Rut 1 - Mankanya

Elimelek na biki katohul du uŧaak wi Mowab

¹ Ţi wal wi bawayëş bţup bakşihuŋ Iŧrayel, kë ubon uweek uşë wo ţi uŧaak. Uko waŋ ukaaŋ kë ñiinţ aloŋ, anwooŋ i ubeeka wi Betleyem du uŧaak wi Yuda apënna da wal mënţ, ul na aharul na babukul biinţ batëb, aya pyaanţ ŋwal ŋloŋ du uŧaak wi Mowab

² Katim ki ñiinţ mënţ kawo Elimelek, ki aharul kë kawo Nowemi, yi babukul kë iwo Mahlon na Kiliyon. Bawo bañaaŋ biki Efrata banwoonuŋ Betleyem du uŧaak wi Yuda. Wi babanuŋ du uŧaak wi Mowab aşë fëţ da.

³ Wi bawooŋ da kë Elimelek ayin Nowemi aşë waaŋa, aduka nayoţ na babukul.

⁴ Babukul bukuŋ, kë baduk aniim baaţ biki uŧaak wi Mowab. Aloŋ ţi baaţ mënţan awo katim ki Orpa, kë natëbanţën awo Rut. Baţo da ado uko ji ŋşubal iñeen,

⁵ kë Mahlon na Kiliyon bakak akeţ bukal batëb bŧi, kë Nowemi aduka najinţ, awaaŋ ayinul na babukul batëb.

Pkak pi bi Nowemi na Rut du Betleyem

⁶ Wi wi Nowemi aşaaŋ anaţa abomandër ul na bahar babukul batëb bukuŋ pkak uŧaak wi nul, ţiki wi bawooŋ du uŧaak wi Mowab, aŧiink kë baji Yawe Nawat Kabuka aţënk bayiţul, ado kë ŋdeey ŋaŧumi.

⁷ Ul na bahar babukul kë bapën du dko di bawooŋ, aŧool pkak uŧaak wi Yuda. Wi bawooŋ ţi bgah,

⁸ kë Nowemi aşë ji na baaţ batëb bukuŋ : « Babuk naan naţiişan, nayaan andoli du uko anin. Dñehan Nawat Kabuka awulan bnuura jibi nayuujuŋ biki ŋkeţandënuŋ, na nji ţi uleef naan, bnuura !

⁹ Dñehan Nawat Kabuka awulan bnuura du itoh yi bayinan. » Wi ajakuŋ haŋ, aşë mook baka, kë başë wooni maakan,

¹⁰ aşë ŧeema aji : « A-a, ŋya na iwi du bayiţu. »

¹¹ Kë Nowemi aşë ji : « Babuk naan, naţiişan i ! Nabaa biir we na nji ba ? Dkak ahil kabuk bapoţ bankhilanuŋ kawo bayinan i ?

¹² Babuk naan naţiişan i, dţaf maakan pkak kaka ñiinţ aloŋ. Woli ddoo haţ haŋ, woli ddoo kaka ñiinţ nţa di, abuk bapoţ biinţ,

¹³ nahilan ppok bniim kayoonk baka badëm i ? Babuk naan, nin, ţi nji di di utamnuŋ, nji i i kañen ki Nawat Kabuka kakobuŋ. »

¹⁴ Wi Nowemi ajakuŋ haŋ, kë bakak awooni maakan. Kë Orpa aşë mook Nowemi uyaani, kë Rut ul, aşë kuulana ţi ateem.

¹⁵ Kë Nowemi aşë ji na a : « Tenan, Orpa awuŋ akak du bayiţul, na du ŋnŧoŋ ŋi baka. Ţiişan ji a. »

¹⁶ Kë aŧeema aji : « Wutan kado na pdookën nţiiş këme pdolën nduku kafeţ, ţiki : Dko di ikyaaŋ, dul di di nji kayaaŋ ; dko di ikţooŋ, dul di di nji kaţooŋ. Bayiţu bakwooŋ bayiţ naan, Naşibaţi i nu akwooŋ Naşibaţi i naan.

¹⁷ Dko di ikkeţnuŋ, dul di di nji kakeţnuŋ, dul di di nji kamoynaaniiŋ. Nawat Kabuka aţu'ën pwuţan pweek uwole mënţ pkeţ pawayëşuŋ nja ! »

¹⁸ Wi Nowemi awinuŋ kë Rut aţu kabaţ, aşë ţañan pjaka aţiiş.

¹⁹ Kë wi wi baaţ batëb bukuŋ bayaaŋ, aban Betleyem. Wi babanuŋ da, kë bañaaŋ bŧi başë ñoŋar, baaţ kë bakŋajar aji : « Woon Nowemi awi i ? »

²⁰ Kë aşë ji na baka : « Nawutan kado kadolën Nowemi, nadoon kadu'ën Mara, ţiki El Şaday, Naşibaţi Anhiniiŋ iko bŧi ajooţanaan ubida maakan.

²¹ Wi nji kayaaŋ dwo nayok, kë Yawe Nawat Kabuka aşaaŋ akakanaan iñen ijinţ nji wi. Wel ukaaŋ kë nakdolën anlilanuŋ ba ? Nawat Kabuka adekën kafeţ, Anhiniiŋ iko bŧi aţu'ën pwuţan. »

²² Kë hënk di Nowemi apënnuŋ Mowab na Rut ahar abukul anwooŋ i uŧaak mënţ. Baban Betleyem ţi wal wi kakit ki ŋdeey ŋŧeek kabaaŋ ajun jun.