PÍTƐ HESENDAA GƆLƆÍ 4 - Kɛ́lɛ Niinaí

Kíya kule í ma mú lɛ́ɛ́h̃ui h̃uuhíya

¹ Kílisitii í nduwu ya fuulɛ́ w̃áánɔw̃ɔ yeɣéni, náa hááw̃a, kɛ wá bɛ́lɛ nɔ wú liibá ngáá kisiyái í ɣɛ́i Kílisitii w̃a maa gísiyai híí í ɣɛ́ wú w̃á. Sífaa, nuí fíli áá ndúwu ya fuulɛ́ w̃áánɔw̃ɔ yeɣé, kɛ maa w̃ɔ́i i bengá faa ỹɔ́u ɣɛndái wa.

² A ná ɣɛ kɛinɔɔ́ wú wú lɛ́ɛ́h̃ui w̃áta h̃uuhíya ngeleí sí wu kíya Ngalá ndóngɔ wú kɛ, kɛ́ álaa ɣɛ́ ngáá ngeleí sí wu líívo kɛí.

³ Wú lɛ́mbinga naá wɔ́lɔ fái sítii kɛ́ma sítii taa ngáá Ngalá fɛ́li mbélaa ti lóngɔ ngáá ti ɣɛndáá. Ngufe tála haítii tɔ wú ɣɛ́ngɔ ti h̃u, kɔlɔsiyángitiini, ndɔɔ bɔ́lendaa walaní, ndɔɔ hoúni su ɛ́ɣɛ kooh̃unɛɛ lááỹɛ mbo máá wala waláitii kɔlɔsiyá fáá áá ɣɛ́ na. Ná vólu, ngufemá héndai kɔɔ kɔɔ ŋáni vekáitii kɔndáá h̃u taa ti yeɣé ngáá ngalángaa kíya nuu áá ngufema hé Ngalá mbɛ sí í ngáá ngangufé fáá wala.

⁴ Aá lɔ́ ngáá sítii taa ngáá Ngalá fɛ́li mbélaa ti gɔ́ɔ́lamba h̃ú háá ná táa tɔ wɔ́i mɔ́ɔ́ ɣɛ́ wáá báha kpahá ti wa ngeleí sí wu líívo kɛɛ haa ɣɛndáitii su ngáá suulɔ́vengɔ lɛ́i nga ngáá mba, faale, taa wú yɛ́ɛ́li.

⁵ Kɛ́ kɛ tí fái sítii pólu haa lé. Tiyá lɔɔ vá ná ɣɛ́ma Ngalá kakála lɛ́i íwaa vá nuu kpɛ́lɛɛ kɔ́sɔma, ná wáá ngáá, sítii ti háánga ɛ́ɣɛ sítii taa ɣɛ́ ndɛɛh̃ú h̃ú ngetéya ngakɛ́ɛ́lɛmai.

⁶ Aáva sítii ti saí sí wongɔ ti mbóngɔ kíya nuu kpɛ́lɛɛ taa há Ngalángi gɔ́sɔngi háwui h̃u. Kɛ́ Jísu Kílisitii i keela wóo vándai lénga náa sítii ma ti háángɔ kɛinɔɔ́ ti yáfuw̃angaitii ti ɣɛ́ Ngala ndóów̃a ti ɣɛ́ kíya Ngalá ndongɔ́ ti ɣɛ́ na.

A mu ɣɛ́ ngáá Ngalangí yénge mbelaa vanda

⁷ Ngetéyangi sí yakɛ́ɛ́lɛmai bɛ́ɛ́ngɔ lé náa mba. A bɔwɔ́ h̃úúhou w̃a faa kpɛ́lɛɛ su, ɛ́ɣɛ wú giséi w̃a, kɛinɔɔ́ wú hómbo wááyaa Ngala fɛ́li.

⁸ Ná vólu, faí kpɛ́lɛɛ maah̃u hái lɔ náá ngáá sí ngáá wú ló ngáá ỹɔw̃ɔ́ ỹɔ́w̃ɔ ngáá lií kpɛ́lɛɛ sífaa ndongí aa kɛ ngáá háwu faa ỹɔ́u bih̃íw̃aa h̃úúhaa í lo.

⁹ A lokohéi ỹɔw̃ɔ́ ỹɔ́w̃ɔ héi heindaa wu wú vɛ́lɛitii nda bɛ́kpɛ, wú ɣɛ́ wáá kɛ ndiiwolé w̃ááh̃u.

¹⁰ Ngenge tókoitii Ngalá ngí kɛ́ngɔ ngáá háwu wú hómbo ti la, kɛ nuí fíli í ɣɛ́ áá ngi ndái yangénge ngáá pangɔ́, ngáá kíya áá ngángenge nungáá vekaítii bɛ́lɛ nɔ taá kulasuunúma w̃ááhɔlɔ su.

¹¹ Nuí fíli áá Ngála ngóó le, keela wói áá nde, í ɣɛ́ ngáá Ngala kééla woí. Nuí fíli pá áá ɣɛ́ ngáá kpɔmba hé mɔ́ɔ, Ngalángi ɣɛ́ la áá ɣɛ́ maa yákpangi héni mbɛ. Ná í ɣɛ h̃íí kɛinɔɔ́ faa kpɛ́lɛɛ su, Ngalá ngí tɛ maahɔ́lɔ Jísu Kílisitii w̃aa véle w̃a lɛ́i ngufema kpɛ́lɛɛ í ngeyá ɛ́ɣɛ ngakpángi kpɛ́lɛɛ kúnafɔ taá ngí ndá gúnafɔ. Amíína.

Wú w̃aanɔw̃ɔí í ɣɛ ngáá Jísu Kílisitii ndái ɣɛ kíli

¹² Mu mbála vandáitii, álaa ɣɛ́ ngáá wú gɔ́ɔ́lamba h̃ú háa ná wááyaa nduwu ya fuulɛ́ w̃áánɔw̃ɔ yeɣé ngáá kɛinɔɔ́ Ngalá ngí wú lángi h̃úúgɔvɔ. Maa hái álaa gúla ngáá kíya nɔ́ɔ kɔ́ɔ́lamba h̃u haa áá ɣɛ́ ngáá nuu yé.

¹³ Kɛ́ aá ɣéle, wú góóh̃unɛɛngɔ í ɣɛ́ la ngáá sífaa wúwaa maanɔw̃ɔ́i sí ta yeɣé Kílisitii í ngeɣéni, kɛinɔɔ́ wá bɛ́lɛ nɔ wú góóh̃unɛɛngɔ í ɣɛ́ la ngwala naa hɔwɔ́i ná w̃a íwaa vá vaamá wú tɔ ngi yákpa maanɛɛnɛɛ ngwalaí h̃u.

¹⁴ Ná taa ɣɛ́ táa ngɛ́ɛ́li ngóó ỹɔ́u ỹɔ́uni nde wú w̃a sífaa wú ngáá Kílisitii volú yelái ti tá, aá lɔ ngáá faa vánda wú hááw̃a bɔw̃álale ná ná áá ɣɛ, aa ngakɛ́ ngáá Ngalángi Hɛ́ɛ́ma Ỹínangi lɛ́i ngakpángɔ ngwala aá lɔ wú vólu.

¹⁵ Kɛ́ ná maanɔw̃ɔ́ áá lá wú ta fíli ma, álaa la wú w̃a nuu váá fááw̃a ɔɔ ŋuỹá hááw̃a, ɔɔ nyaama gúla fááw̃a, ɔɔ víli fááw̃a nungáá háá h̃u.

¹⁶ Kɛ́ ná maanɔw̃ɔ́ áá la wu w̃a sífaa nɔ́ɔ wú ngáá Kílisitii vóngaa, álaa ɣɛ́ ngáá ngufé wú w̃a, kɛ́ laá ɣéle, wú sɛ́ɣɛɛ gula Ngala ma sífaa ndaahei ngí wú wa ngáá Kílisitii vóngaitii.

¹⁷ Naa hɔwɔ́i i foloá náa ma Ngalá ngíwaa vá nuu kpɛ́lɛɛ kɔ́sɔma ma. Maa gɔ́sɔngi va aá lɔ́ɔ tɔkúla héi Ngalángi vóngaitii a mu wa. Ná aá vá áá ɣɛ tɔkúla héini a mu wa, ná ná áá ɣɛ, faa bámai h̃uu áá ɣɛ wɔɔlɔ áá la sítii ma taa lái ngáá Ngalángi gééla woo vandaí í tɔvengɔ́ ngeleí sí wu.

¹⁸ Maa hái waa ngáá kíya nɔ́ɔ pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáá ngáá sí, “Ná wɔ́lii telembo mbélaitii kele tɔ ti wumaawóndaa áá ɣɛ́ ngáá faa bángɔ kɛlaa faa ỹɔ́u yélaitii tiyɛ́i tɛ́i Ngala fɛ́li, aá ɣéle p̃ɛ́ɛ́ ti ndái h̃uu áá ɣɛ́ wɔɔlɔ ngwala.”

¹⁹ Faale, sítii ti w̃áá íwaa nɔ́w̃ɔ sífaa áá ɣɛ́ ngáá Ngalá ngí háá h̃uubatɛ ngáá í ɣɛ́ h̃íí na ngáá ti ye, ti ɣɛ́ táa télembo túva wo, laáva tí gíto ti bátɛ mɔ́i Ngalá mbá lɛ́i ná áá kuuló mbo, ɛ́i nga ỹááni.