Ppën 22 - Mankanya

¹ Naşibaţi akak aji : « Woli bawin nakiij kë awo ţi pluŋan uniw, aşë koba kë akeţi, ankobuluŋ aankduknaana ţi uko wi afiŋuluŋ.

² Kë woli mënţ na uŧejan wa, ankobuluŋ afiŋ aduknaana ţi uko wi afiŋuluŋ. Nakiij awo i kakakan uko wi ajejuŋ, woli aanka uko ukakan bawaapa kahilna kakakan uko wi ajejuŋ.

³ Woli uko wi akiijuŋ, uwo uwit, ubuuru këme unŧaam umpoţi, awinana ahum ţi iñen yi nul abot awo ujeb, akakan unŧaam wi akiijuŋ ŋyaaş ŋtëb. »

Pjuban pangakandëruŋ na baluk

⁴ « Woli ñaaŋ ado ŋnŧaam ŋi nul kë ŋafeer uţeeh këme uwoorta wi mnko mndolni ubiñu wi ñaaŋ, aluk ajug dko mënţ uko unliŋuŋ na uko unfeeraniiŋ. Uko mënţ ajejna wa ţi uţeehul këme uwoorta wi nul unnuurnaaniiŋ.

⁵ « Woli bdoo banaţaa, kë kajaagal kaŧehi aya tër ŋdeey ŋi bakituŋ, ŋampënuŋ këme ŋanhojuŋ du uţeeh wi ñaaŋ, andoluŋ bdoo mënţ aluk uko unyikuŋ.

⁶ « Woli ñaaŋ awul aŧënţul uko wi phankan, iko yi baţaknuŋ unŧaam këme iko iloŋ, kë başë bi kiij ya du katohul, woli nakiij awinanaa, aluk uko wi akiijuŋ ŋyaaş ŋtëb.

⁷ Aşale wo aanwinanaa, i bahankanuŋ añog du Naşibaţi kadiiman kë aanţu kañen ţi iko yi bahankanuluŋ.

⁸ Woli bañaaŋ batëb baŋomna uwit, ubuuru, upi këme unkaneel, kamişa këme uko uloŋ kak unneemuŋ, kë bukal batëb bŧi başë pok aji : “Dyikrën ka, kul ka”, bañooţ baka du kadun ki Naşibaţi. Ñaaŋ i Naşibaţi akjakuŋ aduknaanaa, aluk aŧënţul ŋyaaş ŋtëb uko wi bakŋomnuŋ.

⁹ « Woli ñaaŋ awul batanan aŧënţul ubuuru, uwit, upi, unkaneel, këme unŧaam uloŋ kak, kë uşë ya keţ, akita kahoţ këme akiijana kë aloŋ aammaar maar da,

¹⁰ i bawuluŋ batanan amehna ţi kadun ki Yawe Nawat Kabuka kadiiman kë aanţu kañen ţi unŧaam. Ajug unŧaam adinan pmehna pi aŧënţul, undu aşë wo aankluk nin uko uloŋ.

¹¹ Kë unŧaam unkiijaniiŋ, woli bakiij wa kë i bawuluŋ wa batanan awo da, uŋ mënţ aluk wa.

¹² Woli uko wi uţeeh ufiŋuŋ wa, añooţ unŧaam unkeţuŋ kaşë kawo aankluk.

¹³ « Woli ñaaŋ aţeeţ aŧënţul unŧaam, kë uşë ya kita kahoţ këme akeţ ţi kafeţ ki anţeeţanuŋ wa, anţeeţuŋ awo i kaluk.

¹⁴ Kë woli ţi kadun ki nul ka, undu aankluk. Woli ajug unŧaam aji wul wul wa uya ulemp kaşë luka, ayeenk baluk mënţ ţañ.

¹⁵ « Woli ñaaŋ ala napoţ ñaaţ anwooŋ aando bi me biinţ abot awo aanjokanaa, aşë piinţ na a, aluk uko wi bajaaŋ batanna bniim kaşë kaniima.

¹⁶ Woli aşin poonu apok pwula a aniim, aluk itaka inliŋuŋ na yi baţuuŋ pa baaţ banwooŋ baando bi me biinţ. »

Iko yi pţaş

¹⁷ « Iinkwut ñaaţ nado dayaamu awo najeb.

¹⁸ « Ankpiinţuŋ na unŧaam, bawo i kafiŋa.

¹⁹ « Ankdoluŋ bţeŋan pa aloŋ nampaţi bë mënţ Yawe Nawat Kabuka a, bawo i kafiŋa.

²⁰ « Iinkŋotna nayaanţ këme kahajana, naleşan kë an ţi ŋleefan, nabi wo bayaanţ du uŧaak wi Ejiptu.

²¹ « Nawutan kaŋotna ñaaţ nayoţ, këme napoţ anwaaŋuŋ aşin.

²² Woli naŋotna aloŋ ţi baka, kë awooni adu'ën, kaŧiink pdiim pi nul ;

²³ udeeb wi naan ujotnan, ddo bafiŋan na kej baharan bakak bayoţ, babukan bawaaŋ başin baka.

²⁴ « Woli iţeeţan ñaaŋ i pntaali pi naan, nawaaŋ anwooŋ na iwi, kdo kado ji banjaaŋ baţeeţan, itaka yi iţeeţanuluŋ yul yi akkakaniiŋ nin iinkbuk uko uloŋ.

²⁵ Woli ñaaŋ aţeeţu kë işë yeenk umanta wi nul ugurada amëban, unuur ujotle kkakana wa.

²⁶ Wul ţañ uwooŋ kako kagurada ki nul. Apiinţle we wi akţuuŋ ţi uleef ? Adole pdiim adu'ën, kaŧiinka, ţiki nji dji kañaga.

²⁷ « Iinkkar Naşibaţi abot awo iinkñehandër naşih i uŧaaku buţaan.

²⁸ « Klutan pwul Naşibaţi iko iŧeek yi uţeehu na yi uwoorta wi nu. Napoţ ñiinţ naŧeek ţi babuku iwulën a.

²⁹ Ido haŋ kak na ŋnŧaam ŋi nu bŧi. Umpoţi uţo ŋnuur paaj na uloŋ na unin wa, unuur uţënk bakreŋ iwulën wa.

³⁰ « Nawo pa nji bañaaŋ bayimanaan, ukaaŋ kë naankde uyemaţ wi unŧaam wi uko wi uţeeh ufiŋuŋ, nafëlan ŋbuş uyemaţ mënţ. »