Ppën 24 - Mankanya

Bhoŋar bapiiŧanaa

¹ Yawe Nawat Kabuka aji na Moyiŧ : « Payiin ibi ţi nji du pnkuŋ iwi na Aaron na Nadab na Abihu, na bantohi iñeen paaj na uloŋ ţi biki Iŧrayel. Woli naya aţu kalow naşë ŋup kadëmanaan,

² iwi Moyiŧ, ţañ iwooŋ kañog Yawe. Bandukiiŋ baankñog, kë bañaaŋ baankpaya na a. »

³ Moyiŧ aya aţup bañaaŋ iko bŧi yi Nawat Kabuka ajakuluŋ na iko yi pţaş kë bañaaŋ bado pdiim ploolan aŧeema aji : « Uko wi Nawat Kabuka ajakuŋ bŧi ŋdo wa. »

⁴ Kë Moyiŧ apiiŧ uko wi Nawat Kabuka ajakuŋ bŧi, aşë naţa na nfa kub aniw bliit bi mngur ţi pnkuŋ uţeeh abot anaţan klaak iñeen na ktëb ji mpej pa kntaali iñeen na ktëb ki Iŧrayel.

⁵ Wi wi aşaaŋ ado baţaşa baloŋ biki Iŧrayel baya bafiŋar Nawat Kabuka ŋnŧaam babot batër ŋa, bakak bafiŋara ŋgit ŋkaş ŋawo ŋi bŧiinkar.

⁶ Moyiŧ ajej pñaak afaaş ţi pŧoof aţu ploŋ ţi iţukar aşë lëŧ pandukiiŋ ţi bliit bi mngur.

⁷ Wi abaaŋ aşë jej ulibra wi bhoŋar wi abaaŋ apiiŧ piiŧ aleyiir uko bŧi wi Nawat Kabuka ajakuŋ ţi kadun ki bañaaŋ, kë bukuŋ başë ŧeem aji : « Uko wi Nawat Kabuka ajakuŋ bŧi ŋdo wa, kabot kaţaş wa. »

⁸ Moyiŧ ajej wal mënţ pñaak alëŧar bañaaŋ aşë ji : « Pi pawooŋ pñaak pankţeŋanuŋ bhoŋar bi Nawat Kabuka adoluŋ na nja woli ŋţaş iko yi ajakuŋ yi. »

⁹ Kë Moyiŧ apaya du pnkuŋ, ul na Aaron na Nadab na Abihu na bantohi biki Iŧrayel iñeen paaj na uloŋ,

¹⁰ bawin Naşibaţi i Iŧrayel. Uko uloŋ uwo ţi ihoţul uţeeh unwooŋ ji blay bandaaŋuŋ awo uniilu ajinţ ji baţi.

¹¹ Baweek biki Iŧrayel bawin Naşibaţi kë aando baka buţaan, baţo ade adaan.

Pyit pi Moyiŧ na Naşibaţi du pnkuŋ

¹² Yawe Nawat Kabuka aji na Moyiŧ : « Payiin ibi ţi nji du pnkuŋ iţo da, nwulu klaak ki mpiiŧuŋ Bgah na iko yi nţu'anaŋ pdo, ijukan ya bañaaŋ biki Iŧrayel. »

¹³ Moyiŧ anaţa ul na Yoŧuwe nalemparul aşë paya du pnkuŋ pi Naşibaţi.

¹⁴ Abi ji na bantohi : « Nayoonkun ţi te ukakun ; nawo na Aaron na Hur, ankaaŋ uhok na aŧënţul aţupan baka. »

¹⁵ Kë hënk, wi Moyiŧ akpayiiŋ du pnkuŋ kë kanfëluŋ kaşë wun pa.

¹⁶ Mndëm mi Nawat Kabuka manwala ţi pnkuŋ pi Ŧinayi, kë kanfëluŋ kawun pa ŋnuur paaj. Unuur uţënk paaj na uloŋ Nawat Kabuka aduuna Moyiŧ du pŧoof pi kanfëluŋ.

¹⁷ Ţi bañaaŋ biki Iŧrayel mndëm mi Nawat Kabuka manwo wo ji bdoo bweek ţi pnkuŋ duuţ.

¹⁸ Moyiŧ aneej ţuŋ kanfëluŋ, apayaara paya, aya aţo da ŋnuur iñeen ŋbaakër na ŋŧejan iñeen ŋbaakër