FÉLEPA 4 - Kɛ́lɛ Niinaí

Pɔ́ɔ i Ngala fɛ́li mbélai tɛni

¹ Faalɔ, mu mbála Yalá fɛ́li mbélai, wɛ́i ndóngɔ ngáá wú ye aáva wú w̃ɔ́ni áá sóu, wá lɔ wáá kóóh̃unɛɛ, nyáá va ndíílɛingɔɔ lé wú hááw̃a. Faalɔ, ndangí wú su ngáá Ndemɔí Jísu a ló su kpáŋ kpáŋ.

² Yɛ́i yí ngáá nyah̃ái sí taa ɣɛ́ í w̃á Yulódiya ɛ́ɣɛ nyah̃ái sí taa ɣɛ́ í w̃á Seteki, nyá lɔɔ wú w̃áánɛɛnɛ ngáá wú ɣɛ́ ngáá nde ngilangaa Ndemɔí Jísu w̃aa véle w̃á.

³ Ní mbála yengé mɔ́i yɛ́i tókolangɔi í w̃á ngwala ngáá yí bɔ́ mbá, bɔ́ nyah̃ái sítii mba ti woo í ɣɛ́ su yíla. Tiyá lɔ ti bɔ́ngɔ ni wa ngengengí h̃u Ngala ngói hááw̃a naa Kílɛmɛ ɛ́ɣɛ ní mbála yengé mbélaa vekaítii kpɛ́lɛɛ. Nungái sítii ti bɔ́ngɔ mbá ti laahéingai pɔnɛngɔ́ɔ́ lé kúnafɔ lɛ́ɛ́h̃u gɔ́lɔi h̃u.

⁴ Wú báhangɔɔ lé Ndemɔí Jísu wa, a gooh̃unɛ́ɛ́ ndoow̃á. Nyá lɔ́ɔ nde wú w̃a múl̃ɔ ngáá a gooh̃unɛ́ɛ.

⁵ Wú lúva veléi w̃aanɛ́ɛ́ngɔ í ɣɛ́ la nuu kpɛ́lɛɛ ngááh̃u. Ndemɔí Jísu lɔɔ vá h̃úmbuwa.

⁶ A wálaa ndiihɛlɛ́ fíli píli w̃a faa fíli fááw̃a. Kɛ́ aá ɣéle, a waayaa Ngala fɛ́li faa fíli fááw̃a wú béɣengɔ áá ɣɛ́ la faaw̃a. Aáva sɛ́ɣɛɛ gulama í ɣɛ́ wú líítii su hɔ́wɔ fíli ná wáá ɣɛ́ wáá fɛ́li.

⁷ Ná ná áá ɣɛ́, Ngalángi lííhei sí nuu fíli ɛ́i ngatɔ́ mba aa kɛ ngáá háwu ndiihɛlɛ́ ngɛ́i ɣɛ́ wú líítii su kɛlaa kisíya ɔ́ɔ́ víli wú w̃a. Ná va ngáá ɣɛ wú báha gilíi wa Jísu Kílisitii wa.

⁸ Mu mbála Yalá fɛ́li mbélai, ngapúmaa haí wáa ngáá wú gí máa háitii ti ɣɛ́ ngáá fái sítii ti ngáá tɔɔỹaá ɔɔ ngufema háá ɛ́ɣɛ sítii tí péle w̃a ɔɔ maa w̃úỹangɔ, ná vólu, sítii nuu áá kɛ ndo mááh̃u ɔɔ sí fíli áá ɣɛ́ ngáá ngaah̃u w̃aahou háa ɛ́ɣɛ faa fíli nɔ́ɔ taá nuu lɛ́ su ɔɔ sí fíli í ngáá faa yááh̃u bétevengɔ.

⁹ Sí fíli wú naa wɔlínga ngéya ngáá kalambo ɔɔ sí wú maahɔ́lɔnga ngéya ɔɔ sí wú mɛningá ndá ɛ́ɣɛ sí wú tɔwá sú, a ti ɣɛ. Aáva Ngalá pa lɛ́i áá ndiiheí he nuu yɛ́ aa ɣɛ wú vólu.

Pɔ́ɔ i sɛɣɛ́ɛ́ gulamaí toko bɔ́mbai hááw̃a

¹⁰ Kóóh̃unɛɛngɔ wala le kpáhangɔi w̃a Ndemɔí Jísu wa ngáá wú mɔ́ɔ́ ngakɛ́a ngáá ngé ngáá wú béɣengɔɔ lé fááw̃a. Aá ɣéle wú béɣengɔ i ɣɛngɔ lá fááw̃a p̃ɛ́ɛ́ kɛ́ wáá ɣɛngɔ nɛ́nɛ lokohɔ́lɔni wɔ́ɔ́ ngakɛ́.

¹¹ Ngáá sí léma ngáá sífaa kpéɣengɔ lé ŋani fíli má, bɔw̃álale ngí w̃aa golónga ngáá sí fíli áá ɣɛ́ ngéya í ndííla.

¹² Ngí kɔlɔ́ kɛ kíya áá ɣɛ́ na ná nuu béɣengɔ áá ɣɛ́ la. Aáva ngí kɔlɔ́ kɛ kíya áá ɣɛ́ na ná ŋáni áá ɣɛ́ nuu yáá bih̃í. Ngí w̃áá golónga ngáá sí fíli áá ɣɛ́ ngéya í ndííla, kóóhengɔ ɔ́ɔ́ bɔ́ɔ́ ɣɛ lá ɔɔ ndɔlɛ í ɣɛ ma, ngéya wɔ́lingi ɔ́ɔ́ bɔ́ɔ́ ɣɛ bih̃í ɔɔ aa bih̃í.

¹³ Jísu Kílisitii haalái h̃u, ngáá hómbo ngí híya faa kpɛ́lɛɛ su, sífaa laá lɔ áá kɛ ngí hómbo náa la.

¹⁴ Ná fíli sú, wú faa vánda ɣɛngɔ́ ngáá wú bɔ́ngɔ mbá ní háá bɔlundaítii su.

¹⁵ Wɛ́i wú ngáá Ngala fɛ́lɛ mbélai wú Félepa taa h̃u, wú kɔ́lɔ kpál̃au ngáá ná ngí tɔ́kula heini ngáá Ngala ngóó vandái léndai, ngí gúlani Mɛsedóniya lataí h̃uu wá, Ngala fɛ́li mbélaa veka fíli taá toko bɔ́mba héi mbɛ́ kɛ léi wá. Maa wúyeni tɔ nɔ́ɔ mú híyani ní haa bɔlúndai h̃u mú maa gúlasuunumai w̃ááhɔlɔ.

¹⁶ Ná múl̃ɔ bɛ́lɛ ngí ɣɛ́i taa sí h̃u taá náá lolí ngáá Tɛsalónika, wú kpɔmba héni mbɛ́ ká ká ná kpéɣengɔ ɔ́ɔ́ ɣɛ́ la.

¹⁷ Sɛ́mbɛi aa nɔ́ɔ léi ngáá ngí kpɔmba wɔ́li maahɔ́lɔ wú yáá kɛ́ aá waa ngáá ta í báha wú gɛ́ɛ́hɔ pándai w̃aa woí wa.

¹⁸ Sí kínɛi í ɣɛ́ngɔ ngáá kpéɣema wɔ́lingai ngí maahɔ́lɔnga wú yáá í lɔ́ve ma bɛ́lɛ. Sí kpɛ́lɛɛ kpéɣengɔ í ɣɛ́ngɔ lá ma, aá lɔ náa ngéya ná Ɛpafulɔdáitɔ í váa náa ngáá wú loko bɔmba wɔlingáitii ngéle. Ti gúlangɔɔ lé ngáá toko bɔ́mba wɔ́li pánda nuu áá fé Ngalá mbɛ, kíya nɔ́ɔ tokoheí mbu hááɣa áá ɣɛ́ na Ngalá ngelé áá ndiivó.

¹⁹ Ngalá pa, lɛ́i ngíwaa yénge mbɛ aáva kpatɛngɔ́i ngwala, aá lɔɔ wú béɣema wɔlingái kpɛ́lɛɛ kúla kɛlɛ́ma wú yɛ́ Jísu Kílisitii w̃aa véle w̃a.

²⁰ Bɛlɛ́ Ngála lɛ́i í ngáá a mu Kɛ́ɛ́ɣɛ, ngufema í ɣɛ́ mbɛ kúnafɔ taá ngi ndá gúnafɔ. Amíína.

Ngapúmaa laalimaí

²¹ Ngí há Ngalángi vóngaitii kpɛ́lɛɛ ma tiyɛ́i tí ngáá Jísu Kílisitii vólu yélaa. A mu mbála Yalá fɛ́li mbélai sítii tí ndóów̃a mbéi tí hái wú w̃á.

²² Ngalángi vóngaitii kpɛ́lɛɛ ti hái wú w̃a ngungí nda mɛ́ɛ́ sítii ma tí Lóómingai ti Lɔ́wɔlɔ W̃ása Ngwalaí vɛ́lɛ lowaí wu.

²³ Bɛlɛ́ Ndemɔí Jísu Kílisitii háá bɔwɔí í ɣɛ́ wú kpɛ́lɛɛ mbɛ́.