Ɛ́FƐSƆ 3 - Kɛ́lɛ Niinaí

Ngalángi lɔ́ɔ́wu h̃u hái Pɔ́ɔ í suugúlani

¹ Náá hááw̃a, nyɛ́i ngí ngáá Pɔ́ɔ, nyá lɔ́ Ngala fɛ́li wú hááw̃a nyɛ́i ngí ngáá pelésina bɔw̃álale nyáá lɔ́ɔ yénge Jísu Kílisitii yɛ wú hááw̃a wɛ́i wáá ngáá Júsua.

² Kɛ́ nɛ́nɛ p̃ɛ́ɛ́, ndángɔɔ lé lá ngáá wáá ɣɛ́ faa yɛ́ninga kɔwɔ́ato ngengengí sí wa Ngalá ngí féngɔ ngéya ngi háá bɔwɔí w̃áá véle w̃a ngáá ngí mbo áá wú gúlah̃uunuma.

³ Sí í ɣɛ́ngɔ ngáá Ngalángi lɔ́ɔ́wu h̃u hái nuu fíli áá ɣɛ́ngɔ faa wɔ́lɔ mba Ngalá ngí kɛngɔ́ ngáá ngé kɛ kíya nɔ́ɔ ngí faa gúlo lénga kɔwɔ́ato mba kɔlɔí sí h̃u.

⁴ Ná wáá kɔlɔí sí gála, wáá ɣɛ́ náa kɔlɔ́ kíya ngí Ngalángi lɔ́ɔ́wu h̃u hái sí yátɔngɔ mba Kílisitii áá kɛ ngáá háwu íwaa ɣɛ́.

⁵ Hése wɔ́lɔ nungáá taá ɣɛ́i ndɔɔwu h̃ú hái sí wɔ́lɔ, kɛ́ Ngalá ngí kɛngá ngáá háwu Hɛ́ɛ́ma Ỹínangi í ndɔ́ɔ́wu h̃ú hái sí ɣɛ́nga ngáá Ngalángi hɛ́ɛ́ma géélaitii ɛ́ɣɛ ndaa háá lé mbélaitii.

⁶ Ndɔɔwu h̃ú hái sí wáa ngáá kééla woo vándai í kɛ́a ngáá háwu Júsuai ɛ́ɣɛ sítii taá ngáá Júsua tí héi h̃u félengɔ p̃ɛ́ɛ́ tí ɣɛ́a ngáá nuu yílaa aáva ti kpɛ́lɛɛ taa Ngalángi nɛ́ɛ́mai w̃ááhɔlɔ ɛ́ɣɛ kuulóngi Ngalá ngi mbóngɔ Jísu Kílisitii í kɛ́nga ngáá háwu íwaa ɣɛ́.

⁷ Ngalá ngí kɛ́a ngáá háwu ngi háá bɔwɔí w̃áá véle w̃á ngáá ngí kééla wóo vándai lé. Ngi yákpangi h̃uu lɔ́ ngáá ngengengí sí wó na.

⁸ Toow̃aá aa mbá Ngalángi vóngaitii ndiiwáá. Kɛ́ ná fíli sú, Ngalá ngí ngenge kpíkpi fengɔ́ ngéya ngáá ngi kééla woó vándai lé sítii ma taa ngáá Júsua kɔwɔ́ato faa bɔ́wɔ h̃uulɔ́vengɔ wálai wa nuu áá maahɔ́lɔ ná áá ɣɛ́ Kílisitii wɔ́lɔ.

⁹ Kule lɔ́ má múl̃ɔ ngí kɛ nuu kpɛ́lɛɛ tí ngátɔ mba kíya Ngalá ngáá vá ngi lɔ́ɔ́wu h̃u hái h̃uu híyama. Ngala, lɛ́i í ngáá ngelegóóh̃u ɛ́ɣɛ ngélewu bátɛ mɔ́i, i ngi lɔ́ɔ́wu h̃ú hái sí lɔ́ɔ́wungɔ nuu kpɛ́lɛɛ mbá wɔ́lɔ

¹⁰ kɛinɔɔ́ sí h̃úi náa Ngala fɛ́li mbélaitii maa véle w̃á, ngakpa ŋániitii ti ɣɛ́ Ngalángi géle ɣélengi wɔ́lɔ pele kpɛ́lɛɛ su.

¹¹ Ngalá ngí kɛngɔ́ ngáá háwu Jísu Kílisitii mu Lemɔ́i, í kɛ sí wɔ́lɔ kpɔ́lɔɔ Ngala ngí ɣɛ́ngɔ loí í ɣɛ́.

¹² Kpahaí a mu sú Jísu Kílisitii wa ɛ́ɣɛ ndangí a mú su lá, i kɛngá ngáá háwu ngáá a mú fólo Ngalá má, ná vólu, a mu yɛ́pɛ ngelé nduwá ɛ́i ɣɛ́ mu h̃u.

¹³ Faalɔ, nyáá ngáá wú w̃áánɛɛnɛ ngáá wálaa liiỹááni ngáá sífaa ngíwaa maanɔw̃ɔ́i sí yéɣe wú hááw̃a. Maanɔw̃ɔ́i sí lɔ́ ngáá wú gúlasuunuma haa.

Pɔ́ɔ í Ngala fɛ́lini Ɛ́fɛsɔ yeláitii faaw̃a

¹⁴ Náá hááw̃a, ngááyaa ɣɛ ná léni, ngáá hítɛ wumbú yá ngí Kɛ́ɛ́ɣɛi Ngalá fɛ́li,

¹⁵ lɛ́i í kɛ́ngɔ ngáá háwu sítii kínɛi ti ngelegóóh̃u ɛ́ɣɛ ngélewu tí ná.

¹⁶ Ngáá Ngala fɛ́li ngáá Ngalángi háá bɔwɔí w̃áá véle w̃a wú ngakpá mááhɔlɔ Hɛ́ɛ́ma Ỹínangi yáa ngáá wú líí í bá.

¹⁷ Ngáá Ngala fɛ́li ngáá Kílisitii í vá wú líí h̃u ngáá ndangí wáá ɣɛ́ su lá ɛ́ɣɛ ngí lóngi í wú líí h̃u láa hé

¹⁸ kɛinɔɔ́ wá p̃ɛ́ɛ́ ɛ́ɣɛ Ngalángi vóngaa vekaítii wú hómbo wú ngatɔ́ mba kpál̃au kíya Kílisitii lóngɔ ngáá wú ye ngwala ngáá suulɔ́vengɔ.

¹⁹ Ngáá Ngala fɛ́li ngáá wú hómbo wú ɣɛ́ Kílisitii lóngi wɔ́lɔ, í ɣɛ́ wú yɛ, wú ɣɛ́ ngáá Ngalá kɛ kíli kíya bɛ́lɛ ngi lóngi h̃uuwɔ́ɔ́lɔngɔ nuu áá kɛɛlɛmáá wɔlɔ́.

^20-21 A mú Ngalá tɛ́ lɛ́i ngi yákpangi í mu h̃u áá hómbo í fáa bíh̃iw̃aa ɣɛ́ í lɔ́ve sí wá a maá mɔ́ɔ́ni faaw̃a ɛ́ɣɛ sí a maá gísiya la. A muỹɛ́i mu ngáá Ngala fɛ́li mbélaitii kpɛ́lɛɛ aáva mu báhangɔ Jísu Kílisitii wa, a maayáá Ngalá tɛ́ maá ngufema hé mbɛ́ hɔ́wɔ fíli kúnafɔ taá ngí ndá gúnafɔ. Amíína.