Rut 3 - Mankanya

Byit bi Booŧ na Rut na uŧejan

¹ Wi ŋnuur ŋloŋ ŋaţëpuŋ, Nowemi ayootan Rut aji na a : « Abuk naan, dwo kalaaru ñiinţ, ihilna iwo bnuura.

² Ileş Booŧ i ? Ñiinţ anwutiiŋ na balemparul baaţ du uţeehul, awo ayiţ nja. Hënkuŋ, ŧiinkaan : Awo i pkoban ŋdeey nţa na utaakal.

³ Yaan iñowa, ikërada ukëra ulil pţëkëñ ibot iwoh kamişa kadiţ. Idole kşë ya du dko di akkobnuŋ, işë iwut kado ame kë iwo da, te wi akdeeŋ kaba, kadaan.

⁴ Tenan bnuura dko di apiinţuŋ, woli aŋoyënţi kşë ya gurëşa ihoţ kapiinţ kakab ţi ya. Aluŋ kaţupu uko wi iwooŋ kado. »

⁵ Kë Rut aŧeema aji : « Uko wi ijakuŋ bŧi, ddo wa. »

⁶ Kë hënk di di Rut ayaaŋ du dko di bakkobnuŋ, ado jibi Nowemi ajakuluŋ.

⁷ Booŧ ade, adaan, alilan bŧi, aşë ya añog dko di bajunkanuŋ ŋdeey apiinţ. Wi wi Rut aşaaŋ añuugat aya agurëşa ihoţ, apiinţ kakab ya.

⁸ Kaya pban uŧejan mnjel, kë Booŧ aşë lënk aten, aheŧ aşë win ñaaŋ ñaaţ kë apiinţ kakab ihoţul.

⁹ Kë aşë ji : « In a wi ba ? » Kë aŧeema aji : « Naweek, nji Rut a. Yeenkaan nji nalemparu, ţiki iwo ţi bankaaŋ na pdo kaţënkën. »

¹⁰ Kë aŧeema aji : « Poon, dñehan Naşibaţi awulu bnuura. Bnuura bi ikaaŋ ado Nowemi ayootanu bi badëm apel bŧeek ; iinţo pla baţaşa, bajuuk këme bayok.

¹¹ Hënkuŋ poon, kţi nin we, uko wi ijakuŋ bŧi dluŋ kado wa. Bañaaŋ bŧi ţi ubeeka wi naan bame kë iwo ñaaţ anwooŋ na uhaaş unuura.

¹² Uwo manjoonan kë dwo ţi bankaaŋ na pduka na iwi, kë uşë ka aloŋ anŧaaŋuŋ na pdo haŋ apelën.

¹³ Fëran ţi, faan woli aŋal kado uko wi aŧaaŋanaanuŋ pdo, uwo bnuura, ayeenku. Aşale wo aandii, dmehna ţi katim ki Nawat Kabuka kë dyeenku. Piinţan ţi te nfa. »

¹⁴ Hënk, kë aduka apiinţ ţi kakab ihoţ yi Booŧ te nfa kub, kë Booŧ aşë ji : « Ñaaŋ aloŋ aanwo i kame kë abi ţi dko di kakob. » Rut anaţa ji unuur ubi udo kajinţ.

¹⁵ Kë Booŧ aşë jaka : « Pënaan blaañ bi iguradiiŋ buŋ ibi itar. » Kë Rut amëban ba, kë ajej kako aniiba ŋyaaş paaj, kë ŋdeey ŋaŧum maakan. Akuŋana ŋa aşë kak ubeeka.

¹⁶ Wi Rut akakuŋ du ayootanul, kë aşë jaka aji : « Abuk naan, iya do hum ba ? » Kë Rut aşë kakalëşa bŧi bnuura bi adoluluŋ :

¹⁷ Ajaka aji : « Wi akniibnuŋ ŋdeey ŋyaaş paaj aji aankwutën ŋkak du iwi iñen ijinţ. »

¹⁸ Kë Nowemi aşë ŧeema aji : « Abuk naan, ţooni, joobëţan ido katen di ŋkbañëşaanuŋ, ţiki ñiinţ i aankpiinţ nţa di, bë aando uko wi ajakuŋ. »