FÉLEPA 3 - Kɛ́lɛ Niinaí

Telembongí Jísu w̃aa véle w̃a

¹ Mu mbála Yalá fɛ́li mbélai, ngapúma haí waa náa ngáá sí a gooh̃unɛ́ɛ́ wú báha gilíi w̃a Ndemɔí Jísu wa. Aa ngáá faa fíli ngéya ngáá ngí fái sítii pɔ́nɛ wú yéle múl̃ɔ ngí pɔ́nɛni hése. Laáva aa ɣɛ ngáá kpɔmba wú hááw̃a wú lángitii ndo fái w̃a wú líítii su.

² A w̃aah̃ú belé ngáá kéke máá nuú búsai nátii, tiyɛ́i taá tuva ỹɔ́u ỹɔ́ungi wó í ti gi má ngáá ti wumáá aa wó ngáá ti luwúitii taa ɣɛ́a tevé téve mba.

³ Ná wáá ngáá tɔvé pɛlɛ vólu hái, a muỹá gíte lɔ mu lɔ́vɔngɔ pɛlɛ́ vólu ngáá tɔɔỹaá kɛ́ tiyá laa le, bɔw̃álale a muỹá lɔɔ́ Ngalángi hɛ́li ngi Hɛ́ɛ́ma Ỹínangi bɔ́mbai w̃aa véle w̃a. Aáva a mu liilɛingɔ́ɔ́ lé ngáá a mu báha gílii su maa Jísu Kílisitii. Ná vólu, a mu ndá Yála fɛlindái mu lóko langɔ́i ma aa nɔ́ɔ ngáá faa lɛ́ingaani kɛndáá bɛ́kpɛ.

⁴ Kɛ bele ngí ɣɛ́i lokolaí ná w̃a, kɛ háwu wul̃á ɔ́ɔ́ ɣɛ ngéya ngɔ́ɔ́ bɔwɔ́ yéɣe su ngáá telembo mɔ́ɔ́ Ngalá ngaah̃ú. Ná nuu fíli áá lokola faa lɛ́ingaa ɣɛ́ndaa w̃a bɛ́kpɛ, ná í ɣɛ ngeyá ngáá háwu ngáá kɛ telémbongɔɔ lé, kɛ háwu bih̃íngɔ lɔ́ ngéya ngɔ́ɔ́ lokola ma í lɔ́ve laá mba.

⁵ Ná ti ndéni, foló ngɔ́felangɔ i gulaí su, ngwahákpa kélei w̃a ti tɔ́ve pɛlɛ́ vólu. Nyá lɔ ngáá Ísulɔ yelái ti lé ndou. Híbulungai ti ỹááw̃ɔi kái kai mbáá ngé, nde kpambii sí h̃u taa ɣɛ́ ma Bɛ́njimai. Ná áá lí náa í to Ngala sávai hóundai wa, ngí ɣɛ́ngɔ ngáá Falósiai ti tá.

⁶ Ndii í ɣɛ́i kóó ya ngwala ngáá ngí híya ngáá Ngala sávai. Ngí ɣɛ́i p̃ɛ́ɛ́ ngáá faa bá ndá Jísu vólu yélaitii ma. Ná yáá gisíya ngáá nuu ɣɛ́ndai h̃u ngáá telembo mɔ́ɔ́, áá gúla nuu híya gilíí h̃u ngáá Ngala sávai, tɔmbema w̃áá fíli áá ɣɛi mbá.

⁷ Fái sítii kínɛi pá ngɔ́ɔ́ ti yeɣé ngáá kulasuunúma hááni hése, sí h̃uí ngáá ti yeɣé nɔ́ɔ náa ngáá kula ngeyá hááni kɔwɔ́ato sí wa Kílisitii í kɛ́a mbɛ́.

⁸ Aá ɣéle p̃ɛ́ɛ́ kulasuunúmai í Kílisitii wɔ́lɔndai h̃u ngáá kíya í na, ná nuu fíli áá faa fíli súw̃a maa gúlasuunumai ná w̃a, ngáá maa hái ná kpɛ́lɛɛ ngéɣe ngáá faa ỹááka. Sífaa ngí lokogúlaa faa kpɛ́lɛɛ sú ngí ti yeɣé ngáá faa ỹááka ngáá kɛinɔɔ́ ngí hómbo ngí ɣɛ́ ngáá Jísu Kílisitii nuu lɛ́i í ngáá Ndémɔi.

⁹ Ná vólu, naá laá ni ɣɛ́ ngáá nuu yílaa kpé. Ná vá tɔ áá kɛ ngɛ́i mɔ́ɔ lo hiyamá ngáá Ngala sávai telembo mááhɔlɔ fááw̃a. Kɛ́ aá ɣéle, ní lángi ngáá ɣɛ́ su ngáá Kílisitii, laá lɔ áá kɛ télembongɔ áá ɣɛ́ la. Ngimɔ́ɔ́ maa hái í na, ngáá telembongí Ngalá ngáá kɛ ngáá háwu a maa ɣɛ́ su, aa gula ndangí h̃u maa ɣɛ́ su ngáá Ngalá.

¹⁰ Faalɔ, ndóngɔɔ lé ngí ɣɛ́ Kílisitii wɔlɔ́ ngáá kɛ ele gíte wáá ngáá laá, kɛinɔɔ́ ná í wúyoɣeni sái h̃u, ngakpángi sí í ngeyá nyá bɛ́lɛ í ɣɛ́ ngéya. Ná wáá ngáá ngí ɣɛ́ ngáá kíya í ɣɛ́i na ngi w̃áánɔw̃ɔi h̃ú ɛ́ɣɛ sái í mbóni.

¹¹ Ná ná áá ɣɛ́, kítomai waa ngáá nyá bɛ́lɛ Ngalá ngi mbúyoɣe sái h̃u.

Yakpá yí Ngala fái wúkula

¹² Ngáá ndéma ngáá kɛ kɛɛlɛ ngáá ní gɛ́ɛ́hɔ pandaí wa. Kɛ́ nyá lɔ́ɔ yákpa gíte ngáá lií kpɛ́lɛɛ fái sítii kɛ fááw̃a, bɔw̃álale Jísu Kílisitii i naa gúlaa kɛlɛ́ma mbɛ́ ngáá ní ndá kɛinɔɔ́ ngí kɛ.

¹³ Mu mbála Yalá fɛ́li mbélai, ngáá ngeɣéma naá ngáá kɛ sí ngí su ngí ngukúlanga. Kɛ́ sí va ngí waá kɛ aá wáa ngáá sí, ngí lééw̃anga sítii ma ngí ɣɛ́ngɔ ti h̃u. Nyá lɔ́ɔ naa lúwɔɔ belé naá ngáá sí í naa wutúwɔ.

¹⁴ Nyá ngáá yakpá ngáá ngí fólo mbéinda a múwaa maa lápii wɔ. Ná wáá ngáá kulasuunúmai sí Ngala ngí mu wu pótenga mba ngelegóóh̃u véle. Aáva nuu áá mááhɔlɔ Jísu Kílisitii w̃aa véle w̃a.

¹⁵ A múỹɛi kínɛi mu lóko h̃úú levéngɔ naá Ngala fái h̃u a mú kisíya láálii sí wo. Ná wɔ́lii í gísiyai áá ɣɛ́ léélaa faa tá h̃u, ná ɣéle tɔ bɛ́lɛ Ngalá ngáá maa hái yakɛ́ í yáá kpál̃au.

¹⁶ A mú ndi nɔ́ɔ léi ngu ma ngáá sí a mu lónga mba mú fólonga sí h̃u w̃á.

¹⁷ Mu mbála Yalá fɛ́li mbélai, a waayáá híya ngáá túva veléi, ná vólu, a waayaa sítii ngasɔ́bɛ táá híya ngáá sí ní wú gálambongɔ la.

¹⁸ Ngí ndengá wú w̃á ká ká aáva nyá lɔ́ɔ múl̃ɔ nde wú w̃a ndiiỹaaní wála h̃u ngáá nuu bíh̃iw̃aa lɔ na ti ngáá Kílisitii waa hílima yélaa. Ti lúva veléi aa kula ngáá kɛ faa ỹááka waa ngáá Kílisitii háálai kulɔ́sii w̃a.

¹⁹ Tiyá lɔɔ vá liimá njahááma bɔw̃álale, ti ndá yálangi waa ngáá, sí ti longɔ́ lá ti luwúi hááw̃a ɛ́ɣɛ ngetéyangi h̃uu háitii. Taá h̃uubákpa ngáá sí kule í ti w̃a ti wúfe lá.

²⁰ Kɛ́ a muỹá mu ndái, a muỹá lɔ ngáá ngelegóóh̃u yélaa aáva a muỹa lɔ́ɔ mu Wúmaawo Mɔ́i Ndemɔí Jísu Kílisitii w̃áálɛlɛ gɛ́lɛ gɛlɛ ngáá í híɣe ngelegóóh̃u,

²¹ lɛ́i ngakpángi í ngeyá áá kɛ ngáá háwu ŋani kpɛ́lɛɛ í ɣɛ laá ngi léhei wu. Mu luwúi sítii taa ỹááni aa ti w̃áálovi ngáá maa yákpangi ná í ngeyá tí ɣɛ ngáá ngi ndá lúwui w̃aanɛɛ ngwalaí ɣɛ́ kíli.