Ppën 34 - Mankanya

Klaak ktëbanţën ki bapiiŧuŋ bgah

¹ Yawe Nawat Kabuka aji na Moyiŧ : « Fejan klaak ktëb ji kŧeek, dpiiŧ ţi ka ŋţup ŋi mpiiŧuŋ ţi kŧeek ki ifomuŋ.

² Nfa kub manwo kaţënk ibaa, payiin na nfa muŋ du pnkuŋ pi Ŧinayi, inaţ ţi kadun naan ţi pa duuţ.

³ Nin ñaaŋ aankpaya na iwi, nin aloŋ aankbi ţi pa, nin unŧaam umpoţi këme uweek uunkbi kafeer kañog ţi pa. »

⁴ Kë Moyiŧ afej klaak ktëb ji kŧeek ; anaţa na nfa apaya du pnkuŋ pi Ŧinayi jibi Nawat Kabuka ajakuluŋ, awo na klaak ktëb ţi iñen.

⁵ Nawat Kabuka kë aşë wala ţi kanfëluŋ anaţ kañoga aţupa katim ki nul aji : « Nji dwooŋ Yawe Nawat Kabuka ».

⁶ Aţëp ţi kadunul aşë ji : « Nji dwooŋ Yawe Nawat Kabuka anjaaŋ añaga, kaŧiink mnţëg, anwooŋ aanŧar udeeb, anjaaŋ aŋal te mnţo abot aji do uko wi ajakuŋ.

⁷ Dji kawul bnuura bi naan, te iwuuŋ iñeen week ŋyaaş iñeen, kabot kamiir bado buţaan, bampataţiiŋ na banjubanuŋ kaşë wo mënji kafaŋan anduknaaniiŋ kabot kakob bañaaŋ banjubanuŋ, babuk baka te bamumiin baka. »

⁸ Wal mënţ kë Moyiŧ aşë ŋup adëman Nawat Kabuka,

⁹ aji : « Ajugun, woli dwinana bnuura ţi këş ki nu, dñehanu iwi Ajugun ido kapoş na un ; dme kë bañaaŋ biki batam ikow, kë nşë kooţu kooţ imiirun ipekadu yi nun, na pjuban pi nun, ibot ijejun ŋwo biki nu. »

Pkakalëş Bhoŋar

¹⁰ Yawe Nawat Kabuka aji na Moyiŧ : « Tenan, ddo bhoŋar na an. Ddo ţi pŧoof pi pntaali pi nu bŧi iko iñoŋarënaan inwooŋ iimbaaŋ kawohaara nin du uŧaak uloŋ, nin du pntaali ploŋ. Pntaali pi nu bŧi pawin udo wi nji Nawat Kabuka, kë nşë ţëpna ţi an kado iko iyibanaan.

¹¹ Namëbaan bnuura uko wi nji kaţu'anaŋ nţa di pdo. Natenan, ddook ţi kadunan bahamorit, biki Kanaan, bahitit, baperiŧit, bahiwit na bayebuŧit.

¹² Naţaafaraan kado bhoŋar na bañaaŋ biki ŋŧaak ŋi nakneejuŋ, kawutna kajot ţi kaguuru ki baka.

¹³ Nadoo ţëp ţëp kawat iliit yi mngur yi baka, kawat itu yi baka, kabot kaŧok iduuŋ yi baka.

¹⁴ Iinwo kaŋup kadëman nin biki bajaaŋ bado başibaţi, ţiki katim ki Nawat Kabuka kawo “Mënji kaţok uko”. Nji dwo Naşibaţi anwooŋ aanji ţok uko.

¹⁵ « Nawutan keeri kado bhoŋar na banfëţuŋ ţi uŧaak mënţ, bawutna kadu'an nade ŋnŧaam ŋi bajaaŋ bafiŋar biki bajaaŋ bado başibaţi woli bado iko iţop pa baka.

¹⁶ Nawutan kajej babuk baka baaţ kawul babukan biinţ baniim. Hënk, babuk baka baaţ bahilan woli bado iko iţop pa biki bajaaŋ bado başibaţi, baţu babukan biinţ bado kado iko mënţ kak.

¹⁷ « Nin iinkyuuyan uko uloŋ kado kado wa Naşibaţi.

¹⁸ « Nado kado ufeŧtu wi ipoom indaţ, nado ŋnuur paaj na uloŋ kado kade ipoom indaţ ; ţi wal wi njakanaŋ, ţi upën ŋdeey jibi mbiiŋ aţu'an pdo, ţiki wal wi ŋdeey ŋajaaŋ ŋapën wi wi mpënananaŋ du Ejiptu.

¹⁹ « Bajeen ñiinţ awo i naan jibi ŋbuk ŋkaş ŋŧeek ŋi ŋnŧaam ŋmpoţi na ŋweek ŋakaaŋ awo ŋi naan.

²⁰ Aşë wo woli ubuuru wa, naţëţan umpoţi wi wa na umpoţi wi unkaneel këme wi upi, woli naanţëţan wa, nakit wa kaţuţ. Bajeen biinţ bŧi nakak aţëţan baka. « Naankbi ţi kadun naan iñen ijinţ.

²¹ « Nado kalemp ŋnuur paaj, uţënk paaj na uloŋ nanoorfën, woli udo wo ţi wal wi ijaar, këme ikit.

²² « Nado ufeŧtu wi inëm, ufeŧtu wi upën ŋdeey ŋŧeek na ufeŧtu wi ikit ţi uba uşubal.

²³ « Ŋyaaş ŋwajanţ ţi uşubal biinţ bŧi baya du kadun ki nji Ajugan Nawat Kabuka Naşibaţi i Iŧrayel.

²⁴ Ddook ŋŧaak ţi kadunan, kahaanan uŧaaku. Wal wi nakyaaŋ ŋyaaş ŋwajanţ ţi uşubal ţi kadun ki Nawat Kabuka Naşibaţi i nan, ddo kë nin ñaaŋ aloŋ aankŋal pyeenk uŧaak wi nan.

²⁵ « Wal wi nakfiŋaraanuŋ ŋnŧaam, nawutan kanaakrën pñaak na ipoom innaţiiŋ. Unŧaam unfiŋuŋ pa Ufeŧtu wi Mbuur uunkhankana te nfa.

²⁶ « Naţij du katoh ki nji Nawat Kabuka Naşibaţi i nan ŋdeey ŋŧeek ŋannuurnaaniiŋ ŋi mboş mi nan. « Naankyikan upi umpoţi na mntow mi unin. »

²⁷ Kë hënk di Nawat Kabuka akaaŋ aji na Moyiŧ : « Piiŧan ŋţup ŋi ţi ulibra, ţiki ŋul ŋi ŋi nji kadolnuŋ bhoŋar na iwi, na babuk Iŧrayel. »

²⁸ Moyiŧ aţo na Nawat Kabuka ŋnuur iñeen ŋbaakër na ŋŧejan iñeen ŋbaakër. Nin aandee, aandaan nin meel. Wal mënţan wuŋ wi wi Nawat Kabuka apiiŧuŋ ţi klaak kanfejuŋ ŋţup ŋi bhoŋar, iko iñeen yi aţuuŋ pdo kaţaş.

Kaara di Moyiŧ danuur

²⁹ Wi ŋnuur ŋuŋ ŋaţëpuŋ kë Moyiŧ aşë wala ţi pnkuŋ pi Ŧinayi, amëban ţi iñeen klaak ktëb kanfejaniiŋ apiiŧ uko wi Yawe Nawat Kabuka aŧiinkaruŋ na biki Iŧrayel. Kë kaara di nul daknuur ţiki aţiini na Nawat Kabuka kë aşë wo aammee.

³⁰ Aaron na biki Iŧrayel bŧi bawin jibi kaara di nul daknuuruŋ aşë wo baaññoom pñoga.

³¹ Adu baka, kë Aaron na baweek biki pntaali bŧi baya du a añoga. Kë aşë ţiini na baka.

³² Wal mënţ kë biki Iŧrayel bŧi başë ñoga. Aţup baka uko wi Nawat Kabuka ajakuluŋ du pnkuŋ pi Ŧinayi aji bawo i kado.

³³ Wi Moyiŧ aţiiniiŋ na baka aba, aşë wun kaara na uleenŧ.

³⁴ Woli awo du kadun ki Nawat Kabuka aţiini na a, aji pënan uleenŧ te wal wi apënuŋ da. Akakle, aji ţup bañaaŋ uko wi Nawat Kabuka aţuuŋ pdo.

³⁵ Biki Iŧrayel baji baten kaara di Moyiŧ kaşë win da danuur aşë wun da na uleenŧ te wal wi akyaaŋ pţiini na Nawat Kabuka.