PÍTƐ HESENDAA GƆLƆÍ 2 - Kɛ́lɛ Niinaí

Jísu Kílisitii gúlangɔɔ lé ngáá ngangímba wɔ́tui

¹ Ná ná áá ɣɛ, a bé naá nyaama haa ɣɛndái kpɛ́lɛɛ mbá ɛ́ɣɛ ndɛɛ gɔ́ɔ́landaitii ɛ́ɣɛ fáa lándai wa yaah̃ú kɛ́ ɛi ɣɛ wú líí h̃u. Ná vólu, a bé náa tólomai wa ɛ́ɣɛ ngoo ỹɔ́u léndai nungáá vékaa w̃a.

² Kɛ kíya nɔ́ɔ nyíni bɔ́lendai vílingɔ áá ɣɛ la ndoulála nɛ́ŋɛ nɛŋɛngí lii vólu, ngimɔ́ɔ́ nɔ́ɔ kule í wu w̃a wú líí vílingɔ í ɣɛ́ la Ngalá kééla woí ỹɛ́nindai volú, ná lɔ áá kɛ wú h̃úú áá ba Ngala fái h̃u, wú ngumaawóngi w̃ááhɔlɔ.

³ Pɔnɛngɔ́ɔ́ lé Ngala Kɔ́lɔi h̃u, sí vá pɔ́nɛngɔ aá wáá ngáá sí, “Wá gíte wú Ndemɔí Ngalangí háá nɛ́i w̃ááhɔlɔnga wu ɣɛ́ kɔlɔ́ kíya í na.”

⁴ A vá Ndemɔí Jísu yelé lɛ́i kulangɔi ngáá kɔtu ndɛɛh̃ú í sú, nungáitii ti ngeɣéngɔ ngáá ngambalámba w̃ɔ́ɔ́ taá kɛngɔ́ tɔɔ́ lókohei mbu. Kɛ́ Ngalá ngi lokolongɔ́ mba í kɛ́ ngáá ngangímba w̃ɔ́ɔ́.

⁵ Wú gúlangɔɔ lé ngáá kɔtuni ndɛɛh̃ú i wú h̃u. A bɛlɛ́ Ngala ngí wú ɣɛ́ ngáá maa wɔ́tui tá ngí vɛ́lɛi h̃u ngi Ỹínangi íwaa to. Wú gúlangɔ í ɣɛ́ lá ngáá hɛ́ɛ́ma Yála sááɣa gula mbélaa, wú ɣɛ́ wáá Ngala fɛ́li wáá Ngala tɛ́ sí í ngáá sááɣa ɣɛ kíli wáá ɣɛ́ wáá kula, sítii taá ɣɛ́ ngáá Ngala tókohei mbu gélea Jísu Kílisitii w̃áá véle w̃a.

⁶ Sífaa, sí pɔnɛngɔ́i Ngala Kɔ́lɔi h̃u, aá wáá ngáá sí Ngala ngí ɣɛ́ngɔ ta, “A sí w̃aa hái lɔ lɛ́ɛ́! Ngí lókolonga kɔtu vandá wála wa aáva maa wɔ́tui vá tɔ́ ngáá ngangímba wɔ́tu. Nyá lɔɔ́ nda taa walái sí h̃u taa náa lolí ngáá Jɛlúsɛl̃ɛ. Aáva nuí fíli áá lá lá, kitómai ɛi ỹaaní kúnafɔ.”

⁷ Kɔtuí sí va wɛ́i wú lángɔ la aá lɔ ngáá ngangímba wɔ́li ngwala wú hááw̃a. Kɛ́ sítii pa taa lái la maa hái gúlangɔɔ lé ngáá sí pɔnɛngɔ́i áá va tɔ ngáá sí, “Kɔtuí sí pɛ́lɛ ló mbélai ti bééleni mba í ɣɛ́i ti gi má nga ngáá mba, laá lɔ́ náa í ɣɛ́a ngáá ngangímba wɔ́tui pɛlɛ́i lo fááw̃a, í lɔ́ve kɔtu vekái kpɛ́lɛɛ mbá.”

⁸ Faa véka lɔ múl̃ɔ ngáá sí pɔnɛngɔ́ Ngala Kɔ́lɔi h̃u áá vá mbaa ngáá sí, “Kulangɔ́ɔ́ lé ngáá kɔtuí í ná áá kɛ́ ngáá háwu nungái ti bówa lá, ti gula.” Sí aa ɣɛ h̃íí ngáá ti ye bɔw̃álale taá gólongɔ Ngalá kééla wói wú. Aáva ná vá tɔ Ngala ngí súúbatɛnga ti haáw̃a.

⁹ Kɛ́ wá lɔ́ ngáá Ngalá tokoló mba yélaa wú ngáá ngi hááɣa gula mbélaa wáá yénge Ngalá mbɛ́ lɛ́i í ngáá Masa Ngwalái. Wú gálihangɔɔ lé Ngalá ma, Ngalángi ndá nungáá gíte gíte wáá ngáá wu ye. Wá lɔ ná ngáá wú ɣɛ wáá faa lé kɔwɔ́ato káámaa háitii mba Ngalá ngáá tí ɣɛ́ lɛ́i í wú w̃áálolinga wú gúla faa ỹɔ́u ɣɛ kpíndii h̃u, wú gúla kalá kála ma naa walá w̃aanɛ́ɛ́ngɔi.

¹⁰ Hése wáá ɣɛ́i ngáá Ngalángi vóngaa, kɛ́ sí h̃úi wá lɔ́ náa ngáá Ngalangí vóngaa, ná vólu, wáá ɣɛ́i ngi yááh̃u w̃ááw̃aanui wɔ́lɔ kɛ́ wú ngi yááh̃u w̃aaw̃aanuí w̃aahɔ́lɔnga naa ngeyá.

A mu gúlangɔɔ lé ngáá nduwɔ lopoá Ngala mbɛ́

¹¹ Mu mbála vandáitii, nyá lɔɔ́ fái sí lé wú w̃a gíte, ngáá ná muỹá lɔ́ ngáá sotángaa ngeleí sí wu mú na, mú maavéla véle h̃u, wálaa bɔwɔ́ gula múl̃ɔ kɛlɛ́ma ndiivó kɛ́i yɛ́, ɔ́ɔ́ víli wú líí volú. Ndiivo kɛ́i áá vílii nuu líí vólu, ti lówah̃u ɣɛ́ kíli taá nuu h̃úúyafuw̃angi kulangɔ́ɔ́ lé ngáá kɔɔ áá ɣɛ́ nungáá lówah̃u.

¹² Wú lúva veléi w̃aanɛ́ɛ́ngɔ í ɣɛ́ la ngwala sítii ndiiwáá taa ngáá Ngala fɛ́li mbélaa. Ngáá ná bɛ́lɛ taá í yéɣe ngáá tuva velé ỹɔ́u w̃ɔɔ, taá wɔ́lɛ nɔ́ɔ í lúva velé vándaitii mba tí Ngala tɛ folói ná w̃a íwaa vá nuu kpɛ́lɛɛ kɔ́sɔma ma.

¹³ A bɔwɔ́ gula kɛlɛ́ma nuu fíli mbɛ́ áá ɣɛ́ ngáá nuu wála ná bɛ́lɛ áá ɣɛ́ ngáá ndɔwɔlɔ́ w̃ása ngwalaí lɛ́i ngakpángɔi ngwala. A ná ɣɛ́ Ndemɔí Jísu hááw̃a,

¹⁴ ɛ́ɣɛ nungái sítii Ndɔwɔlɔ́ W̃ása Ngwalaí áá lokoló ti wa ngáá ti ɣɛ́ ỹandáitii ngi lɔ́wɔlɔi h̃u ngáá ngááh̃u, wú gúla kɛlɛma nátii kele tɔ mbɛ. Tiyá lɔ taa ɣɛ́ naítii ngáá ti ɣɛ́ táa sítii tɛ taa ɣɛ́ taa híya ngáá savaí, tí faa lá sítii ma tɛí ɣɛ́ taa híya ngáá savaí kɛ́ ti ngáá faa ỹɔ́u ɣɛ́ mbélaa.

¹⁵ Sífaa sí Ngalá ndóngɔ la aá waa ngáá wú lúva vélei, sítii ti lamál̃angɔ faa ỹɔ́u fíli álaa ɣɛ́ na tɔ́ɔ́ nde kɔwɔ́ato wú lúva véle vándai wa.

¹⁶ A ɣɛ́ ngáá kíya nungáá taa ɣɛ́ na tɛi ɣɛ́ ngáá nduwɔ lopoá. Kɛ́ ná fíli su, ná álaa kɛ náá ngáá háwu wɔ́ɔ́ ɣɛ́ wáá fáa ỹɔ́u ɣɛ́ wɔ́ɔ́ ɣɛ́ wáá maa lɔ́ɔ́wu, kɛ́ aá ɣéle, a ɣɛ́ ngáá Ngalángi lúwɔ lopoa ɣɛ kíli.

¹⁷ A ngufema hé Ngála mbɛ nduwá mba h̃ú wú ngúfema hé Ndɔwɔlɔ́ W̃ása Ngwalaí yɛ́, wú ngúfema hé nuu fíli mbɛ́, wú ló ngáá wú mbála Yalá fɛ́li mbélai.

Jísu Kílisitii w̃aanɔw̃ɔí lɔ ngáá tɔmaséi mu hááw̃a

¹⁸ Wɛ́i wú ngáá ngenge mbélaitii a bɔwɔ́ gúla kɛlɛ́ma, wú ngúfema hé sítii mbɛ taa ɣɛ́ wú w̃ááh̃u. Wálaa ná ɣɛ́ nɔ́ɔ́ sítii mbɛ ti ngáá wú w̃ááh̃u yélai taa wú h̃úúhou ngáá pangɔ́, kɛ́ wú kɛ sítii kele tɔ mbɛ taá bándi bándi héi wú w̃a.

¹⁹ Ná nungáá táa faa lá wú w̃a kule áá ma tɔɔ́ nda wú w̃a, kɛ́ wú lokohéi nɔ́ɔ mbu sífaa wú lóngɔɔ lé wú sí ɣɛ Ngalá ndóngɔ wú kɛ, ná ná áá ɣɛ́, Ngalá ngáá nɛ́ɛ́ma yéi wú w̃á.

²⁰ Ná wáá faa ỹɔ́u ɣɛ wú maa w̃áánɔw̃ɔ yeɣé, ná ná áá ɣɛ́, kulasuunúmai bɛɛ́ lɔ́ áá ɣɛ́ Ngalá ngéya wú hááw̃a ná h̃u? Kɛ́ ná wáá máánɔw̃ɔ yéɣe faa h̃ú wáá ɣɛ kɛ́i i pele w̃a, ná ná áá ɣɛ, Ngalá ngáá nɛ́ɛ́ma yéi wú w̃á ná h̃u.

²¹ Ngalá ngí wú lólingɔ ngáá wú w̃áánɔw̃ɔ h̃íí ná sífaa Kílisitii í w̃aanɔw̃ɔ́ngɔ wú hááw̃a. Aáva ngi w̃áánɔw̃ɔi ná ɣɛ kíli lɔ wáá ɣɛ́ wáá wɔ́lɛ mba wúwaa híya kɔwɔ́ vó njɛ́ ya.

²² Jísu aa faa ỹɔ́u fíli kɛ́ni laáva aa ngoo fíli ndéi ndɛɛ ɔ́ɔ́ ɣɛ́ mba.

²³ Ná tí ngɛɛliní, aa poto kúlani. Ná tí maanɔw̃ɔ́ni, aa ɣɛi ta faa áá ɣɛ́ ngáá ti ye náá hááw̃a. Kɛ́ laá ɣéle, i laí nɔ́ɔ́ ngáa Ngalá lɛ́i í ngáá Telembo Kɔ́sɔ Mɔ́i.

²⁴ A mú háá ỹɔítii kpɛ́lɛɛ tí vungɔ́ Kílisitii gíte w̃a ná h̃u í ɣɛ́i kulɔ́sii w̃a. I ná ɣɛ́i kɛinɔɔ́ a mu gi ngí léve náa faa ỹɔ́u ɣɛ́ndai volú, a mu ɣɛ́ ngáá telembo mbélaa ndɛɛh̃úi sí h̃u. Ỹandái ná í héini mba, laá lɔ́ í mu walongá.

²⁵ Wú ɣɛ́ngɔ náá káka péle wa kíya nɔ́ɔ mbaalaí áá ɣɛ́ na ndongɔ́ áá ɣɛ́ lá su. Kɛ́ Ngalá ngí mɔɔ vaá ngáá wú ye Jísu Kílisitii yéle lɛ́i í ngáá wú W̃ááh̃u Béle Mɔ́i.