáá háwu malékaitii táa vá ngáá saváitii Muusé yelé. Muusé vá tɔ i ɣɛi nungáitii ndowah̃u taá Ngála.

²⁰ Kɛ́ ndowah̃u w̃ɔ́ɔ́ haa aa ɣɛi su ná Ngala ngí kuulongí wóni ngáá Lébilah̃au. Ngala ngílaa kpé tɔ́ í kɛ́ni.

²¹ Ná áá ɣɛ́ h̃íí ná, kɛ savaí i ɣɛngɔ hɔ́ɔ ngáá kíya nɔ́ɔ nuu áá ɣɛ́ áá lápi ngáá Ngalángi gúúlongitii báá? Kɛ́ maa hái aa h̃íí ná kulo bɛ́lɛ kpósouŋ! Ɔɔ ná wɔ́lii ɔ́ɔ́ ɣɛ́ ngáá solowo fáa ngáá nuu í ndɛɛh̃u gítei w̃ááhɔlɔ savaí w̃áá véle w̃a, kɛ nuu áá ɣɛ́ hɔ́ɔ ngáá telembo mɔ́ɔ́ Ngala ngaah̃u savaí w̃áá véle w̃a.

²² Pɔnɛngɔ́ɔ́ lé Ngalá Kɔ́lɔi h̃u ngáá faa ỹɔ́i lɔ áá nuu kpɛ́lɛɛ ngúto ngelewu, kɛinɔɔ́ kuulongí Ngala ngí mbóngɔ maahɔ́lɔ péle i ngáá ndangí nuu áá ɣɛ́ su ngáá Jísu Kílisitii í hé sítii ngeyá nda ngáá ɣɛ́ tí h̃u.

²³ Ná h̃ú nda fáá áá nɛ́ɛ́ ɣɛi su ngáá Jísu Kílisitii, nungái ti ɣɛ́i savaí wu kíya nɔ́ɔ nuu áá ɣɛ́ pelesínalaa h̃u. Ná i ndií ngú ma í ló su kpóloo nuu lándai ngáá Jísu Kílisitii í fóloma.

²⁴ Faalɔ, savaí i ɣɛngɔ mu w̃ááh̃u í ló su Kílisitii í vá, kɛinɔɔ́ a mu ɣɛ́ ngáá telembo mbélaa Ngalá ngááh̃u ndangí w̃áá véle w̃a nuu áá ɣɛ́ su ngáá Jísu.

²⁵ Kɛ́ ná náá naa hɔwɔ́i í fóloa náa má ngáá nuu áá lá ngáá Jísu Kílisitii, savaí aa mɔɔ nuu w̃ááh̃u.

²⁶ Ndangí w̃áá véle w̃a wú kpɛ́lɛɛ wú su ngáá Jísu Kílisitii, i wú báhaa Jísu wa aáva i kɛ́a wú kpɛ́lɛɛ wú ɣɛ ngáá Ngala ndéngaa.

²⁷ Nguyaí wú kpɛ́lɛɛ wú maahɔ́lɔngɔ í wú báhaa Kílisitii wa. Laáva wá lɔ́ naa ngáá Kílisitii ɣɛ́ kíli.

²⁸ Faalɔ, ndowah̃u kɔlɛ́ aa mɔɔ Júsuaitii ndowah̃u taa sítii taa ngáá Júsua, ɛ́ɣɛ nduwɔ lopóaitii taa sítii taa ngáá nduwɔ lopóa, ɛ́ɣɛ siỹɛngáitii ndowah̃u taá nyah̃áitii, wú kpɛ́lɛɛ wú báhangɔɔ lé náá su ngáá nuu yílaa Jísu Kílisitii wa.

²⁹ Ná wú ngáá Kílisitii vólu yélaa, kɛ wá lɔ ngáá Lébilah̃au laala lengaa ɣɛ kíli, laáva wá lɔɔ va kuulóngi sí w̃ááhɔlɔma Ngalá ngí mbóngɔ ngáá Lébilah̃au.