FELÉMO 1 - Kɛ́lɛ Niinaí

Ndaalimaí

¹ Nyɛ́i ngí ngáá Pɔ́ɔ, ngí ngáá pelésina sífaa nyá lɔ́ɔ yénge Jísu Kílisitii yɛ, nyá ɛ́ɣɛ mú mbála Yalá fɛli mɔ́i Tímoti niỹa lɔ́ náa kɔlɔí sí vɔ́nɛ í yéle Felémo, yɛ́i yí ngáá mu mbála vandái ɛ́ɣɛ mu mbála yengé mɔ́ɔ,

² ɛ́ɣɛ Ngala fɛ́li mbélai sítiini taá máákpɔi hóu í vɛ́lɛi wú. Nyá lɔ́ɔ pɔ́nɛ múl̃ɔ Ápifiya yelé lɛ́i í ngáá a mu hééla Ngala fái h̃u ɛ́ɣɛ Ákipɔ lɛ́i laá bɛ́lɛ í ngáá mu mbála yénge mɔ́ɔ́ vanda Jísu Kílisitii hááw̃a.

³ Bɛlɛ́ mu Kɛ́ɛ́ɣɛ Ngála ɛ́ɣɛ a mu Lemɔ́i Jísu Kílisitii ti háá bɔwɔí ɛ́ɣɛ ti lííhei ti ɣɛ́ wú yɛ́.

Pɔ́ɔ í Felémo lɛní ngi lóngi taá ngi lángi hááw̃a Jísu h̃u

⁴ Felémo, kíya fíli ngáá ɣɛ́ ngáá mu Yálangi hɛ́li, ngáá sɛ́ɣɛɛ gula ma í yɛ́,

⁵ bɔw̃álale, ngí fáá ỹɛ́ninga kɔwɔ́ato ndongí wa yí su ngáá Ngalángi vóngaitii kpɛ́lɛɛ ɛ́ɣɛ ndangí yí su ngáá Ndemɔí Jísu.

⁶ Ní Yála fɛ́li ngói í hááw̃a aá waa ngáá, mu lángi í su yíla í kɛ́ ngáá háwu yí ɣɛ́ kulasuunúmai kpɛ́lɛɛ kɔ́lɔ í mu haáw̃a ɛ́ɣɛ yí ngátɔ ti wa kɛinɔɔ́ yí hómbo yí yénge Kílisitii yɛ.

⁷ Mu mbálai, ndongí í í h̃u i kɛ́a ngáá háwu kooh̃unɛ́ɛ́ wála i ɣɛ́a mbɛ́ aáva í mɔ́ɔ́ nduwúh̃ulɛ ngáá ngé ngwala. Yí kɛ́a ngáá háwu Ngalángi vóngaitii kpɛ́lɛɛ ti góóh̃u í nɛ́ɛ́ ngwala.

Maanɛ́ɛ́nɛngi Onɛsímɔ haaw̃a

⁸ Faalɔ, kíya mu báhangɔ su Kílisitii wa, ngɔ́ɔ́ nde í w̃a kpésekele ngáá sí kule í í w̃a kɛ fááw̃a.

⁹ Kɛ́ sífaa ndóngɔ ngáá í ye, ná lɔ́ɔ í kɛ́a ngáá háwu ngíwaa maanɛɛnɛ́ngi sí wo. Nyɛ́i ngí ngáá Pɔ́ɔ, ngí ngáá Jísu Kílisitii yááh̃u, aáva ngi hái í kɛ́a ngáá háwu ngí ngáá pelésina,

¹⁰ nyá lɔ́ ngáá í w̃áánɛɛnɛ siỹɛndópoi sí hááw̃a taa ɣɛ́ ma Onɛsímɔ lɛ́i í ɣɛ́a ngáá ní lóu Ngala fɛ́lindai h̃u táingi sí h̃u ngí ngáá pelésina.

¹¹ Hése wɔ́lɔ Onɛsímɔ aa ɣɛi ngáá ngangímba w̃ɔ́ɔ́ í hááw̃a, kɛ́ sí h̃úi náa í ɣɛa náá ngáa ngangímba w̃ɔ́ɔ́ mu félengɔ hááw̃a.

¹² Felémo, ndóngɔɔ lé ngáá Onɛsímɔ ngwala, kɛ́ ná fíli su, nyá lɔɔ́ tɔvé náá volú í yéle.

¹³ Ngí ɣɛ́ngɔ loí í ló ndóów̃a mbéinda ngáá ááyaa bɔmbá í vótoma ná ngi pélesinalai sí h̃u Ngalángi gééla woo lé fái w̃a.

¹⁴ Kɛ́ aáva ngɛ́i ɣɛ́ loí ngí í bánda ngá ngáá yí faa ɣɛ́ mbɛ́, kɛ́ aá ɣéle, ngáá ɣɛ loí yí nda gi sú yá gíte yí faa ɣɛ́ mbɛ́, faale, ngɛ́i ɣɛ́ loí ngɔ́ɔ́ kɛ́ ngáá ngakpa fáa kɛ yá gíte yí lúw̃a ma.

¹⁵ Tɛingaa Onɛsímɔ vela hawúi í wá aá waa ngáá kɛinɔɔ́ wú lówah̃u í wɔ́lɛma naa kuló í ɣɛ́ kpɛ́ɛ́ ngáá ná náá áá yángaima í w̃a, aa lo náá í wá kúnafɔ.

¹⁶ Kɛ́ aáva aa mɔɔ ngáá í lúwɔ lopo nɔ́ɔ, tɔvengɔ́ɔ́ lé náa nduwɔ lopólaa wa, aá lɔ́ náá ngáá mu mbála Yalá fɛ́li mɔ́i ta. Aá lɔ́ ngáá ndíívo mɔ́ɔ́ vánda wala aáva kíya ndóngɔ la, yá lɔɔ vá lóma la í lɔ́ve mbá sífaa, aá lɔ vá ɣɛ́ma ngáá í lúwɔ ɛ́ɣɛ múl̃ɔ í mbála ndangɔ́ ngáá Ndemɔí Jísu kíya nɔ́ɔ yí na.

¹⁷ Faalɔ, ná yíwaa ngéɣe ngáá í mbála yengé mɔ́ɔ́ Ngala fɛ́lindai h̃u, kɛ lokohéi Onɛsímɔ wu kɛ kíya nɔ́ɔ yáá lokohéi mbú.

¹⁸ Faa ỹɔ́u fíli áá ɣɛ́ kɛ́ngɔ ngáá í ye ɔɔ í gúle bɛ́lɛ í ɣɛ́ ma, bɛlɛ́ kpɛ́lɛɛ í ɣɛ́ ngáá mbáá háá.

¹⁹ Nyɛ́i ngí ngáá Pɔ́ɔ, nyá gíte lɔ náá ngíwaa sí vɔ́nɛ ngáá loko aa waa ngáá, sí fíli áá ɣɛ́ ma ngáá kule, ngáá fé vólu. Ngɛ́i ló p̃ɛ́ɛ́ í gísitɛma ná ngáá ní gúle lɔ í w̃a í lɛ́ɛ́h̃ui hááw̃a yí mááhɔlɔngɔ Jísu Kílisitii w̃aa véle w̃a.

²⁰ Faale, mu mbálai, í véle háále kái faa bɔ́wɔi sí ɣɛ́ mbɛ́ Ndemɔí Jísu haalái h̃u. Kíya mu báhangɔ su Kílisitii wa, yí kɛ ngáá háwu kóóh̃u í nɛ́ɛ́.

²¹ Ngí súúwɔlɔ kpál̃au ngáá ná ngáá í w̃ɔ́ɔ́ni faa fíli fááw̃a kɔlɔí sí h̃u ngíwaa pɔ́nɛ í yéle, yáá kɛ́ bɛ́lɛ í lɔ́ve ma.

²² Ná vólu múl̃ɔ, ndaa lomú ɣɛ́ kíli batɛ́ mbɛ́ bɔw̃álale, kí tɔ́ na ngáá Ngalá tɔɔ vá wú kpɛ́lɛɛ wú hɛ́li ngoítii ngapotéma ngáá ngi hómbo náá ngi yángaima wú yéle.

Ngapúmaa laalimaí

²³ Siỹɛndópoi sí taa ɣɛ́ ma Ɛpáfulɔ lɛ́i laa bɛ́lɛ í kpíndi vɛlɛí wu mbéi ngí na, sífaa í tɔɔỹái lengá láa bɛ́lɛ kɔwɔ́ato Jísu Kílisitii wa, i haaní i w̃a.

²⁴ Máa, Alesitáákɔ, Dímɔ ɛ́ɣɛ Lúu, tiyɛ́i ti ngáá mu mbála yengé mbélaitii tiyá bɛ́lɛ nɔ́ tí haaní í w̃a.

²⁵ Bɛlɛ́ Ndemɔí Jísu Kílisitii háá bɔwɔí í ɣɛ́ wú kpɛ́lɛɛ mbɛ́.