TƐSALÓNIKA GƆ́LƆI HELE KÉLEI 2 - Kɛ́lɛ Niinaí

Ndemɔí Jísu vaalái vólu

¹ Mu mbála Yála fɛ́li mbélai, niỹá lɔ́ɔ faa lé wú w̃a kɔwɔ́ato mu Lemɔ́i Jísu Kílisitii váálai wá vólu, ɛ́ɣɛ táingi máá vá ndaaw̃ɛ́ɛ́ma.

² Wú gí máitii nga súpundai h̃uu álaa ɣɛ́ nɔ́ɔ lúkpu kɛlaa wɔ́ɔ́ ɣɛ́ wú nga wúúlee kɔwɔ́ato sí wa ndengɔ́i ngáá Ndemɔí Jísu vaa holói í folónga ma. Aá ɣéle tɛingaa h̃u nuu lɔ́ í ɣɛ́ngɔ áá ngusu lɔ́ ngóó le í ná léngɔ, ɔɔ nuu lɔ́ í ɣɛ́ngɔ áá keela wóó lé í ná léngɔ ɔɔ ná láá lé múl̃ɔ, tɛingaa taá ɣɛ́ ndengɔ́ ngáá ni ná vɔ́nɛngɔ kɔlɔ h̃u.

³ Kɛ́ wálaa kɛ nuu fíli ɔ́ɔ́ wú yákpolowa péle fíli su, sífaa, Ndemɔí aa nɛɛ vaamá kɛ sítii táá vá ngapúmaa lo ndáá wuí gúlama ngáá Ngala tí kɛ. Ná vólu, nyaama ỹáni walaí sí lɛ́i suubátɛngɔ náa ngáá aá lɔɔ lí njahááma aa vá náa.

⁴ Aa ŋani kpɛ́lɛɛ fɛ́lindaa h̃uuh̃ándɛ ɛ́ɣɛ sítii kpɛ́lɛɛ pá nuu áá ɣɛ́ ta ngakpá tɔ ti h̃u ti hɛ́li fáá h̃u. Aa bɔwɔ́ yá kɛ baí ngákpa fáá kpɛ́lɛɛ mááh̃u, ná vólu, aa li bɛ́lɛ p̃ɛ́ɛ́ Hɛ́ɛ́ma Yála Pɛ́lɛi wu, í héi na, í bɔ́wɔ gúla ngáá Ngalá.

⁵ Wáá gíseingɔ sí kpɛ́lɛɛ má ngí ndéngɔ wú w̃a ná h̃u ngí ɣɛ́i wú lóów̃a?

⁶ Wú kɔ́lɔ sí áá nyááma ỹáni walaí sí h̃úúhou áá nɛ́ɛ́ vaamá í ló sú í fólo fóloi ná kái kái má áá vá vááma má.

⁷ Kpindí h̃úú hái nyaamái í su aá lɔ náá áá ɣɛ́ kílii. Kɛ́ sí kái kái pá kule í ma í ɣɛ́, ɛi ɣɛ í ló su kpóloo nuí ná toko í lái maa hái lúwɔ tí kúla naa lúwɔ.

⁸ Ná ná áá ɣɛ, nyaama ỹáni walaí sí aa va náa aáva Ndemɔí Jísu va aa paa náa paaw̃ái ngáá láá hɛ́fɛngi, í nyaaní pɔ́lɛɣɛ pɔ́lɛɣɛ ngáá ngí múw̃a muw̃angí.

⁹ Nyaama ỹáni walaí sí áá vá Setána yákpangi h̃ú, aa káámaa haa bih̃i bih̃i kɛ taá kíndaa víli fááni kɛ́ tí kpɛ́lɛɛ taá ɣɛ́ nɔ́ɔ ngáá ngakpolówa fáa lee léé.

¹⁰ Sítii pa ti wu ngáá vá lóma su, aa ti ya yakpólowa pele bíh̃i bíh̃i su. Nátii pa ti wú tɔ́ɔ́ ló su bɔw̃álale, taá lokohéingɔ tɔɔỹáa gééla woí wú tɔɔ́ ló lá ngáá ti wumáá ɔ́ɔ́ wó.

¹¹ Háwui náá hááw̃a, Ngalá ngáá kɛ ngáá háwu tɛ́i gísiya ngáá pele vánda aáva ná aa kɛ sí áá ɣɛ́ ngáá ndɛ́i aá lɔ́ taa lá la.

¹² Faale, sítii kpɛ́lɛɛ tɛ́i ɣɛ́ lái ngáá tɔɔỹáa gééla woí, kɛ́ láa ɣéle, ti liivóngi í ngáá faa ỹɔ́u ɣɛ́ndai, Ngalá ngáá ti kpɛ́lɛɛ péle lála.

Ngalá ngi lokolongá wú wá ngumaawongí hááw̃a

¹³ Mu mbála Yalá fɛ́li mbélai, wɛ́i Ndemɔí lóngɔ ngáá wu ye, tɔkúla héimai kpɔ́lɔɔ Ngalá ngi lokolongɔ́ wú wá ngáá wú wúmaa í wó. I sí ɣɛ́ngɔ Hɛ́ɛ́ma Ỹínangi w̃aa véle w̃a lɛ́i í kɛ́nga ngáá háwu wú ɣɛ́ ngáá Ngalángi vóngaa Ngala ngéngengi hááw̃a aáva wú lá ngáá tɔɔỹáa gééla woí. Faalɔ, hɔ́wɔ fíli kule lɔ ni w̃a ní sɛ́ɣɛɛ gula Ngalá ma wú hááw̃a.

¹⁴ Ngalá ngí wú lólingɔ ngáá wú ngumaawóngi w̃ááhɔlɔ keela wóó vándai w̃áá véle w̃a ní ndéngɔ wú w̃a. I wú lólingɔ kɛinɔɔ́ wú ɣɛ́ mu Lemɔ́i Jísu Kílisitii háá w̃aanɛɛnɛɛ ngwalaí sí h̃u.

¹⁵ Faale, mu mbála Yalá fɛ́li mbélai, a loo gilí bátɛ, wú ndí ngu ma ngáá tɔɔỹáa gálambongi sí ní mbóngɔ ngáá wú ye. I ɣɛi ngáá sí ní púi kɔ́lɔ w̃a ní tɔ́ve wú yéle, baa sí ní ndeí wú w̃a ngáá laa wóó.

^16-17 Bɛlɛ́ mu Lemɔ́i Jísu Kílisitii laá gíte ɛ́ɣɛ mu Kɛ́ɛ́ɣɛ Ngala ti wú lííwuulɛ ɛ́ɣɛ ti wú h̃úúba faa vánda kpɛ́lɛɛ nde fááw̃a ɛ́ɣɛ kɛ fááw̃a. Ngala ndóngɔɔ lé ngáá mu ye aáva ngi háá bɔwɔí w̃áá véle w̃a, í kitomáá vánda hengá mú yɛ, í kɛ ngáá háwu mu lííwuulɛngi áa ndi ngu ma kúnafɔ.