Ppën 9 - Mankanya

Kakob kañeenanţën : Pkeţ pi ŋnŧaam

¹ Yawe Nawat Kabuka aji na Moyiŧ : « Yaan du Farawuna ijaka, Nawat Kabuka Naşibaţi i bahebërë bajaaŋ badëman ajakuŋ : “Wutan pntaali pi naan paya padëmanaan.

² Ipokle pwutan pa akak amëban pa kak,

³ Nawat Kabuka kakob itani yi nu inwooŋ du pşaar na kañen ki nul, kaţu ŋmpëlënŧ na ŋbuuru, na ŋnŧaam ŋi pnkunkaali, ŋgit, ŋkaneel na ŋpi bkeţan bweek.

⁴ Kë Nawat Kabuka aşë apaţëş itani yi biki Iŧrayel na yi biki Ejiptu, kë nin unŧaam uunkkeţ ţi ŋi biki Iŧrayel.” »

⁵ Nawat Kabuka aţu unuur wi akdoluŋ uko mënţ ţi uŧaak, aji uwo faan.

⁶ Wi unuur ujinţuŋ Nawat Kabuka ado uko wi ajakuŋ, akob itani, kë yi biki Ejiptu bŧi ikeţi, kë ţi yi biki Iŧrayel bŧi, nin unŧaam uundoo keţ keţ.

⁷ Farawuna ado bañaaŋ kë baya ten uko unţëpuŋ kë babi aţupa kë nin unŧaam uloŋ ţi itani yi biki Iŧrayel uundoo keţ keţ. Kë uhaaş wi Farawuna uşë dënëţaara dënëţ kë apok pwutan bañaaŋ biki Iŧrayel baya.

Kakob kapaajanţën : Ŋwur ŋankakuŋ ŋjad

⁸ Yawe Nawat Kabuka aji na Moyiŧ na Aaron : « Nabëñan ufob wi pteet naŧuman iñen, Moyiŧ aya afël wa ţi kadun ki Farawuna.

⁹ Ukak pdëpalën kaniink uŧaak wi Ejiptu bŧi. Paţu bañaaŋ na ŋnŧaam bŧi ţi Ejiptu bawo na ŋwuur ŋankyaaŋ kadoo kakak ŋjad. »

¹⁰ Bajej ufob wi pteet aya anaţ ţi kadun ki Farawuna ; kë Moyiŧ ajej ufob afël kë bañaaŋ bawo na ŋwuur ŋankakuŋ ŋjad.

¹¹ Bado dayaamu baanhil kaya kanaţ du kadun ki Moyiŧ ţiki bawo na ŋjad ţi uleef bŧi ji bañaaŋ biki Ejiptu bŧi.

¹² Nawat Kabuka ado kë uhaaş wi Farawuna udënëţ kë aanŧiink baka jibi Nawat Kabuka abiiŋ aji na Moyiŧ.

Kakob kaţënk paaj na kaloŋ : Uşubal wi mpoj

¹³ Yawe Nawat Kabuka aji na Moyiŧ : « Naţiin na nfa kub iya inaţ du kadun ki Farawuna. Jakana, Nawat Kabuka Naşibaţi i bahebërë bajaaŋ badëman aţiini aji : “Wutaan pntaali pi naan paya padëmanaan.

¹⁴ Ipokle, byaaş bi, kadolu iko itam iŧum iwi ţi uleefu na banjaaŋ baţënku pşih na bañaaŋ biki uŧaaku imeena kë uunka nin aloŋ annaami na nji ţi mboş.

¹⁵ Woli ddeeŋ lah kañen akoban na pmaak pi pkeţ, iwi na pntaali pi nu, nawetana ţi mboş.

¹⁶ Kë uko unkaaŋ kë nwutu uwo kë dŋal pyuuju mnhina mi naan, katim naan kahilna kameeţana ţi umundu bŧi.

¹⁷ Idiik apok pwutan pntaali pi naan paya.

¹⁸ Faan na kawoori ki keeri, ddo uşubal wi mpoj udëm maakan, jibi uwooŋ uumbaaŋ kawohaara ţi Ejiptu kapënna unuur wi dapaşnaaniiŋ te wi nţa wi.

¹⁹ Kë hënkuŋ, doon baneejan itani yi nu du impen na uko wi ikaaŋ bŧi kë uwo du uţeeh. Uko bŧi unwooŋ du uţeeh awo uunţiişi, uwole ñaaŋ këme unŧaam, mpoj kajotna wa ukeţ.” »

²⁰ Banfiyaaruŋ uţup wi Nawat Kabuka ţi banjaaŋ baţënk Farawuna pşih baŧaran ado kë balempar baka kë baţiişi abot aneejan ŋnŧaam du itoh.

²¹ Kë banwooŋ baanfiyaar uţup wi nul bawut du ŋţeeh balempar baka na ŋnŧaam ŋi baka.

²² Nawat Kabuka aji na Moyiŧ : « Deeŋan kañen du baţi, uşubal wi mpoj uşë ujot ţi uŧaak wi Ejiptu bŧi, ujot ţi bañaaŋ, ţi ŋnŧaam, na ţi ujaagal bŧi ţi uŧaak wi Ejiptu. »

²³ Moyiŧ adeeŋ pmul pi nul du baţi kë Nawat Kabuka aşë do kë imparantant iŧiinkanaa, mpoj manjoti, kë imparantant ikak ajot ţi mboş. Kë Nawat Kabuka ado kë mpoj mankşub ţi Ejiptu.

²⁴ Iliik liik ipën ţi uşubal wi mpoj wuŋ. Uşubal wi mpoj udëm pdëm paŋ ; uloŋ uŧënţ wuŋ uumbaaŋ kawoha wi uŧaak wi Ejiptu uwoonuŋ.

²⁵ Mpoj manjotna uko bŧi unwooŋ du uţeeh du Ejiptu kajunna du bañaaŋ te du ŋnŧaam. Mankak ajotna ujaagal bŧi wi uţeeh awat mnko abot akit ma.

²⁶ Dko di Goşen di biki Iŧrayel bawooŋ dul di manwooŋ maanjoti.

²⁷ Farawuna ado kë badu Moyiŧ na Aaron aşë ji na baka : « Ţi byaaş bi, djubani ; Nawat Kabuka awooŋ naŧool, kë nji na pntaali pi naan ŋşë duknaana.

²⁸ Nañehandëraan Nawat Kabuka aţañan imparantant na mpoj, dwutanan naya mënkak amëbanan. »

²⁹ Moyiŧ aŧeema aji : « Woli dpën ţi ubeeka kadeeŋ iñen du Nawat Kabuka kañehan imparantant kţañ, mpoj mambot manţañ ihilna ime kë Nawat Kabuka awooŋ ajug mboş.

³⁰ Kë nşë me bnuura iwi, na banjaaŋ baţënku pşih, naandobi kaţi Nawat Kabuka kado uko wi ajakuŋ. »

³¹ Mngof manaamuŋ na bmuuţ na mannaamuŋ na umaanan mankeţi.

³² Kë ŋdeey ŋloŋ ŋaşë wo ŋaanŧokaa ţiki ŋaji ŋajon ude.

³³ Moyiŧ apën du uko Farawuna, apën ţi ubeeka, aşë deeŋ iñen du Nawat Kabuka añehana, kë imparantant na mpoj ibot aţañan kë uşubal uţañan pşub.

³⁴ Wi Farawuna awinuŋ kë uşubal, mpoj na imparantant iţañi, kë aşë mëbanaara ţi pjuban pi nul, adënëm. Banjaaŋ baţënka pşih badoo kak ji a.

³⁵ Adiik apok pwut biki Iŧrayel baya jibi Nawat Kabuka abiiŋ aţëpna ţi Moyiŧ aţup.