Ppën 8 - Mankanya

¹ Yawe Nawat Kabuka akak aji na Moyiŧ : « Jakan na Aaron ajej pmul pi nul adek pa du idëk, itant, na ibuul na ilaaña ado ŋbobal ŋapaya ŋapën ţi uŧaak wi Ejiptu. »

² Aaron adek kañen ţi dko danwooŋ na meel ţi Ejiptu kë ŋbopal ŋapaya aniink mboş mi uŧaak bŧi.

³ Bado dayaamu biki Ejiptu kë bakak ado haŋ na dayaamu di baka apënan ŋbopal kë ŋaniink uŧaak wi Ejiptu.

⁴ Farawuna ado kë badu Moyiŧ na Aaron aşë ji na baka : « Nakooţan Nawat Kabuka apënan ŋbopal ŋanwooŋ ţi dko di naan na di bañaaŋ biki uŧaak. Wal mënţ kawut bañaaŋ biki nan baya bado Nawat Kabuka bţeŋan. »

⁵ Moyiŧ aji na a : « Dwutu idat wal wi nji kañehandëriiŋ Nawat Kabuka, iwi, banjaaŋ baţënku pşih na bañaaŋ biki uŧaak, ŋbopal ŋahil ŋapën ţi iwi na ţi itohu, ŋawo ţi bdëk ţañ. »

⁶ Kë aŧeem aji : « Ñehandëraan faan. » Kë akak aji na a : « Uwo jibi ijakuŋ, ihilna ime kë uunka nin aloŋ anwooŋ ji Nawat Kabuka, Naşibaţi i ŋjaaŋ ŋdëman.

⁷ Ŋbopal ŋalowu, kalow itohu, kalow banjaaŋ baţënku pşih, kalow bañaaŋ biki uŧaaku, ŋawo du bdëk ţañ. »

⁸ Moyiŧ na Aaron bapën du uko Farawuna kë Moyiŧ aşë huuran añehan Nawat Kabuka ţi uko wi ŋbopal ŋi aţuuŋ Farawuna.

⁹ Nawat Kabuka ado uko wi Moyiŧ añehanuŋ, kë ŋbopal ŋakeţ ţi itoh, ţi ilay na du ŋţeeh.

¹⁰ Bajejënţ ŋa ado injuŋ kë pţëkëñ paniink uŧaak bŧi.

¹¹ Farawuna, wi awinuŋ kë uko uţu kawiir, kë uhaaş wi nul uşë kak adënëţ, kë apok pŧiink bi Moyiŧ na Aaron jibi Nawat Kabuka abiiŋ aji.

Kakob kawajanţën : Ŋbarëm

¹² Yawe Nawat Kabuka aji na Moyiŧ, aji na Aaron adeeŋ pmul akob ţi mboş pdëpalën panknaţiiŋ pakak ŋbarëm kaniink uŧaak wi Ejiptu bŧi.

¹³ Kë bado uko wi ajakuŋ, Aaron adeeŋ pmul akob ţi mboş, kë pdëpalën bŧi panaţaa, akak ŋbarëm ţi uŧaak wi Ejiptu bŧi, ŋaniink bañaaŋ na ŋnŧaam.

¹⁴ Bado dayaamu kë bakdo na pdo ji bi Moyiŧ na Aaron aşë wo baanhili. Ŋbarëm ŋawo ţi bañaaŋ na ţi ŋnŧaam.

¹⁵ Bado dayaamu baji na Farawuna : « Uko wi, uwo udo wi kañen ki Naşibaţi. » Kë uhaaş wi Farawuna uşë dënëţ kë apok pŧiink bi Moyiŧ na Aaron jibi Nawat Kabuka abiiŋ aţup.

Kakob kabaakanţën : Ŋtiw

¹⁶ Yawe Nawat Kabuka aji na Moyiŧ : « Naţiin na nfa kub iya iyit na Farawuna wal wi akyaaŋ bdëk, ijaka, Nawat Kabuka aţiini aji : “Wutan pntaali pi naan paya padëmanaan.

¹⁷ Ipokle pwut baka baya, kaţu'u ŋtiw, iwi na banjaaŋ baţënku pşih na bañaaŋ biki uŧaaku, na ţi itohu. Itoh yi biki Ejiptu iŧum ŋa, ŋadoo wo ţi mboş mi baknaţuŋ.

¹⁸ Unuur mënţ kë nşë paţëş Goşen di pntaali pi naan pawooŋ, ŋtiw ŋawutna kawo da, iwi ihilna ime kë nji Nawat Kabuka dwo ţi uŧaak wi.

¹⁹ Dpaţëş pntaali pi naan na pi nu. Uko mënţ faan di di ukwooŋ.” »

²⁰ Nawat Kabuka ado jibi ajakuŋ, kë hënk ŋtiw ŋŧum maakan ŋaneej du katoh ki Farawuna, du yi banjaaŋ baţënka pşih ; ŋaniink uŧaak wi Ejiptu bŧi, aŧok wa.

²¹ Farawuna ado kë badu Moyiŧ na Aaron aji na baka : « Nadolan Naşibaţi i nan bţeŋan ţi uŧaak ţi. »

²² Moyiŧ kë aŧeema aji : « Uunuura ŋdo haŋ ţiki bţeŋan bi ŋkdoluŋ Nawat Kabuka Naşibaţi i nun bawo uko uwuţaan maakan ţi këş ki bañaaŋ biki Ejiptu. Ŋdole ba ţi këş ki baka, batapun mnlaak kafiŋ.

²³ Ŋwo i kapoş ŋnuur ŋwajanţ du pndiiş kaşë kado da bţeŋan pa Nawat Kabuka Naşibaţi i nun jibi ajakuŋ na un. »

²⁴ Kë Farawuna aji : « Nji dwutan naya nado Nawat Kabuka Naşibaţi i nan bţeŋan du pndiiş. Hënkuŋ uko uloolan wi nji kajakanaŋ : nawutan kalow maakan. Nañehandëraan. »

²⁵ Kë Moyiŧ aji na a : « Upënarën pën ţi katohu, dñehandëru Nawat Kabuka faan ŋtiw ŋapën, kalowu iwi Farawuna na banjaaŋ baţënku pşih na pntaali pi nu. Kë işë wo kaţañan pdo kadolun ji bapën, kapok pwutan bañaaŋ biki nun baya bado Nawat Kabuka bţeŋan. »

²⁶ Moyiŧ apën du uko Farawuna aşë ñehan Nawat Kabuka,

²⁷ kë ado uko wi añehanuluŋ, adook ŋtiw ţi Farawuna, ţi banjaaŋ baţënka pşih na ţi bañaaŋ biki uŧaakul, nin uloolan uundukaa.

²⁸ Kë uhaaş wi Farawuna uşë kak adënëţ kak kë apok pwutan pntaali pi Iŧrayel paya.