TƐSALÓNIKA HESENDAA GƆLƆÍ 4 - Kɛ́lɛ Niinaí

A mu híya veléi sí áá Ngála ndiilɛ́i

¹ Mu mbála Yalá fɛ́li mbélai, sí náá í ngáá ngapúmaa haí, aá wáá ngáá tuva veléi sí áá Ngalá ndiilɛ́i ni wú gálamboni lá. Kɛ́ aáva p̃ɛ́ɛ́ maa lúva veleí lɔ́ nɔ́ɔ́ wúwaa híya la. Kɛ́ ná fíli su, niỹá lɔɔ́ wú w̃áánɛɛnɛ Ndemɔí Jísu laahéingi h̃u ngáá wú ndi ngu ma ngáá kɛndáá ngwala.

² Wú faa wɔ́lɔ sítii mba Ndemɔí Jísu í ndéni ngáá a mu ɣɛ́ maá tí ɣɛ, ní tí lení wú w̃a.

³ Ngalá ndóngɔɔ lé wú w̃ááw̃uỹangɔ í ɣɛ́ la fó faa ỹɔ́u fíli álaa ɣɛ́ wú h̃u. Ná wáá ngáá, kɔlɔsiyá faá álaa ɣɛ́ wú h̃ú ɛ́ɣɛ nyah̃ápo haa ɛ́ɣɛ siỹɛndópo haa.

⁴ Ngalá ndóngɔɔ lé wú yíla ngílangi p̃ɛ́ɛ́ wú bɔwɔ h̃úúhou w̃a tɔmbema w̃áá fíli álaa ɣɛ́ wú wa ngááh̃u ɛ́ɣɛ nungáá yaah̃ú. Ngufema í ɣɛ́ wú w̃a.

⁵ Njeé sína w̃áá luvá álaa víli wú líí vólu kíya sítii taa béɣei Ngala fááw̃a kpósouŋ tí na.

⁶ Nuu fíli pa álaa fái sí ta ɣɛ ngáá ngi mbála Yalá fɛ́li mɔ́ɔ. Wú ɣɛ́ kɔ́lɔ ngáá kɛ Ndemɔí Jísu lɔɔ vá faa bá ndáma nungái sítii ma taa fái sítii kɛ ní ndááhi kpá kpá mbongɔ́ ngáá wú yé kɔwɔ́ato ti wa.

⁷ Sífaa, Ngalá ngáá mu yeɣéngɔ ngáá mu ɣɛ́ faa ỹɔ́i nátii kɛ́ ndaani su, kɛ́ aá ɣéle, i mu yeɣéngɔ ngáá ngi vóngaa ngáá faa ỹɔ́u fíli álaa ɣɛ́ mu h̃u.

⁸ Faalɔ, nuí fíli ɛ́i lókohei kalambóngi sítiini mbu níwaa mbo ngáá wú yé, kɛ maa w̃ɔ́i aa kolo lála h̃u ngáá nuu búsa, kɛ́ aá ɣéle, kolo lála wúl̃a nɔ́ɔ áá ɣɛ́ sú ngáá Ngalá, lɛ́i í kɛ́ngɔ ngáá háwu wú ngi Hɛ́ɛ́ma Ỹínangi í wú vólu.

⁹ Ná áá lí náa í tó ndongí wá kule í ma í ɣɛ́ a mu lówah̃u a maá mu mbála Yalá fɛ́li mbélaitiini, nɛ́i mɔ́ɔ lo kɔlɔ vɔ́nɛma wú yéle kɔwɔ́ato ná wa sífaa, Ngalá kpúte lɔ í wú galámbongɔ ngáá wú ló ngáá ỹɔw̃ɔ́ ỹɔ́w̃ɔ.

¹⁰ Aáva p̃ɛ́ɛ́ wú ndó ngááh̃u ɣɛ́a ngáá mu mbála Yalá fɛ́li mbélaitii kínɛi ti Mɛsedóniya lataí h̃u. Kɛ́ ná fíli su, mu mbála Yalá fɛ́li mbélai, niỹá lɔ́ɔ wú w̃áánɛɛnɛ ngáá wú ndí ngu ma ngáá kɛndáá ngwala.

¹¹ Wú ɣɛ́ngɔ í ɣɛ́ lá lúúỹaa, wálaa ɣɛ́ wáá víli nungáá hááni su. Wálaa ɣɛ́ ngáá saɣá yélaa, kɛ́ wu ɣɛ́ wáá ngenge mbó ngáá sí wáá lókola ma kíya nɔ́ɔ ní ndéni wú w̃á kílii.

¹² Ná lɔ́ áá kɛ sítii taá lái ngáá Jísu Kílisitii taá ngufema hé wú yɛ́. Aáva wɔ́i mɔ́ɔ lokola nuu fíli má wú béɣema háá fíli fááw̃a.

Ndemɔí Jísu vaalái

¹³ Mu mbála Yalá fɛ́li mbélai, ni longɔ́ɔ́ lé wú ɣɛ́ tɔɔỹái wɔlɔ́ kɔwɔ́ato sítiini mba ti háánga kɛinɔɔ́ wɔ́ɔ́ vá ɣɛ́ wáá w̃aaw̃áánu ngwala kíya sítiini kitomáá áá tí yɛ taá kɛ.

¹⁴ A mu langɔ́ɔ́ lé lá ngáá Jísu i haaní aáva í mɔ́ɔ́ wuyoɣé sái h̃u. Faalɔ, a mú lángɔɔ lé lá ngáá sítii ti langɔ́ í ɣɛ́ngɔ lá ngáá Jísu í ló sú tí há, Ngala ngáá ti yooɣé sái h̃u, í tí báha Jísu wa.

¹⁵ Sí vá í ngáá kalambo Ndemɔí Jísu í mbóni kɔwɔ́ato maa hái wa aá wáá ngáá sí, muỹɛ́i a maá ló ndɛɛh̃úi h̃u í ló su Ndemɔí Jísu í vá, ná a maa ɣɛ́a lí ndaaw̃ɛ́ɛ́ma, mɔí lí sítii ngutúwɔ ti háángɔ áá ɣɛ́ lá.

¹⁶ Ná Ndemɔí Jísu áá ɣɛ áá gúla ngelegóóh̃u áá va, áá wóó gúla, malékai ti wutúwɔi bɛ́lɛ í wóó gúla, kɛ Ngalángi lólimbo búlu walaí í hɛngá. Nungái sítii ti langɔ í ɣɛ́ngɔ lá ngáá Kílisitii í ló su ti há tiyá hése tɔ taá wúyoɣe naá sái h̃u ngáá tí Ndemɔí Jísu laaw̃ɛ́ɛ́.

¹⁷ Muỹɛ́i va a maa ɣɛ́ nɛ́nɛ ndɛɛh̃úi h̃u, a muỹɛ́ bɛ́lɛ a maá lɛ́ náa mu lɔ́ngɔ mu báha ti wa ngáá a mú Ndemɔí Jísu laaw̃ɛ́ɛ́ ngeleí ya. Aáva ngimɔ́ɔ́ náa a maa ɣɛ́ na Ndemɔí Jísu yelé kúnafɔ.

¹⁸ Faalɔ, a ỹɔw̃ɔ́ ỹɔ́w̃ɔ liiwúúlɛ ngáá ngoí sítiini.