Ɛ́FƐSƆ 1 - Kɛ́lɛ Niinaí

Ndaalimaí

¹ Nyɛ́i ngí ngáá Pɔ́ɔ, nyá lɔ́ ngáá kɔlɔí sí vɔ́nɛ nyɛ́i ngi ngáá Jísu Kílisitii géélai áá gúla Ngalángi háá h̃uubatɛ su. Nyá lɔ́ ngáá Kɔlɔí sí vɔ́nɛ wú yéle wɛ́i wú ngáá Ngalángi vóngaitii taí sí h̃u taa tolí ngáá Ɛ́fɛsɔ, wɛ́i wáá híɣengɔ tɔ́wɔbaɣa vélei sí wa wú lɛ́ɛ́h̃ui h̃u wú kpáhangɔ Jísu Kílisitii wa.

² Bɛlɛ́ mu Kɛ́ɛ́ɣɛ Ngalá ɛ́ɣɛ mu Lemɔ́i Jísu Kílisitii ti háá bɔwɔí ɛ́ɣɛ ti lííhei ti ɣɛ́ wú yɛ́.

Mu h̃úúyafuw̃a pandaí í hɛ́ɛ́ w̃aahɔ́lɔ Jísu Kílisitii yáa

³ A mú sɛ́ɣɛɛ gula Ngalá ma lɛ́i í ngáá Kɛɛɣɛí Ndemɔí Jísu Kílisitii hááw̃a. I káámaa hɛɛ kpɛ́lɛɛ mbónga mu yɛ ɛ́ɣɛ mu h̃úúyafuw̃angi kɔwɔ́ato kpahaí wa mú su Kílisitii wa.

⁴ P̃ɛ́ɛ́ ngelewu ɔ́ɔ́ bátɛ, Ngala ngí ɣɛi náa lokoloí mu wá ngáá ngi vóngaa, kpahaí wa mú sú Jísu Kílisitii wa ngáá faa ỹɔ́u ɛ́i ɣɛ́ mu h̃u ngaah̃u mu h̃úúlaahengɔ í ɣɛ́ la ngáá ndongí.

⁵ Ngala ngí ɣɛi náa kpatɛí ngáá mu ɣɛ́ ngáá ngi léngaa Jísu Kílisitii w̃áá véle w̃a. Aáva sí lɔ́ í ngáá ndiivó fái ɛ́ɣɛ ngi háá h̃uubatɛngí

⁶ kɛinɔɔ́ laa Ngalá ndaaw̃áá í lɛ́ ngi háá bɔwɔ vanda walaí hááw̃a sí í féngɔ mu yaá ngi líívo Síỹɛndou Loí w̃áá véle w̃a.

⁷ Saáɣa hái Jísu Kílisitii í mbóngɔ i mu wúmaawonga í mú háá ỹɔítii suuhaaló. Sífaa, Ngalángi háá bɔwɔí wála h̃úu í wɔ́ɔ́lɔ

⁸ í kɛ́a mu yɛ́ ngi géle ɣelengi w̃áá véle w̃a.

⁹ Ndɔɔwu h̃ú hái í ɣɛ́ngɔ kpatɛí i kɛ́a mu ɣɛ́ kɔ́lɔ Kílisitii w̃áá véle w̃a. Ná vá tɔ í ɣɛ́ngɔ loí í kɛ.

¹⁰ Ngalángi háá h̃uubatɛngí áá vá mbóma, ná kɛ fóloi áá fólo ma, aa kɛ ngáá háwu ŋaniáitii kpɛ́lɛɛ tí ngélewu ɛ́ɣɛ ngelegóóh̃u ti ɣɛ́ ngoo yiláá sú, Kílisitii í ɣɛ́ ngáá ti wútuwɔɔ w̃ɔ́ɔ́ walaí.

¹¹ Faí kpɛ́lɛɛ aa ɣɛ kɛ kíya Ngalá ngáá ɣɛ́ loí tí ɣɛ́. Ngalángi lokolongɔ́ ni wa ngáá ngi vóngaa kpahaí wa mú su Kílisitii wa. I sí ɣɛ́ngɔ bɔw̃álale sí lɔ́ í suubátɛngɔ ngáá í kɛ́ tɔkúla héimai wɔ́lɔ kpɔ́lɔɔ

¹² kɛinɔɔ́ ní láa Ngála ndaaw̃áálɛ ngi yákpangi hááw̃a niỹɛí hése ni yaah̃ú í ɣɛ́ngɔ Kílisitii lúwɔ.

¹³ Wá bɛ́lɛ nɔ́ Ngala ngí wú ɣɛ́i ngáá ngi vóngaa ná wú tɔɔỹaá gééla woo vandaí ỹɛ́nini, wú lá lá. I wú wumááwoni, wú lá ngáá Kílisitii aáva Ngalá ngi ngakɛ́a ngáá muỹa lɔ ngáá ngi vóngaa ngáá Hɛ́ɛ́ma Ỹínangi í maa gúúlo mbóni, í kɛ́a ngáá háwu í mu vólu.

¹⁴ Hɛ́ɛ́ma Ỹínangi í mú volú i kɛngá a mu ɣɛ́ kɔlɔ ngáá sí Ngalángi í ngi vóngaitii kuulongɔ la, aa kɛ. Aáva í mɔ́ɔ kɛ mu ɣɛ́ kɔ́lɔ ngáá sítii ti ngáá Ngalángi vóngaitii tí wumááwongɔ áá ɣɛ́ la. Ná vá tɔ́ í kɛ́a táa Ngalá ndaaw̃áálɛ ngi yákpangi hááw̃a.

Pɔ́ɔ Yála fɛ́li ngoí

^15-16 Náá hááw̃a, sí kpɛ́lɛɛ Ngala ngí kɛ́a, kíya fíli ngáá ɣɛ́a Ngala fɛ́li, ngáá sɛ́ɣɛɛ gula Ngalá má wú yɛ́ í séi ná h̃úu w̃á ngí fáa ỹɛ́nini kɔwɔ́ato ndangí wa wú su ngáá Ndemɔí Jísu ɛ́ɣɛ ndongí wú su ngáá Ngalángi vóngaitii kpɛ́lɛɛ.

¹⁷ Ngáá Ngalá mɔ́ɔ́ni lɛ́i í ngáá ngakpa Kɛ́ɛ́ɣɛi Ndemɔí Jísu Kílisitii hááw̃a í kɛ ngáá háwu Hɛ́ɛ́ma Ỹínangi í ɣɛ́ wú vólu, i wú géle ɣele wú ɣɛ́ tɔɔỹái wɔlɔ́ kɔwɔ́ato Ngalá mbá, wú ɣɛ́ kɔlɔ́ ngáá ele gíte wáá ngáá laá.

¹⁸ Nyá lɔ́ɔ Ngalá fɛ́li ngáá wú gí mai ya ngí ɣɛ́ kpál̃au ngáá wú hómbo wú ɣɛ́ tɔɔỹái wɔlɔ́ áá gúla ngeyá kɛinɔɔ́ wú ɣɛ́ kitomái wɔlɔ́ áá kúla kɛlɛ́ma wú yɛ́ ɛ́ɣɛ ngi háá bɔwɔ walaí í wú gúúlongɔ lá

¹⁹ ɛ́ɣɛ ngakpa ngwálai áá fé mu yaá muỹɛ́i máá lá lá. Ngakpángi sí áá fé mu yaá, aá lɔ nɔ́ɔ

²⁰ í Kílisitii yooɣéni lá sái h̃u í séi bɔwɔ́ béla ngufema ỹándai masandáá h̃u.

²¹ Kílisitii w̃ásandai í ngelegóóh̃u áá lɔ́ masandái kpɛ́lɛɛ kpɛ́lɛɛ maah̃u ngelegóóh̃u. Masa tóów̃aa mbá lááheingi sí í mba, tɔvengɔ́ɔ́ lé masa tóów̃aa mbá lááheingi kpɛ́lɛɛ mbá í ngelewu ɛ́ɣɛ sí áá ɣɛ́ na kúna.

²² Ngala ngí ngakpá féngɔ Kílisitii yáa ŋani kpɛ́lɛɛ mááh̃u í mɔ́ɔ́ kɛ ngáá ngutuwɔɔ́ w̃ɔ́ɔ́ walaí Ngala fɛ́li mbélaitii faaw̃a.

²³ Ngala fɛ́li mbélaitii kulangɔ́ɔ́ lé ngáá Kílisitii laá búte. Ngala fɛ́li mbélaitii tɔ ti ngáá Kílisitii yénge toko yafɔ́ningɔi. Aáva Kílisitii lɔ náa í ngáá fái kpɛ́lɛɛ ngu tevéngɔi ỹandá kpɛ́lɛɛ.