Yonaŧ 3 - Mankanya

Yonaŧ aya Niniwe

¹ Yawe Nawat Kabuka akak aţiini na Yonaŧ uyaaş utëbanţën aji na a :

² « Naţiin iya Niniwe ubeeka uweek, iţup bañaaŋ banfëţuŋ da uko wi nji kaţupiiŋ. »

³ Kë Yonaŧ anaţa ţi byaaş bi aya Niniwe jibi Nawat Kabuka ajakuluŋ. Nameen kë Niniwe dawo wal mënţ ubeeka uweek maakan : ñaaŋ aji do ŋnuur ŋwajanţ pa pñaay wa kaba.

⁴ Yonaŧ ajunna ado unuur upëb apoş na ubeeka aşë ţup bañaaŋ aji : « Naŧiinkan, uduka ŋnuur iñeen ŋbaakër Niniwe daşë daŧoka. »

⁵ Bañaaŋ biki Niniwe bafiyaar uko wi Nawat Kabuka ajakuŋ aşë yiman bukal bŧi, awohara ŋşaaku du baweek te du anwoonuŋ nampoţi ţi baka.

⁶ Wi naşih i Niniwe aŧiinkuŋ uko unţëpuŋ, anaţa ţi pţij pi pşih, apënan ulankoŋ wi pşih, awohara uşaaku aşë ţo ţi ufob.

⁷ Ado kë bahuuran ţi Niniwe aji : « Naşih na banjañanul baneenan bañaaŋ, na ŋnŧaam ŋweek na ŋmpoţi pde, pfeer na pdaan.

⁸ Bañaaŋ na ŋnŧaam bawo kagurada ŋşaaku ; andoli awo kañehan Naşibaţi maakan, kakuţ kawut buţaan na iko inwooŋ iinwo iŧool yi akdoluŋ.

⁹ Hënk, ulome Naşibaţi aguban pkob nja, awut udeeb uweek wi adeebaţëruŋ nja, ŋwo ŋënkkeţ. »

¹⁰ Wi Naşibaţi awinuŋ iko yi badoluŋ na jibi bakdoonaanuŋ pa pwut buţaan, aguban pdo uko wi ajakuŋ, aanŧok ubeeka wi baka. Aando uko mënţ.