Yonaŧ 4 - Mankanya

Yonaŧ na pñaga pi Naşibaţi

¹ Kë Yonaŧ aşë wo aanlilan nin ţi uko mënţan, adeebaţi.

² Añehan wal mënţan Yawe Nawat Kabuka aji : « Nawat Kabuka, mënţ uko wi, wi wi mbiiŋ aşal wi nhumuŋ du uŧaak wi naan i ? Mënţ uko waŋ ukaaŋ kë nŧaran aţi aya Tarşiş i ? Dme bnuura kë iwo Naşibaţi anjaaŋ añaga, anjaaŋ aŧiink mnţëg, anwooŋ aanji ŧar udeeb, anŧumuŋ bnuura, anjaaŋ aguban pdo bañaaŋ buţaan.

³ Nawat Kabuka, hënkuŋ, wutaan nkeţ, dhokan kakeţ. »

⁴ Kë Nawat Kabuka aŧeema aji na a : « Ifaŋaari i wi ideebaţuŋ ? »

⁵ Wal mënţ Yonaŧ apën ţi ubeeka aya aţo du bmayar unuur bi wa, aboman da bliit aţo ţi ba uţeeh du blifi ayoonkna uko wi Naşibaţi akdoluŋ ţi ubeeka.

⁶ Kë Nawat Kabuka aşë do bko bloŋ kë banaţa ado blifi ţi bkow bi Yonaŧ, pjooţan pi awoonaanuŋ papënna ţi a. Alilan maakan ţi uko mënţ.

⁷ Ţi unuur utëbanţën na mnjinţ, Naşibaţi ayil ukuŧ kë ude bko kë bakeţi.

⁸ Wi unuur umayuŋ, kë ado uyook uyik kë upënna bmayar unuur, kë bnuur babot atër ţi bkow bi Yonaŧ te kë adoo kak i kafiikla. Wal mënţ Yonaŧ aŋal kakeţ awo ţi pji : « Dhokan kakeţ. »

⁹ Kë Naşibaţi aşë hepara aji : « Ifaŋaari wi ideebaţuŋ ţi uko wi bko buŋ i ? » Kë Yonaŧ aŧeema aji : « Aa, ddo bnuura wi ndeebaţuŋ ţi uko wi bko buŋ adoo hokan kakeţ. »

¹⁰ Wal mënţ kë Nawat Kabuka aşë ji na a : « Iñaga bko bi te iinleemp lemp nin uko uloŋ pa ba, mënţ iwi iţuuŋ kë badëmi. Badëm ţi uŧejan uloolan, akay ţi utëbanţën.

¹¹ Kë iwi işë ŋal nwo mënkñaga ubeeka uweek wi Niniwe. Iinwin kë uwo na bañaaŋ bampeluŋ iñeen-week ŋyaaş iñeen-week ŋyaaş iñeen-week na iñeen ŋtëb (120 000) banwooŋ baando bi me uko unwooŋ bnuura na uko unwooŋ buţaan ? Iinwin kë uwo na ŋnŧaam ŋŧum i ? »