Rut 4 - Mankanya

Bniim bi Booŧ na Rut

¹ Wi wi Booŧ aşaaŋ aya du plëman pi ubeeka, kë ayiţul i abiiŋ aţiiniyaan uŋ aşë mara mara aţëp. Booŧ kë aşë jaka : « Ayiţ naan biinuŋ ţi i, dnumi'u. » Ñiinţ kë añog aţo.

² Kë Booŧ aşë du biinţ iñeen ţi bantohi biki ubeeka aji na baka baţo, kë baţoo.

³ Kë aşë ji na ñiinţ ankaaŋ na pduka na bi Rut, aji : « Nowemi anwoonuŋ du uŧaak wi Mowab, aŋal pwaap uţeeh umbiiŋ awo wi nakeţ Elimelek ayiţ nja.

⁴ Dşal aji dţupu kajaku inug wa ţi kadun ki banţooŋ biki, na ki bantohi biki ubeeka. Woli iŋal pnug wa jibi iŧaaŋuŋ na pa, knug. Işale wo iinŋali, kţupën nwo name. Iwooŋ naŧeek ţi bankaaŋ na pnug wa, nji kë mbaa bi. » Kë ñiinţ mënţ aŧeema aji : « Aa ! Dŋal kanug wa. »

⁵ Kë Booŧ aşë ji na a : « Unuur wi iknugaŋ uţeeh ţi Nowemi, wul wi ikaaŋ ayeenk Rut ñaaţ i uŧaak wi Mowab, ahar abuk nakeţ Elimelek, katimul kahilna kaduka ţi bka bi nul. »

⁶ Kë aşë ŧeem aji : « Mënkhinan kado wi nkaaŋ na pdo ţiki dţi pŧok bka bi naan. Iwi ţi uleefu dolan uko wi nji nwooŋ i kado, ţiki mënhinan pdo wa. »

⁷ Kë ţfa du Iŧrayel, ţi bwaap këme phiij, na iko bŧi yi bţëlşër, aloŋ aji wohëş kaşapaat kawul aŧënţul kadiimanaan kë bawat ţi ploolan. Du Iŧrayel ţfa, hënk di ñaaŋ ajaaŋ ado.

⁸ Kë wi wi ankaaŋ na pnug uţeeh ajakuŋ na Booŧ : « Nugarën wa uleefu », aşë pënan kaşapaat.

⁹ Kë Booŧ aşë ji na bantohi na bañaaŋ bŧi : « Dnug nţa di kakuţ kayeenk ţi Nowemi iko bŧi imbiiŋ awo yi Elimelek, na iko bŧi imbiiŋ awo yi bi Kiliyon na Mahlon, kë nakwo bamaar,

¹⁰ kabot kayeenk ñaaţ i bajaaŋ bado Rut anwoonuŋ uŧaak wi Mowab kaniim, i Mahlon adukuŋ, katim ki ankeţuŋ kahilna kaduka ţi bka bi nul, kawutna kaneem ţi bayiţul na ţi ubeeka. Nawo nţa bamaar. »

¹¹ Kë bantohi na bañaaŋ bŧi banwooŋ du plëman kë baŧeem aji : « Ŋwo bamaar », aşë ñehan aji : « Ŋñehan Yawe Nawat Kabuka ado ñaaţ ankneejuŋ du katohu anaam ji bi Rakel na Leya, banŧumanuŋ pntaali pi Iŧrayel bukal batëb ţañ. Nawat Kabuka aţenu inaţ iliinŧ ţi Efrata ibot imeeţana ţi Betleyem.

¹² Ŋñehan kabuk ki Nawat Kabuka akwuliiŋ ţi ñaaţ i, kado katoh ki nu ki kanaam ji ki Pereŧ, i Tamar abukaruŋ Yuda. »

¹³ Kë Booŧ ayeenk Rut, kë akak aharul. Wi bameeruŋ, kë Nawat Kabuka aţen Rut kë abuk napoţ ñiinţ.

¹⁴ Wi wi baaţ başaaŋ aji na Nowemi : « Ŋdëman Nawat Kabuka, anwooŋ aanwutu nţa kë iwaaŋ ankluŋ kado kaţënku. Katim ki nul kameeţana ţi Iŧrayel.

¹⁵ Awo mnlilan mi nu, kabot kaboofu ţi pţaf pi nu. Ahar abuku anŋaliiŋ abukariiŋ napoţ uŋ. Woli ido buk lah biinţ paaj na aloŋ baankhinan pdo uko wi Rut adooŋ. »

¹⁶ Kë Nowemi aşë jej napoţ, akabana ţi bjënŧ, ul akuşuluŋ.

¹⁷ Baaţ bakinţul kë başë ji : « Nowemi abuk napoţ », aşë du'a aji Obed. Ul abukuŋ Yeŧe aşin Dayiţ.

Pntaali pi Pereŧ

¹⁸ Pntaali pi Pereŧ pii pi : Pereŧ abuk Heŧron,

¹⁹ kë Heŧron abuk Ram, Ram kë abuk Aminadab.

²⁰ Aminadab kë abuk Naaŧon, Naaŧon kë abuk Ŧalmon.

²¹ Ŧalmon kë abuk Booŧ, kë Booŧ abuk Obed.

²² Obed kë abuk Yeŧe, kë Yeŧe abuk Dayiţ.