GALÉSIYA 2 - Kɛ́lɛ Niinaí

Ngala kééla vekaítii tí lókoheini Pɔ́ɔ wú

¹ Ná fówo púúngɔ maah̃úú nááningɔ í gúlani su, naa Bánaba ní yángaimai Jɛlúsɛl̃ɛ taa walái h̃u. Táitɔ vá í ɣɛi ni volú siyangí ná h̃ú.

² Ngí lííni na bɔw̃álale Ngala ngí ngákɛi ngáá ngé ngáá ngí lí na. Ní wúmaa w̃áákpɔ hóuni naá máa Yála fɛli mbélai ti wutúwɔaitii, aáva keela woó vándai sí ngí ɣɛ́i ngáá ndé sítii ma taa ngáá Júsua ngí súúgulai ti w̃a. Sífaa ngáá ɣɛ́i loí ní Yála ngéngengi sí kínɛi ngí mbónga ɛ́ɣɛ sí ngáá va ndíma ngu ma ngáá mbondáá nga ngɔ́ɔ́ wálamba.

³ Kíya bɛ́lɛ ní mbála hiyá pólu w̃ɔí Táitɔ í ɣɛ́i ngáá Gilísi w̃ɔɔ, taá kpái ma ngáá kule ngáá kɛ tí tɔvé pɛlɛ́ vólu,

⁴ kɛ kíya bɛ́lɛ siỹɛngáá lɛ́ingaa tí ɣɛ́i loí ná í ɣɛ́. Nungái sítii tí ɣɛ́i taá kúla ngáá tiyá lɔ ngáá mu mbála Yála fɛ́li mbélaa ti ta, kɛ́ tí ɣɛ́i nɔ́ɔ ngáá ngasɔbɛ́ mbélaa. Ti vílii nɔ́ɔ kuuwuí sí h̃u ngáá tí ɣɛ́ faa wɔ́lɔ kɔwɔ́ato maawalóngi wá í wóni ngáá ni ye ni báha gilíi w̃a Jísu Kílisitii wa. Ti ɣɛ́i loí tí ni ɣɛ ngáá nduwɔá Júsuaitii ti Yála fɛli kíli hávai wú.

⁵ Kɛ́ sí tí ɣɛ́i lói ní kɛ, naá lúw̃ai ma kulo bɛ́lɛ kɛinɔɔ́ tɔɔỹaá gééla woo vandaí haa h̃uu ɔ́ɔ́ vú wú yáá.

⁶ Nungái sítii naa Yála fɛli mbélai ti ɣɛ́i taá tí yeɣé ngáá ngutuwɔ́ yélaa, ti ɣɛ kíli i ɣelé ɣɛ́i na fíli taá gba ngááh̃u. Sífaa, Ngalá ngɛ́i nuu gɔ́sɔ kpatɛ gilíi w̃a nduwú w̃a. Ngutuwɔ́ai nátii kele tɔ taá ndááhi níína fíli mbóni ngáá ngé kééla woí sí lé fááw̃a.

⁷ Laá ɣéle tɔɔỹaá hááw̃a, tí ngátɔni mba ngáá kɛ Ngalá tɔ́ í ngéngengi sí héngɔ ngéya ngáá ngí keela woó vándai lé sítii ma taa ngáá Júsua, kɛ kíya nɔ́ɔ í kééla wóo vánda léndaa yengengí héngɔ Pítɛ yáá ngáá í ndé Júsuaitii ma.

⁸ Ngalá ngílaa kpéngi sí áa kɛ ngáá háwu Pítɛ áa ngi gééla woí le Júsuaitiini ma, laá lɔ nɔ́ɔ mɔ́ɔ áa kɛ ngáá háwu ngíwaa ngi gééla woí lé sítii ma taá ngáá Júsua.

⁹ Jimisí, Pítɛ ɛ́ɣɛ Njɔú, tiyɛ́i naa Yála fɛli mbélai taa ti yéɣe ngáá ngutuwɔ́aitii, tí ngátɔni mba ngáá kɛ Ngalá ngí ngengengí sí héngɔ ngéya gba ngáá ngí mbo. Faalɔ, tí fáma wóni ní w̃a naá Bánaba ngáá í ngákɛ ngáá kɛ ni lɔ́ngɔ niỹá lɔ́ɔ ngenge ngílaa mbó. Ni kpɛ́lɛɛ ní lúw̃ai náa ma ngáá nyá ɛ́ɣɛ Bánaba ni lí naayáa kééla wóó vándai lé sítii ma taa ngáá Júsua, tiyá va ti lí taayáá nde Júsuaitii ma.

¹⁰ Sí nɔ́ɔ léi tí ndéni ni w̃a, i ɣɛi ngáá ní ndí ngu ma ngáá kpɔmba wóndaa nyaani yélaitii mba tí tí h̃u Jɛlúsɛl̃ɛ. Sí vá tɔ nɔ́ɔ jɔ́ í ɣɛ́i ndíí wa ngáá ni ɣɛ́ naá kɛ.

Pɔ́ɔ i Pítɛ haa ỹaaningí léni lííwaa

¹¹ Ná Pítɛ í vááni Átiyɔ taa h̃u ní héi hei ma, ngí yɛ́pɛni ngelé ni mbála Yála fɛ́li mbélaitii kpɛ́lɛɛ kákala ngáá kɛ sí í kɛ́ni aa ɣɛi pele w̃a.

¹² Pítɛni ngaa sítii taa ngáá Júsua, kɛ́ tí ɣɛ́i náa laí ngáá Jísu, ti ɣɛ́i taá lááỹɛ ỹanda yílaa. Kɛ́ ná Jimisí í Júsua lɛingáá lɔ́veni Átiyɔ, Pítɛ ɛ́i beé mɔ́ɔ́ kɛ tɔɔ́ lááỹɛ taa sítii taa ɣɛ́i ngáá Júsua. I ná ɣɛ́ni bɔw̃álale, i ɣɛi áá lúwa sítii mba ti ɣɛ́i loí taayáá sítii tɔve pɛlɛ́ vólu taa ngáá Júsua.

¹³ Júsua vekaítii bɛ́lɛ ti ɣɛ́i náá laní ngáá Jísu, ti báhani naá Pítɛ wa táa lúwa. Ti lúva veléi ná vá i kɛní ngáá háwu Bánaba bɛ́lɛ í báha ti wa maa hái h̃ú.

¹⁴ Kɛ́ ná ngí tɔ́ni ngáá kɛ taá ɣɛ́i taa híya ngáá keela woó vándai ngáá tɔɔỹaá, ngí ndéi Pítɛ w̃a ti kpɛ́lɛɛ kakála, ngí ɣɛ́ ma, “Yá lɔ́ ngáá Júsu w̃ɔɔ, kɛ́ yá lɔ́ɔ lúva kɛ kíya sítii taa ngáá Júsua taa lúva. Ndeénii le sítiini taa ngáá Júsua yáá kpa ti w̃á ngáá kúle ngáá taayáá híya ngáá Júsuai ti ndá híya veleí?”

Nuí fíli ndangɔ ngáá Jísu áá ngumaawongí w̃ááhɔlɔ

¹⁵ Tɔɔỹaá hááw̃a, niỹá lɔ ngáá Júsua ni le péle w̃a, naa ngáá faa ỹɔ́u yélaa kíya sítii taá ngáá Júsua tí na.

¹⁶ Ná fíli su, ní kɔ́lɔ ngáá kɛ nuu ɛ́i ɣɛ́ ngáá telembo mɔ́ɔ Ngalá ngááh̃u ngáá nuu híyalai ngáá savaí sí Ngalá ngi féni Muusé yáa, kɛ nɔ́ɔ léi ndangí w̃aa véle w̃á nuu áá ɣɛ́ su ngáá Jísu Kílisitii. Faalɔ, niỹá bɛ́lɛ ní laá ngáá Jísu Kílisitii ngáá ni ɣɛ́ ngáá telembo mbélaa Ngalá ngááh̃u, kɛ́ aa ngáá nuu híyalai ngáá savaí, bɔw̃álale ná ɛi nuu fíli kɛ́ ngáá telembo mɔ́ɔ Ngalá ngááh̃u.

¹⁷ Ná hɔ́ɔ ni yakpandái ngáá ni ɣɛ́ ngáá telembo mbélaa Ngalá ngááh̃u ndangí w̃aa véle w̃á naa ɣɛ́ su ngáá Kílisitii, ná aa ngákɛ ngáá kɛ ni ɣɛ́ngɔ ngáá faa ỹɔ́u yélaa kíya nɔ́ɔ sítii taa ngáá Júsua ti ngáá faa ỹɔ́u yélaa, kɛ ná gúlangɔɔ le ngáá Kílisitii lɔ ngáá faa ỹɔ́u w̃ɔ́ɔ báa? Kpéle, aa h̃íí na.

¹⁸ Savaí ngí kpɛ́nga nga kílii ná wɔ́lii ngáá váa lá vólu, ná aa ngakɛ́ ngáá kɛ nyá lɔ ngáá faa ỹɔ́u ɣɛ́ mɔ́ɔ.

¹⁹ Sífaa, savaí bútei lɔ́ í kɛngɔ́ kúlangɔ ngáá nuu háángɔ savaí ndá gákai w̃a kɛinɔɔ́ ngí ɣɛ́ ndɛɛh̃ú h̃u Ngalá fááw̃a. Kulangɔ́ɔ́ lé nɔ́ɔ ngáá kpáhangɔ i ɣɛngɔ lá Kílisitii wa ni há kulɔ́sii w̃a,

²⁰ aáva ngáá mɔ́ɔ ndɛɛh̃ú h̃u bɔwɔ́ hááw̃a kɛ́ Kílisitii lɔ́ náa ngí su faaw̃a. Ndɛɛh̃úi sí ngí su náa sí h̃úi, nyá lɔ su ndangí w̃aa véle w̃a ngí su ngáá Ngalángi H̃íỹɛndou Lói lɛ́i í longɔ́ ngáá ngé í lɛ́ɛ́h̃ui gúla kɛlɛ́ma fááw̃a.

²¹ Ngáá lélengɔ Ngalángi háá bɔwɔ wa. Kɛ́ ná wɔ́lii nuu áá ɣɛ́ ngáá telembo mɔ́ɔ́ Ngalá ngááh̃u savaí w̃aa véle w̃a, kɛ ná gúlangɔɔ lé ngáá Kílisitii i haangɔ́ gbááma.