Ppën 32 - Mankanya

Ubay wi uwuuru

¹ Biki Iŧrayel bawin kë Moyiŧ ajon du pnkuŋ bë aanwalaa aşë bi ayit afooy Aaron aji na a : « Iwi, naţiin idolun ptu pankdooŋ kapoş ţi kadun ki nja. Na manjoonan Moyiŧ i, ñiinţ ampënanuŋ nja du uŧaak wi Ejiptu, ŋëndo me me uko wi akakuŋ. »

² Aaron aji na baka : « Naŧehan irinku yi uwuuru inwooŋ ţi ibaţ yi baharan na yi babukan biinţ na baaţ, naţijën ţi. »

³ Kë bañaaŋ bŧi bapënan irinku yi uwuuru inwooŋ ţi ibaţ yi baka aţij ya Aaron.

⁴ Ayeenk ya ţi iñen yi baka ayuuyan aţak ubay, kë bañaaŋ başë huuran aji : « Iŧrayel, uko wi uwooŋ Naşibaţi i nja, wul upënanuŋ nja du Ejiptu. »

⁵ Wi Aaron awinuŋ uko mënţ aşë niw bliit bi mngur ţi kadun ki ubay wi wuuru aşë ji : « Faan ŋdo ufeŧtu kadëmanaan Yawe Nawat Kabuka. »

⁶ Unuur utëbanţën, banaţa na nfa kub, afiŋar wa ŋnŧaam abot tër ŋa, bado kak iţeŋan iloŋ yi bŧiinkar. Baţo ade, adaan aşë naţa unoh.

⁷ Wal mënţ, kë Nawat Kabuka aşë ji na Moyiŧ : « Yaani, waliin ţi pnkuŋ ţiki pntaali pi nu pi ipënanuŋ du Ejiptu pado uko uwuţaan maakan.

⁸ Baŧaran apën ţi bgah bi nţuuŋ baka, baţak ubay, aŋup adëman wa abot ado iţeŋan aşë ji : “Iŧrayel, uko wi uwooŋ Naşibaţi i nja, wul upënanuŋ nja du Ejiptu.” »

⁹ Nawat Kabuka akak aji na Moyiŧ : « Dwin kë bañaaŋ biki pntaali pi batam ikow.

¹⁰ Hënkuŋ, yoonkaan na baka : udeeb wi naan uţu nhajan baka, mba baka, kë iwi, ddo bañaaŋ bankpënnuŋ ţi iwi bawo pntaali pweek. »

¹¹ Kë Moyiŧ aşë kooţ Nawat Kabuka Naşibaţi i nul aji na a : « Iwi Nawat Kabuka, we ukaaŋ kë udeeb wi nu ukjotna pntaali pi nu, pi ipënanuŋ du uŧaak wi Ejiptu na mnhina mnweek mi kañen ki nu ?

¹² Wutan kado bañaaŋ biki uŧaak mënţ bado babi baji Naşibaţi i baka apënan baka da kaţu baka pwuţan, apënan baka kafiŋna baka du inkuŋ, kaba na baka ţi mboş. Walaan udeeb wi nu iwut kado pntaali pi nu uko utam wi iŋaluŋ pdo pa.

¹³ Leşan Abraham, Iŧaak, na Iŧrayel balemparu biki imehniiŋ aji na baka : “Ddo bañaaŋ bankpënnuŋ ţi an baŧum ji ŋjah ŋi baţi. Dwul bañaaŋ bankpënnuŋ ţi an uŧaak bŧi wi nţiiniyaanuŋ na an, uwo wi baka te mnţo.” »

¹⁴ Kë Nawat Kabuka awut uko utam wi ajakuŋ aŋal pdo pntaali pi nul.

¹⁵ Moyiŧ awugşa wal mënţ aşë wala du pnkuŋ, awo na klaak ktëb kanfejaniiŋ apiiŧ uko wi Nawat Kabuka aŧiinkaruŋ na biki Iŧrayel ţi iñen. Klaak kapiiŧana ţi Ŋmbaŋ ŋtëb, ţi kadun na ţi kafeţ.

¹⁶ Klaak kuŋ kawo ulemp wi Naşibaţi, kë ŋpiiŧ ŋanjabuŋ ţi ka ŋawo ŋi Naşibaţi.

¹⁷ Kë Yoŧuwe aşë ŧiink idiim yi pntaali pankdoluŋ iwuh aşë ji na Moyiŧ : « Iwuh yi ugut iwo du dko di bañaaŋ bafëţuŋ. »

¹⁸ Kë aŧeema aji : « Mënţ iwuh yi mnlilan yi bankobuŋ ţi ugut këme yi ŋwooni yi biki bakobuŋ ya ; iyeeh iloŋ yi yi nji kaŧiinkuŋ. »

¹⁹ Wi Moyiŧ akñoguŋ dko di bafëţuŋ awin ubay wi baţakuŋ, kë bañaaŋ bawo ţi uki. Wal mënţ Moyiŧ adeebaţ maakan adoo fël klaak ki awoonaanuŋ ţi iñen kë kafoma aroca roca ţi pnkuŋ uţeeh.

²⁰ Ajej ubay wi baţakuŋ afël du bdoo, aşon şonan wa kë udoo kak pdëpalën, ajej pdëpalën puŋ alëŧ lëŧan ţi meel duuţ aşë do bañaaŋ biki Iŧrayel kë badaan pa.

²¹ Wi abaaŋ aşë hepar Aaron aji : « Wel wi bañaaŋ biki badoliiŋ kë idoo ţu baka kë bajuban pjuban pweek pi ba ? »

²² Aaron aŧeema aji : « Naweek, wutan kadeebaţ ! Iwi ime ţi bkowu kë pntaali pi, pdo buţaan ţañ di di pameeŋ.

²³ Bajakën aji ndo baka ptu pankndooŋ kapoş ţi kadun ki baka ; bajakën aji iwi Moyiŧ i, ñiinţ ampënanuŋ baka du uŧaak wi Ejiptu baando me me uko wi ikakuŋ.

²⁴ Kë nji na baka bañaaŋ bŧi bankaaŋ uwuuru baţij wa. Kë baţijën wa kë nţu wa du bdoo, kë ukak ubay wi. »

Kakob

²⁵ Moyiŧ awin kë bañaaŋ baji andoli ado uko wi aŋaluŋ, kë Aaron awut baka, kë banşooruŋ baka bakak kabi kabeeh baka.

²⁶ Wi wi Moyiŧ ayaaŋ anaţ ţi dko dneejni du dko di batannuŋ iloona aşë ji : « Banwooŋ biki Yawe Nawat Kabuka babiin ţi nji. » Kë biki pşini pi Lewi bŧi babi ţi a.

²⁷ Aji na baka : « Uko wi Nawat Kabuka, Naşibaţi i Iŧrayel ajakuŋ wii wi : “Andoluŋ atanan kakej ki nul ţi blank. Nañaayan na dko di nafëţuŋ bŧi, naneej du iloona bŧi, nafiŋ biinţ bayiţan, banohan na bakinţan.” »

²⁸ Biki pşini pi Lewi bado uko wi Moyiŧ ajakuŋ na baka ; kë uko ji biinţ iñeen-week ŋyaaş iñeen ŋwajanţ (3 000) bakeţ unuur mënţ.

²⁹ Moyiŧ aji na biki pşini pi Lewi : « Nţa di nawo biki Nawat Kabuka wi nadooŋ afiŋ babukan na bayiţan, awulan nţa bnuura bi nul. »

³⁰ Unuur utëbanţën Moyiŧ aji na bañaaŋ bŧi : « Najuban pjuban pweek maakan. Hënkuŋ dkak du Nawat Kabuka, katen me nhilan pdo amiiran pjuban pi nan. »

³¹ Moyiŧ akak du Nawat Kabuka aşë ţëga aji : « Pntaali pi pajuban pjuban pweek, baţak ubay wi uwuuru ado wa ptu.

³² Hënkuŋ miiran baka, kë woli iinkdo haŋ, kpënan katim naan ţi ulibra wi ipiiŧuŋ itim yi bañaaŋ biki nu. »

³³ Kë Nawat Kabuka aŧeema aji : « Anjubanuŋ ţañ i i nji kapënanuŋ katimul ţi ulibra wi naan.

³⁴ Yaan hënkuŋ iñooţ pntaali du dko di njakiiŋ. Uwanjuŧ wi naan upoş ţi kadunu, kë unuur wi nji kalukanuŋ, dkob baka ţiki bajubanaan. »

³⁵ Nawat Kabuka akob biki Iŧrayel ţiki bado kë Aaron aţak baka ubay.