Rut 2 - Mankanya

Rut du uţeeh wi Booŧ

¹ Kë Nowemi aşë ka ayiţul aloŋ du umbaŋ wi ayinul. Awo ñiinţ anyoki abot ameeţana ţi dko di bawooŋ. Awo i pşini ploolan na Elimelek, katim ki nul kawo Booŧ.

² Unuur uloŋ Rut i uŧaak wi Mowab aji na Nowemi : « Wutaan nya du uţeeh ndo kapërënţ ţi kafeţ ki ñaaŋ ankyaaŋ kadinanaan. » Kë aŧeema aji : « Abuk naan, yaani. »

³ Kë Rut ayaa, ajun ppërënţ ţi kafeţ ki bankkituŋ. Amara awo ţi uţeeh wi Booŧ i pşini pi Elimelek.

⁴ Kë Booŧ aşë ba woona woona wal mënţ ubeeka wi Betleyem, aşë wul bakit mboş aji : « Dñehan Yawe Nawat Kabuka awo na an ». Kë baŧeema aji : « Ŋñehan Nawat Kabuka awulu bnuura bi nul ! »

⁵ Booŧ kë aşë hepar naweek i bakit aji na a : « Poonu undu awo ahoŋ ? »

⁶ Kë aŧeema aji : « Abiiŋ na Nowemi, awoona uŧaak wi Mowab, awo i da.

⁷ Añehanaan aji nţena ado kapërënţ ţi kafeţ ki bakit. Wi abiiŋ na nfa te hënkuŋ, abi wo wo bnaţ, anoorfënaara ntiinku ţañ. »

⁸ Kë Booŧ aşë ya aji na Rut : « Kya ppërënţ du uţeeh uloŋ umpaţi, wutan kalow, woon na balemp naan baaţ, itee ?

⁹ Jaan kten dko di bakkitnuŋ, kaţaş baka. Meen kë dneenan balempnaan pbanu. Woli udaan uţiju, kya du idunk kadaan meel mi baliikuŋ. »

¹⁰ Kë Rut aşë ŋup ţi ihoţ yi Booŧ, aşë jaka : « Ddo do hum adoo yeenk bnuura baŋ ţi iwi, nji nayaanţ yaanţ ? »

¹¹ Kë Booŧ aŧeema aji : « Baţupën jibi ilempi na ayootanu bŧi, wi ayinu akeţuŋ. Dŧiink jibi iduki şaaş na naan, na uŧaak wi nu, abi du bañaaŋ biki iwooŋ iimbaaŋ kame'aara.

¹² Dñehan Nawat Kabuka aluku uko wi idoluŋ ! Ibot iyeenk katuum kanuura kanwoonuŋ du Nawat Kabuka Naşibaţi i Iŧrayel, i ibiiŋ amena ţi ibaaklu yi nul ! »

¹³ Kë Rut aşë jaka : « Dñehan kado kawinanaara winana bnuura ţi kadunu, iwi ajug naan ! Itëŋţënaan, wi iţiiniiŋ bnuura na nji nalemparu te mëndo liŋ liŋ na aloŋ ţi balemp biki nu. »

¹⁴ Wal wi bawooŋ ţi pde kë Booŧ aşë ji na Rut : « Ñogan. Biin ijej kapoom ide, ŧoopan bnduŋ bi nu ţi poŧ. » Kë hënk di aţooŋ, añog bakit, kë Booŧ ajej kak ŋdeey ŋanŧoowuŋ abëkan ţi kadunul. Rut kë ade ayok adoo dukşën.

¹⁵ Wi akakuŋ ulemp kë Booŧ aşë ji na balemp biki nul aji : « Nawutana ado kapërënţ ţi dko di nadooŋ idëp, nawutan kaneenana pdo haŋ.

¹⁶ Naţëpan ţëp nadoki nawut ŋdeey ŋloŋ ŋajot ahilna ajejënţ ŋa, nawutan kaŋoman na a. »

¹⁷ Rut kë aţoo du uţeeh alemp te utaakal. Wi abaaŋ, aşë kob ŋdeey ŋi ajejënţuŋ, kë ŋaŧum uşaaku.

¹⁸ Wi wi aşaaŋ akuŋa wa, akak ubeeka, ayootanul kë awin uko wi apërënţuŋ. Rut apënan iko yi añabanuŋ wi bakdeeŋ, awula.

¹⁹ Kë aşë hepara ajaka : « Ţuŋ di di ipërënţaanuŋ nţa ba ? Du uţeeh wi in, wi wi ilempnuŋ ba ? Dñehan Naşibaţi awul ñaaŋ andinaniiŋ kë ilempi bnuura ! » Kë Rut aşë ţup ayootanul katim ki ñiinţ i alempnuŋ, aji na a : « Ñiinţ i nji nlempuŋ nţa du uţeehul awo katim ki Booŧ. »

²⁰ Kë Nowemi aşë ji na ahar abukul : « Dñehan ayeenk bnuura bi Nawat Kabuka, anjaaŋ ado bnuura ţi bañaaŋ bajeb na bandooŋ abi akeţ ! » Akak aji na a : « Ñiinţ mënţ ayiţ na nja bnuura, awo ţi bankaaŋ na pdo kaţënk nja. »

²¹ Kë Rut aşë ji na ateem : « Akak aji na nji nwo na balempul te uba baka kakit. »

²² Kë Nowemi aşë ji na Rut ahar abukul : « Waŋ ulil pŧiink, abuk naan, iya na balempul baaţ, ibuur mnhaj du uţeeh wi ñaaŋ aloŋ nampaţi. »

²³ Rut aţo na baaţ balempar Booŧ, akit na baka, te uba kakit ki ŋdeey ŋŧeek na ŋtëbanţën, aşë woha na ateem.