Ujuni 16 - Mankanya

Kabuka ki Iŧmayel

¹ Ŧaaray ahar Abram aambi buk, aşë ka nalemparul ñaaţ aloŋ anwooŋ i uŧaak wi Ejiptu i katim kawooŋ Hagar.

² Kë Ŧaaray aşë ji na Abram : « Tenan, jibi Yawe Nawat Kabuka awooŋ aandi mbuk, dkooţu kooţ kakan ido kawinar na nalempar naan ; ulome nţëpna ţi a nka napoţ. » Abram aŧiink uko wi ajakuluŋ.

³ Wi Abram adoluŋ ŋşubal iñeen ŋi afëţuŋ ţi uŧaak wi Kanaan, Ŧaaray aharul kë aşë jej Hagar, nalemparul, awula kë aniimi.

⁴ Abram awinar na Hagar, kë awo na kayiŋ. Wi Hagar awinuŋ kë awo na kayiŋ, aşë jun pkul Ŧaaray ajugul.

⁵ Kë Ŧaaray aşë ji na Abram : « Iwi iţuuŋ kë Hagar abeehën hënkuŋ. Nji ţi uleef naan dwuliiŋ nalempar naan, kë hënkuŋ wi awooŋ na kayiŋ aşë beehën. Dñehan Nawat Kabuka awayşun nji na iwi. »

⁶ Kë Abram aşë ŧeema aji : « Nalemparu awo ţi kañen ki nu, dolana uko wi iŋaluŋ. » Wi wi Ŧaaray akakuŋ ahajan Hagar, kë adoo noor aţi, kabuurna.

⁷ Uwanjuŧ wi Nawat Kabuka uyit na Hagar du kañog pliik ploŋ panwooŋ du pndiiş, pliik mënţ pawo ţi bgah bi Şur.

⁸ Uji na a : « Hagar, nalempar Ŧaaray, iwoona ţuŋ, aşë aya ţuŋ ? » Kë aşë ŧeem aji : « Dţi ţi kabuurna Ŧaaray, ajug naan. »

⁹ Kë uji na a : « Kakan du ajugu, ido kaŧiinka. »

¹⁰ Uwanjuŧ wi Nawat Kabuka ukak aji : « Ddo babuku baŧum te nin aloŋ aando hil pfën baka.

¹¹ « Tenan, iwo na kayiŋ, iluŋ kabuk napoţ ñiinţ, luŋi iţu'a katim ki Işmayel, ţiki Nawat Kabuka aŧiink mnţëg mi nu.

¹² Aluŋ kawo ji ubuuru unwooŋ uundomi ; anknaţariiŋ bañaaŋ bŧi, bañaaŋ bŧi bakak banaţari'a ; aluŋ kalow bayiţul bŧi. »

¹³ Hagar aşal aji awin na manjoonan anjaaŋ awina, aşë ji wal mënţ na Nawat Kabuka, anţiiniiŋ na a : « Iwo El-Roy, Naşibaţi anwinnuŋ. »

¹⁴ Uko waŋ ukaaŋ kë bakdu pliik mënţ aji Lahay-Roy, dawooŋ « Anwooŋ Aankba awinën. » Pliik mënţ pawo ţi pŧoof pi Kadeş na Bered.

¹⁵ Hagar abukar Abram napoţ ñiinţ, kë Abram aţu napoţ i Hagar abukaruluŋ katim ki Işmayel.

¹⁶ Abram aka ŋşubal iñeen bakreŋ na ŋşubal paaj (86) wi Hagar abukaruluŋ Işmayel.