TI GƐ́Ɛ́ HAÍTII 28 - Kɛ́lɛ Niinaí

Pɔ́ɔni tí fóloi Mɔ́ɔ́ta

¹ Ná ní foloní kaséngi ya lɛ́i lɛ́i, ní kɔlɔní náa ngáá kɛ maa ỹandái ná ni ɣɛ́i na, njɛí naa w̃ááyele mbélengɔ taá maa lɔwɔlɔí sí lolí ngáá Mɔ́ɔ́ta.

² Nungái nátii ti ɣɛ́i na, tí kɛ́ɛ́hɔ pandá wála gulaní ngáá ni ye ngáá ni gí kéle tɔ aa ɣɛi mba. Tí lókoheini ní wu, tí ngɔmbu la, tí ni lolí ma ni kpɛ́lɛɛ, bɔw̃álale njɛí i ɣɛi áá wá, kɔɔlɛ́i áá va.

³ Pɔ́ɔ i kɔvií yatɛní mba í pɛlɛ pumá ngɔ́mbui yá. Kɛ nduyé kpándii i kɛngá kaalií tá ngi w̃ál̃ai yakpangɔ́ í ɣɛ́i lá í gúla maa gɔ́vii ná h̃u, í laa vɛ́lɛ Pɔ́ɔ lokoí wa, í nyíí í bá mba.

⁴ Ná maa látai ná h̃uu yélaitii tí kaalií na lɔ́ni hɛ́lɛni Pɔ́ɔ lokoí wa, ti ɣɛ́i náa taa nde ndé ỹɔw̃ɔ́ ỹɔ́w̃ɔ w̃a, táa ɣɛ́ ta, “Siỹɛndópoi sí ɔɔ ɣɛ ngáá nuu váá mɔ́ɔ́ kái kái. Ná lɔ́ í kɛ́nga kíya bɛ́lɛ í vélangɔ áá mɔ́ɔ longɔ́ yívoi wu, ná fíli sú, tɔ́wɔbaɣa w̃ásangi lɔɔ ɣɛ́ í ngi háá ỹɔí votó kula nɔ́ɔ w̃ɛ́ɛ́ ma, aa lɔɔ ɣɛ́ nɔɔ́ í ngu ndaa víli.”

⁵ Kɛ́ Pɔ́ɔ i lokoí liikáni ngɔmbuí w̃ááh̃u, kaalií í gúla mba, í víli ngɔmbuí yá. Aáva faa fíli aa ɣɛi ngáá Pɔ́ɔ.

⁶ Nungái nátii pa ti gingí i ɣɛi nɛ́nɛ na ngáá kɛ Pɔ́ɔ lokoí lɔɔ vá hemá ɔɔ ná na láá le, í gula í ha. Kɛ́ ná tí naa w̃áálɛlɛni ká ká taá tɔ́ni faa fíli ɔ́ɔ́ ɣɛ́ ngáá Pɔ́ɔ, tí gi máa haí i ɣɛi náa léélaa, tí ndéni tí ɣɛ ta, “Siỹɛ́ngi sí lɔ ngáá ngalángi ta!”

⁷ Mbéi va ni ɣɛ́i na naa w̃áa áá ɣɛ́i gooh̃á ỹandái ná h̃uu wá í ɣɛ́i ngáá siỹɛndópoi sí taa ɣɛ́ ma Pɔbíliyɔ ngi ndá. Aáva Pɔbíliyɔi sí va tɔ í ɣɛ́i ngáá masangí ndɔwɔlɔí ná h̃uu haáw̃a. I lokohéini ni wu ngi vɛ́lɛ wu. Aáva foló sáángɔ haaw̃a, i ɣɛi áá ni h̃úúhou ngáá pangɔ́ ngwala ngáá ngi hótangaa.

⁸ Masangí na ngi kɛ́ɛ́ɣɛ i ɣɛi laáni ngáá seebɛ. Kɔɔlɛ́ húlaini ngaa koo h̃u woléngi lɔ ti ɣɛ́i mba. Pɔ́ɔ i liiní ná sei héi ma, aáva ná Pɔ́ɔ í Ngala fɛ́lini ma, í loko vɛ́lɛni ma, ná í wálo.

⁹ Ná faí sí í ɣɛ́ni, seebɛ yelái sítii kínɛi náa tí ɣɛ́i maa ỹándai ná, ti w̃áta tí vaaní, aáva tí mbaló mááhɔlɔni.

¹⁰ Ti wúfeni ni w̃a pele bih̃íw̃aa h̃u aáva ná ni w̃ááhei w̃óni ngáá ni gúla naa wa ni li keléngi tá h̃u njɛí ya, tí ní w̃ááloloni ngáá ni bɛ́ndɛ ma wɔ́lingaitii.

Ni gúlani Mɔ́ɔ́ta, ní li Lóómi

¹¹ Ná ní kɛ́ni ngáá ngalú sáángɔ Mɔ́ɔ́ta, keléngi sí í gúlani Alɛsáánduya taí h̃u ndaaheíngi í ngáá Heela Ngálangai, aáva í ɣɛ́i lóóni Mɔ́ɔ́ta lɔwɔlɔí ná h̃u í ló su kɔɔlɛ́ hɔ́wɔi ná í lɔ́ve, laá lɔ náa ni vílii su, ní li.

¹² Ní fóloni naá taa walái sí h̃u taa naa lolí ngáá Sélakiyu, ní kɛ na ngáá foló sáángɔ.

¹³ Ná ni vílini keléngi h̃u, ni gúlani naa wa aáva ní lii náa taa walá vékai sí h̃u taa náa lolí ngáá Lɛ́giyɔ. Maa yélei ná í wóni, kɛ fɛfɛngí i mɔɔ tɔkúla héinga ngáá vaalaá áa gúla ngáá seɣá h̃u veleí. Naa vólu, w̃áá yeleí lɔ náa í wóni, ní fóloni tái sí h̃u taá tolí ngáá Putiyóli.

¹⁴ Naa lɔ ní ni mbála Yalá fɛli mbélaitii tɛingáá w̃ááleni na. Aáva tí ndéni ni w̃a ngáá ni ló na ti gɔwɔ́ w̃á ngáá ndɔwɔ́ yílaa. Kɛ ni híyangi ɣɛ kíli i ɣɛi ngáá sí, ná ni ɣɛ́i naa lí Lóómi taa walái h̃u.

¹⁵ Ngala fɛ́li mbélai sítii ti ɣɛ́i Lóómi tí ni w̃áá woo ỹɛ́nini ngáá kɛ naá náa va. Tí vaaní ngáá tí ní lúwɔɔ lo. Tí lɛ́ingaa ti fóloni fáli ndɔwɔ́ bálangi sí ya taa tóli ngáá Ápiyɔ ɛ́ɣɛ ti lɛ́ingaa ti foló ỹandái sí Sota Pɛ́lɛ Sáángɔitii tí na. Ná Pɔ́ɔ í ti lɔní, i sɛ́ɣɛɛ gulaní Ngalá ma aáva nduwúh̃u i lɛ́ lá búte.

Pɔ́ɔ i Ngala ngói lení Lóómi

¹⁶ Ná ní fóloni Lóómi tai h̃u, Lóómingaitii ti gɔ́mɛti nuu walaí i luw̃áni ma ngáá Pɔ́ɔ í ɣɛ́ bɔwɔ́ hááw̃a. Aáva i sóya w̃ɔɔ bahaní mba ngáá ná yaah̃ú í ɣɛ mba.

¹⁷ Ná ní kɛ́ni náa na ngáá foló sáángɔ, Pɔ́ɔ i Júsuaitii ti wútuwɔaitii maakpɔ́ni mba. Ná tí w̃aakpɔ́ni, kɛ i ɣɛa ti w̃a, “Mu mbálangaa, kɛ kíya bɛ́lɛ ngáá faa ỹɔ́u fíli kɛ́ngɔ kɔwɔ́ato mu káwalani ti ndá híya veleí wa kɛlaa ngɔ́ɔ́ faa ỹɔ́u ɣɛ ngáá a mu vóngaitii, ná h̃u fíli, ti sóuni ngáá pelésina Jɛlúsɛl̃ɛ, ti tɔ́ve Lóómingai ti gɔ́mɛtii yele.

¹⁸ Ti kɔ́sɔni, aáva ti ɣɛ́i náá loní ti bé mbá, bɔw̃álale tí tɔ́ni ngáá kɛ péle lálangɔ aa ɣɛi lá faa fíli su ngáá kule ɣɛ́ ma ngɔ́ɔ́ saa w̃ááhɔlɔ su.

¹⁹ Kɛ́ ná Júsuaitii taa ɣɛ́i kɛní tɔɔ́ lúw̃a ná w̃a, i ɣɛi má ngáá kule ngáá ngí nde ngáá Lóómi Lɔwɔlɔ́ W̃ása Ngwalaí í ní bɔ́ɔ́lɔi le. Kɛ́ faa fíli táá le ɔ́ɔ́ ɣɛ́ ɣɛngɔ́ ngéya ngáá ngɔ́ɔ́ pɛlɛ kpɔ́wɔ bɔ́wɔ vóngaitii mba.

²⁰ Háwui sí lɔ í kɛ́ngɔ ngí ndéi ngáá ngáá ɣɛ loí ngí wú lɔ, ná vólu, ngí yɛ́pɛ wú yele, sífaa sí Ísulɔ yeláitii ti gítongɔi mba laá pólu véle h̃uu lɔ́ í kɛ́nga ngí njɔ́lɔwɔ ya.”

²¹ Kɛ nátii tí ngoo yápotenga, ti ɣɛ́ ma, “Kɔlɔ vɔ́nɛngɔ fíli aa nɛɛ gulaní Judíya lɔwɔlɔí h̃u ɔ́ɔ́ foló ni w̃a kɔwɔ́ato í wa kɛlaa mu mbála Júsuaitii kele tɔ tiyɛ́i taa gúla na tɔɔ ɣɛ́ ngoo ỹɔ́u léngɔ kɔwɔ́ato í wa.

²² Kɛ́ ni longɔ́ɔ́ lé ní í gí maa háitii kɔ́lɔ, sífaa ní kɔ́lɔ ngáá ỹandá kpɛ́lɛɛ kpɛ́lɛɛ, nungáitii tiyá lɔɔ yɛ́pɛ ỹɔú kɔwɔ́ato ngoo yiláá fái sí wa yí vílingɔ mba.”

²³ Tí kuu láni ma náa ngáá folói tɔ́ɔ́ w̃ɛ́ɛ́ múl̃ɔ Pɔ́ɔ w̃áála. Ná naa hɔwɔ́ í hítini, ti yangí ɣɛ́i wɔɔlɔ í lɔ́ve sítii mba ti vááni maipángi w̃a. Ti vááni mbéi Pɔ́ɔ laaw̃áá vɛ́lɛngɔ i ɣɛi lá na. Í sei ngelendái w̃a í fólo kpɔkɔ́ w̃a, Pɔ́ɔ i ɣɛi áá yɛ́pɛ ti yelé kɔwɔ́ato Ngalángi w̃ásandai wá, ná vólu, íwaa yákpa ngáá í ti lii vóte, ti lá ngáá Jísu. I ɣɛi áá maa hái yakɛ́ ngáá tí ye áá gúla Ngala sávai h̃u í féni Muusé yáá ɛ́ɣɛ fái Ngalá ndaa háá lé mbélai ti pɔnɛní.

²⁴ Ti lɛ́ingaa ti ɣɛ́i ti h̃u tí láni lá ngáá kɛ sí áá nde tɔɔỹáá le. Kɛ́ pekaítii taá láni la.

²⁵ Taá luw̃áni ỹɔw̃ɔ́ ỹɔ́w̃ɔ woo w̃á aáva tí pɛlɛní gulamá Pɔ́ɔ yeléngi wa táá lí ná Pɔ́ɔ í ngapúmaa woí sí lení, ngáá sí í ɣɛ́i ta, “Hɛ́ɛ́ma Ỹínangi í tɔɔỹái léni wú káwalani ma wɔ́lɔ ngáá sí í kɛ́ni ngáá háwu Ngalá ndaa háá lé mɔ́i Aisáya í ndéni,

²⁶ í ɣɛ́i ta, ‘Lí nungái sítii ngéle, yí yɛ́pɛ ti yelé, yí ɣɛ́ ti w̃a, Wá lɔɔ ɣɛ́ nɔ́ɔ fɔ́ wáá wolílo ká ká kɛ́ wɛ́i faa yátɔ mba. Ná vólu, wá lɔɔ ɣɛ́ nɔ́ɔ fɔ́ wáá wɔ́lɛ kɛ́ wɛ́i ỹandá lɔ.

²⁷ Sífaa nungái sítii ti liítii kpángɔɔ le, tí wóliitii sitɛngɔ nga, ná vólu, taa yaah̃úitii tivi tɛí ỹánda lɔ́ ngáá yaah̃úitii. Kɛ bele ná láá lé, tɔ́ɔ́ ɣɛ́ táa ỹandáitii tɔ ngáá yaah̃úitii aáva tí faa ỹɛ́ni ngáá wolíítii, tí ngatɔ́ mba ngáá liítii aáva tɔ́ɔ́ vóte nyá mbá Ngalá, ngí tí waló.’ ”

²⁸ Kɛ́ Pɔ́ɔ i woí yakɛ́lɛni ngáá sí, í ɣɛ́i ti w̃a, “Nyáá ngáá nde náa wú w̃a wú ɣɛ́ faa wɔ́lɔ mba ngáá kɛ Ngalángi wúmaawo gééla woí sí i gulangɔ́ Ngalá ngelé, i tɔ́venga sítii taa ngáá Júsua ngelé, sífaa nátii tiyá lɔɔ vá wóliloma ma.” [

²⁹ Ná Pɔ́ɔ í ngói sí léni, Júsuaitii ti gúlani naa wa táa ỹɔw̃ɔ́ ỹɔ́w̃ɔ w̃aaɣaalí ngáá ndiiyaw̃al̃á.]

³⁰ Fowó félengɔ laa lówah̃u kínɛi, Pɔ́ɔ i ɣɛi nɔ́ɔ wu maa vɛ́lɛi wu í ɣɛ́i ngeɣéni, áá maa pávai gúla pɛlɛ́ w̃ɔ́i w̃a. Aáva i lokohéini sítii kpɛ́lɛɛ mbú tɔ́ɔ́ li laalíma ma.

³¹ I ɣɛi náa áá yɛ́pɛ nungáitii ngéle kɔwɔ́ato Ngalángi w̃ásandai wa, ná vólu, áa ti galámbo kɔwɔ́ato Ndemɔí Jísu Kílisitii wá. I ɣɛi áá njɛpɛí sítii pú ngáá ndiiba nungáitii ma. Aáva nuu fíli pá aa mɔɔ tokobení ná wa.