Ɛ́FƐSƆ 2 - Kɛ́lɛ Niinaí

Ngala ngí kɛngá mu ɣɛ́ ndɛɛh̃u gítei h̃u

¹ Ná wú ɣɛ́ngɔ ngoo ỹɛni tálai ɛ́ɣɛ faa ỹɔ́i h̃u Ngalá ngeyá, wú ɣɛ́ngɔ ɣɛi ngáá kíya nɔ́ɔ nuu háángɔ áá ɣɛ́ na Ngala ngááh̃u.

² Wú lúva veléi i ɣɛngɔ ỹɔu kíya nɔ́ɔ ngeleí sí wuu yélai ti lúva véle ỹɔu ỹɔungí tí na. Lɛ́i í ỹína nyɔítii maah̃u ngelewu, wú gólongɔ i ɣɛngɔ la mbu lɛ́i mɔ́ɔ í sítii maah̃u taá kólo lálai gúla ngáá Ngalá.

³ Mú ndé ngáá tɔɔỹaá, a mu kpɛ́lɛɛ mu ɣɛ́i ngoo ỹɛni tála h̃u ngáá Ngalá. Sí fíli ɔ́ɔ́ mu liivó aá lɔ́ nɔ́ɔ a mɔ́ɔ́ kɛ. Mu ɣɛ kíli sí w̃aa véle w̃a, kule í ɣɛ́ngɔ mu w̃á á mu maanɔw̃ɔ́ yéɣe kíya nuu búsa kpɛ́lɛɛ tí na bɔw̃álale Ngalá tuungɔ́ i ɣɛngɔ lá a mu lɔ́ngɔ kpɛ́lɛɛ ngéya a mu háá ỹɔítii faaw̃a.

⁴ Kɛ́ maaw̃aanúi í Ngalá ngeyá mu hááw̃a ɛ́ɣɛ ndongí í su ngáá mu ye ngwala h̃uu í wɔ́ɔ́lɔ.

⁵ Ná mu ɣɛ́ngɔ ngáá kíya nuu háángɔ áá ɣɛ́ la kɔwɔ́ato ngoo ỹɛni tálai wa ɛ́ɣɛ faa ỹɔ́i wa mu ɣɛ́ngɔ maá kɛ ngáá Ngalá, Ngalá ngi kɛní ngáá háwu mu ndɛɛh̃u gítei w̃ááhɔlɔ Kílisitii w̃aa véle w̃a, ná í Jísu yoɣéni sái h̃u. Ngalángi háá bɔwɔí lɔ í mu wúmaawongɔ la.

⁶ Sífaa, mu báhangɔ su maa Jísu Kílisitii, náá hááw̃a, a mu yooɣénga sái h̃u aáva a muỹá lɔ mba ngáá masangáá ngelegóóh̃u w̃ásandai h̃u.

⁷ I sí ɣɛ́ngɔ mu yɛ kɛinɔɔ́ nuu kpɛ́lɛɛ ti ɣɛ́ kɔlɔ́ kúnafɔ ngáá faa bɔ́wɔ lo ngwalaí sí í su ngáá mu ye kɔwɔ́ato kpahaí wá mú sú Jísu Kílisitii wa.

^8-9 Ná wáá ngáá, Ngalángi háá bɔwɔí lɔ í mú wúmaawongɔ la ndangí w̃áá véle w̃a a mú su la. Aa ngáá mu yénge panda haa lɔ Ngalá ngí mú wúmaawongɔ faaw̃a, kɛ́ Ngala máábatɛ te nɔ́ɔ. Náá hááw̃a, nuu ɛ́i maayónga tevé.

¹⁰ Ngalá tɔ́ í mú bátɛngɔ kíya a mú na. I mu bátɛngɔ ngáá niina kpahaí wá mú su Jísu Kílisitii wa ngáá a mú ngenge pándai sítii mbo sí í suubátɛnga náa kílii ngáá a mú tí wo.

Sítii tí langɔ́ ngáá Jísu Kílisitii tiyá lɔ́ ngáá nuu yílaa

¹¹ Wɛ́i wáá ngáá Júsua nde pele w̃a, wú lɔ́vengɔ láá le pɛlɛ́ vólu, ná va tɔ í kɛ́a Júsuai taa wú yéɣe ngáá Ngalá kɔlɔ́ tála yelaa. Júsuai pa taa bɔwɔ́ yéɣe ngáá Ngala mbélaa bɔw̃álale tí lɔ́vengɔɔ lé pɛlɛ́ vólu kɛ́ ná lɔ nɔ́ɔ́ ngáá nuu búsa ndá lúva vele. A gisíya ngáá kíya wú ɣɛ́ngɔ na hése.

¹² Hése, wú báhangɔ aa ɣɛngɔ lá Kílisitii wa, wáá ɣɛ́i ngáá Ísulɔ yélai ti tá. Kɛ́lɛngi í Ngalá ndowah̃u taá ngi vóngaitii kɔwɔ́ato kuulóngi wa í mbóni ngáá ti ye, wáá ɣɛ́i naa wa. Wú ɣɛ́ngɔ nɔ́ɔ ndɛɛh̃ú h̃u kɛ́ wú gítomaa aa ɣɛngɔ na. Wáá ɣɛ́ngɔ tɔɔỹaá Yála kái káingi wɔ́lɔ.

¹³ Wú w̃áá í ɣɛ́ngɔ gooh̃á Ngalá mba, kɛ́ wú báhangɔɔ lé náa Jísu Kílisitii wa, aáva wá lɔ naa Ngalá kpéla kɔwɔ́ato saáɣa haí wá Kílisitii í mbóni.

¹⁴ Jísu Kílisitii bɛ́lɛ i vaangá ngáá ndiihéi a mu yɛ sífaa sítii tí ngáá Júsua ɛ́ɣɛ sítii taa ngáá Júsua i ti ɣɛngá ngáá nuu yílaa. Sái Jísu i mbóni kulɔ́sii w̃a, i silímai gúlanga Júsuai ndowah̃u ɛ́ɣɛ sítii taa ngáá Júsua.

¹⁵ I Júsuai tí hávaitii ngi háá bɛni nga í ɣɛ́i na í ɣɛ́i áá nungái nguto kɛinɔɔ́ Júsuai ɛ́ɣɛ sítii taa ngáá Júsua ti ɣɛ́ ngáá nuu yílaa, tí báhangɔ í ɣɛ́ la su Jísu wa. Ná lɔ í kɛ́nga ndiihéi í híí félengɔi sítii ndówa h̃u.

¹⁶ Sái Jísu Kílisitii í mbóni kulɔ́sii w̃á i silímai gúlanga híí félengɔi sítii ndowah̃u, í tí ɣɛ́ ngáá nuu yílaa, í mɔ́ɔ kɛ ngáá háwu tí lówah̃u í bátɛ taá Ngála.

¹⁷ Faalɔ, Jísu Kílisitii i váani í ndiihéi gééla woo vandaí lé wú kpɛ́lɛɛ má wɛ́i wáá ngáá Júsua wú w̃áá gooh̃ángɔ í ɣɛ́ngɔ la Ngalá mbá ɛ́ɣɛ Júsuaitii tiyɛ́i tí ɣɛ́ngɔ Ngalá kpéla.

¹⁸ Jísu Kílisitii w̃áá véle w̃á lɔ a mu kpɛ́lɛɛ kpɛ́lɛɛ, sítii tí ngáá Júsua ɛ́ɣɛ sítii taa ngáá Júsua, í kɛngá naa gúlangɔ kɛlɛ́ma mu yɛ ngáá a maá fólo Kɛɛɣɛí Ngalá ma mu Yála fɛ́li ngói w̃aa véle w̃a, Hɛ́ɛ́ma Ỹína ngiláá kpéngi sí w̃áá véle w̃a.

¹⁹ Náá hááw̃a, wɛ́i wáá ngáá Júsua wáá mɔ́ɔ ngáá híí vékaa ɔɔ sotangáá Ngalángi vóngaitii ndiiwáá, wá lɔ́ náa ngáá Ngala ndéngaa pɛlɛ́ lówa yílaa mbú.

²⁰ Mu kpɛ́lɛɛ nɔ́ɔ mu gúlangɔɔ lé ngáá pɛlɛ́ aáva Ngalángi géélaitii ɛ́ɣɛ Ngalá ndaa háá lé mbélaitii tí gúlangɔɔ lé ngáá maa vɛ́lɛi gɔ́wɔi. Jísu Kílisitii lɔ áá pɛ́lɛ gɔ́wɔi ná h̃úúba.

²¹ Aá lɔ́ áá kɛ ngáá háwu pɛlɛ́i sí ɛ́i wólo. Í mɔ́ɔ kɛ ngáá háwu ngu ngangí í yóóɣe ngáá hɛ́ɛ́ma vɛ́lɛ Ndemɔí hááw̃a.

²² Kpahaí wú su Jísu Kílisitii wa, wá bɛ́lɛ wú báhaa Ngalángi vóngaa vekaítii kpɛ́lɛɛ mbá ngáá pɛlɛ́ mbéi Ngalángi Hɛ́ɛ́ma Ỹínangi áá ɣɛ́ na.