TƐSALÓNIKA HESENDAA GƆLƆÍ 2 - Kɛ́lɛ Niinaí

Ngalá ngéngengi Pɔ́ɔ í mbóni Tɛsalónika

¹ Mu mbála Yalá fɛ́li mbélai, wá gíte wú kɔ́lɔ ngáá siyangí ní mbói wú yéle faa yangúyangɔ i gulaní su.

² Wá gíte wú kɔ́lɔ kíya ti ɣɛ́i náá ni h̃úúhou kíli ỹɔu woní ɛ́ɣɛ kíya tí ni yangúfeni Félepa taa h̃u nɔɔ́ ɣɛ́a va wú yéle Tɛsalónika taa h̃u. Kɛ́ Ngála pa í mú ndá gákai w̃a, í ní liibáni ngáá ní kééla woó vándai lé wú w̃a áá gúla ngeyá. Aáva ní maa gééla woí léni kíya bɛ́lɛ nuu bíh̃iw̃aa ti ɣɛ́i na táá yakpá ngáá tí ni betéve nde fái wa.

³ Naa wú hɛ́sɛmboma ngáá wú víli faa h̃u í ngáá ndɛɛ́ kɛlaa nɔ́ɔ ɣɛ́a wú yákpolowa ngáá wú víli kaka péle wa. Kɛ́ aá ɣéle, ni gi máá ɣɛ́ngɔɔ lé kpál̃au.

⁴ Sí Ngála ngáá ɣɛ́ lói ní ndé laá lɔ́ nɔ́ɔ naá nde bɔw̃álale i lokolongá ní wa, í kééla wóó vándai léndai he ni yaá. Naá yákpama ngáá sí nɔ́ɔ áá ɣɛ́ ngáá nuu búsa liivó fái ni ná ɣɛ́, kɛ́ Ngalá lɛ́i í nuu líí h̃u háitii kɔ́lɔ, laá lɔ náa yakpá ngáá naa ɣɛ́a ndiilá.

⁵ Wú súuwɔlɔ aáva Ngala bɛ́lɛ i suuwɔlɔ́ ngáá naá váángɔ nɔ́ɔ wú yéle ngáá njɛpɛ nɛɛ́ nɛ́ɛ́ ɛ́ɣɛ ŋani w̃áálii láá le ɔ́ɔ́ ɣɛ́ ní góó ya nɔɔ́ ɣɛ́a maa bátɛ batɛ́ njɛ́pɛ vu.

⁶ Naá kɔ́vɔi p̃ɛ́ɛ́ ngáá nɔɔ́ tɛ mááhɔlɔ nuu fíli ngéya i ɣɛi ngáá wá ɔɔ nuu vékaa ɣéle tɔ.

⁷ Ní ndái ɔ́ɔ́ ɣɛ́ tɔɔỹaá w̃a ná wɔ́lii nɔ́ɔ ni beɣéma wɔ́lingaitii fɛ́li wú w̃a bɔw̃álale niỹá lɔ ngáá Kílisitii géélaitii. Kɛ́ ní wú h̃úúhouni lɛ́ɣɛ lɛɣɛ ná h̃u ni ɣɛ́i wú lóów̃a kɛ kíya nɔ́ɔ ndoú njéi áá ngí léngaitii suuhóu ngáá pangɔ́.

⁸ Ndo ngwálai ní su ngáá wú ye i kɛngɔ́ ngáa háwu ní Ngalángi gééla wóo vandaí lé wú w̃a. Kɛ́ aáva aa gɛɛlɛní nɔ́ɔ ná wa, aá ɣéle p̃ɛ́ɛ́ nɔ́ɔ́ bɔwɔ́ gúla kɛlɛ́ma wú hááw̃a ná vá ɔ́ɔ́ ni liilá sífaa, ni longɔ́ɔ́ lé ngáá wú ye ngwála.

⁹ Mu mbála Yalá fɛ́li mbélai, wú gíseingɔ ma gíte kíya nɔ́ɔ ngenge kpá kpangaitii mbó wú lííwaa. Nɔ́ɔ́ yénge fóloni ngaa kpindí kɛinɔɔ́ ni waa háá ɣɛ́ndaa ɔ́ɔ́ va bá nuu fíli ngú mba Ngalángi gééla woo vandaí sí lé fááw̃a í féngɔ ni yaá ngáá ní ndé wú w̃a.

¹⁰ Ná h̃ú ní ɣɛ́i wú lóów̃a, naá tuva véle ỹɔ́u fíli kúlai ngáá wú ye, ni lelémbongɔ i ɣɛi la wú yaa, tɔmbema w̃áá fíli aá ɣɛi ni wa. Wú ná h̃úúwɔlɔ aáva Ngalá bɛ́lɛ nɔ́ í suuwɔlɔ́.

¹¹ Wú kɔ́lɔ ngáá ni wú h̃úúhouni kíya nɔ́ɔ ndoú kɛ́ɛ́ɣɛ áá ngí léngaitii suuhóu.

¹² Ni ɣɛ́i naa wú lííwuulɛ, náá wú lííyapɔpɔ, náá nde wú w̃á ngáá wú lúva veléitii ɛ́ɣɛ wú gɛ́ɛ́ haítii tí Ngalá ndiivó lɛ́i í wú lólingɔ ngáá wú ɣɛ́ ngi w̃ásandai wu, wú ɣɛ́ múl̃ɔ ngi yákpa maanɛɛnɛɛ ngwalaí h̃u.

¹³ Ná vólu, niỹá lɔ́ nɔ́ɔ fɔ́ naá sɛ́ɣɛɛ gula Ngalá ma wú yɛ́ sífaa, ná wú Ngálangi gééla woí ỹɛ́nini ní ndéni wú w̃a, wáá ngéɣei ngáá nuu búsa bátɛ ngeyá háa, kɛ́ wú lókoheini mbu sífaa, aá lɔ́ ngáá Ngalá ndaa wóo, aáva aá lɔ́ ngáá tɔɔỹáá. Wɛ́i wú lángɔ la, aá lɔ náá wú líítii su, áá yénge ná.

¹⁴ Mu mbála Yála fɛ́li mbélai, sí í lái mu mbála Yalá fɛ́li mbélaa vekái sítiini ma ti báhangɔ Jísu Kílisitii wa ti Judíya lataí h̃u, ngi híí lɔ nɔ́ɔ jɔ́ wá bɛ́lɛ í lángɔ wú w̃a. Ná wáá ngáá, sítii ti ngáá wu bɔ́wɔ bɔ́wɔ híí yélai tiyá lɔ́ tí faa bá ndángɔ wú w̃a kɛ kíya nɔ́ɔ tiyá bɛ́lɛ ti bɔ́wɔ bɔ́wɔ híí yélai, ná wáá ngáa, Júsuaitii tí faa bá ndáni ti w̃a.

¹⁵ Júsuai tɔ nɔ́ɔ múl̃ɔ tí Ndemɔí Jísu vaaní, tí Ngalá ndaa háá lé mbélaitii páa. Tiyá vá tɔ nɔ́ɔ tí kɛ́i ni gúlai ndɔwɔlɔ́i ná h̃uu wá. Taá ɣɛ́ taá Ngalá kpáálɛ mba háá ɣɛ, ná vólu, tiyá lɔ́ ngáá nuu kpɛ́lɛɛ mbááhilimaa yélaa.

¹⁶ Ti longɔ́ɔ́ lé tí ni betéve Ngalá kééla woí wa níwaa ndé sítii ma taa ngáá Júsua kɛinɔɔ́ nátii tɔ́ɔ ngúmaawongi w̃ááhɔlɔ. Faa ỹɔ́i híí kpɛ́lɛɛ tí vílaa ngáá kɛ ngu tevéngɔi wul̃a ngáá ná. Ngalangí háá bamaí i folóa náa ti wa.

Pɔ́ɔ longɔ́ɔ́ lé í Tɛsalónika Yalá fɛli mbélai séi héi múl̃ɔ

¹⁷ Mú mbála Yála fɛ́li mbélai, kíya bɛ́lɛ a mu yakɔ́lɛngɔ ma kuu félengɔ laa lówah̃u, niỹá lɔ́ nɔ́ɔ fɔ́ naá gisíya ngáá wu ye ngwala. Níỹa vá ni ɣɛ́ngɔ náá naá yákpa ngwala gíte ngáá ni vá ni wú héi héi múl̃ɔ.

¹⁸ Ní ɣɛ́ngɔ lói ní yángaima wú yéle. Nyá bútei ngí ngáá Pɔ́ɔ, naa lɔ́vengɔɔ lé náa ngilaa má ngáá ngíwaa yákpa ngáá ngí vá wú yéle, kɛ́ Setána i kɛí ngáá háwu náa lóko w̃aahɔ́lɔi nɔ́ɔ vá.

¹⁹ Kɛ nɔ́ɔ wú w̃ɔ́ni í ní hóu bɔw̃álale folói ná w̃a a mu Lemɔ́i Jísu áá vá vaamá ma, wú hááw̃a lɔ́ áá vá kɛ́ma kitomáá í ɣɛ́ ni wa, ná vólu, ni góóh̃u í nɛ́ɛ́. Folói ná lɔ́ naa wú w̃ááyonga téve ngáá ní vílaa ngengengí sí w̃a Ngalá ngi féngɔ ni yaá.

²⁰ Tɔɔỹaá hááw̃a, wá lɔ́ wú kɛ́nga ni góóh̃u í nɛ́ɛ́nga, wá lɔ́ náá vá wú w̃ááyonga tevéma.